Read Northwest Gbaya LUK 9 Bible Online

LUK 9 - Northwest Gbaya bible

LUK 9

¹Jesu mɔi̧a o ŋgaiwi kɔ‘i ɓu-zua-yiitoo, ɓɛɛ sur wa ha̧ wa mɛ kpa ŋgai zu o ɗaŋ-sɔ̧ in ha̧ wa mɛ kpasi o wi-zɛɛ mbɛt.

²A̧ toma wa mɛ tɔ̧ wen Wan ko Sɔ̧ in ha̧ wa mɛ kpasi o wi-zɛɛ.

³Ɓɛɛ a̧ tɔ̧ ha̧ wa: «K’ɛ́nɛ́ ba ŋma mɔ er'nɛ́ wen yuwar na, kóó dɔra, kóó ŋgoɓo, kóó brɛt in sede na; ká bíí kpɔk kai laa yiitoo na mbɛt.

⁴K’ɛ̀nɛ̀ zir kɔ̧́ ŋma tua, ɓɛɛ ɛ̀nɛ̀ ɔ́ kànà ɓɔn kɔ̧̀ kpɔk tua'i hɔ wese n’ɛnɛ tɛ kur yak.

⁵Ɓɛɛ kà o bíí kpɛk'nɛ́ tɛ ŋma saaye na, tɛ̀ kura-a k’ɛ́nɛ́ saaye'i, ɛ̀nɛ̀ mgbɔ́ fuunu naŋ‘nɛ́ a nù fara'i: mɔ‘i tɛ duk nɛ́ mɔɔ sedaako yí-wa.»

⁶Nɛ́ mɔ'ɔ nɛ̀ o ŋgaiwi nɔ‘i ɓu-zua-yiitoo'i yaka, ɓɛɛ pɛsi dam tɛ o ye tɔ̧ nɛ̀ De Mbe Wen nɛnɛ, kpasi nɛ̀ o wi-zɛɛ dam fara lɛŋ.

⁷Wannu Herod zia nyɛrɛmɔ lɛŋ nɛ̀ yaka ɓɛɛ a̧ sakali, wen o ŋma bíí duka so tɔ̧‘e: «Jean kura mgbara o fio,»

⁸ɓɛɛ o ŋma mbɛt'e: «Elii pia ɗoŋ,» o ŋma mbɛt tɔ̧ɔ̧ woyo'e: «Ŋma wi-tɔ̧-wen oi nú Sɔ̧ nɛ̀ duka so ɓeemɛ kpasa.»

⁹Ɓɛɛ Herod tɔ̧: «Mi bàá ɓir so zu Jean yinɛ kaɗi, ɓɛɛ wi n'am zii nyɛrɛmɔ kɔ̧-a̧ hegɔ woyo’ɛ nɛ́ o nde?» Ɓɛɛ Herod kii war mɛ zɔk wi’ɛi.

¹⁰O betom ko Jesu pia ɗoŋ, ɓɛɛ wa we ɗoŋ mɔ lɛŋ nɛ̀ wa dea ha̧ a̧, ɓɛɛ a̧ mgbɔ wa yaknɛ si sɛn ká̧ ŋma ye nɛ̀‘i sa'e Bɛtsaida.

¹¹Giiwi iŋa yaka-a ko Jesu, ɓɛɛ wa nɛ́ ɗoŋ a̧. A̧ kpɛka wa nɛ̀ de-a, tɔ̧ nɛ́ wen Wan ko Sɔ̧ ha̧ wa, ɓɛɛ a̧ kpasi o wi-zɛɛ mbɛt.

¹²Mbóè ga̧a̧ kaɗi, ɓɛɛ o ŋgaiwi ɓu-zua-yiitoo ɗɔli si katɛ a̧, ɓɛɛ wa tɔ̧ ha̧ a̧: «Ɛ̀nɛ̀ fó o giiwi sinɛ si saaye in o be ye ká̧ fara’ɛ wen ha̧ wa mɛ kpa tua-ɔ-sɛnɛ in ha̧ wa mɛ kpa nyɔŋmɔ mbɛt, wen fara n’ɛɛ duk sɛnɛ'ɛ nɛ́ géé zaŋbɛɛ.»

¹³Jesu kifa nú ha̧ wa: «Ɛ́nɛ́ nɛ̀ tɛ̀‘nɛ́, ɛ̀nɛ̀ há̧ nyɔŋmɔ ha̧ wa.» Wa kifa nú: «Ɛɛ a̧a̧ nɛ̀ brɛt mɔɔrɔ in zoro yiitoo ɓɛɛ, kóó ɛ́ɛ́ tɛ hi̧fi nɛ́ nyɔŋmɔ wen wa lɛŋ nde?»

¹⁴Wen o wiwii nɛ̀ yaa so hi̧i̧ duka so hee booro-mɔɔrɔ ga. Ɓɛɛ Jesu tɔ̧ ha̧ o ŋgaiwi kɔ‘i: «Ɛ̀nɛ̀ dé ha̧ wa mɛ ya nù, dùk-aa ɓu-mɔɔrɔ, ɓu-mɔɔrɔ.»

¹⁵Wa dee hee mɔ‘i ga ɓɛɛ o bíí lɛŋ ya nù.

¹⁶Ɓɛɛ Jesu kai brɛt mɔɔrɔ in zoro yiitoo'i, ɓer yí si yiwese, de osoko ha̧ Sɔ̧, ɓɛɛ gbin ha̧ o ŋgaiwi kɔ‘i mɛ kɛ̧ nɛ̀ o giiwi.

¹⁷Bíí lɛŋ nyɔŋa mɔ zaŋ sur, ɓɛɛ wa ndɛm oi-aa nɛ̀ ɓɔna dun gɛsɛ ɓu-zua-yiitoo.

¹⁸Ŋma wese Jesu duka kɔfi nɛ̀ Sɔ̧ nɛ̀ nyɛi̧a-a tikiɗi; ká o ŋgaiwi kɔ̧-a̧ a̧a̧ so in a̧ mbɛt, ɓɛɛ a̧ ak wa: «Tɛ́ wen nɛ̀ o bíí tɔ̧'ɛ; mi nɛ́ o?»

¹⁹Wa kifa nú: «O bíí‘e, ɛnɛ nɛ́ Jean Zui-bíí; o ŋma'e, ɛnɛ nɛ́ Elii, ɓɛɛ o ŋma'e ndé, ɛnɛ nɛ́ ŋma wi-tɔ̧-wen oi nú Sɔ̧ nɛ̀ duka so ɓeemɛ nɛ̀ kpasa.»

²⁰Ɓɛɛ a̧ ak wa: «Ɓɛɛ nɛ̀ k’ɛ́nɛ́, ɛnɛ tɔ̧ k’ɛ́nɛ́‘e mi nɛ́ o?» Pierre kifa nú: «Ɛnɛ nɛ́ Mɛsii nɛ̀ Sɔ̧ toma tɛnɛ.»

²¹Ɓɛɛ Jesu mbo nú-wa nɛ̀ ŋgaya-a wen ká wa tɛɛ tɔ̧ wen'i ha̧ ŋma bíí.

²²A̧ tɔ̧ɔ̧ ha̧ wa: «Bem ko bíí tɛ zɔk kànà bɔnɛ nɛ̀ dɔka-a; o gasawi, o gasa wan-ɗafi-sɔ̧ in o wi-usi-heembea tɛ bɛ̧ a̧, o bíí tɛ gbɛ a̧, ɓɛɛ ɗoŋ zɛ taar, a̧ kpasa tɛ fio.»

²³Ɓɛɛ a̧ tɔ̧ ha̧ wa lɛŋ: «Wi nɛ̀ kɔ̧ɔ̧ mɛ tɛ ɗoŋ am, a̧ a̧ é tɛ-a tɛ geemɔ, a̧ a̧ túí te-diŋa kɔ̧-a̧ wese lɛŋ, ɓɛɛ a̧ a̧ tɛ́ ɗoŋ am.

²⁴Wen wi nɛ̀ kɔ̧ɔ̧ mɛ duk kpasa tɛ fe, ɓɛɛ wi nɛ̀ tɛ fe wen zu'm, tɛ kpasi.

²⁵Kà ŋma bíí yɔ tɛ-a, kóó kà̧ a̧ ɗaŋ duka-a kɔ̧-a̧ mɛ kpa mɔɔ-zaŋnu lɛŋ, kpaamɔ kɔ̧-a̧‘i tɛ gbak a̧ tɛ ge mɔ ge?

²⁶Wen wi nɛ̀ tɛ de foe wen am in wen wen kɔ‘m, Bem ko bíí mbɛt tɛ de foe wen-aa, ŋgimbi n'aa tɛ tɛ zaŋ gasamɔ kɔ̧-a̧, in ko Dáà kɔ̧-a̧, ká bá nɛ̀ ko o sa̧a̧ betom mɛ yiwese mbɛt.

²⁷Nɛ́ kpasawen a̧‘m tɔ̧ h’ɛ́nɛ́, o ŋma bíí a̧a̧ mgbara'nɛ́ hɛ̧ɛ̧ nɛ̀ beka fe na hɔ ŋgimbi nɛ̀ wa tɛ zɔk Wan ko Sɔ̧ sɛ́.»

²⁸Dee hee zɛ mɔɔrɔ-ɗoŋ-taar ɗoŋ tɔ̧ɔ̧-wen ko Jesu ga, ɓɛɛ a̧ mgbɔ Pierre, Jean in Jak nɛnɛ in a̧, a̧ daŋa zu kaya mɛ kɔfi Sɔ̧.

²⁹Ŋgimbi n'aa duk kɔfi nɛ̀ Sɔ̧, saŋa-yí-a kpaia, ɓɛɛ laa kɔ̧-a̧ kifi nɛ̀ bu-a kpúŋ-kpúŋ.

³⁰Kà wa zɔk wó, bíí yiitoo nɛ́ mɔ'ɔ nɛ̀ ya tɔ̧ nɛ̀ wen in a̧'ɛ; duka so nɛ́ Moisɛ in Elii.

³¹Wa usa tɛ-wa tɛ gasamɔ, tɔ̧ nɛ̀ wen fio nɛ̀ Jesu tɛ fe sɛn Jerusalɛm.

³²Pierre in o gbama-yari kɔ‘i tika so yá gbéyéŋ, ɓɛɛ tɛ tuna-a kɔ-wa, wa zɔka gasamɔ ko Jesu in o bíí yiitoo nɛ̀ yor in a̧.

³³Ɓɛɛ hee mɔ'ɔ nɛ̀ o bíí nɔ‘i yiitoo'i de mɛ e Jesu duk mɛ yak ga, Pierre tɔ̧ɔ̧ ha̧ Jesu: «Wan-usi-mɔ, daden n’ɛɛ a̧a̧ hɛ̧ɛ̧. Ɛ̀ɛ̀ dé gbaksak taar sɛn hɛ̧ɛ̧, k’ɛ́nɛ́ kpɔk, ko Moisɛ kpɔk, ko Elii kpɔk.» Ɓɛɛ a̧ iŋ zu wen'i n'aa tɔ̧a̧‘i na.

³⁴Nú-a tɛ zɔm tɛ wen'i na, ɓɛɛ bu-zan tɛ́ɛ̀ kpe zu wa. Kíì dee wa nyɛmna ŋgimbi nɛ̀ bu-zan kpee nɛ̀ zu wa'i.

³⁵Ɓɛɛ ŋma tiger tɔ̧ wen nɛ̀ tɛ bu-zan mɛ tɛnɛ‘e nde: «Wi’ɛ nɛ́ bem kɔ‘m n'am hoka; ɛ̀nɛ̀ zíí wen nú-a.»

³⁶Ŋgimbi nɛ̀ tiger tɔ̧ nɛ̀ wen'i, ká nɛ́ Jesu a̧ yor ɛ̀nɛ̀; o ŋgaiwi ko Jesu yaa nɛ̀ oi nú, ɓɛɛ wa we ɗoŋ mɔ nɛ wa zɔka'i ha̧ ŋma bíí tɛ ŋgimbi'i na kóó tikiɗi.

³⁷Mɛ́ bin, hee mɔ'ɔ nɛ̀ Jesu in o ŋgaiwi kɔ‘i biti zira-a nɛ̀ zu kaya ga, o bíí nɛ̀ dɔka-a wee ti a̧.

³⁸Ɓɛɛ ŋma bíí mgbara wa ku̧ naŋ hiɗa mɔ, «Wan-usi-mɔ, mi ai nú h’ɛ́nɛ́, ɛ̀nɛ̀ gír yí‘nɛ́ sitɛ bem kɔ‘m, wen a̧ nɛ́ kpɔk bem.

³⁹Ɗaŋ-sɔ̧ zar nɛ́ a̧; kà̧ a̧ híɗí mɔ war kpɔk, ɓɛɛ zara a̧ pi̧ nù, ɓɛɛ gba woo gboo nɛ̀ kɔ̧̀ nú-a; nɛ́ bɔnɛ bɔnɛ sɛka ɗaŋ-sɔ̧‘i ee a̧ duk, ɓɛɛ oi-aa, a̧ ɔ nù hee fio ga.

⁴⁰Mi aia nú ha̧ o ŋgaiwi k’ɛ́nɛ́ mɛ ndak ɗaŋ-sɔ̧‘i, ɓɛɛ wa nyɛm ndaka a̧ na.»

⁴¹Ɓɛɛ Jesu tɔ̧: «Ɛ́nɛ́ o ɗaŋ tugun bíí nɔ'ɔ nɛ̀ bo nɛ̀ kɔ̧ɔ̧ɗɔɔwen na’ɛ! Mi tɛ duk in'nɛ̀ɛ̀ hɔ tɛ ge ŋgimbi ge? Mi tɛ nɔ ŋgiɗi tɛ mɔ k’ɛ́nɛ́ hɔ ge ŋgimbi ge? Mɛ̀ mgbɔ́ bem kɔ-mɛ‘i tɛnɛ.»

⁴²Bem’ɛi biti tɛa-a, ɓɛɛ ɗaŋ-sɔ̧-doe'i zar a̧ pi̧ nù nak nɛnɛ ɗik ɗik, ɓɛɛ Jesu de ŋmaa in ɗaŋ-sɔ̧‘i. A̧ kpasa bem’ɛi, ɓɛɛ ha̧ a̧ siɗoŋ ha̧ dáà kɔ̧-a̧.

⁴³Ɓɛɛ ɗɛɗɛ-wa lɛŋ gɔn wen ŋgayamɔ ko Sɔ̧ nɛ̀ ɔ gasa. Ɗɛɗɛ bíí lɛŋ gɔna wen mɔ nɛ̀ Jesu dea, ɓɛɛ a̧ tɔ̧ ha̧ o ŋgaiwi kɔ̧-a̧:

⁴⁴«Ɛ̀nɛ̀ kásí wen n'am tɛ tɔ̧ h’ɛ́nɛ́'ɛ nɛ̀ de-a. Bem ko bíí tɛ ye er o bíí.»

⁴⁵Ɓɛɛ wa zii mgbara wen'i na. Wen'i ɔ ɗuka wen ká wa tɛɛ iŋ mgbara-a, ɓɛɛ wa yu aka a̧ zu mɔ‘i.

⁴⁶Ɓɛɛ ŋma akamɔ hɔ zu-wa'e: o nɛ gasawi mgbara wa o?

⁴⁷Jesu iŋa aka ŋmaa nɛ̀ wa ak'i, ɓɛɛ ba ŋma geɗek bem e ká̧ tɛ,

⁴⁸ɓɛɛ tɔ̧ ha̧ wa: «Wi nɛ̀ kpɛk geɗek bem’ɛ nɛ̀ nin-am, kpɛk nɛ‘m, ɓɛɛ wi nɛ̀ kpɛk am, kpɛk nɛ́ wi nɛ̀ toma'm tɛnɛ; wen wi nɛ̀ duk nɛ̀ geɗek-a mgbara'nɛ́ lɛŋ, nɛ́ wi’ɛi a̧ duk nɛ́ gasawi.»

⁴⁹Ɓɛɛ Jean tɔ̧: «Wan-usi-mɔ, ɛ́ɛ́ zɔka ŋma bíí nɛ̀ ndak nɛ́ ɗaŋ-sɔ̧ yinɛ nɛ̀ nin'nɛ́. Ɛ́ɛ́ kɔ̧ɔ̧ so mɛ dor a̧ wen a̧ nɛ́ ɗoŋ‘nɛ́ in yɛ̀ɛ̀ na.»

⁵⁰Ɓɛɛ Jesu tɔ̧ ha̧ a̧: «K’ɛ́nɛ́ dor a̧ na; wi nɛ̀ sɛn'nɛ́ na, nɛ́ bíí k’ɛ́nɛ́.»

⁵¹Hee mɔ'ɔ nɛ̀ ŋgimbi hɛɗa ha̧ Jesu mɛ e zaŋnu duk ga, a̧ nɔɔ ŋgiɗi mɛ daŋ si Jerusalɛm.

⁵²Ɓɛɛ a̧ tom o ŋma betom yak ti. Nɛ́ mɔ'ɔ nɛ̀ o betom nɔ‘i yaka, ɓɛɛ wa hɔ sɛn ŋma ye nú Samarii, wen ha̧ wa mɛ ɗafi mɔ lɛŋ zɛm nɛ̀ a̧.

⁵³Ɓɛɛ o bíí kpɛk a̧ na wen n'aa nɛ́ si sɛn Jerusalɛm.

⁵⁴O ŋgaiwi ko Jesu, Jak in Jean zɔka hegɔ, ɓɛɛ wa tɔ̧ ha̧ Jesu: «Gasa Wan, ɛ́nɛ́ kɔ̧ɔ̧ ɛɛ sa wee mɛ yiwese mɛ tɛnɛ ha̧ dɔ wa gbuɗuk a̧ nù nde?»

⁵⁵Jesu zika tɛ, gai wa,

⁵⁶ɓɛɛ wa yak si ŋma mbe ye.

⁵⁷Wa ɓɔna yuwar, ɓɛɛ ŋma bíí tɔ̧ ha̧ Jesu: «Fara n’ɛnɛ tɛ nɛ̀ lɛŋ, mi tɛ nɛ̀ in'nɛ̀ɛ́.»

⁵⁸Jesu kifa nú ha̧ a̧: «O gba-toyo a̧a̧ nɛ̀ gbamgba mɛ ɔ sɛnɛ, o nɔ̧́í̧ a̧a̧ nɛ̀ yáá kɔ‘i mbɛt, ɓɛɛ Bem ko bíí bó nɛ̀ géé fara-e-zu na.»

⁵⁹Nɛ́ mɔ'ɔ n'aa tɔ̧ɔ̧ ha̧ ŋma bíí: «Mɛ̀ tɛ́ ɗoŋ am,» ɓɛɛ wi’ɛi kifi nú: «Gasa Wan, ɛ̀nɛ̀ é ha̧‘m nɛ́ɛ̀ gun dáà kɔ‘m sɛ́.»

⁶⁰Ɓɛɛ Jesu kifi nú ha̧ a̧: «Mɛ̀ é ha̧ o fio a̧ gún fio kɔ‘i, ɓɛɛ nɛ̀ kɔ-mɛ, mɛ̀ nɛ́ɛ̀ tɔ̧ wen Wan ko Sɔ̧ yaknɛ.»

⁶¹Ŋma bíí woyo tɔ̧ɔ̧ ha̧ Jesu: «Gasa Wan, mi tɛ nɛ̀ ɗoŋ‘nɛ́, ɓɛɛ ɛ̀nɛ̀ e ha̧‘m nɛ́ɛ̀ war o bíí kɔ‘m sɛ́.»

⁶²Jesu kifa nú ha̧ a̧: «Wi nɛ̀ wa fɔ, ɓɛɛ zika tɛ zɔk mɔ si ɗoŋ, nyɛm wen Wan ko Sɔ̧ na.»