Read Northwest Gbaya WEE-ƊOŊ-HEEMBEA 1 Bible Online

WEE-ƊOŊ-HEEMBEA 1 - Northwest Gbaya bible

WEE-ƊOŊ-HEEMBEA 1

¹Wen nɛ Moisɛ tɔ̧ɔ̧ ha̧ o be Israɛl sɛn kur Jurdɛn sɛn ŋga-gbárà kɔ̧ ɗɔŋgɔ Araba, tan nɛ ye Suf, mgbara Paraŋ, Tofɛl, Labaŋ, Haserot in Di-Zahad nɛ mɔ'ɔ.

²(Ka'i kur sɛn Hɔrɛb nɛ yuwar nɛ ɓir nɛ zaŋ kaya Sɛir, wi ɔ zɛ ɓu-zua-kpɔk sɛka'i hɔɔ sɛn Kadɛs-Barnɛa.)

³Tɛ ɓu-naar pɛ tɛ kuti ɔɔ-zɛ zaŋ ɓu-zua-kpɔk fio-zɛ, Moisɛ wee ɗoŋ mɔ ha̧ o be Israɛl, hee mɔ'ɔ nɛ GASA WAN baa tɔ̧ so ha̧ a̧ nɛti ga.

⁴Moisɛ wee ɗoŋ Heembea ha̧ wa ɗoŋ nɛ wa bìí nɛ Sihɔŋ wannu ko o be Amɔr nɛ ɔ so sɛn Hɛsbɔŋ, in Og wannu Basaŋ nɛ ɔ so kɔ‘i sɛn Astarot. Wa bìí a̧ sɛn Edrɛi. Moisɛ wee ɗoŋ Heembea ha̧ wa sɛn kur Jurdɛn nu Mɔab.

⁶A̧ tɔ̧a̧: «GASA WAN Sɔ̧ k’ɛɛ tɔ̧ɔ̧ wen h’ɛ́ɛ́ sɛn Hɔrɛb'e: ‹Zɛ‘nɛ́ dɔka zu kaya’ɛ kaɗi.

⁷Ɛ̀nɛ̀ kúr, ɛ̀nɛ̀ yák si zu kaya ko o be Amɔr in sitɛ o wi nɛ ɔ zik wa, sɛn Araba, sɛn mgbara kaya, sɛn bɔkɔ-nù, sɛn mgbara Nɛgɛb, in ká̧ gasa nana-yì. Ɛ̀nɛ̀ nɛ́ɛ̀ bá nú Kanaŋ ba nɛ Libaŋ hɔ nɛnɛ ká̧ nana-yì Efrat.

⁸Ɛ̀nɛ̀ zɔk, nù n'am ha̧a̧ h’ɛ́nɛ́ nɛ mɔ‘i. Ɛ̀nɛ̀ nɛ́ɛ̀ bá nù nɛ Sɔ̧ kana so mɔ mɛ ha̧ ha̧ o zɔmdáa k’ɛ́nɛ́ Abraham, Izak in Jakob in o bezaŋ wa mɛ ɗoŋ.›

⁹«Mi tɔ̧ɔ̧ so h’ɛ́nɛ́, mi nyɛm mɛ mgbɔ‘nɛ́ ɛ̀n’ám na,

¹⁰wen GASA WAN Sɔ̧ k’ɛ́nɛ́ dee so h’ɛ́nɛ́ mɛ dɔk hee o sɔra yiwese ga.

¹¹Mi tɔ̧ɔ̧ so'e GASA WAN Sɔ̧ ko o dáà k’ɛ́nɛ́ a̧ de h’ɛ́nɛ́ mɛ nyɛɓi siti war booro, ɓɛɛ a̧ a̧ ha̧ de sɔnti h’ɛ́nɛ́ hee mɔ'ɔ n'aa tɔ̧ɔ̧ so ga.

¹²Mi tɛ̀ɛ́ tui so o kiri k’ɛ́nɛ́, o akamɔ k’ɛ́nɛ́ in o sii-kafɛ k’ɛ́nɛ́ ɛ̀n’ám hee ge nde?

¹³Mi tɔ̧a̧, tɛ o zuduk k’ɛ́nɛ́, ɛ̀nɛ̀ hók o wi-iŋ-mgbara-mɔ, o wi-iŋ-mɔ nɛ iŋa tom nɛ de-a, sɛn mgbara dukbíí k’ɛ́nɛ́, ha̧‘m mɛ e wa nɛ wan zu'nɛ́.

¹⁴Ɛnɛ kifa so nú ha̧‘m'e, wen n'am tɔ̧a̧‘i nɛ de wen.

¹⁵Hegɔ mi kaia o wi-gɔn-kita tɛ zuduk k’ɛ́nɛ́, o wi-iŋ-mgbara-mɔ nɛ wen-tɛ-wa ɔ dee, ɓɛɛ mi e wa zu'nɛ́. O wi-ya-zu o bíí booro, ɓu-mɔɔrɔ, in zu o bíí ɓu; ɓɛɛ mi a o ŋma bíí nɛ o kapita mgbara o zuduk k’ɛ́nɛ́.

¹⁶«Mi ha̧a̧ nú ha̧ o wi-gɔn-kita nɔ‘i, wa a̧ zii wen ko o nya-wa, ɓɛɛ wa a̧ gɔn kita nɛ yuwar-a mgbara o bíí in o nya-wa, mgbara o bíí in o gɛnɛ nɛ ɔ mgbara wa mbɛt.

¹⁷Wa beka ye ɗoŋ bíí tɛ gɔna-kita na; wa tɛ zii wen ko geɗek bíí hee ko gasawi ga mbɛt. Wa beka yu kíí bíí na, wen gɔna-kita tɛ nɛ̀ tɛ Sɔ̧. Kà ŋma wen ŋgai gán wa, ɓɛɛ wa a̧ ba pii tɛ‘m, ɓɛɛ mi tɛ zii mgbara-a.

¹⁸Nɛ́ hegɔ a̧‘m ha̧a̧ nɛ nú h’ɛ́nɛ́ zu mɔ lɛŋ n’ɛnɛ tɛ de.»

¹⁹«Ɛɛ kura sɛn Hɔrɛb, ɓɛɛ ɛɛ ɓir nɛ gasa ŋga-gbárà n’ɛnɛ zɔka'i; ɛɛ baa nɛ yuwar si zu kaya ko o be Amɔr hee mɔ'ɔ nɛ GASA WAN Sɔ̧ k’ɛɛ baa tɔ̧ so h’ɛ́ɛ́ ga, ɓɛɛ ɛɛ hɔ sɛn Kadɛs-Barnɛa.

²⁰Mi tɔ̧ɔ̧ so h’ɛ́nɛ́‘e ɛnɛ hɔɔ sɛn zu kaya ko o be Amɔr nɛ GASA WAN Sɔ̧ k’ɛɛ ha̧a̧ so h’ɛ́ɛ́.

²¹Mi tɔ̧a̧: ‹GASA WAN Sɔ̧ k’ɛ́nɛ́ ha̧a̧ nù'ɛ h’ɛ́nɛ́. Ɛ̀nɛ̀ dáŋ mɛ́ nɛ̀ɛ́ ba nù‘i hee mɔ'ɔ nɛ GASA WAN Sɔ̧ ko o dáà k’ɛ́nɛ́ baa ha̧ so nú h’ɛ́nɛ́ ga. Ká kíì de'nɛ́ na, k’ɛ́nɛ́ de zɛŋ nɛ tɛ‘nɛ́ na mbɛt.›

²²«Ɛnɛ tɛɛ pii tɛ‘m lɛŋ, ɓɛɛ ɛnɛ tɔ̧ ha̧‘m: ‹Ɛ̀ɛ̀ tóm o wi-kpe-naŋ-mɔ mɛ nɛɛ zɔk nù‘i, wa tɛ tɔ̧ yuwar n’ɛɛ tɛ nɛ nɛnɛ in o ye n’ɛɛ tɛ nɛ si sɛnɛ h’ɛ́ɛ́ mbɛt.›

²³«Mɔ‘i dee tɛ‘m, ɓɛɛ mi hok bíí kpɔk kpɔk mgbara'nɛ́ dam nɛ zuduk ɓu-zua-yiitoo lɛŋ.

²⁴Wa yaka, wa daŋa kaya ɓɛɛ wa zir si kɔ̧ ɗɔŋgɔ Ɛskɔl, ɓɛɛ wa yar dam sɛnɛ.

²⁵Wa kaia o waya-te nù‘i piinɛ usi h’ɛ́ɛ́, ɓɛɛ wa tɔ̧ mɔ nɛ wa zɔka h’ɛ́ɛ́. Wa tɔ̧a̧, nɛ́ de nù nyɛmna a̧ GASA WAN Sɔ̧ k’ɛɛ ha̧a̧ h’ɛ́ɛ́.

²⁶«Ɛnɛ bɛ̧ɛ̧ daŋa-a sitɛ nù‘i, ɛnɛ dee ŋgazu in GASA WAN Sɔ̧ k’ɛ́nɛ́;

²⁷ɛnɛ ku̧i̧a mɔ ká̧ tua-laa[1] k’ɛ́nɛ́ tɔ̧ nɛnɛ: ‹Mɛ̀ nɛ́ wen nɛ Sɔ̧ sɛna yɛ sa a̧ gboo ɛɛ nɛ nú Egiptɛ ha̧ o be Amɔr mɛ kum yɛ.

²⁸Ɛ̀ɛ̀ dáŋ bɔɔ si déè? O nya yɛ gbina gba̧a̧ tɛ-ɛɛ tɔ̧ nɛnɛ‘e, wa nɛ o bíí nɛ ɔ dɔka, nɛ ŋgaia gan yɛ mbɛt. Wa mbo nɛ o garo zik o ye kɔ-wa e yiwese mɛ. Ɛɛ zɔka o bezaŋ Anak hi̧i̧ mbɛt.›

²⁹«Mi tɔ̧ɔ̧ h’ɛ́nɛ́: ‹Ká tɛ‘nɛ́ nak na, k’ɛ́nɛ́ yu wa na,

³⁰GASA WAN Sɔ̧ k’ɛ́nɛ́ nɛ̀ yak ti h’ɛ́nɛ́‘i tɛ bi biro wen zu'nɛ́, hee mɔ'ɔ n'aa dee so sɛn Egiptɛ nɛ yí‘nɛ́ ga.

³¹Ɛnɛ zɔka a̧ mbɛt sɛn ŋga-gbárà. GASA WAN Sɔ̧ k’ɛ́nɛ́ tuia'nɛ́ hee mɔ'ɔ nɛ ŋma bíí tui nɛ bem kɔ‘i ga tɛ yuwar n’ɛnɛ baa hɔ nɛnɛ sɛn fara’ɛ.›

³²Ɓɛɛ tɛ mɔɔ nɔ‘i lɛŋ, ɛ́nɛ́ e ta nɛ GASA WAN Sɔ̧ k’ɛ́nɛ́ na.

³³Nɛ a̧ a̧ duka ti h’ɛ́nɛ́ mɛ zɛ mɛ usi war h’ɛ́nɛ́ in tɛ tura-zan mɛ wese usi nɛ war h’ɛ́nɛ́ mbɛt.»

³⁴«Sɔ̧ zia aia-nú k’ɛ́nɛ́, ɓɛɛ a̧ kan mɔ nɛ nyimsea'e:

³⁵‹Ŋma bíí kpɔk mgbara o ɗaŋwi nɔ'ɔ beka zɔk de nù n'am kana so mɔ mɛ ha̧ ha̧ o dáà kɔ-wa na;

³⁶kànà nɛ Kalɛb bem ko Yefunɛ in o bem kɔ‘i a̧ tɛ zɔk nù‘i. Mi tɛ ha̧ nù n'aa i̧sa'i ha̧ wa wen a̧ mboo zu nɛ see kpɔk tɛ wen ko GASA WAN.›

³⁷See Sɔ̧ ɗaŋa in am mbɛt wen zu'nɛ́, ɓɛɛ a̧ tɔ̧: ‹Kóó nɛ́ mɛ mbɛt, mɛ beka hɔ tɛ nù‘i na.

³⁸Nɛ́ Josue, bem ko Nun, wi-gbak-am a̧ tɛ hɔ hi̧i̧. Mɛ̀ há̧ ŋgai ha̧ a̧, wen mɛ nɛ a̧ a̧ tɛ yor ɗoŋ o be Israɛl ha̧ wa mɛ ba nù‘i.›

³⁹«O bem n’ɛnɛ tɔ̧ɔ̧ so'e o bíí tɛ kai wa nɛ bara-biro, be geɗek bem k’ɛ́nɛ́ nɛ tɛ iŋ so kɛ̧ɛ̧ mgbara demɔ in ɗaŋmɔ na, nɛ́ wa a̧ tɛ ye nù‘i. Mi tɛ ha̧ nù‘i ha̧ wa nɛ kɔ-wa.

⁴⁰Ɓɛɛ nɛ k’ɛ́nɛ́, ɛ̀nɛ̀ zík tɛ‘nɛ́ wen sii ɗoŋ woyo si ŋga-gbárà si yuwar Gbɛ̧ gba-tɔp.

⁴¹«Ɛnɛ kifa nú ha̧‘m: ‹Ɛɛ dee ɗaŋmɔ ti GASA WAN. Ɛɛ tɛ daŋ si zu kaya mɛ bi biro hee mɔ'ɔ nɛ GASA WAN Sɔ̧ k’ɛɛ tɔ̧ɔ̧ h’ɛ́ɛ́ ga.› Ɛnɛ baa so mɔɔ-bi-biro k’ɛ́nɛ́ kpɔk kpɔk, ɓɛɛ ɛnɛ taa so mɛ daŋ si zu kaya hee geemɔ ga.

⁴²«Nɛ mɔ'ɔ nɛ GASA WAN tɔ̧ɔ̧ ha̧‘m a̧‘m tɔ̧ h’ɛ́nɛ́: ‹K’ɛ́nɛ́ daŋ si zu kaya mɛ na; k’ɛ́nɛ́ nɛ́ɛ̀ bi biro na, wen mi bo mgbara'nɛ́ na. K’ɛ́nɛ́ de ha̧ o wisɛn k’ɛ́nɛ́ mɛ gan'nɛ na.›

⁴³Mi tɔ̧ɔ̧ wen h’ɛ́nɛ́, ɓɛɛ ɛnɛ kɔ̧ mɛ zii na; ɛnɛ dee ŋgazu in GASA WAN, ɓɛɛ ɛnɛ daŋ si zu kaya nɛ ŋgai tɛ‘nɛ́.

⁴⁴Ɓɛɛ o be Amɔr nɛ ɔɔ so sɛn zu kaya gbo so mgbúzúk sitɛ‘nɛ́ hee mboɗa zi-gɔrɔ ga. Wa ndaka ɗoŋ‘nɛ́, wa pɛsa'nɛ́ nɛ̀ Sɛir hɔ Ɔrma.

⁴⁵Sɛn tɛ pia ɗoŋ k’ɛ́nɛ́, ɛnɛ hi̧a̧ kɔ̧a̧ sɛn ti GASA WAN, ɓɛɛ a̧ zii aia-nú k’ɛ́nɛ́ na; a̧ nyeŋ zer-aa sɛnɛ na mbɛt.

⁴⁶Mɛ̀ nɛ́ hegɔ s’ɛnɛ ɓɔn sɛn Kadɛs ɗoŋ-aa nyɛi̧ hee mɔ'ɔ n’ɛnɛ duka so nɛnɛ nɛti ga.»