Read Northwest Gbaya WEE-ƊOŊ-HEEMBEA 7 Bible Online

WEE-ƊOŊ-HEEMBEA 7 - Northwest Gbaya bible

WEE-ƊOŊ-HEEMBEA 7

¹«GASA WAN Sɔ̧ kɔ-mɛ tɛ mgbɔ mɛ hɔ tɛ nù nɛ mɛ tɛ duk sɛnɛ; a̧ tɛ ndak o dukbíí mɔɔrɔ-ɗoŋ-yiitoo nɛ ɔ dɔka in nɛ ŋgaia gan mɛ yinɛ ti mɛ: mɛ̀ nɛ́ o be Hit, o be Girgas, o be Amɔr, o be Kanaŋ, o be Periz, o be Hiv in o be Jebus.

²Ŋgimbi nɛ GASA WAN Sɔ̧ kɔ-mɛ tɛ fo wa e kɔ̧ er-mɛ in nɛ mɛ tɛ bi wa kaɗi, mɛ tɛ kum wa yinɛ lɛŋ. Mɛ beka nɔ tɔk in wa na, mɛ beka de ko ha̧ wa na mbɛt.

³Mɛ beka ba kóò tɛ-wa na, mɛ beka ha̧ o boko-bem kɔ-mɛ nɛ kóò ha̧ o bem kɔ-wa na, in mɛ beka ba o boko-bem kɔ-wa nɛ kóò ha̧ o bem kɔ-mɛ na;

⁴wen ká wa tɛɛ e nɛɛ ɗoŋ-am duk mɛ gasi o ŋma sɔ̧ nɛtɛ. K’ɛ̀nɛ̀ de hegɔ, GASA WAN tɛ kpa ɗaŋsee sɛn zu'nɛ́ lɛŋ, ɓɛɛ ɛnɛ tɛ kum.

⁵Mɔ n’ɛnɛ tɛ de in o bíí nɔ‘i nɛ mɔ'ɔ: ɛ́nɛ́ tɛ gbin o fara-ɗafi-sɔ̧ kɔ-wa a nù. Ɛnɛ tɛ gbin o ta-zu-nù in o sɛka-te nɛ wa gasi hee sɔ̧ ga a nù. Ɛnɛ tɛ kai o géé-sɔ̧ kɔ-wa a tɛ wee,

⁶wen ɛnɛ nɛ bíí nɛ dúk nɛ ko GASA WAN Sɔ̧ k’ɛ́nɛ́. Nɛ́ ɛnɛ a̧ GASA WAN Sɔ̧ k’ɛ́nɛ́ hoka mɛ duk nɛ́ war dukbíí kɔ̧-a̧ mgbara o bíí lɛŋ nɛ ya zu nù.

⁷«Bó nɛ́ GASA WAN hoka'nɛ wen n’ɛnɛ dɔka gan o oi dukbíí zaŋnu’ɛ na. Ɛnɛ iŋa mbɛt'e nɛ́ ɛnɛ'ɛ dɔk sɛn zaŋnu’ɛ na ɓɛɛ.

⁸Kà GASA WAN nɛ́ foo'nɛ́ gbonɛ nɛ ŋgai er-a nɛ kɔ̧ tua-bara er wannu Egiptɛ, gɔn nɛ zu'nɛ́, mɛ̀ nɛ́ wen nɛ GASA WAN kɔ̧ɔ̧‘nɛ́ ɓɛɛ kasi nɔɔ-tɔk kɔ‘i in o dáà k’ɛ́nɛ́.

⁹Ɛnɛ tɛ iŋ kànà‘e kpasa Sɔ̧ nɛ́ GASA WAN Sɔ̧ k’ɛ́nɛ́; a̧ kasi nɔɔ-tɔk kɔ̧-a̧ in deako kɔ̧-a̧ kasi hɔ tɛ bezaŋ war booro in o wi nɛ kɔ̧ a̧ in nɛ kasi o heembea kɔ̧-a̧,

¹⁰ɓɛɛ a̧ kifi er ɗaŋmɔ kifi ha̧ wi nɛ sɛn a̧, ɓɛɛ a̧ gbɛa a̧; a̧ nik naŋ-a tɛ kifa er na.

¹¹Ɛnɛ tɛ kasi o heembea, o ha̧a̧nú in o yuwar duka-a n'am usi h’ɛ́nɛ́ sɔsɔɔ h’ɛ́nɛ́ mɛ ba de nɛ tom.»

¹²«K’ɛ̀nɛ̀ zii o yuwar duka-a nɔ‘i in k’ɛ́nɛ́ kai wa de nɛ tom, GASA WAN Sɔ̧ k’ɛ́nɛ́ tɛ kasi nɔɔ-tɔk in deako hee mɔ'ɔ n'aa kana so mɔ sɛnɛ ha̧ o dáà k’ɛ́nɛ́ ga.

¹³A̧ tɛ kɔ̧‘nɛ́, a̧ tɛ tok de yoŋgo zu'nɛ́, ɓɛɛ a̧ tɛ de ha̧ kpar'nɛ́ mɛ dɔk. A̧ tɛ tok de yoŋgo zu o bezaŋ‘nɛ́ in zu o nyɔnɔ k’ɛ́nɛ́; a̧ tɛ tok de yoŋgo zu fɔ-alkamaari k’ɛ́nɛ́, zu mbe dɔ̧ɔ̧ in nɔ̧́ k’ɛ́nɛ́, zu nana-ndai in zu o nana-sami k’ɛ́nɛ́ tɛ nù n'aa kana mɔ ha̧ o dáà k’ɛ́nɛ́‘e, wi tɛ ha̧ h’ɛ́nɛ́.

¹⁴A̧ tɛ tok de yoŋgo h’ɛ́nɛ́ mɛ gan zu o dɔka zuduk lɛŋ, o bíí k’ɛ́nɛ́ beka yar ndɔra na, kóó nɛ wiwii, kóó nɛ okoo, kóó nɛ mɔ-dai k’ɛ́nɛ́ mbɛt.

¹⁵GASA WAN tɛ ndak o zɛɛ nɛtɛ nɛtɛ in o ɗaŋ zɛɛ-geŋa n’ɛnɛ zɔka so sɛn nú Egiptɛ nyɛi̧ nɛ ɛnɛ. O zɛɛ nɔ‘i beka hɔ katɛ‘nɛ́ na; a̧ tɛ tom wa si zu o wi-sɛn'nɛ́ ɛ̧.

¹⁶Ɛnɛ tɛ kum o bíí nɛ GASA WAN Sɔ̧ k’ɛ́nɛ́ tɛ fo e kɔ̧ er'nɛ́ lɛŋ. Ɛnɛ beka zɔk wa nɛ ko na, in ɛnɛ beka gasi o sɔ̧ kɔ-wa na, wen k’ɛ́nɛ́ tɛɛ tik sak lɛŋ.

¹⁷«Ŋmafara mɛ tɛ ta mɔ hee mɔ'ɔ ga: ‹O dukbíí nɔ'ɔ dɔka gan am, hee ge a̧‘m tɛ ndak nɛ wa yinɛ ge?›

¹⁸Ká mɛ yu wa na, tɛ-mɛ tɛ mbaŋ ɗoŋ mɔ nɛ GASA WAN Sɔ̧ kɔ-mɛ dee so pi̧ zu wannu Egiptɛ in nù kɔ̧-a̧ lɛŋ,

¹⁹o gasa weamɔ nɛ yí-mɛ zɔka, o mɔɔ-usi-mɔ in o mɔɔ-kifi, mɔɔ-oi ŋgai-te-er GASA WAN Sɔ̧ kɔ-mɛ ŋgimbi n'aa mgbɔɔ nɛ mɛ gbonɛ; mɛ̀ nɛ́ hegɔ a̧ GASA WAN Sɔ̧ kɔ-mɛ tɛ de nɛnɛ in o wi nɛ nyɛma so mɛ pi̧ kíì tɛ-mɛ.

²⁰GASA WAN Sɔ̧ kɔ-mɛ tɛ tom gba gíí dɛnɛ mɛ dɔ o wan nɛ ɓɔna in o wan nɛ tɛ yu mɔ hu̧si gbɛ.

²¹Ká kíì de mɛ wen wa na, wen GASA WAN Sɔ̧ kɔ-mɛ a̧a̧ in mɛɛ; a̧ nɛ Sɔ̧ nɛ ɔ gasa in nɛ ɔ ŋgaya nyɛmna.

²²GASA WAN Sɔ̧ kɔ-mɛ tɛ ndak o dukbíí nɔ‘i yinɛ ti mɛ mɔktɛ mɔktɛ; mɛ beka gbɛ wa hegɔ lɛŋ war kpɔk na, wen ká o ɗaŋ saɗi zaŋbɛɛ tɛɛ dɔk gan zu mɛ.

²³GASA WAN Sɔ̧ kɔ-mɛ tɛ fo wa a kɔ̧ er-mɛ, a̧ tɛ pi̧ gasa kíì tɛ-wa kum nɛ wa.

²⁴A̧ tɛ a o wannu kɔ-wa kɔ̧ er-mɛ, ɓɛɛ mɛ tɛ bi nin-wa sɛn zaŋnu yinɛ. Ŋma mgbara wa kpɔk nɛ tɛ ba zu nɛ ŋgɔn ti mɛ bo na hɔ wese nɛ mɛ tɛ kum wa lɛŋ.

²⁵Mɛ tɛ dɔ o géé-sɔ̧ kɔ-wa wen ká mɛ tik sak tɛ kaia o laa kɔ-wa nɛ‘i dee nɛ bu-mbɔi in lɔr, wen mɔ‘i nɛ gasa ɗaŋmɔ nyɛmna yí GASA WAN Sɔ̧ kɔ-mɛ.

²⁶Mɛ beka ba ndiŋmɔ pi̧ kɔ̧ tua kɔ-mɛ na, wen k’ɛ́nɛ́ tɛɛ kum in mɔ‘i mbɛt; mɛ tɛ zɔk mɔ‘i hee gasa ɗaŋmɔ in hee ndiŋmɔ ga mbɛt, wen nɛ́ mɔ nɛ fom baa baa.»