Read Northwest Gbaya WEE-ƊOŊ-HEEMBEA 19 Bible Online

WEE-ƊOŊ-HEEMBEA 19 - Northwest Gbaya bible

WEE-ƊOŊ-HEEMBEA 19

¹«Ŋgimbi nɛ̀ GASA WAN Sɔ̧ k’ɛ́nɛ́ tɛ kum o tugun bíí n'aa tɛ ha̧ nu kɔ-wa h’ɛ́nɛ́, k’ɛ̀nɛ̀ be tɛ̀ɛ́ ndak wa h’ɛ́nɛ́ mɛ ba ye in tua kɔ-wa kaɗi,

²ɛ́nɛ́ tɛ kɛ̧ nù nɛ GASA WAN Sɔ̧ k’ɛ́nɛ́ ha̧‘nɛ́ tɛ fara taar; ɛnɛ tɛ hok o ŋma gasa ye taar sɛn tɛ o kɛ̧ɛ̧-nù nɔ‘i, ɓɛɛ ɛnɛ ɗafa yuwar nɛa-a sitɛ o ye nɔ‘i. Hegɔ o wi-gbɛ-zu lɛŋ tɛ kpa ŋma fara-hu̧si sɛnɛ.

⁴Kà ŋma bíí nɛ́ gbɛɛ zu nɛ̀ hɔɔ-kɔ-mɔ, in nɛ̀ bó nɛ́ a̧ sɛna so wi’ɛi sɛn nɛti na, a̧ nyɛma mɛ hu̧si tɛ ŋma ye nɔ‘i, ɓɛɛ a̧ kpasa.

⁵Hee kinii ga, kà ŋma bíí nɛ́ mɛ́ gɔm te in gbama-yari kɔ̧-a̧, nɛ mɔ'ɔ n'aa gɔma te, ɓɛɛ gba̧a̧-kpi̧i̧ kpɔ̧i̧ yo gbama-yari kɔ̧-a̧ pi̧ nù nɛ fio, wi-gɔm-te'i nyɛma mɛ yu mɔ si ŋma ye nɔ‘i, ɓɛɛ a̧ kpasa,

⁶kà yuwar nɛa-a si tɛ o ye nɔ‘i a̧ nyɛi̧a na, wen ká wi-kifi-er ndak pata wi-gbɛ-zu'i nɛ nyimsea mɛ gbɛ a̧ nɛ yuwar. Wen bó nɛ́ wi-gbɛ-zu'i sɛna so wi n'aa gbɛa'i nɛti ha'i mɛ ba a̧ gbɛ na.

⁷Nɛ hegɔ sa'm ha̧ heembea’ɛ h’ɛ́nɛ́: ‹Ɛnɛ tɛ hok gasa ye taar a nɛtɛ.›

⁸«K’ɛ̀nɛ̀ nɛ́ kasa o heembea ko GASA WAN Sɔ̧ k’ɛ́nɛ́ n'am ha̧‘nɛ́ sɔsɔɔ, k’ɛ̀nɛ̀ bá wa de nɛ tom, k’ɛ̀nɛ̀ nɛ́ kɔ̧ɔ̧ GASA WAN Sɔ̧ k’ɛ́nɛ́, ndak nɛ ɗoŋ yuwar kɔ̧-a̧ wese lɛŋ, a̧ tɛ de ha̧ nù k’ɛ́nɛ́ mɛ gasi siti hee mɔ'ɔ n'aa kana so mɔ sɛnɛ ha̧ o dáà k’ɛ́nɛ́ ga; a̧ tɛ ha̧ nù lɛŋ n'aa tɔ̧ɔ̧ so'e wi tɛ ha̧ ha̧ wa h’ɛ́nɛ́. Hegɔ‘i, ɛnɛ tɛ a o mbe ye taar zu o kuti-a nɔ‘i.

¹⁰Hegɔ tɔk tɛ wi nɛ de ɗaŋmɔ na beka a nù sɛn zu nù k’ɛ́nɛ́ nɛ GASA WAN Sɔ̧ k’ɛ́nɛ́ ha̧a̧ h’ɛ́nɛ́ nɛ mɔɔ-oi na, wen ká tɔk tɛ wi’ɛi tɛɛ tik zu'nɛ́.

¹¹«Ɓɛɛ kà ŋma bíí sɛ́n ŋma-a, kà a̧ hai a̧, tik zu a̧, gusi a̧ gbɛ, kà wi-gbɛ-zu'i yu mɔ nɛ́ɛ̀ hu̧si tɛ ŋma ye nɔ‘i,

¹²o gasawi ye kɔ̧-a̧ tɛ tom bíí nɛ́ɛ̀ ba a̧ ha̧ wi-kifi-er mɛ gbɛ a̧.

¹³K’ɛ́nɛ́ de ko ha̧ a̧ na; ɛnɛ tɛ gbɛ wi nɛ gbai tɔk tɛ wi nɛ de ɗaŋmɔ na a nù yinɛ nú Israɛl, ɓɛɛ ɛnɛ tɛ ya nɛ de-a.»

¹⁴«Mɛ beka ɗoŋ mgbara-nù ko ŋma-mɛ nɛ o zɔmdáa ee so ŋgimbi nɛ wa hɔɔ nɛnɛ ba e zu kɔ-mɛ tɛ nù nɛ GASA WAN Sɔ̧ kɔ-mɛ ha̧ ha̧ mɛ‘i na.»

¹⁵«Wi-sedaako beka duk ɛ̀nɛ̀ tɛ wen ko wi nɛ gbɛɛ zu, kóó wi nɛ dee ɗaŋmɔ, kóó ŋma gɔɔmɔ na. Nɛ́ ɗoŋ wen ko wi-sedaako yiitoo, kóó taar sɛka wen'i sa̧a̧.

¹⁶Kà ŋma wi-sedaako ɓír wen e nú ŋma bíí‘e, a̧ dee ŋgazu wó,

¹⁷o wi nɔ‘i nɛ si kafɛ‘i tɛ nɛ si sa̧a̧-fara ti o wi-ɗafi-sɔ̧ in o wi-gɔn-kita nɛ tɛ de tom wese'i.

¹⁸O wi-gɔn-kita tɛ kii mɛ iŋ mgbara mɔ‘i, wa tɛ zɔk'e wi-sedaako'i nɛ́ wi-ndela, a̧ ɓira nɛ wen e nú nya-a̧.

¹⁹Ɛnɛ tɛ de mɔ in a̧ hee mɔ'ɔ n'aa kɔ̧ɔ̧ so mɛ de in nya-a̧ ga; ɛnɛ tɛ fo ɗaŋmɔ yinɛ mgbara'nɛ́.

²⁰O oi bíí tɛ zii nyɛrɛ mɔ‘i, kíì tɛ de wa, ɓɛɛ bíí tɛ kaɗi dee pɛrti ɗaŋmɔ hegɔ mgbara'nɛ́.

²¹Ko beka de'nɛ́ ha̧ wi’ɛi na: fio oi fio, yí oi yí, nin oi nin, er oi er, naŋ oi naŋ.»