Read Northwest Gbaya WEE-ƊOŊ-HEEMBEA 11 Bible Online

WEE-ƊOŊ-HEEMBEA 11 - Northwest Gbaya bible

WEE-ƊOŊ-HEEMBEA 11

¹«Mɛ tɛ kɔ̧ GASA WAN Sɔ̧ kɔ-mɛ, ɓɛɛ mɛ kasa mɔ n'aa tɔ̧ ha̧ mɛ mɛ kasi: mɛ̀ nɛ́ o heembea kɔ̧-a̧, o yuwar duka-a kɔ̧-a̧ in o geŋa kɔ̧-a̧ a̧ mɛ tɛ kasi dam ɗoŋ wese lɛŋ.

²Sɔsɔɔ ɛnɛ iŋa mɔ nɛ o bem k’ɛ́nɛ́ tɛ iŋ hɔ̧ɔ̧ na in mɔ nɛ wa tɛ zɔk hɔ̧ɔ̧ na; ɛnɛ iŋa usamɔ ko GASA WAN Sɔ̧ k’ɛ́nɛ́, gasi kɔ̧-a̧, ŋgai-te-er-a in ŋgamɔ n'aa de.

³Ɛnɛ zɔka o mɔɔ-sedaako in o tom kɔ̧-a̧, mɔ n'aa dea sɛn Egiptɛ in wannu'i gu nɛ nù kɔ̧-a̧ lɛŋ.

⁴Ɛnɛ iŋa mɔ n'aa dee in o wi-biro, o nyaŋa kɔ-wa gu nɛ o keekee-biro kɔ-wa lɛŋ, hu̧r nɛ wa nɛ Gbɛ̧ gba-tɔp ŋgimbi nɛ wa ndaka nɛ ɗoŋ‘nɛ́. GASA WAN kuma wa yinɛ hɔ sɔsɔɔ.

⁵Ɛnɛ iŋa mɔ n'aa dee in'nɛ̀ɛ́ sɛn ŋga-gbárà, hɔ ŋgimbi n’ɛnɛ hɔɔ nɛnɛ hɛ̧ɛ̧.

⁶Ɛnɛ iŋa mɔ n'aa dee in Dataŋ in Abiram, o bem ko Eliab, be-koo Rubɛn. Sɛn yí o be Israɛl lɛŋ, a̧ dee ha̧ nù mɛ mbaŋ, ɓɛɛ kpe zu wa, in o tua-laa kɔ-wa gu nɛ o bíí nɛ nɛɛ ɗoŋ wa mbɛt.

⁷Ɛnɛ zɔka gasamɔ nɛ GASA WAN dee lɛŋ nɛ yí‘nɛ́.»

⁸«Ɛnɛ tɛ kasi heembea lɛŋ n'am ha̧‘nɛ́ sɔsɔɔ h’ɛ́nɛ́ mɛ kpa nɔɔ-ŋgiɗi wen yea-a tɛ nù n’ɛnɛ nɛ mɛ nɛɛ ba'i,

⁹ha̧ zɛ‘nɛ́ mɛ dɔk tɛ nù nɛ GASA WAN baa kan mɔ ha̧ nɛnɛ ha̧ o dáà k’ɛ́nɛ́ in ha̧ o bezaŋ-wa; mɛ̀ nɛ́ nù nɛ yibere in gɔrɔ fok fok sɛnɛ.

¹⁰Nù nɛ mɛ nɛ mɛ ba'i hɔ ŋmaa in nú Egiptɛ nɛ mɛ gboo nɛnɛ‘i na: mɛ́ gun so nyɔnɔ, ɓɛɛ mɛ pi̧i̧ war-yì si sɛnɛ nɛ naŋ-mɛ hee mɔ'ɔ nɛ‘i a nɛ yì tɛ fɔ-wa̧a̧-kpoo’ɛ ga.

¹¹Nù n’ɛnɛ ɓir mɛ nɛ̀ɛ́ ba'i, nɛ́ o kaya in o ɗɔŋgɔ á̧ dɔka sɛnɛ; nɛ́ nu nɛ kórò hɔ hɔɔ sɛnɛ.

¹²Nɛ́ nù nɛ GASA WAN Sɔ̧ kɔ-mɛ zɔk zɔk nɛ de-a; yí-a ɓɔn sɛnɛ ku̧u̧naŋ pɛ hɔ tɛ kaɗa-pɛ.

¹³«K’ɛ̀nɛ̀ nɛ́ mboo zu tɛ o heembea n'am ha̧‘nɛ́ sɔsɔɔ nɛ mbetɛ, k’ɛ̀nɛ̀ nɛ́ kɔ̧ɔ̧ GASA WAN Sɔ̧ k’ɛ́nɛ́, k’ɛ̀nɛ̀ nɛ́ dee tom kɔ̧-a̧ nɛ see'nɛ́ kpɔk in nɛ kiitɛ‘nɛ́ lɛŋ,

¹⁴mi tɛ de ha̧ kórò mɛ hɔ sɛn hi̧i̧ nyɛm nɛ ŋgimbi-a, mɛ bɛɛ in tɛ nú-kórò; ɓɛɛ ɛnɛ tɛ mɔi̧ alkamaari, mbe dɔ̧ɔ̧, in nɔ̧́ k’ɛ́nɛ́.

¹⁵Mi tɛ de ha̧ zɔ̧ mɛ hɔ nɛ dɔka-a sɛn zaŋbɛɛ wen o mɔ-dai k’ɛ́nɛ́, ɓɛɛ ɛnɛ tɛ nyɔŋ mɔ zaŋ‘nɛ́ sur.

¹⁶Ɛ̀nɛ̀ zɔ́k tɛ‘nɛ́ ká wa tɛɛ ba see'nɛ́ sitɛ o ŋma sɔ̧, k’ɛ́nɛ́ tɛɛ gasi wa gu nɛ nù ti wa.

¹⁷K’ɛ̀nɛ̀ dé mɔ‘i, see GASA WAN tɛ tu̧ zu'nɛ́, a̧ tɛ kpe yiwese, ɓɛɛ kórò beka hɔ na, nù beka dɛm nyɔnɔ ɓɔna, ɓɛɛ ɛnɛ tɛ kum nɛ haya-a tɛ de nù nɛ GASA WAN ha̧a̧ h’ɛ́nɛ́.

¹⁸«Ɛ̀nɛ̀ kásí o wen nɔ'ɔ kɔ‘m’ɛ e kɔ̧ see'nɛ́, ɛ̀nɛ̀ dé ŋma mɔɔ-sedaako-a hɛr er'nɛ́, ɛ̀nɛ̀ dé ŋma gá̧í̧ sɔnti'nɛ́ mbɛt.

¹⁹Ɛ́nɛ́ tɛ usi wa ha̧ o bem k’ɛ́nɛ́ tɔ̧ nɛnɛ ha̧ wa ŋgimbi n’ɛnɛ a̧a̧ tɛ k’ɛ́nɛ́ in ŋgimbi n’ɛnɛ tɛ nɛ nɔ̀ yuwar, ŋgimbi n’ɛnɛ tɛ ɔ nù in ŋgimbi n’ɛnɛ tɛ kur.

²⁰Ɛ́nɛ́ tɛ yɔr wa tɛ o te nú tua k’ɛ́nɛ́, in tɛ kpar-nú-garo ye k’ɛ́nɛ́,

²¹ha̧ zɛ‘nɛ́ in o bem k’ɛ́nɛ́ mɛ dɔk zu nù nɛ GASA WAN kana so mɔ ha̧ nɛnɛ ha̧ o dáà k’ɛ́nɛ́. Zɛ duka-a k’ɛ́nɛ́ hi̧i̧ tɛ dɔk hee mɔ'ɔ nɛ yiwese in nù'ɛ tɛ duk nɛnɛ ga.

²²«K’ɛ̀nɛ̀ kasi o heembea n'am tɔ̧ h’ɛ́nɛ́ mɛ ba de nɛ tom, kɔ̧ nɛ GASA WAN Sɔ̧ k’ɛ́nɛ́, nɛ́ nɛ̀ nɔ̀ tɛ o yuwar kɔ̧-a̧ lɛŋ, ndaɗi nɛnɛ in a̧,

²³GASA WAN tɛ ndak o tugun bíí nɔ'ɔ yinɛ ti'nɛ́, ɓɛɛ ɛnɛ tɛ ndak o dukbíí nɛ̀ gasa in nɛ̀ ŋgaia gan'nɛ.

²⁴Fara nɛ naŋ‘nɛ́ tɛ i̧si̧ lɛŋ tɛ duk nɛ́ k’ɛ́nɛ́. Mgbara nù k’ɛ́nɛ́ tɛ duk nɛ ŋga-gbárà nɛ war ká̧-zan-mɛ́-ɗɔɔ, ɓɛɛ duka nɛ nú Libaŋ nɛ war ká̧-zan-mɛ́-ŋgɔn; tɛ duk nɛ nana-yì Efrat nɛ war daŋa-wese ɓɛɛ duka nɛ gba-tɔp nɛ war yee-wese.

²⁵Ŋma bíí beka yor ti'nɛ́ na. GASA WAN tɛ de ha̧ o bíí mɛ yu'nɛ́ tɛ nù nɛ naŋ‘nɛ́ tɛ i̧si̧ hee mɔ'ɔ n'aa tɔ̧ɔ̧ so h’ɛ́nɛ́ ga.

²⁶«Ɛ̀nɛ̀ zɔk, sɔsɔɔ mi ee de yoŋgo in ɗaŋ yoŋgo ti'nɛ́.

²⁷Ɛ́nɛ́ nɛ́ mbòó zu tɛ o heembea ko GASA WAN Sɔ̧ k’ɛ́nɛ́ n'am ha̧ h’ɛ́nɛ́ sɔsɔɔ, ɛ́nɛ́ tɛ kpa nɛ́ de yoŋgo.

²⁸K’ɛ̀nɛ̀ nɛ́ mbòó zu tɛ o heembea ko GASA WAN Sɔ̧ k’ɛ́nɛ́ n'am usi h’ɛ́nɛ́ sɔsɔɔ na, in k’ɛ̀nɛ̀ nɛ́ zika tɛ‘nɛ́ tɛ yuwar n'am usi h’ɛ́nɛ́ sɔsɔɔ, h’ɛ́nɛ́ mɛ nɛ ɗoŋ o ŋma sɔ̧ n’ɛnɛ iŋ na, ɛnɛ tɛ kpa nɛ́ ɗaŋ yoŋgo.

²⁹Ŋgimbi nɛ GASA WAN Sɔ̧ k’ɛ́nɛ́ tɛ de h’ɛ́nɛ́ mɛ ye sɛn tɛ nù n’ɛnɛ nɛ́ mɛ ba'i, ɛ́nɛ́ tɛ duk zu kaya Garizim tok nɛ de yoŋgo, ɓɛɛ ɛnɛ duka zu kaya Ebal tok nɛ ɗaŋ yoŋgo.

³⁰(O kaya nɔ‘i a̧a̧ nɛ kur Jurdɛn nɛ kur war nɛ a̧a̧ si yee-wese, tɛ nù ko o be Kanaŋ nɛ ɔ kɔ̧ ɗɔŋgɔ ti Gilgal ká̧ o gasa te sɛn Mɔre.)

³¹Ɛnɛ tɛ ku Jurdɛn h’ɛ́nɛ́ mɛ ba nù nɛ GASA WAN Sɔ̧ k’ɛ́nɛ́ ha̧a̧ h’ɛ́nɛ́; ɛnɛ tɛ ba nù‘i, ɓɛɛ ɛnɛ dee ye sɛnɛ.

³²Ɛnɛ tɛ zɔk o heembea in o yuwar duka-a n'am ha̧‘nɛ́ sɔsɔɔ h’ɛ́nɛ́ mɛ ba de nɛ tom.»