Read Northwest Gbaya WEE-ƊOŊ-HEEMBEA 20 Bible Online

WEE-ƊOŊ-HEEMBEA 20 - Northwest Gbaya bible

WEE-ƊOŊ-HEEMBEA 20

¹«Ŋgimbi n’ɛnɛ gbo mɛ bi o wisɛn k’ɛ́nɛ́, k’ɛ̀nɛ̀ zɔ́k o nyaŋa in o keekee-nyaŋa, in bíí nɛ dɔka-a gan'nɛ, k’ɛ́nɛ́ yu mɔ na, wen GASA WAN Sɔ̧ k’ɛ́nɛ́ nɛ gboo'nɛ́ nɛ nú Egiptɛ a̧a̧ in'nɛ̀ɛ́.

²Ŋgimbi n’ɛnɛ tɛ hɛɗi mɛ bi biro, wi-ɗafi-sɔ̧ tɛ ɗɔŋ piiti, ɓɛɛ a̧ tɔ̧ɔ̧ ha̧ o bíí:

³‹O be Israɛl, ɛ̀nɛ̀ zii! Ɛ́nɛ́ nɛ́ mɛ bi o wisɛn k’ɛ́nɛ́ sɔsɔɔ. Ɛ̀nɛ̀ nɔ́ ŋgiɗi, k’ɛ́nɛ́ yu mɔ na, ká kíì de'nɛ́ na, ká tɛ‘nɛ́ nak ti wa na,

⁴wen nɛ́ GASA WAN Sɔ̧ k’ɛ́nɛ́ a̧ nɛ nɔ̀ in'nɛ̀ɛ́ ha̧ a̧ mɛ de biro in o wisɛn k’ɛ́nɛ́ oi nú‘nɛ́, ye nɛ̀ ɗoŋ‘nɛ́.›

⁵«O kapita tɛ tɔ̧ wen ha̧ o bíí hee mɔ'ɔ ga: ‹Kà ŋma bíí mgbara'nɛ́ nɛ́ dee tua n'aa tɛ si kɔ̧ a̧ hɔ̧ɔ̧ na, a̧ a̧ si ɗoŋ si tɛ kɔ̧-a̧, wen ká a̧ tɛɛ fe yí biro, ká ŋma bíí si kɔ̧ tua kɔ̧-a̧ oi-aa.

⁶Kà ŋma bíí nɛ́ guna nyak-dɔ̧ɔ̧ ɓɛɛ n'aa ɓi kuti waya-a na, a̧ a̧ si ɗoŋ si tɛ kɔ̧-a̧, wen ká a̧ tɛɛ fe yi biro, ɓɛɛ ká ŋma bíí tɛɛ ɓi kuti waya-nyak-dɔ̧ɔ̧ kɔ̧-a̧.

⁷Kà ŋma bíí nɛ́ hara kóò, ɓɛɛ n'aa tɛ ba hɔ̧ɔ̧ na, a̧ a̧ si ɗoŋ si tɛ kɔ̧-a̧, ká a̧ tɛɛ fe yi biro, ɓɛɛ ká ŋma bíí tɛɛ ba kóò kɔ̧-a̧.›

⁸«O kapita tɛ tɔ̧ ha̧ o bíí woyo: ‹Kà ŋma bíí nɛ́ dee kíì, ɓɛɛ kà a̧ bó nɛ̀ nɔɔ-ŋgiɗi na, a̧ a̧ si ɗoŋ si tɛ kɔ̧-a̧, wen ká kíì tɛɛ de o ŋma-a hee a̧ ga.›

⁹Ŋgimbi nɛ o kapita be tɛ̀ɛ́ tɔ̧ wen ha̧ o bíí kaɗi, wa tɛ a o gasa wi-biro zu o dùk wi-biro kpɔk kpɔk.

¹⁰«Ŋgimbi n’ɛnɛ tɛ hɛɗi ká̧ ŋma ye h’ɛ́nɛ́ mɛ bi a̧, mɛ tɛ ak ga̧a̧mɔ in o bíí ye'i.

¹¹Kà wa nɛ́ kpɛka ga̧a̧mɔ‘i, ɓɛɛ kà wa hú̧í̧ nú garo h’ɛ́nɛ́, ɓɛɛ bíí saaye'i lɛŋ tɛ de tom-bara h’ɛ́nɛ́.

¹²Kà wa nɛ́ kpɛka ga̧a̧mɔ‘i na, ɓɛɛ kà wa bá nɛ́ biro duk nɛ̀ ɛnɛ, ɛ́nɛ́ tɛ kɛr ye'i e nù.

¹³GASA WAN Sɔ̧ k’ɛ́nɛ́ tɛ fo wa a kɔ̧ er'nɛ́, ɓɛɛ ɛnɛ gbɛɛ wa lɛŋ nɛ gba-paa.

¹⁴Mɛ tɛ kai o okoo lɛŋ, o obem, mɔ-dai in mɔ lɛŋ nɛ tɛ duk saaye nɛ̀ mɔɔ-oi-biro; ɛnɛ tɛ nyɔŋ nɛ mɔɔ-oi-biro er o wisɛn k’ɛ́nɛ́. Mɔ‘i nɛ́ mɔ nɛ GASA WAN Sɔ̧ k’ɛ́nɛ́ ha̧a̧ h’ɛ́nɛ́.

¹⁵Nɛ́ hegɔ ɛ̀nɛ̀ tɛ de in o ye lɛŋ nɛ ɔ nyɛi̧a nɛ ɛnɛ, o wan nɛ bo mgbara o ye ko o tugun bíí nɔ'ɔ na.

¹⁶«Ɓɛɛ ɛ́nɛ́ beka e ŋma bíí kpɔk mɛ duk kpasa tɛ nù ko o dukbíí nɔ'ɔ nɛ GASA WAN Sɔ̧ k’ɛ́nɛ́ ha̧a̧ h’ɛ́nɛ́ nɛ mɔɔ-oi’ɛ na.

¹⁷Ɛ́nɛ́ tɛ kum o be Hit, o be Amɔr, o be Kanaŋ, o be Periz, o be Hiv in o be Jebus lɛŋ, hee mɔ'ɔ nɛ GASA WAN Sɔ̧ k’ɛ́nɛ́ baa tɔ̧ so h’ɛ́nɛ́ ga,

¹⁸wen ká wa tɛɛ usi ɗoŋ ɗaŋ yuwar ɗafa o sɔ̧ kɔ-wa h’ɛ́nɛ́, wen k’ɛ́nɛ́ tɛɛ de ɗaŋmɔ in GASA WAN Sɔ̧ k’ɛ́nɛ́.

¹⁹«K’ɛ̀nɛ̀ nɛ́ kɛra ŋma ye e nù ɗoŋ-aa nyɛi̧ bi nɛ a̧, ɛ́nɛ́ beka gɔm o te nɛ kpi̧i̧ yinɛ na, wen nɛ́ waya-te nɔ‘i ɛ̀nɛ̀ tɛ nyɔŋ, wen te bó nɛ́ bíí, k’ɛ́nɛ́ bi biro in a̧ na.

²⁰Kànà nɛ́ te nɛ̀ bó nɛ́ te-wai-wai na ɛ̀nɛ̀ tɛ gɔm, wen ɗafa-a nɛ fara-duk bi nɛ biro, hɔ wese nɛ ye'i tɛ tik nɛnɛ.»