Read Northwest Gbaya JEAN 4 Bible Online

JEAN 4 - Northwest Gbaya bible

JEAN 4

¹O Fariziɛn zia nyɛrɛ tɔ̧a̧-a̧ nɛ̀ o bíí tɔ̧‘e o bíí nɛɛ ɗoŋ Jesu nɛ̀ dɔka-a gan Jean, ɓɛɛ nɛ́ mɔ'ɔ n'aa zui nɛ̀ wa mɛ ya o ŋgaiwi kɔ̧-a̧.

²(Ɓɛɛ kpasawen, Jesu zui kɔ‘i o bíí na, nɛ́ o ŋgaiwi kɔ̧-a̧ a̧ zui zuia wa ɛ̧́.)

³Ŋgimbi nɛ̀ nyɛrɛmɔ‘i aa zer Jesu, a̧ kura e Judee duk, ɓɛɛ si ɗoŋ Galilee mɛ.

⁴Tɛ sii ɗoŋ‘i, a̧ tɛ ɓir kànà nɛ̀ nú Samarii.

⁵Nɛ́ mɔ'ɔ n'aa hɔɔ ŋma gasa ye sɛn nú Samarii, nin ye'i nɛ́ Sikar, nɛ̀ duk nyɛi̧ nɛ̀ ŋmaa in nù nɛ̀ Jakob ha̧a̧ so ha̧ bem kɔ‘i Jozɛf na.

⁶Gɔna-yì ko Jakob a̧a̧ so fara'i. Jesu mbɔia tɛ nɔ̀, ɓɛɛ duk nù sɛn ká̧ yì‘i; ŋgimbi'i wese hɛɗa zu wi kaɗi.

⁷Nɛ́ mɔ'ɔ nɛ̀ ŋma ko Samarii tɛɛ mɛ ɗu yì; ɓɛɛ Jesu tɔ̧ ha̧ a̧: «Mɛ̀ há̧ yì ha̧‘m nɔ.»

⁸(Wen o ŋgaiwi ko Jesu nɛ̀ɛ̀ so saaye mɛ hi̧fi nyɔŋmɔ.)

⁹Ko Samarii tɔ̧ɔ̧ ha̧ Jesu: «Mɛ́ nɛ́ Juif, mí nɛ́ ko Samarii, mɛ́ tɛ́ kɔfi yì er-am hee ge?» (Wen o Juif kɔ̧ wen ko o be Samarii na.)

¹⁰Jesu kifa nú ha̧ a̧: «Kà mɛ iŋ so ha̧a̧mɔ ko Sɔ̧, in wi nɛ̀ tɔ̧ wen ha̧ mɛ‘e: mɛ̀ há̧ yì ha'i nɔ wó‘i, nɛ́ mɛ́'ɛ tɛ̀ɛ́ ak so mɔ, ɓɛɛ a̧ ha̧a̧ gbafor-yì ha̧ mɛ.»

¹¹Kóò‘i tɔ̧ɔ̧ ha̧ a̧: «Nyaa, ŋma mɔɔ-ɗu-yì bo er'nɛ́ na, ɓɛɛ gɔna-yì ɔ ɗuka mbɛt, ɛ́nɛ́ tɛ kpa yí-gbafor'i déè?

¹²Ɛ́nɛ́ ta k’ɛnɛ, ɛ́nɛ́ nɛ̀ tɛ‘nɛ́, ɛ́nɛ́ gana zɔmdáa k’ɛɛ Jakob nɛ̀ nɔɔ yì'ɛ nɛ̀ tɛ-wi mbɛt in o bem kɔ‘i ká bá nɛ̀ o mɔ-dai kɔ‘i, ɓɛɛ ká ha̧ yì'ɛ h’ɛ́ɛ́'ɛ nde?»

¹³Jesu kifa nú ha̧ a̧: «Wi nɛ̀ nɔ yì'ɛ, wɔ-yì tɛ gbɛ a̧ woyo,

¹⁴ɓɛɛ wi nɛ̀ tɛ nɔ yì n'am tɛ ha̧ ha̧ a̧‘i, wɔ-yì beka gbɛ wi’ɛi ɓɔna. Yì‘i tɛ kifi nɛ́ gbafor-yì nɛ̀ tɛ fok mɛ de ha̧ a̧ mɛ duk kpasa kpoo nɛ kpoo.»

¹⁵Kóò‘i tɔ̧ɔ̧ ha̧ Jesu: «Nyaa, ɛ̀nɛ̀ há̧ yì‘i ha̧‘m nɔ wen ká wɔ-yì tɛ́ɛ̀ gbɛ‘m, ɓɛɛ ká‘m tɛ́ɛ̀ pii ɗoŋ mɛ ɗu yì'ɛ woyo.»

¹⁶Ɓɛɛ Jesu tɔ̧ ha̧ a̧: «Mɛ̀ nɛ́ɛ̀ sa wíì kɔ-mɛ, ɓɛɛ ɛ̀nɛ̀ píí ɗoŋ in ŋmaa.»

¹⁷Kóò‘i kifa nú: «Mí bó kɔ‘m nɛ̀ wíì na.»

¹⁸Ɓɛɛ Jesu tɔ̧: «Nɛ̀ mbetɛ, wen'i nɛ̀ mɛ tɔ̧a̧‘i nɛ́ kpasawen, mɛ́ bó nɛ̀ wíì na; wen mɛ gbia wíì mɔɔrɔ kaɗi, ɓɛɛ wan nɛ̀ mɛ duk in a̧ kinii'i, bó nɛ́ wíì kɔ-mɛ na; wen nɛ̀ mɛ́ tɔ̧a̧‘i nɛ́ kpasawen.»

¹⁹Kóò‘i tɔ̧ɔ̧ ha̧ a̧: «Nyaa, mi zɔka ɛ́nɛ́ nɛ́ wi-tɔ̧-wen oi nú Sɔ̧.

²⁰O zɔmdáa k’ɛɛ yaa so gasi nɛ̀ Sɔ̧ zu kaya’ɛ, ɓɛɛ k’ɛ́nɛ́ o Juif, ɛnɛ‘e ndé, ɓaa fara-gasi Sɔ̧ nɛ́ Jerusalɛm ɓɛɛ.»

²¹Ɓɛɛ Jesu tɔ̧ ha̧ a̧: «Kóò'ɛ, mɛ̀ kɔ̧́ ɗɔɔ wen kɔ‘m; ŋma ŋgimbi tɛ hɔ n’ɛnɛ beka gasi Dáà sɛn zu kaya’ɛ, kóó sɛn Jerusalɛm ɓɔna.

²²K’ɛ́nɛ́, ɛ́nɛ́ gasi nɛ́ mɔ n’ɛnɛ iŋ na, ɓɛɛ k’ɛ́ɛ́, ɛ́ɛ́ gasi nɛ́ mɔ n’ɛɛ iŋa, wen yuwar-kpasa-a tɛ́ nɛ̀ tɛ̀ o Juif.

²³Ŋgimbi tɛ hɔ, ɓɛɛ ŋgimbi'i nɛ́ mɔ'ɔ n’ɛɛ ya sɛnɛ kinii'i, nɛ̀ o kpasa wi-gasi Dáà tɛ gas'aa nɛ̀ ŋgai ko Sa̧a̧ Ɔmi in nɛ̀ kpasawen, ɓɛɛ mɛ̀ nɛ́ pɛrti o wi-gasi-sɔ̧ hegɔ‘i, a̧ Dáà kii.

²⁴Sɔ̧ nɛ́ Ɔmi; mɛ̀ nɛ́ hegɔ o wi nɛ̀ gas'aa, tɛ gasi kànà a̧ nɛ̀ ŋgai ko Sa̧a̧ Ɔmi in nɛ̀ kpasawen.»

²⁵Kóò‘i tɔ̧ɔ̧ ha̧ a̧: «Mi iŋa'e Mɛsii (nɛ̀ wa sa'e Krist), tɛ́ tɛ̀, ɓɛɛ ŋgimbi n'aa tɛ́ tɛ̀, nɛ́ a̧ a̧ tɛ́ tɔ̧ mɔ lɛŋ h’ɛ́ɛ́.»

²⁶Jesu tɔ̧ɔ̧ ha̧ a̧: «Wi’ɛi, nɛ́ mí n'am tɔ̧ wen in mɛ'ɛ.»

²⁷O ŋgaiwi ko Jesu pia ɗoŋ nyɛm nɛ̀ ŋgimbi'i; ɗɛɗɛ-wa gɔna tɛ zɔka Jesu fara tɔ̧ɔ̧ wen in okoo. Ɓɛɛ ŋma bíí mɛ ak a̧‘e: «Nɛ́ ge a̧ a̧ kɔ̧a̧ in kóò‘i ge?» kóó «Nɛ́ ge wen ge a̧ a̧ tɔ̧ in kóò‘i ge?» bo na.

²⁸Ɓɛɛ kóò‘i e kpáná-ɗu-yì kɔ‘i ɓɔn hi̧i̧, ɓɛɛ ma yì si saaye mɛ tɔ̧ ha̧ o bíí‘e:

²⁹«Ɛ̀nɛ̀ tɛ́ɛ̀ zɔk ŋma wiwii nɛ̀ tɔ̧ɔ̧ mɔ n'am dee so lɛŋ ha̧‘m. Wi’ɛi bó nɛ́ Mɛsii na nde?»

³⁰Wa gboo saaye, ɓɛɛ nɛ́ sitɛ Jesu.

³¹Tɛ́ ŋgimbi'i, o ŋgaiwi kɔ̧-a̧ aia nú ha̧ a̧: «Wan-usi-mɔ, ɛ̀nɛ̀ nyɔ́ŋ mɔ sɛ wa!»

³²Ɓɛɛ Jesu tɔ̧ ha̧ wa: «Mi a̧a̧ nɛ̀ ŋma nyɔŋmɔ n’ɛnɛ iŋ na.»

³³Ɓɛɛ o ŋgaiwi kɔ̧-a̧ ak o ŋmaa: «Ŋma bíí baa nyɔŋmɔ baa tɛnɛ ha̧ a̧ nde?»

³⁴Jesu tɔ̧ɔ̧ ha̧ wa: «Nyɔŋmɔ kɔ‘m, mɛ̀ nɛ́ ha̧‘m mɛ de mɔ nɛ̀ Wan nɛ̀ toma'm tɛnɛ kɔ̧a̧, in ha̧‘m mɛ kaɗi tom n'aa ha̧a̧ ha̧‘m mɛ de.

³⁵Bó nɛ́ ɛ́nɛ́ tɔ̧‘e: ‹Oi kii-zɛ ɓɔna naar ɓɛɛ wi mɔi̧a nyɔnɔ na?› Ɓɛɛ mi tɔ̧ h’ɛ́nɛ́: ɛ̀nɛ̀ zɔ́k o fɔ nɛ̀ nyɔnɔ sɔka sɛnɛ mɛ mɔi̧ kaɗi’ɛ.

³⁶Wi-mɔi̧-nyɔnɔ kpaa mɔɔ-oi-tom kɔ‘i kaɗi, ɓɛɛ a̧ mɔi̧ nɛ́ waya-mɔ wen duka-kpasa kpoo nɛ kpoo; hegɔ‘i, ɓɛɛ wi-pɛ-kpar-mɔ in wi-mɔi̧-nyɔnɔ ya nɛ̀ desee in ŋmaa.

³⁷Mɛ̀ nɛ́ wen hegɔ tɛ mɔ‘i, tua-wen’ɛ nɛ́ kpasawen nɛ̀ tɔ̧‘e: ‹Ŋma bíí pɛ kɔ‘i nɛ́ kpar-mɔ, ɓɛɛ ɓii-aa mɔi̧a kɔ‘i nɛ́ mɔi̧a-a.›

³⁸Mi toma'nɛ́ mɛ mɔi̧ nyɔnɔ n’ɛnɛ zɔk bɔnɛ tom-aa na; nɛ́ o ŋma bíí a̧ zɔka bɔnɛ-a ɓɛɛ k’ɛ́nɛ́, ɛ́nɛ́ kpá nɛ́ mɔɔ-oi-tɔm kɔ-wa.»

³⁹O bíí Samarii nɛ̀ dɔka-a tɛ ye'i kɔ̧ɔ̧ ɗɔaa ha̧ Jesu wen zu wen nɛ̀ koo'i tɔ̧a̧‘e ndé: «A̧ tɔ̧ɔ̧ mɔ n'am dee so lɛŋ ha̧‘m.»

⁴⁰Wen hegɔ, o bíí Samarii nɛ̀ɛ̀ tɛ a̧, ɓɛɛ wa ai nú ha̧ a̧ mɛ duk in wa; hegɔ a̧ ɔɔ in wa zɛ yiitoo.

⁴¹O mbe bíí nɛ̀ dɔka-a kɔ̧ɔ̧ ɗɔaa ha̧ Jesu wen zu wen n'aa tɔ̧a̧;

⁴²ɓɛɛ nɛ́ mɔ'ɔ nɛ̀ wa tɔ̧ɔ̧ ha̧ kóò‘i: «Bó nɛ́ ɛ́ɛ́ kɔ̧ɔ̧ ɗɔaa ha̧ a̧ wen zu wen kɔ-mɛ ɓɛɛ na; ɛ́ɛ́ zia wen kɔ̧-a̧ nɛ̀ tɛ-ɛɛ, ɓɛɛ ɛ́ɛ́ iŋ nɛ̀ mbetɛ‘e, a̧ nɛ́ Wan-kpasi o bíí nù lɛŋ.»

⁴³Zɛ yiitoo ɗoŋ mɔ‘i, Jesu kura yak si nú Galilee mɛ.

⁴⁴Wen Jesu nɛ̀ tɛ-wi baa tɔ̧ so'e: «O bíí yu o wi-tɔ̧-wen oi nú Sɔ̧ tɛ mgbák nù kɔ-wa na.»

⁴⁵Ŋgimbi n'aa hɔɔ Galilee o bíí nù‘i kpɛka a̧ nɛ̀ de-a nyɛmna, wen wa mbɛt nɛ̀ɛ̀ so gbaŋa Paska nɛ̀ dee so Jerusalɛm, ɓɛɛ wa zɔk mɔ n'aa dee so lɛŋ ŋgimbi'i.

⁴⁶Jesu sii ɗoŋ saaye Kana sɛn nú Galilee, fara n'aa bàá kpai so yì nɛ̀ dɔ̧ɔ̧. Ŋma gasawi ko wannu duka so hi̧i̧, nɛ̀ bem kɔ̧-a̧ ɔ so nɛ́ zɛɛ sɛn Kafarnaum mɛ.

⁴⁷Ŋgimbi n'aa zia'e Jesu kura Judee tɛ pii Galilee wó, a̧ nɛɛ mɛ ai nú ha̧ Jesu mɛ nɛ̀ɛ́ kpasi bem kɔ̧-a̧ nɛ̀ hɛɗa fio kaɗi.

⁴⁸Jesu tɔ̧ɔ̧ ha̧ a̧: «K’ɛ̀nɛ̀ zɔ́k o mɔɔ-usi-mɔ in o mɔɔ-gɔn-ɗɛɗɛ na, ɛ́nɛ́ beka kɔ̧ ɗɔaa na.»

⁴⁹Gasawi'i kifa nú ha̧ a̧: «Gasa Wan, ɛ̀nɛ̀ nɛ́ bee, wen ká bem kɔ‘m tɛɛ fe.»

⁵⁰Ɓɛɛ Jesu tɔ̧ ha̧ a̧: «Mɛ̀ sí ɗoŋ, bem kɔ-mɛ kpasa kaɗi.» Wi’ɛi kɔ̧ɔ̧ ɗɔɔ wen nɛ̀ Jesu tɔ̧a̧, ɓɛɛ si ɗoŋ,

⁵¹ɓɛɛ a̧ kpa ŋmaa in o wi-de-tom kɔ̧-a̧ nɛ̀ nɛ́ ɗoŋ-aa, ɓɛɛ wa tɔ̧ ha̧ a̧: «Bem k’ɛ́nɛ́ kpasa.»

⁵²A̧ aka wa: «Bem’ɛi kpaa daama tɛ ge ŋgimbi ge?» Wa kifa nú ha̧ a̧: «Zɛɛ‘i kaɗa tɛ-a mɛ mboyɛɛ tɛ gira wese.»

⁵³Ɓɛɛ dáa-wan-bem iŋa'e mɛ̀ nɛ́ tɛ́ kale ŋgimbi'i a̧ Jesu tɔ̧ɔ̧ nɛnɛ ha̧ a̧‘e: «Bem kɔ̧-a̧ kpasa kaɗi'i,» ɓɛɛ a̧ in o bíí kɔ̧-a̧ lɛŋ kɔ̧ ɗɔaa ha̧ Jesu.

⁵⁴Ɛ̧ɛ̧ hɛ̧ɛ̧ nɛ́ yiitoo mɔɔ-usi-mɔ nɛ̀ Jesu dee tɛ pia-ɗoŋ kɔ̧-a̧ nɛ̀ Judee pii Galilee.