Read Northwest Gbaya WEE-ƊOŊ-HEEMBEA 21 Bible Online

WEE-ƊOŊ-HEEMBEA 21 - Northwest Gbaya bible

WEE-ƊOŊ-HEEMBEA 21

¹«Sɛn tɛ nù nɛ GASA WAN Sɔ̧ k’ɛ́nɛ́ ha̧‘nɛ́, kà‘i kpá ŋma wɔr bíí fara ɔɔ nù sɛn kpɛɛfɔ, kà‘i íŋ yi wi nɛ gbɛɛ a̧ na,

²o kuti-wi in o wi-gɔn-kita k’ɛ́nɛ́ tɛ nɛ mɛ we naŋ hɔ tɛ o ye nɛ duk mgbák katɛ wɔr'i.

³Wi tɛ zɔk ye nɛ nyɛi̧ nɛ wɔr'i na. O kuti-wi tɛ ye'i tɛ ba nɛ be-zɔŋa-ndai nɛ tɛ de tom hɔ̧ɔ̧ na, nɛ‘i tɛ kun mɔɔ-wa-fɔ ger-a hɔ̧ɔ̧ na;

⁴wa tɛ ba be ndai'i si nú ŋma foka-yì, sɛn ŋma fara nɛ fɔ bo na, nɛ‘i tɛ gun mɔ sɛnɛ na mbɛt, ɓɛɛ wa tɛ gbin ger be ndai'i sɛn ɗɔɔ foka-yì‘i.

⁵O be Levii nɛ ya nɛ o wi-ɗafi-sɔ̧ tɛ nɛ si fara'i mbɛt, wen mɛ̀ nɛ́ wa a̧ GASA WAN Sɔ̧ k’ɛ́nɛ́ hoka wen ɗafa sɔ̧ in toka-de-yoŋgo nɛ nin GASA WAN, ɓɛɛ mɛ̀ nɛ́ wen kɔ-wa a̧ kɛ̧ mgbara kafɛ lɛŋ in wen-ee-da̧i̧ tɛ ŋmaa mbɛt.

⁶Ɓɛɛ o kuti-wi lɛŋ tɛ ye'i nɛ ɗɔŋa so pii ká̧ wɔr'i tɛ tai er ɗɔɔ foka-yì‘i sɛn zu be ndai nɛ wa gbina ger-a'i,

⁷ɓɛɛ wa tɔ̧a̧: ‹Bo nɛ er yɛ a̧ gbaia tɔk’ɛ a nù na, yí-ɛɛ mbɛt zɔk na.

⁸GASA WAN, ɛ̀nɛ̀ é ɗaŋmɔ ko Israɛl, dukbíí k’ɛ́nɛ́ n’ɛnɛ gɔna zu wa ha̧ wa; k’ɛ́nɛ́ e ha̧ tɔk tɛ wi nɛ de ŋma ɗaŋmɔ na mɛ tik zu Israɛl dukbíí k’ɛ́nɛ́ na.› Ɓɛɛ simbo tɔk beka tik zu wa na.

⁹Nɛ́ hegɔ ɛ̀nɛ̀ tɛ ba nɛ simbo tɔk tɛ wi nɛ de ŋma ɗaŋmɔ na yinɛ mgbara'nɛ́, de nɛ mɔ nɛ yuwar-a yí GASA WAN.»

¹⁰«K’ɛ̀nɛ̀ gbó mɛ bi o wisɛn nɛ GASA WAN Sɔ̧ k’ɛ́nɛ́ aa kɔ er'nɛ́, k’ɛ̀nɛ̀ káí o bara-biro,

¹¹ɓɛɛ kà mɛ zɔ́k ŋma de be-zɔŋa sɛn mgbara o bara-biro nɔ‘i, kà mɛ ndáɗí in a̧ mɛ ba a̧ nɛ kóò,

¹²mɛ tɛ mgbɔ a̧ si kɔ̧ tua kɔ-mɛ; a̧ tɛ kpui zu-a, ɓɛɛ a̧ gɔna sɔ̧ɔ̧ er-a;

¹³a̧ tɛ kpai laa n'aa pi̧a ŋgimbi nɛ‘i baa nɛ a̧, ɓɛɛ a̧ tɛ ɔ kɔ̧ tua kɔ-mɛ. A̧ tɛ hi̧i̧ fio dáà kɔ̧-a̧ in nàà kɔ̧-a̧ tɛ fio-zɛ kpɔk; ɗoŋ mɔ‘i, mɛ tɛ nɛ si katɛ a̧, ɓɛɛ mɛ baa a̧ nɛ kóò.

¹⁴Ɓɛɛ kà wɔ-a búsí tɛ-mɛ, mɛ tɛ e ha̧ a̧ mɛ yak hee mɔ nɛ see-aa kɔ̧a̧ ga; mɛ beka ɗɔr a̧ wen sede na, mɛ beka usi bɔnɛ ha̧ a̧ na mbɛt, wen mɛ baa so a̧ baa nɛ kóò kaɗi.»

¹⁵«Kà ŋma bíí nɛ̀ baa kóò yiitoo, kà a̧ nɛ́ kɔ̧ɔ̧ ɓii-aa, ɓɛɛ kà a̧ sɛ́n ɓii-aa, kà wa yiitoo lɛŋ nɛ́ kòó be-wiwii, ɓɛɛ kà wi-hɔ-ti nɛ́ bòò nɛ́ bem ko kóò nɛ̀ wíì sɛn'i,

¹⁶ɓɛɛ wese n'aa tɛ kɛ̧ nɛ mɔɔ-oi ha̧ o bem kɔ̧-a̧, be-kai-mɔɔ-oi beka duk nɛ kaya-bem ko kóò n'aa kɔ̧a̧‘i, e bem ko ɓii kóò n'aa sɛn'i duk na.

¹⁷A̧ tɛ iŋ kànà‘e, be-kai-mɔɔ-oi nɛ́ bem ko kóò n'aa sɛn'i, ɓɛɛ a̧ tɛ ha̧ mɔɔ-oi ha̧ a̧ war yiitoo, wen bem’ɛi nɛ́ kuti ŋgai nɛ gboo tɛ dáà kɔ̧-a̧. Nɛ́ a̧ a̧ tɛ duk be-kai-mɔɔ-oi.»

¹⁸«Kà ŋma bíí nɛ̀ a̧a̧ nɛ̀ bem nɛ̀ de nɛ ŋgazu, nɛ̀ mbo zu ha̧ dáà in nàà kɔ‘i na, kà wa nɛ́ tɔ̧ɔ̧ mbɔrɔ ha̧ a̧, ɓɛɛ kà a̧ zii na,

¹⁹dáà kɔ̧-a̧ in nàà kɔ̧-a̧ tɛ mgbɔ a̧ nɛnɛ sitɛ o gasawi saaye, sɛn ká̧ nú-garo ye'i;

²⁰wa tɛ tɔ̧ ha̧ o gasawi nɔ‘i'e: ‹Ɛ̀nɛ̀ zɔ́k bem k’ɛɛ hɛ̧ɛ̧ nɛ́ ŋma be-ŋgazu, a̧ zii mbɔrɔ k’ɛɛ na, a̧ nɛ́ wi-ɗaɗa in wi-gbɛ-dɔ̧ɔ̧.›

²¹O wiwii saaye lɛŋ tɛ yo a̧ nɛ ta gbɛ. Nɛ́ hegɔ a̧ mɛ tɛ fo nɛ ɗaŋmɔ sɛn mgbara'nɛ́ yinɛ; o be Israɛl lɛŋ tɛ zii nyɛrɛ mɔ‘i, ɓɛɛ kíì dee wa.»

²²«Kà‘i gbɛ́ ŋma bíí wen ŋma ŋga ɗaŋmɔ n'aa dea, ɓɛɛ kà‘i gá̧í̧ wɔr-aa tɛ te,

²³wɔr-aa beka ɔ tɛ te'i na. Ɛnɛ tɛ gun a̧ kpɔk kale wese'i, wen wɔr nɛ ga̧i̧ tɛ te dak nɛ fom ko Sɔ̧ pi̧ nù. Hegɔ mɛ beka pi̧ ndiŋ tɛ nù nɛ GASA WAN Sɔ̧ kɔ-mɛ ha̧a̧ ha̧ mɛ nɛ mɔɔ-oi na.»