Read Northwest Gbaya WEE-ƊOŊ-HEEMBEA 17 Bible Online

WEE-ƊOŊ-HEEMBEA 17 - Northwest Gbaya bible

WEE-ƊOŊ-HEEMBEA 17

¹«Ɛnɛ beka ɗafi GASA WAN Sɔ̧ k’ɛ́nɛ́ nɛ̀ ndai, kóó nɛ̀ sami nɛ a̧a̧ nɛ kputu tɛ na, wen mɔ‘i nɛ gasa ɗaŋmɔ ti GASA WAN Sɔ̧ k’ɛ́nɛ́.

²«Ŋmafara ŋma bíí mgbara'nɛ́, wiwii kóó okoo nɛ duk tɛ ye nɛ GASA WAN Sɔ̧ k’ɛ́nɛ́ ha̧a̧ h’ɛ́nɛ́ tɛ de ŋma ɗaŋmɔ yí GASA WAN Sɔ̧ k’ɛ́nɛ́ gbin nɛ heembea nɔɔ-tɔk kɔ̧-a̧.

³Ŋmafara wi’ɛi tɛ nɛ̀ɛ́ gasi o ŋma sɔ̧, gu nɛ nù ti wa, kóó a̧ tɛ gu nù ti wese, kóó ti nyaŋa-zɛ, kóó ti o sɔra lɛŋ. Mɔ‘i nɛ́ mɔ n'aa dora.

⁴Kà wa tɔ̧́ wen'i h’ɛ́nɛ́, kóó k’ɛ̀nɛ̀ zii nyɛrɛ-a, ɛnɛ tɛ kii mɛ iŋ mgbara-a nɛ de-a. K’ɛ̀nɛ̀ nɛ iŋa'e pɛrti ɗaŋmɔ hegɔ dee nù Israɛl nɛ mbetɛ,

⁵ɛnɛ tɛ sa wiwii, kóó okoo nɛ dee ɗaŋmɔ‘i si nú ye, ɓɛɛ ɛnɛ tɛ yo a̧ nɛ ta gbɛ.

⁶Nɛ́ sɛn tɛ wen ko wi-sedaako yiitoo kóó taar ɛ̀nɛ̀ tɛ́ gbɛ nɛ wi’ɛi, bo nɛ tɛ wen ko wi-sedaako kpɔk ɓɛɛ na.

⁷Nɛ́ wi-sedaako a̧ tɛ yo a̧ nɛti sɛka o gee bíí yoo kɔ‘i nɛ ɗoŋ. Nɛ́ hegɔ ɛ̀nɛ̀ tɛ́ fo nɛ ɗaŋmɔ yinɛ mgbara'nɛ́.»

⁸«Kà gɔna-kita gbɛɛ-zu, in kpɛri, sɛka da̧i̧ in ŋma gɔna-kita tɛ ye k’ɛ́nɛ́ nɛ́ gana mɛ, ɛnɛ tɛ ba yuwar daŋ si fara nɛ GASA WAN Sɔ̧ hoka.

⁹Ɛnɛ tɛ nɛ̀ɛ́ kpa o be Levii nɛ ya nɛ o wi-ɗafi-sɔ̧ in wi-gɔn-kita nɛ a̧a̧ tɛ tom wese'i. Ɛnɛ tɛ ak wa zu wen'i, ɓɛɛ wa tɛ tɔ̧ mgbara gɔna kita'i h’ɛ́nɛ́.

¹⁰Ɛnɛ tɛ de mɔ nyɛm nɛ ɗoŋ mɔ nɛ o wi-gɔn-kita tɔ̧ɔ̧ h’ɛ́nɛ́ sɛn fara nɛ GASA WAN hoka. Mɔ nɛ wa tɛ tɔ̧ h’ɛ́nɛ́ lɛŋ, nɛ mɔ‘i ɛ̀nɛ̀ tɛ de.

¹¹Ɛnɛ tɛ ndak nɛ ɗoŋ wen nɛ wa tɔ̧a̧ in gɔna kita nɛ wa usa ɗoŋ-aa h’ɛ́nɛ́. Ɛnɛ beka nɛ si war wiiko, kóó si war gale sɛn tɛ o mɔ nɛ wa tɔ̧ɔ̧ h’ɛ́nɛ́‘i na.

¹²Ɓɛɛ wi nɛ tɛ gasi zu zii nɛ wen nú wi-ɗafi-sɔ̧ nɛ duk hi̧i̧ de nɛ tom ha̧ GASA WAN Sɔ̧ kɔ-mɛ na, kà a̧ nɛ́ zia wen ko wi-gɔn-kita na, wi’ɛi tɛ fe. Ɛnɛ tɛ fo ɗaŋmɔ yinɛ nú Israɛl.

¹³O bíí lɛŋ tɛ zii nyɛrɛ-a; wa tɛ ya nɛ̀ kíì, ɓɛɛ ŋma bíí beka ŋmaŋ tɛ hee mɔ‘i ga woyo na.»

¹⁴«Ɛnɛ be tɛ̀ɛ́ ye tɛ nù nɛ GASA WAN Sɔ̧ k’ɛ́nɛ́ ha̧ h’ɛ́nɛ́, ɛnɛ be tɛ̀ɛ́ ba nù‘i, ɛnɛ be tɛ̀ɛ́ ɔ sɛnɛ, k’ɛ̀nɛ̀ be tɛ̀ɛ́ tɔ̧‘e wi kɔ̧ɔ̧ mɛ e ŋma wan zu wi hee ko o dukbíí lɛŋ nɛ ya katɛ wi ga,

¹⁵wi n’ɛnɛ tɛ e nɛ wan zu'nɛ́‘i tɛ duk kànà nɛ bíí nɛ GASA WAN hoka. Nɛ́ mgbara o nya'nɛ́ ɛ̀nɛ̀ tɛ hok wi nɛ tɛ ɔ wan zu'nɛ́ sɛnɛ; gɛnɛ nɛ̀ bó nɛ́ nya'nɛ́ na beka ɔ wan zu'nɛ́ na.

¹⁶Mɔ kpɔk, ká o nyaŋa dɔk er-a na, in ká à̧ mgbɔ́ o bíí siɗoŋ Egiptɛ mɛ kii mɛ kpa nyaŋa nɛ dɔka-a na, wen GASA WAN tɔ̧ɔ̧ h’ɛ́nɛ́‘e, ɛnɛ beka ba yuwar'i woyo ɓɔna.

¹⁷Wannu'i beka bo nɛ̀ kóò nɛ̀ dɔka-a na, wen kà see-aa tɛɛ yu tɛ GASA WAN; a̧ beka mɔi̧ bu-mbɔi in lɔr nɛ dɔka-a na mbɛt.

¹⁸A̧ be tɛ̀ɛ́ ɔ wan, a̧ tɛ yɔr o heembea nɛ o be Levii nɛ ya nɛ o wi-ɗafi-sɔ̧ tɛ ha̧ ha̧ a̧‘i zaŋ kalata wen a̧ nɛ tɛ-a.

¹⁹Yɔra heembea'i tɛ duk katɛ a̧, a̧ tɛ tɔr a̧ wese lɛŋ n'aa duk kpasa, wen ha̧ a̧ mɛ yambi yuu GASA WAN Sɔ̧ kɔ̧-a̧, kasi nɛ o wen heembea'i in o mɔ nɛ yɔra sɛnɛ de nɛ tom.

²⁰Ká a̧ gasi zu-a ti o nya-a̧ na in ká a̧ e heembea duk nɛ nɛnɛ si war gale, kóó si war wiiko na, ha̧ zɛ-wan kɔ̧-a̧ in ko o bem kɔ̧-a̧ mɛ dɔk sɛn nú Israɛl.»