Read Northwest Gbaya WEE-ƊOŊ-HEEMBEA 16 Bible Online

WEE-ƊOŊ-HEEMBEA 16 - Northwest Gbaya bible

WEE-ƊOŊ-HEEMBEA 16

¹«Ɛ̀nɛ̀ zɔ́k zɛ sɔi-woo, ɓɛɛ ɛ̀nɛ̀ dé gbaŋa Paska nɛ nin GASA WAN Sɔ̧ k’ɛ́nɛ́ sɛnɛ, wen mɛ̀ nɛ́ sɛn tɛ ŋgimbi'i a̧ a̧ gboo nɛ ɛnɛ nú Egiptɛ mɛ zɛ.

²Ɛnɛ tɛ ɗafi sɔ̧ Paska ha̧ GASA WAN Sɔ̧ k’ɛ́nɛ́ nɛ ndai in sami k’ɛ́nɛ́, sɛn fara nɛ GASA WAN hoka ha̧ nin-a mɛ duk sɛnɛ.

³Ɛnɛ beka nyɔŋ mɔɔ nɔ‘i nɛ brɛt nɛ hao a̧a̧ sɛnɛ na. Tɛ zɛ mɔɔrɔ-ɗoŋ-yiitoo, ɛnɛ tɛ nyɔŋ nɛ brɛt nɛ hao bo sɛnɛ na, wen ɛnɛ gboo sɛn Egiptɛ nɛ haya-a nyɛmna. Ɛnɛ tɛ nyɔŋ nɛ́ brɛt-kaɓa ha̧ tɛ‘nɛ́ mɛ mbaŋ ɗoŋ wese n’ɛnɛ gboo nɛnɛ nú Egiptɛ ɓɔnsɛnɛ.

⁴Wi beka zɔk hao sɛn tɛ k’ɛ́nɛ́ na, kóó sɛn tɛ nù k’ɛ́nɛ́ lɛŋ na tɛ zɛ mɔɔrɔ-ɗoŋ-yiitoo. Kpoo-sɔ̧ k’ɛ́nɛ́ n’ɛnɛ tɛ gɔn nɛ̀ ga̧a̧mɔ sɛn tɛ kuti wese, ɛnɛ beka e ŋgɔn na.

⁵«Ɛnɛ beka ɗafi sɔ̧ Paska sɛn ŋma gee ye nɛ GASA WAN Sɔ̧ k’ɛ́nɛ́ ha̧ h’ɛ́nɛ́ na, na,

⁶ɓɛɛ nɛ́ sɛn fara nɛ GASA WAN Sɔ̧ k’ɛ́nɛ́ hoka ha̧ nin-a mɛ duk sɛnɛ ɛ̀nɛ̀ tɛ ɗafi sɔ̧ Paska sɛnɛ mɛ ga̧a̧mɔ, mɛ yee-wese nyɛm nɛ ŋgimbi n’ɛnɛ gboo so nɛnɛ nú Egiptɛ.

⁷Ɛnɛ tɛ gi saɗi'i, ɛnɛ tɛ nyɔŋ a̧ sɛn fara nɛ GASA WAN Sɔ̧ k’ɛ́nɛ́ hoka, ɓɛɛ mɛ tutuyɛ, ɛnɛ tɛ si ɗoŋ si tɛ k’ɛ́nɛ́.

⁸Tɛ zɛ mɔɔrɔ-ɗoŋ-kpɔk, ɛnɛ tɛ nyɔŋ nɛ́ o brɛt nɛ hao bo sɛnɛ na, mɔɔrɔ-ɗoŋ-yiitoo zɛ tɛ duk nɛ wese kaɗa gbaŋa nɛ nin GASA WAN Sɔ̧ k’ɛ́nɛ́. Ɛnɛ beka de ŋma tom wese'i na.»

⁹«Ɛnɛ tɛ tɔr alat mɔɔrɔ-ɗoŋ-yiitoo, ku̧u̧naŋ-a nɛ wese nɛ‘i mɔi̧ nɛ nyɔnɔ.

¹⁰Ɛnɛ tɛ de gbaŋa alat[7] nɛ nin GASA WAN Sɔ̧ k’ɛ́nɛ́, ba nɛ o ha̧a̧mɔ nɛ̀ ta-tɛ tɛnɛ nɛ er'nɛ́, nyɛm nɛ ɗoŋ de yoŋgo nɛ GASA WAN Sɔ̧ k’ɛ́nɛ́ toka h’ɛ́nɛ́.

¹¹Ɛnɛ tɛ kpa desee ti GASA WAN Sɔ̧ k’ɛ́nɛ́, sɛn fara n'aa hoka mɛ e nin-a sɛnɛ, ɛnɛ in o bem k’ɛ́nɛ́ mɛ be-wiwii-a in o be-okoo-a, o wi-de-tom k’ɛ́nɛ́, o kó-de-tom k’ɛ́nɛ́, be Levii nɛ duk ye k’ɛ́nɛ́, o gɛnɛ, o be-oi in o ko-gera nɛ ya mgbara'nɛ́.

¹²Tɛ‘nɛ́ a̧ mbaŋ ɗoŋ-aa'e, ɛnɛ duka so nɛ bara sɛn nú Egiptɛ. Ɛnɛ tɛ ba o heembea nɔ‘i, de nɛ tom.»

¹³«Ɛnɛ tɛ de gbaŋa tua-laa[8] tɛ zɛ mɔɔrɔ-ɗoŋ-yiitoo ɗoŋ n’ɛnɛ mɔi̧a nyɔnɔ in n’ɛnɛ vata dɔ̧ɔ̧ k’ɛ́nɛ́ kaɗi.

¹⁴Ɛnɛ tɛ duk tɛ desee yɔyɛ k’ɛ́nɛ́, ɛnɛ in o bem k’ɛ́nɛ́ mɛ be-wiwii-a in be-okoo-a, o wi-de-tom k’ɛ́nɛ́, o kó-de-tom k’ɛ́nɛ́, o be Levii, o gɛnɛ, o be-oi in o ko-gera nɛ ya tɛ o ye k’ɛ́nɛ́.

¹⁵Ɛnɛ tɛ de yɔyɛ sɛn tɛ zɛ mɔɔrɔ-ɗoŋ-yiitoo nɛ nin GASA WAN Sɔ̧ k’ɛ́nɛ́ sɛn fara n'aa hoka, wen GASA WAN Sɔ̧ k’ɛ́nɛ́ toka de yoŋgo h’ɛ́nɛ́ tɛ o nyɔnɔ k’ɛ́nɛ́ in o tom k’ɛ́nɛ́ lɛŋ; k’ɛ́nɛ́ kànà nɛ́ desee ɓɛɛ.

¹⁶«War taar sɛn tɛ pɛ kpɔk, o wiwii lɛŋ tɛ nɛ ti GASA WAN sɛn fara n'aa hoka wen gbaŋa brɛt nɛ hao bo sɛnɛ na, gbaŋa alat in gbaŋa tua-laa. Wi beka nɛ ti GASA WAN nɛ gee er na.

¹⁷Kóó o ndé tɛ ha̧ mɔ n'aa kpaa nyɛm nɛ ɗoŋ de yoŋgo nɛ GASA WAN toka ha̧ a̧.»

¹⁸«Ɛnɛ tɛ e o wi-gɔn-kita in o kapita dam tɛ o ye lɛŋ nɛ GASA WAN Sɔ̧ k’ɛ́nɛ́ ha̧a̧ h’ɛ́nɛ́ nyɛm nɛ ɗoŋ o zuduk, ɓɛɛ wa tɛ gɔn kita zu o bíí nɛ yuwar-a.

¹⁹Ɛnɛ tɛ gɔn kita nɛ yuwar-a, ɛnɛ beka ye ɗoŋ bíí na, bíí beka ye'nɛ́ na mbɛt, wen yee ŋmaa bom nɛ yí o wi-iŋ-mgbara-mɔ, ɓɛɛ ɗaŋ nɛ yuwar ko o wi-de-mɔ nɛ yuwar-a.

²⁰Ɛnɛ tɛ kii nɛ deemɔ nɛ yuwar-a, kànà nɛ deemɔ nɛ yuwar-a ɓɛɛ, h’ɛ́nɛ́ mɛ duk kpasa in h’ɛ́nɛ́ mɛ ba nù nɛ GASA WAN Sɔ̧ k’ɛ́nɛ́ ha̧ h’ɛ́nɛ́.»

²¹«Ɛnɛ beka bɛ̧i̧ ŋma sɛka-te mbɔɗɔnu ká̧ fara-ɗafi-sɔ̧ n’ɛnɛ tɛ mbo ha̧ GASA WAN Sɔ̧ k’ɛ́nɛ́ na.

²²Ɛnɛ beka ba ŋma ta e ŋgɔn mɛ gasi na, wen GASA WAN Sɔ̧ k’ɛ́nɛ́ sɛna mɔ‘i.