Read Northwest Gbaya WEE-ƊOŊ-HEEMBEA 15 Bible Online

WEE-ƊOŊ-HEEMBEA 15 - Northwest Gbaya bible

WEE-ƊOŊ-HEEMBEA 15

¹«Ɗoŋ mɔɔrɔ-ɗoŋ-yiitoo pɛ lɛŋ, mɛ tɛ gbɛ nyamandoi yinɛ.

²Yuwar gbɛɛ nyamandoi'i nɛ́ mɔ'ɔ: wi nɛ ha̧a̧ nyamandoi ha̧ sɛm kɔ‘i tɛ gbɛ ha̧ a̧. A̧ beka de ŋma ŋgamɔ in sɛm kɔ̧-a̧, kóó in nya-a̧ na, wen nɛ́ ŋgimbi gbɛɛ nyamandoi nɛ nin GASA WAN.

³Mɛ nyɛma mɛ ak o nyamandoi kɔ-mɛ er o gɛnɛ, ɓɛɛ mɛ tɛ e wan nɛ a̧a̧ er nya-mɛ duk.

⁴«GASA WAN Sɔ̧ k’ɛ́nɛ́ tɛ tok de yoŋgo zu'nɛ́ tɛ nù n'aa ha̧ h’ɛ́nɛ́‘i. San beka ba ŋma bíí k’ɛ́nɛ́ kpɔk na, k’ɛ́nɛ́ nɛ́ mboo zu ha̧ GASA WAN zɔk nɛ ɗoŋ heembea lɛŋ n'am ha̧‘nɛ́ sɔsɔɔ, san beka ba ŋma bíí k’ɛ́nɛ́ kpɔk na.

⁶GASA WAN Sɔ̧ k’ɛ́nɛ́ tɛ tok de yoŋgo zu'nɛ́ hee mɔ'ɔ n'aa ha̧a̧ so nɛ nú-a ga; ɓɛɛ hegɔ o dukbíí nɛ dɔka-a tɛ e ziŋina ba nɛ mɔ er'nɛ́. Ɓɛɛ k’ɛ́nɛ́, ɛnɛ beka e ziŋina ba nɛ mɔ er bíí na. Ɛnɛ tɛ ɔ wan zu o tugun bíí nɛ dɔka-a, ɓɛɛ wa beka ɔ wan zu'nɛ́ na.

⁷«Ŋma wisan nɛ́ bòó mgbara o nya-mɛ sɛn tɛ ŋma ye poo wan nɛ Sɔ̧ ha̧a̧ ha̧ mɛ, ká mɛ ŋgai see-mɛ na in ká mɛ de ŋgoko in a̧ na.

⁸Mɛ̀ hú̧í̧ nɛ́ er-mɛ ha̧ a̧, ɓɛɛ mɛ̀ há̧ mɔ ha̧ a̧ zu ziŋina nyɛm nɛ ɗoŋ mɔ lɛŋ n'aa kɔ̧a̧.

⁹Mɛ̀ dór tɛ-mɛ tɛ taamɔ'ɛ: ‹Mɔɔrɔ-ɗoŋ-yiitoo pɛ gbɛɛ nyamandoi hɛɗa,› ká mɛ zɔk nya-mɛ nɛ ɗaŋ yí, dɔ nɛ a̧, ba nɛ ɗaŋ taamɔ zu-a'e, mɔɔrɔ-ɗoŋ-yiitoo pɛ, pɛ gbɛɛ nyamandoi hɛɗa kaɗi, na, wen ká a̧ tɛɛ ai nú sitɛ GASA WAN nɛ nin-mɛ, ɓɛɛ ká mɔ‘i tɛɛ duk nɛ ɗaŋmɔ wen mɛ.

¹⁰Mɛ̀ há̧ mɔ ha̧ a̧ nɛ sa̧a̧-see, ɓɛɛ ká mɛ́ ha̧ ha̧ a̧ nɛ ɗaŋsee na; hegɔ GASA WAN Sɔ̧ kɔ-mɛ tɛ tok de yoŋgo zu mɛ tɛ tom kɔ-mɛ in mɔ nɛ mɛ tɛ de lɛŋ.

¹¹Ɓɛɛ hee mɔ'ɔ nɛ wisan beka nyaŋ tɛ nù k’ɛ́nɛ́ na ga, mi ha̧ nɛ heembea’ɛ h’ɛ́nɛ́: ‹Ɛnɛ tɛ hú̧í̧ er'nɛ́ nɛ pɛsa-a ha̧ o nya'nɛ́, ha̧ o wi-bɔnɛ in ha̧ o wisan nɛ ya tɛ nu k’ɛ́nɛ́.›

¹²«Mgbara o nya-mɛ be hébreu, kà ŋma wiwii, kóó ŋma okoo nɛ́ ɗɔra tɛ ha̧ mɛ, kà a̧ nɛ́ dee tom ha̧ mɛ hee bara ga tɛ pɛ mɔɔrɔ-ɗoŋ-kpɔk, mɛ tɛ e ha̧ a̧ mɛ yak géè tɛ mɔɔrɔ-ɗoŋ-yiitoo pɛ.

¹³Ɓɛɛ ŋgimbi n'aa be tɛ̀ɛ́ yak, ká mɛ́ e a̧ yak nɛ gee er-a na;

¹⁴mɛ tɛ ha̧ o mɔ ha̧ a̧ nɛ dɔka-a: o geɗek mɔ-dai, o nyɔnɔ in dɔ̧ɔ̧. Mɔ nɛ mɛ tɛ ha̧ ha̧ a̧‘i tɛ nɛ tɛ de yoŋgo ko GASA WAN Sɔ̧ kɔ-mɛ.

¹⁵Tɛ mɛ'ɛ mbaŋ ɗoŋ-aa'e, mɛ duka nɛ bara sɛn nú Egiptɛ, ɓɛɛ GASA WAN Sɔ̧ kɔ-mɛ gɔn zu mɛ. Mɛ̀ nɛ́ wen hegɔ sa'm ha̧ heembea’ɛ ha̧ mɛ sɔsɔɔ.

¹⁶«Kà bara'i tɔ̧ ha̧ mɛ‘e, wi kɔ̧ mɛ gbo er-mɛ na, wen nɛ‘i duk nɛ de-a, in wen nɛ‘i kɔ̧ɔ̧ mɛ in o bíí kɔ̧ tua kɔ-mɛ nyɛmna wó,

¹⁷mɛ̀ mgbɔ́ a̧ si nú tua kɔ-mɛ, mɛ̀ bá zer-aa ndaɗi nɛ kpar-nú-tua, ɓɛɛ mɛ̀ ɗɔ́í nɛ̀ ŋma ɓɛ̧i̧a nú mɔ; hegɔ a̧ tɛ duk nɛ bara kɔ-mɛ ɓɔnsɛnɛ. Mɛ tɛ de kànà nɛ́ kpɔk mɔ‘i in kó-de-tom kɔ-mɛ.

¹⁸«Ká mɛ zɔk kpaa-zu ko bara kɔ-mɛ hee ŋgayamɔ ga na, wen tom n'aa dee ha̧ mɛ tɛ pɛ mɔɔrɔ-ɗoŋ-kpɔk gana tom ko wi-de-tom-sede war yiitoo; hegɔ GASA WAN Sɔ̧ kɔ-mɛ tɛ ha̧ de sɔnti ha̧ mɛ tɛ mɔ nɛ mɛ tɛ de lɛŋ.»

¹⁹«Kaya wiwii-ndai kɔ-mɛ in kaya be vala sami kɔ-mɛ mbɛt, mɛ tɛ e nɛtɛ ha̧ GASA WAN Sɔ̧ kɔ-mɛ; mɛ beka ba kuti be wiwii-ndai kɔ-mɛ wa nɛ fɔ na, in mɛ beka gɔn buma-tɛ kuti be vala sami kɔ-mɛ na.

²⁰Mɛ tɛ nyɔŋ mɔ‘i nyɔŋ in o bíí kɔ̧ tua kɔ-mɛ ti GASA WAN Sɔ̧ kɔ-mɛ dam ɗoŋ pɛ lɛŋ fara n'aa hoka.

²¹Kà kputu nɛ́ aa tɛ-a, kà a̧ nɛ́ nɛɛ kum, kóó kà a̧ zɔk mɔ na, kà ŋma tɛ-a nɛ́ ɗaŋa, mɛ beka ɗaf'aa nɛ Sɔ̧ ha̧ GASA WAN Sɔ̧ kɔ-mɛ na.

²²Mɛ tɛ nyɔŋ mɔ‘i tɛ ye kɔ-mɛ. O bíí nɛ war tɛ-wa sa̧ na in o bíí nɛ war-tɛ ɔ sa̧a̧ tɛ nyɔŋ mɔ kpɔk hee mɔ'ɔ nɛ‘i nyɔŋ nɛ kalamba in kɔɗɛ'ɛ ga.

²³Mɔ kpɔk, mɛ beka nyɔŋ tɔk-aa na, mɛ tɛ gbai a nu hee gee yi ga.»