Read Northwest Gbaya JEAN 7 Bible Online

JEAN 7 - Northwest Gbaya bible

JEAN 7

¹Ɗoŋ mɔ‘i, Jesu yara ɓɔn nú Galilee; a̧ kɔ̧ mɛ yar si nú Judee na wen o Juif kii nɛ́ war mɛ gbɛ a̧.

²Ɓɛɛ gbaŋa ko o Juif nɛ‘i sa'e gbaŋa Tua-laa hɛɗa so kaɗi mbɛt.

³O nya kɔ̧-a̧ tɔ̧ɔ̧ ha̧ a̧: «K’ɛ́nɛ́ duk ɓɔn hɛ̧ɛ̧ na, ɛ̀nɛ̀ yák si Judee ha̧ o ŋgaiwi k’ɛ́nɛ́ mɛ zɔk gasa tom n’ɛnɛ de.

⁴Wi nɛ̀ kɔ̧ɔ̧ ha̧ o bíí mɛ iŋ a̧, de mɔ nɛ̀ hu̧sa̧-a̧ na. Hee mɔ'ɔ n’ɛnɛ dé nɛ́ gasa tom ga, ɛ̀nɛ̀ dé ɓɔn gbaayí o bíí lɛŋ ha̧ wa zɔk.»

⁵(Kóó nɛ́ o nya a̧ mbɛt kɔ̧ ɗɔaa ha̧ a̧ na.)

⁶Ɓɛɛ Jesu tɔ̧ ha̧ wa: «Ŋgimbi kɔ‘m tɛ hɔ hɔ̧ɔ̧ na; ɓɛɛ k’ɛ́nɛ́, ɛ́nɛ́ a̧a̧ nɛ̀ de ŋgimbi ɓɔnsɛnɛ.

⁷O bíí zaŋnu’ɛ nyɛm mɛ sɛn'nɛ́ na, ɓɛɛ war kɔ‘m, wa tɛ sɛn am wen mi de nɛ́ sedaako'e, tom kɔ-wa de na.

⁸K’ɛ́nɛ́, ɛ̀nɛ̀ gár gbaŋa'i; kɔ‘m, mí beka nɛ́ na, wen ŋgimbi kɔ‘m tɛ hɔ hɔ̧ɔ̧ na.»

⁹Ɗoŋ n'aa tɔ̧ɔ̧ hegɔ kaɗi, a̧ duka ɓɔn Galilee.

¹⁰Ɓɛɛ ŋgimbi nɛ̀ o nya a̧ gara kɔ‘i gbaŋa yak kaɗi, a̧ mbɛt, kura nɛ́ ɗoŋ wa nɛ̀ hu̧sa̧-a̧, bíí zɔk a̧ na.

¹¹Tɛ́ ŋgimbi gbaŋa'i, o Juif kia a̧ ak nɛ̀ mɔ‘e: «A̧ a̧a̧ bɔɔ de?»

¹²O giiwi nɛ̀ mɔi̧a tɔ̧ɔ̧ wen tɛ-a dam fara lɛŋ. O ŋma tɔ̧a̧: «A̧ nɛ́ wi-de-demɔ.» O ŋma tɔ̧ɔ̧ kɔ‘i: «A̧ ɔr nɛ́ bíí.»

¹³Ɓɛɛ ŋma bíí mɛ tɔ̧ wen kɔ̧-a̧ nɛ̀ ŋgɔn bo na, wen wa de nɛ́ kii o Juif.

¹⁴Wa dee gbaŋa ɗoŋ-aa nyɛi̧ kaɗi, ɓɛɛ Jesu ye kɔ̧́ Tua ko Sɔ̧, duk usi nɛ̀ mɔ.

¹⁵Ɗɛɗɛ o Juif gɔna, ɓɛɛ wa tɔ̧: «Wi’ɛ dee hee ge iŋ nɛ̀ mɔ hegɔ nɛ̀ bó nɛ́ a̧ yamba so nɛ́ mɔ na’ɛ ge?»

¹⁶Jesu kifa nú ha̧ wa: «Mɔ n'am usi tɛ́ nɛ̀ tɛ‘m na, ɓɛɛ tɛ́ nɛ̀ tɛ́ Wan nɛ̀ toma'm tɛnɛ.

¹⁷Kà ŋma bíí a̧ kɔ̧ɔ̧ mɛ́ de mɔ nɛ̀ Sɔ̧ kɔ̧a̧, wi’ɛi tɛ iŋ‘e usamɔ‘i tɛ̀ɛ́ nɛ̀ tɛ́ Sɔ̧, kóó mi tɔ̧ nɛ́ wen kɔ‘m nɛ̀ zu'm.

¹⁸Wi nɛ̀ tɔ̧ wen mɔ nɛ̀ zɔk nɛ́ a̧ nɛ̀ tɛ-a, kii nɛ́ gasamɔ kɔ‘i, ɓɛɛ wi nɛ̀ kii gasamɔ wen wi nɛ̀ toma a̧, nɛ́ wi-tɔ̧-kpasawen, ɔrmɔ bo tɛ-a na.

¹⁹Bó nɛ́ Moisɛ ha̧a̧ so heembea h’ɛ́nɛ́ na? Ɓɛɛ ŋma bíí kpɔk mgbara'nɛ́ nɛ̀ de mɔ nyɛm nɛ̀ ɗoŋ heembea'i bo na! Ɛ́nɛ́ kɔ̧ɔ̧ mɛ gbɛ‘m wen ge?»

²⁰Giiwi kifa nú: «Ɗaŋ-sɔ̧ a̧a̧ tɛ-mɛ. Mɛ́ zɔka nɛ́ o'o kɔ̧ɔ̧ mɛ gbɛ mɛ o?»

²¹Jesu baa wen ɓɛɛ tɔ̧ ha̧ wa woyo: «Nɛ́ mɔ kpɔk a̧‘m dea, ɓɛɛ nɛ́ mɔ'ɔ nɛ̀ ɗɛɗɛ‘nɛ́ lɛŋ gɔna’ɛ!

²²Moisɛ ha̧a̧ heembea gɔna-bɔr h’ɛ́nɛ́ (ɓɛɛ bó nɛ́ Moisɛ a̧ ku̧u̧ naŋ-a na, mɔ‘i tɛ̀ɛ́ nɛ̀ tɛ̀ o zɔmdáa mɛ tɛnɛ), ɓɛɛ ɛ́nɛ́ gɔn bɔr wese-ɔm-tɛ mbɛt.

²³Hegɔ mbɛt, gɔna-bɔr n’ɛnɛ gɔn wese-ɔm-tɛ'ɛ, ɛ́nɛ́ tá k’ɛ́nɛ́‘e mɔ‘i bó nɛ́ gbina-heembea ko Moisɛ na, ɓɛɛ wen ge s’ɛnɛ kpa ɗaŋsee zu'm wen n'am kpasa kiitɛ bíí nɛ̀ oi-aa lɛŋ wese-ɔm-tɛ ge?

²⁴Ɛ̀nɛ̀ káɗí gɔna kita tɛ mɔ n’ɛnɛ zɔk nɛ̀ zan'i, ɓɛɛ ɛ̀nɛ̀ gɔ́n kita nɛ̀ yuwar-a.»

²⁵O ŋma bíí Jerusalɛm tɔ̧a̧: «Bó nɛ́ wi nɛ̀ wa kii mɛ gbɛ'ɛ nɛ́ mɔ'ɔ na?

²⁶Ɛ̀nɛ̀ zɔ́k a̧ n'aa tɔ̧ wen e yí wa nɛnɛ, ɓɛɛ ŋma bíí hu̧i̧ nú tɔ̧ wen in a̧ na! Mɔ'ɔ, o gasawi k’ɛɛ iŋa nɛ̀ mbetɛ‘e, wi’ɛ nɛ́ Mɛsii nde?

²⁷Ŋgimbi nɛ̀ Mɛsii bé tɛ̀ɛ́ tɛ, ŋma bíí beka iŋ fara n'aa tɛ nɛnɛ na, ɓɛɛ war ko wi’ɛ, ɛ́ɛ́ iŋa fara n'aa tɛ nɛnɛ.»

²⁸Jesu duka usi nɛ̀ mɔ kɔ̧́ Tua ko Sɔ̧ ɓɛɛ tɔ̧: «Ɛ́nɛ́ iŋa'm ɓɛɛ n’ɛnɛ iŋ fara n'am tɛ nɛnɛ mbɛt. Ɓɛɛ bó nɛ́ mí tɛ̀ɛ́ nɛ̀ zu'm na. Wi nɛ̀ toma'm tɛnɛ‘i nɛ́ wi-tɔ̧-kpasawen; k’ɛ́nɛ́, ɛ́nɛ́ iŋ a̧ na.

²⁹Kɔ‘m, mi iŋa a̧ wen mi tɛ̀ɛ́ nɛ̀ tɛ a̧, ɓɛɛ nɛ́ a̧ á̧ toma'm tɛnɛ.»

³⁰Wa kia mɛ ba a̧, ɓɛɛ ŋma bíí fo a̧ nɛ̀ er na wen ŋgimbi kɔ̧-a̧ tɛ́ hɔ hɔ̧ɔ̧ na.

³¹O bíí nɛ̀ dɔka-a mgbara o giiwi kɔ̧ɔ̧ ɗɔaa ha̧ a̧ ɓɛɛ tɔ̧: «Mɔ‘i, Mɛsii bé tɛ̀ɛ́ tɛ, ɓɛɛ a̧ tɛ́ de mɔɔ-usi-mɔ gan ko wi’ɛ nɛ̀ de’ɛ?»

³²O Fariziɛn zia mɔ lɛŋ nɛ̀ o giiwi fu̧i̧ ha̧ o ŋmaa nɛnɛ wen zu a̧, ɓɛɛ wa in o gasa wan-ɗafi-sɔ̧, tom o wi-biro mɛ nɛ̀ɛ́ ba a̧.

³³Nɛ́ mɔ'ɔ nɛ̀ Jesu tɔ̧ɔ̧ ha̧ wa: «Mí biti in'nɛ̀ɛ́ ŋgimbi tikiɗi, ɓɛɛ mi sii ɗoŋ tɛ wi nɛ̀ toma'm tɛnɛ.

³⁴Ɛ́nɛ́ tɛ kii am takaɗi, ɛ́nɛ́ beka kpa'm na; fara n'am tɛ duk'i, ɛ́nɛ́ nyɛm mɛ hɔ sɛnɛ na.»

³⁵Ɓɛɛ o Juif tɔ̧ sitɛ o ŋmaa: «A̧ tɛ yak si déè s’ɛ́ɛ́ beka kpa a̧ na'i ge? A̧ tɛ yak si ɗoŋ o Juif nɛ̀ yambala si mgbara o Grɛk mɛ usi mɔ ha̧ o Grɛk nde?

³⁶Wen n'aa tɔ̧‘e: ‹Ɛ́nɛ́ tɛ kii am takaɗi, ɛ́nɛ́ beka kpa'm na; ɓɛɛ fara n'am tɛ duk'i, ɛ́nɛ́ nyɛm mɛ hɔ sɛnɛ na› wó'ɛ, gba̧a̧ wen'i bɔɔ hee ge?»

³⁷Sɔŋkur wese gbaŋa duka nɛ́ gasa wese. Wese'i Jesu kura yɔr ŋgɔn ɓɛɛ tɔ̧ wen nɛ̀ hee-ger'e: «Wi nɛ̀ wɔ-yí gbɛ a̧ a̧ tɛ́ tɛ‘m, a̧ nɔ́.

³⁸Hee mɔ'ɔ nɛ̀ Yɔramɔ tɔ̧ɔ̧ ga: ‹Wi nɛ̀ kɔ̧ ɗɔaa ha̧‘m, gbafor-yì duka-kpasa tɛ fok nɛ̀ kɔ̧́ see-aa gbonɛ.› »

³⁹(Jesu tɔ̧ɔ̧ wen'i zu Sa̧a̧ Ɔmi nɛ̀ o bíí nɛ̀ kɔ̧ ɗɔaa ha̧ a̧ tɛ kpa. Wen tɛ ŋgimbi'i Sa̧a̧ Ɔmi tɛ hɔ hɔ̧ɔ̧ na, wen Jesu tɛ ye tɛ gasamɔ kɔ‘i hɔ̧ɔ̧ na.)

⁴⁰O ŋma bíí poo giiwi nɛ̀ zia wen'i tɔ̧a̧: «A̧ nɛ́ Wi-tɔ̧-wen oi nú Sɔ̧ nɛ mbetɛ!»

⁴¹O ŋma tɔ̧ɔ̧ kɔ‘i: «Wi’ɛ nɛ́ Mɛsii!» Ɓɛɛ o ŋma woyo tɔ̧ɔ̧ kɔ‘i: «Krist tɛ̀ɛ́ tɛ̀ so nɛ̀ Galilee nde?

⁴²Bo nɛ́ Yɔramɔ tɔ̧ɔ̧‘e: ‹Mɛsii tɛ duk nɛ́ bezaŋ David nɛ̀ wa tɛ ko sɛn Bɛtlɛhɛm be geɗek ye ko David na nde?› »

⁴³Ɓɛɛ giiwi kɛ̧ tɛ̀ nɛ̀ ŋmaa wen zu a̧.

⁴⁴O ŋma mgbara wa kɔ̧ɔ̧ mɛ ba a̧, ɓɛɛ ŋma bíí fo a̧ nɛ̀ er na.

⁴⁵O wi-biro sii ɗoŋ tɛ o gasa wan-ɗafi-sɔ̧ in tɛ o Fariziɛn, nɛ̀ aka wa: «Ɛ́nɛ́ ba bɔɔ a̧ na wen ge?»

⁴⁶O wi-biro kifa nú ha̧ wa: «Ŋma bíí tɛ tɔ̧ wen hee wi’ɛi ga na!»

⁴⁷O Fariziɛn kifa nú ha̧ wa: «Oo, mɔ‘i ɔra'nɛ mbɛt?

⁴⁸Ŋma bíí kpɔk, kóó mgbara o dita-bíí, kóó mgbara o Fariziɛn, nɛ̀ kɔ̧ɔ̧ ɗɔaa ha̧ a̧ so sɛnɛ?

⁴⁹Giiwi nɔ'ɔ nɛ̀ iŋ kɔ‘i heembea na’ɛ, fom baa wa kaɗi.»

⁵⁰Ŋma bíí mgbara o Fariziɛn nɛ̀‘i sa'e Nikodɛm nɛ̀ nɛ̀ɛ̀ so tɛ Jesu nɛti tɔ̧a̧:

⁵¹«Heembea k’ɛɛ tɔ̧a̧‘e, bíí tɛ ɓa yoŋgo wen kɔ‘i, kà‘i iŋa mɔ n'aa dea, sɛka'i gɔna kita zu a̧.»

⁵²Wa kifa nú ha̧ Nikodɛm: «Mɛ́ nɛ́ be Galilee mbɛt. Mɛ̀ tɔ́r mɔ nɛ̀ a̧a̧ zaŋ kalata, ɓɛɛ mɛ́ tɛ́ iŋ‘e ŋma wi-tɔ̧-wen oi nú Sɔ̧ beka gbo nɛ̀ Galilee na.» [

⁵³Ɓɛɛ kóó o ndé kur nɛ́ kura-a, si ɗoŋ tɛ̀ kɔ‘i.