Read Northwest Gbaya WEE-ƊOŊ-HEEMBEA 34 Bible Online

WEE-ƊOŊ-HEEMBEA 34 - Northwest Gbaya bible

WEE-ƊOŊ-HEEMBEA 34

¹Moisɛ daŋa nɛ bɔkɔ-nú Mɔab si zu kaya Nɛbo, zu kaya Pisga tan nɛ Jeriko, ɓɛɛ GASA WAN de ha̧ a̧ mɛ zɔk nù lɛŋ, ku̧u̧naŋ-a nɛ Galad hɔ Dan,

²Nɛftalii, nù ko Efraim in Manase, nù ko Juda lɛŋ hɔ ká̧ gba-tɔp si yee-wese,

³Nɛgɛb in kɔ̧ ɗɔŋgɔ Jurdɛn, ɗɔŋgɔ Jeriko, ye-ndɛŋgɛ, hɔ nɛnɛ Sɔar.

⁴GASA WAN tɔ̧ɔ̧ ha̧ a̧: «Nù n'am kana so mɔ nde, mi tɛ ha̧ ha̧ Abraham, Izak in Jakob, tɔ̧ nɛnɛ‘e, mi tɛ ha̧ ha̧ o bezaŋ-wa nɛ́ mɔ'ɔ. Mi usa a̧ ha̧ mɛ mɛ zɔk nɛ yí-mɛ, ɓɛɛ mɛ beka ye sɛnɛ na.»

⁵Nɛ mɔ'ɔ nɛ Moisɛ wi-de-tom ko GASA WAN fea hi̧i̧ sɛn nú Mɔab hee mɔ'ɔ nɛ GASA WAN tɔ̧ɔ̧ ga.

⁶Ɓɛɛ GASA WAN gun a̧ kɔ̧ ɗɔŋgɔ nù Mɔab tan nɛ Bɛt-Pɛɔr. Ŋma bíí iŋ oi pɛsi kɔ̧-a̧ na hɔ sɔsɔɔ.

⁷Moisɛ a̧a̧ so nɛ̀ pɛ gɔmŋmaa-nɛ-ɓu-yiitoo ŋgimbi n'aa fee nɛnɛ; yí-a ɗaŋ na, in ŋgai kɔ̧-a̧ kaɗi na mbɛt.

⁸O be Israɛl hi̧a̧ Moisɛ tɛ zɛ ɓu-taar sɛn bɔkɔ-nu Mɔab, ɓɛɛ zɛ hi̧a̧ Moisɛ kaɗi.

⁹Josue bem ko Nun a̧a̧ so nɛ̀ iŋa-mgbara-mɔ nyɛmna, wen nɛ Moisɛ ee so er zu a̧. O be Israɛl mboo zu ha̧ a̧, de nɛ mɔ nyɛm nɛ ɗoŋ wen nɛ GASA WAN tɔ̧ɔ̧ so ha̧ Moisɛ.

¹⁰Ŋma wi-tɔ̧-wen oi nú Sɔ̧ hee Moisɛ ga nɛ GASA WAN tɔ̧ɔ̧ wen in a̧ nɛ yí sɛn nú Israɛl bo na.

¹¹Nɛ́ a̧ a̧ GASA WAN toma so mɛ de o mɔɔ-usi-mɔ in o mɔɔ-gɔn-ɗɛɗɛ sɛn nú Egiptɛ ti wannu, in o gasawi kɔ̧-a̧, in ti o wi-de-tom kɔ̧-a̧ lɛŋ.

¹²Nɛ́ Moisɛ‘i a̧ baa de so mɔ nɛ ŋgai de nɛ o gasa mɔɔ-kíì nɛ yí o be Israɛl lɛŋ.