Read Northwest Gbaya WEE-ƊOŊ-HEEMBEA 13 Bible Online

WEE-ƊOŊ-HEEMBEA 13 - Northwest Gbaya bible

WEE-ƊOŊ-HEEMBEA 13

¹«Ɛnɛ tɛ ba o gba̧a̧-wen tɛ heembea n'am ha̧‘nɛ́ de nɛ tom. Ɛnɛ beka e ŋma mɔ sɛnɛ na in ɛnɛ beka ba ŋma mɔ sɛnɛ yinɛ na mbɛt.

²«Kà ŋma wi-tɔ̧-wen oi nu Sɔ̧, kóó ŋma wi-zɔk-mɔ kur mgbara'nɛ́, kóó a̧ tɔ̧ɔ̧ nɛ́ wen ŋma mɔɔ-usi-mɔ, kóó o ŋma mɔɔ-kifi,

³ɓɛɛ kà mɔ n'aa ha̧a̧ nú-a sɛnɛ h’ɛ́nɛ́‘i hɔ́ gba̧a̧, kà a̧ tɔ̧: ‹Ɛ̀ɛ̀ nɛ́ ɗoŋ o ŋma sɔ̧, ɛ̀ɛ̀ gásí wa›;

⁴mɛ beka zii wen kɔ̧-a̧ na, wen nɛ́ o sɔ̧ nɛ mɛ iŋ na. Nɛ́ GASA WAN Sɔ̧ k’ɛ́nɛ́ a̧ we'nɛ́ hee mɔ‘i ga, ha̧ a̧ mɛ zɔk k’ɛ́nɛ́ nɛ́ bòò nɛ́ o bíí nɛ kɔ̧ɔ̧ GASA WAN Sɔ̧ k’ɛ́nɛ́ nɛ see'nɛ́ lɛŋ in nɛ kiitɛ‘nɛ́ lɛŋ.

⁵Ɛ́nɛ́ tɛ ndak nɛ́ pata GASA WAN Sɔ̧ k’ɛ́nɛ́, ɛ́nɛ́ tɛ yu nɛ́ a̧, ɛ́nɛ́ tɛ kasi nɛ́ o heembea kɔ̧-a̧; nɛ́ tiger-a ɛ̀nɛ̀ tɛ zii; ɛ́nɛ́ tɛ gasi nɛ́ a̧; ɛ́nɛ́ tɛ ndaɗi in a̧.

⁶«War ko wi-tɔ̧-wen oi nú Sɔ̧, kóó wi-zɔk-mɔ‘i, wi tɛ gbɛ a̧ yinɛ wen n'aa tɔ̧ɔ̧ ha̧ bíí mɛ de ŋgazu in GASA WAN Sɔ̧ k’ɛ́nɛ́, nɛ mgbɔɔ‘nɛ́ gbonɛ nɛ nú Egiptɛ in nɛ gboo'nɛ́ kɔ̧ tua-bara. Wi’ɛi kɔ̧ɔ̧ so mɛ ɔr'nɛ́ yinɛ tɛ tana war nɛ GASA WAN Sɔ̧ k’ɛ́nɛ́ usa h’ɛ́nɛ́. Ɛnɛ tɛ fo ɗaŋmɔ mgbara'nɛ́ yinɛ.

⁷«Kà nya-mɛ kpɔk nyak-zaŋ-dua, kóó bem kɔ-mɛ, kóó boko-bem kɔ-mɛ, kóó kóò kɔ-mɛ nɛ̀ baa see-mɛ, kóó sɛm kɔ-mɛ nɛ̀ mɛ kɔ̧ɔ̧ hee kiitɛ-mɛ ga nɛ́ tɔ̧ɔ̧ ha̧ mɛ nɛ hu̧sa̧-a̧: ‹Ɛɛ ndak ɗoŋ o ŋma sɔ̧,› o sɔ̧ n’ɛnɛ iŋ nɛti in o dáà k’ɛ́nɛ́ na,

⁸mgbara o sɔ̧ ko o bíí nɛ ɔ nyɛi̧a nɛ ɛnɛ, kóó nɛ ɔ zik nɛ ɛnɛ tɛ mgbii nu k’ɛ́nɛ́ lɛŋ,

⁹ká mɛ kpɛk na, ká mɛ zii wen ko wi’ɛi na. Mɛ beka de ko ha̧ a̧ na, mɛ beka mɔk tɛ-mɛ ha̧ a̧ na, mɛ beka ye ɗoŋ-aa na mbɛt.

¹⁰Mɛ tɛ gbɛ a̧; nɛ́ er-mɛ a̧ tɛ hɔ tɛ-a nɛti sɛka er o dɔka bíí foo a̧.

¹¹Mɛ tɛ yo a̧ nɛ ta ha̧ a̧ mɛ fe, wen a̧ kɔ̧ɔ̧ so mɛ kɛ̧ mgbara tɛ-mɛ in Sɔ̧ nɛ baa mɛ gbonɛ nɛ nú Egiptɛ in nɛ gboo mɛ kɔ̧ tua-bara yinɛ.

¹²«O be Israɛl lɛŋ tɛ zii nyɛrɛ mɔ‘i, ɓɛɛ wa yaa nɛ kíì, ɓɛɛ wa tɛ kaɗi dee pɛrti ɗaŋmɔ‘i mgbara'nɛ́.

¹³Sɛn tɛ ŋma ye nɛ GASA WAN Sɔ̧ kɔ-mɛ ha̧a̧ ha̧ mɛ mɛ ɔ sɛnɛ, kà mɛ zii wa tɔ̧a̧‘e ndé,

¹⁴o tula-bíí gboo nɛ̀ mgbara'nɛ́, ɓɛɛ ɔr bíí saaye kɔ-wa tɔ̧ nɛnɛ‘e, a'i nɛ́ɛ̀ dé tom ha̧ o ŋma sɔ̧ n’ɛnɛ iŋ na wó,

¹⁵mɛ tɛ kii mɔ nɛ dea, mɛ tɛ ak mɔ, mɛ tɛ ak mgbara mɔ nɛ de-a. Kà mɛ nɛ́ iŋa'e pɛrti gasa ɗaŋmɔ hegɔ hɔɔ mgbara wi nɛ mbetɛ wó,

¹⁶mɛ tɛ kum o wi saaye'i a nù lɛŋ nɛ gba-paa. Mɛ tɛ ɗaŋ ye'i in mɔ nɛ a̧a̧ sɛnɛ lɛŋ, ɓɛɛ mɛ kuma o mɔ-dai a nù nɛ gba-paa.

¹⁷Mɛ tɛ mɔi̧ o mɔɔ-oi-biro lɛŋ a bee-gara, ɓɛɛ mɛ dɔɔ ye in o mɔɔ nɔ‘i lɛŋ ha̧ GASA WAN Sɔ̧ kɔ-mɛ; ye'i tɛ duk nɛ bɛɛ-oi ɓɔnsɛnɛ, wa beka de a̧ woyo ɓɔna.

¹⁸Mɛ beka fo ŋma mɔ nɛ fom baa na. Hegɔ see GASA WAN tɛ ga̧, a̧ tɛ usi gasa kɔ̧ɔ̧mɔ ha̧ mɛ; a̧ tɛ de h’ɛ́nɛ́ mɛ dɔk hee mɔ'ɔ n'aa ha̧a̧ so nɛ nú ha̧ o dáà k’ɛ́nɛ́ ga,

¹⁹wen nɛ mɛ zia wen ko GASA WAN Sɔ̧ kɔ-mɛ, kasi nɛ o heembea kɔ̧-a̧ lɛŋ n'am ha̧ mɛ sɔsɔɔ, de nɛ mɔ nɛ yuwar-a yí a̧.»