Read Northwest Gbaya JEAN 8 Bible Online

JEAN 8 - Northwest Gbaya bible

JEAN 8

¹Nɛ́ mɔ'ɔ nɛ Jesu kura ɓɛɛ yak si zu Kaya Te-nɔ̧́ mɛ.

²Mɛ tutuyɛ sut a̧ pia ɗoŋ pii kɔ̧́ Tua ko Sɔ̧, ɓɛɛ hee mɔ'ɔ nɛ̀ o bíí lɛŋ gara sitɛ a̧ ga, a̧ hira duk nù usi nɛ̀ mɔ ha̧ wa.

³Nɛ́ mɔ'ɔ nɛ̀ o wi-usi-heembea in o Fariziɛn mgbɔɔ ŋma okoo nɛ̀ wa kpaa fara de dàlà nɛnɛ tɛ Jesu, wa ee a see-a ti o bíí, ɓɛɛ wa tɔ̧:

⁴«Wan-usi-mɔ, ɛ́ɛ́ baa kóò'ɛ tɛ dee dàlà.

⁵Moisɛ yɔra zaŋ heembea h’ɛ́ɛ́‘e ndé, wi yó o pɛrti okoo nɔ'ɔ nɛ̀ ta gbɛ yinɛ. Ɓɛɛ k’ɛ́nɛ́, ɛ́nɛ́ tɔ̧ bɔɔ hee ge?»

⁶Wa tɔ̧ wen'i mɛ ba wen kɔ̧́ zaŋ-aa, ha̧ wa mɛ pi̧ wen zu a̧. Ɓɛɛ Jesu zum zu, yɔr mɔ nɛ̀ bekete-er mbɔɗɔnu.

⁷Hee mɔ'ɔ nɛ̀ wa ak nɛ́ mɔ in a̧ siti siti ga, a̧ baa zu nɛ̀ ŋgɔn, ɓɛɛ tɔ̧ ha̧ wa: «Ŋma bíí mgbara'nɛ́ nɛ̀ de kɔ‘i ɗaŋmɔ na ndó-ndó-ndó, a̧ pí̧ kuti ta yó a̧.»

⁸Ɓɛɛ a̧ zum zu-a yɔr mɔ mbɔɗɔnu woyo.

⁹Wa zia wen'i hegɔ, ɓɛɛ wa dak zu-wa, ku̧u̧naŋ-a nɛ̀ tɛ o sɔkawi hegɔɔ yak nɛnɛ; ɓɛɛ e nɛ́ Jesu ɛ̀nɛ̀ in kóò‘i. Hee mɔ'ɔ nɛ̀ kóò‘i ɓɔna duka-a see-a ga,

¹⁰Jesu baa zu nɛ̀ ŋgɔn woyo, ɓɛɛ ak a̧: «Kóò'ɛ, o wi nɔ'ɔ a̧a̧ bɔɔ de? Ŋma bíí gɔn kita zu mɛ na?»

¹¹A̧ kifa nú ha̧ Jesu: «Íì, ŋma bíí gɔn kita zu'm na, Wan-usi-mɔ!» Jesu tɔ̧ɔ̧ ha̧ a̧: «Mi mbɛt, mi gɔn kita zu mɛ na. Mɛ̀ yák mɔ kɔ-mɛ, ɓɛɛ ká mɛ́ de ɗaŋmɔ ɓɔna.»]

¹²Jesu tɔ̧ɔ̧ ha̧ wa woyo: «Mí nɛ́ sa̧a̧mɔ zaŋnu; wi nɛ̀ nɛ́ ɗoŋ am, a̧ beka nɛ́ nɔ̀ ti tum na, a̧ tɛ nɛ̀ nɔ̀ tɛ sa̧a̧mɔ wan mɛ duka-kpasa.»

¹³O Fariziɛn tɔ̧ɔ̧ ha̧ a̧: «Mɛ́ dé nɛ́ sedaako zu mɛ nɛ̀ tɛ-mɛ, ɓɛɛ sedaako kɔ-mɛ bó nɛ́ mɔ ha'i mɛ kpɛk na.»

¹⁴Jesu kifa nú ha̧ wa: «Nɛ̀ mbetɛ, mí dé nɛ́ sedaako zu'm nɛ̀ tɛ‘m, ɓɛɛ sedaako kɔ‘m nɛ́ kpasawen, wen mi iŋa fara n'am tɛ nɛnɛ in fara n'am nɛ́ si sɛnɛ mbɛt. Ɓɛɛ k’ɛ́nɛ́, ɛ́nɛ́ iŋ fara n'am tɛ̀ɛ́ nɛnɛ in fara n'am nɛ́ si sɛnɛ na.

¹⁵K’ɛ́nɛ́, ɛ́nɛ́ gɔn kita nɛ̀ yuwar-gɔna-kita ko bíí, ɓɛɛ kɔ‘m, mi gɔn kita zu ŋma bíí na.

¹⁶Ɓɛɛ kà‘m gɔn kita, mi gɔn nyɛm nɛ̀ ɗoŋ kpasawen, wen mi bo ɛ̀n'am na; wan nɛ̀ toma'm tɛnɛ a̧a̧ in am mbɛt.

¹⁷Bó nɛ́ yɔra zaŋ kalata k’ɛ́nɛ́‘e, kà o bíí yiitoo de kale kpɔk sedaako zu ŋma mɔ, ɓɛɛ sedaako ko o wi nɔ‘i nyɛma ha'i mɛ kpɛk na nde?

¹⁸Mí dé nɛ́ sedaako zu'm nɛ̀ tɛ‘m, ɓɛɛ Dáà nɛ̀ toma'm tɛnɛ de nɛ́ sedaako wen am mbɛt.»

¹⁹Wa aka a̧: «Dáà kɔ-mɛ‘i, a̧ a̧a̧ de?» Jesu kifa nú: «Ɛ́nɛ́ iŋ am na, ɛ́nɛ́ iŋ Dáà kɔ‘m na; k’ɛ̀nɛ̀ íŋ so'm, ɛ́nɛ́ tɛ̀ɛ́ iŋ Dáà kɔ‘m mbɛt.»

²⁰Jesu tɔ̧ɔ̧ wen'i ŋgimbi n'aa duka usi nɛ̀ mɔ kɔ̧́ Tua ko Sɔ̧ ká̧ kuɓa-mbɔi, ɓɛɛ ŋma bíí mɛ fo a̧ nɛ̀ er bo na, wen ŋgimbi kɔ̧-a̧ tɛ hɔ hɔ̧ɔ̧ na.

²¹Jesu tɔ̧ɔ̧ ha̧ wa woyo: «Mi tɛ yak, ɛ́nɛ́ tɛ kii am, ɓɛɛ ɛ́nɛ́ tɛ fe tɛ ɗaŋmɔ k’ɛ́nɛ́. Wen ɛ́nɛ́ nyɛm mɛ nɛ̀ hɔ fara n'am nɛ́ sɛnɛ‘i na.»

²²O Juif tɔ̧ɔ̧ sitɛ ŋmaa: «A̧ tɔ̧‘e: ‹Fara n'am nɛ‘i, ɛ́nɛ́ nyɛm mɛ hɔ sɛnɛ na’ɛ,› a̧ tɛ gbɛ nɛ́ tɛ-a nde?»

²³Jesu kifa nú ha̧ wa: «Ɛ́nɛ́ nɛ́ o wi mɛ ɗɔɔ hɛ̧ɛ̧, ɓɛɛ kɔ‘m mi nɛ́ wi mɛ́ ŋgɔn mɛ; ɛ́nɛ́ nɛ́ o bíí zaŋnu’ɛ, ɓɛɛ kɔ‘m, mí bó nɛ́ bíí zaŋnu’ɛ na.

²⁴Mɛ̀ nɛ́ mɔ‘i a̧‘m tɔ̧ɔ̧ nɛnɛ h’ɛ́nɛ́‘e ndé, ɛ́nɛ́ tɛ fe tɛ ɗaŋmɔ k’ɛ́nɛ́. K’ɛ̀nɛ̀ nɛ́ kɔ̧ɔ̧ ɗɔaa'e mi nɛ́ mɔ‘i na, ɛ́nɛ́ tɛ fe tɛ ɗaŋmɔ k’ɛ́nɛ́.»

²⁵Ɓɛɛ wa tɔ̧ ha̧ a̧: «Mɛ́ nɛ́ o?» Jesu kifa nú ha̧ wa: «Nú‘m bɛr tɛ tɔ̧ɔ̧ mɔ‘i h’ɛ́nɛ́ nɛ̀ ku̧u̧naŋ-a mɛ tɛnɛ na.

²⁶Mɔ a̧a̧ zu'nɛ́ nɛ̀ dɔka-a n'am tɛ̀ɛ́ tɔ̧ so wen sɛnɛ, gɔn nɛ̀ kita zu a̧ mbɛt. Ɓɛɛ wan nɛ̀ toma'm tɛnɛ nɛ́ wi-tɔ̧-kpasawen. Mɔ n'am zia nú a̧, nɛ́ mɔ‘i a̧‘m tɔ̧ ha̧ o bíí zaŋnu.»

²⁷Ɓɛɛ wa iŋ‘e a̧ tɔ̧ nɛ́ wen ko Dáà ha̧ wa na.

²⁸Jesu tɔ̧ɔ̧ ha̧ wa: «Ŋgimbi n’ɛnɛ tɛ ba Bem ko bíí e ŋgɔn kaɗi ɓɛɛ sɛk’ɛ́nɛ́ iŋa'e, mí nɛ́ mɔ‘i. Mi tɔ̧ wen nɛ̀ zu'm na, ɓɛɛ mi tɔ̧ nɛ́ mɔ nɛ̀ Dáà usa ha̧‘m.

²⁹Wi nɛ̀ toma'm tɛnɛ e'm ɛ̀n'am na; a̧ duk kpɔk in am, wen mi de nɛ́ mɔ n'aa kɔ̧a̧ ɓɔnsɛnɛ.»

³⁰A̧ ɓɔna tɛ tɔ̧ɔ̧ wen'i, ɓɛɛ o bíí nɛ̀ dɔka-a kɔ̧ ɗɔaa ha̧ a̧.

³¹Ɓɛɛ Jesu tɔ̧ ha̧ o Juif nɛ̀ kɔ̧ɔ̧ ɗɔaa ha̧ a̧: «Kà see'nɛ́ nɛ́ duka tɛ wen kɔ‘m nɛ̀ mbetɛ, ɓɛɛ ɛ́nɛ́ tɛ ya o kpasa ŋgaiwi kɔ‘m;

³²ɛ́nɛ́ tɛ iŋ kpasawen, ɓɛɛ kpasawen tɛ de h’ɛ́nɛ́ mɛ́ kpa zu.»

³³Wa kifa nú ha̧ Jesu: «Ɛ́ɛ́ nɛ́ o bezaŋ Abraham, ɛ́ɛ́ dúk bara ko ŋma bíí nɛti na. Ɓɛɛ mɛ tɔ̧‘e, ɛ́ɛ́ tɛ́ kpa zu wó'ɛ, hee ge?»

³⁴Jesu kifa nú ha̧ wa: «Nɛ́ kpasawen a̧‘m tɔ̧ h’ɛ́nɛ́, wi nɛ̀ de ɗaŋmɔ nɛ́ bara ko ɗaŋmɔ.

³⁵Bara duk tɛ̀ ko dáa-bara kɔ‘i ɓɔnsɛnɛ na, ɓɛɛ nɛ́ bem a̧ duk tɛ̀ ko dáà kɔ‘i ɓɔnsɛnɛ.

³⁶Hegɔ, ká Bem nɛ́ gboo'nɛ́ tɛ bara yinɛ, ɓɛɛ ɛ́nɛ́ tɛ kpa zu nɛ̀ mbetɛ.

³⁷Mi iŋa nɛ̀ mbetɛ, ɛ́nɛ́ nɛ́ o bezaŋ Abraham, ɓɛɛ ɛ́nɛ́ kɔ̧ɔ̧ mɛ gbɛ‘m wen wen kɔ‘m ye kɔ̧́ see'nɛ́ na.

³⁸Kɔ‘m, mi tɔ̧ nɛ́ mɔ n'am zɔka tɛ Dáà kɔ‘m; ɓɛɛ k’ɛ́nɛ́, ɛ́nɛ́ de nɛ́ mɔ n’ɛnɛ zia tɛ dáà k’ɛ́nɛ́.»

³⁹Wa kifa nú ha̧ Jesu: «Dáà k’ɛɛ nɛ́ Abraham.» Jesu tɔ̧ɔ̧ ha̧ wa: «K’ɛ̀nɛ̀ nɛ́ bòò nɛ́ o bezaŋ Abraham, ɓɛɛ ɛ̀nɛ̀ dé nɛ́ tom ko Abraham.

⁴⁰Kpasawen n'am zia nú Sɔ̧ n'am tɔ̧ɔ̧ h’ɛ́nɛ́, bó nɛ́ mɔ'ɔ n’ɛnɛ kii mɛ gbɛ‘m’ɛ na? Abraham de kɔ‘i hegɔ na!

⁴¹K’ɛ́nɛ́, ɛ́nɛ́ baa nɛ́ tom ko dáà k’ɛ́nɛ́.» Wa tɔ̧ɔ̧ ha̧ a̧: «Ɛ́ɛ́ bó nɛ́ o be-dàlà na. Dáà k’ɛɛ nɛ́ Sɔ̧ kpɔk ɓɛɛ.»

⁴²Jesu kifa nú ha̧ wa: «Kà Sɔ̧ bó so nɛ́ Dáà k’ɛ́nɛ́, ɓɛɛ ɛ́nɛ́ tɛ̀ɛ́ kɔ̧ so'm, wen mi gboo nɛ̀ tɛ́ Sɔ̧ tɛ nɛnɛ. Bo nɛ́ mi'i tɛ̀ɛ́ nɛ̀ zu'm na, nɛ́ a̧ á̧ toma'm tɛnɛ.

⁴³Ɛ́nɛ́ zii gba̧a̧ wen kɔ‘m na wen ge? Wen ɛ́nɛ́ nyɛm mɛ zii wen kɔ‘m na.

⁴⁴Dáà k’ɛ́nɛ́ nɛ́ wan-ɗaŋmɔ, ɓɛɛ ɛ́nɛ́ kɔ̧ɔ̧ mɛ de nɛ́ mɔ nɛ̀ dáà k’ɛ́nɛ́ kɔ̧a̧. Nɛ̀ ku̧u̧naŋ-a mɛ tɛnɛ a̧ nɛ́ wi-gbɛ-zu, hegɔ a̧ nyɛm so mɛ duk tɛ kpasawen na, wen kpasawen bo tɛ-a na. Ta-oi-mɔ kɔ̧-a̧ nɛ́ ndela, wen a̧ nɛ́ wi-ndela, a̧ nɛ́ dáà ko ndela.

⁴⁵Ɓɛɛ kɔ‘m, ɛ́nɛ́ kɔ̧ ɗɔaa ha̧‘m na, wen n'am tɔ̧ nɛ́ kpasawen.

⁴⁶Ŋma bíí mgbara'nɛ́ nɛ tɛ usi ɗaŋmɔ kɔ‘m ha̧‘m nɛ́ o? Ɓɛɛ ka'm tɔ̧ kpasawen h’ɛ́nɛ́, ɛ́nɛ́ kpɛk na wen ge?

⁴⁷Wi nɛ̀ duk nɛ́ ko Sɔ̧ zii nɛ́ wen ko Sɔ̧; ɓɛɛ mɛ̀ nɛ́ wen ɛ́nɛ́ bó nɛ́ o bíí ko Sɔ̧ na s’ɛ́nɛ́ zii wen kɔ‘m na.»

⁴⁸O Juif kifa nú ha̧ a̧: «Bó nɛ́ kpasawen ɛ̀ɛ̀ tɔ̧‘e, dùk kɔ-mɛ nɛ́ be Samarii, ɓɛɛ ɗaŋ-sɔ̧ a̧a̧ tɛ-mɛ'ɛ na?»

⁴⁹Ɓɛɛ Jesu kifi nú: «Weyaa, ɗaŋ-sɔ̧ bo tɛ‘m na; mi gasi nɛ́ Dáà kɔ‘m, ɓɛɛ k’ɛ́nɛ́, ɛ́nɛ́ fɛ̧ŋ nɛ‘m.

⁵⁰Mi kii ŋma gasamɔ kɔ‘m nɛ̀ zu'm na. Wi kia-a ha̧‘m a̧a̧ sɛnɛ kpɔk ɓɛɛ; nɛ́ wi’ɛi a̧ tɛ gɔn kita.

⁵¹Nɛ́ kpasawen a̧‘m tɔ̧ h’ɛ́nɛ́; wi nɛ̀ zii wen nú‘m beka fe ɓɔna.»

⁵²O Juif tɔ̧ɔ̧ ha̧ a̧: «Mgbák iŋa-a h’ɛ́ɛ́ mɛ iŋ‘e ɗaŋ-sɔ̧ a̧a̧ tɛ-mɛ‘i nɛ́ mɔ'ɔ kinii'i. Abraham fea, nɛ́ mɔ'ɔ nɛ̀ o wi-tɔ̧-wen oi nú Sɔ̧ mbɛt fea, ɓɛɛ mɛ‘e ndé, kà ŋma bíí a̧ zia wen nú-mɛ, wi’ɛi beka fe ɓɔna.

⁵³Mɛ́ ta kɔ-mɛ‘e mɛ́ nɛ́ o? Mɛ́ gana dáà k’ɛ́ɛ́ Abraham nɛ̀ fea’ɛ? Bó nɛ́ o wi-tɔ̧-wen oi nú Sɔ̧ fee mbɛt na?»

⁵⁴Jesu kifa nú ha̧ wa: «Kà‘m kii so gasamɔ nɛ̀ zu'm, ɓɛɛ gasamɔ‘i tɛ̀ɛ́ duk nɛ́ geemɔ, ɓɛɛ nɛ́ Dáà kɔ‘m, n’ɛnɛ tɔ̧‘e nɛ́ Sɔ̧ k’ɛ́nɛ́ wó‘i, a̧ e'm tɛ gasamɔ.

⁵⁵K’ɛ́nɛ́, ɛ́nɛ́ iŋ a̧ na, ɓɛɛ kɔ‘m, mi iŋa a̧; kà‘m tɔ̧‘e mi iŋ a̧ na, ɓɛɛ mi kifa nɛ́ wi-ndela hee ɛ́nɛ́ ga. Mi iŋa a̧, ɓɛɛ mi zii nɛ́ wen nú a̧.

⁵⁶Dáà k’ɛ́nɛ́ Abraham taa'e wi tɛ zɔk wese kɔ‘m, ɓɛɛ tortɛ ba a̧; nɛ́ mɔ'ɔ n'aa zɔka wese'i, ɓɛɛ a̧ de nyɛŋɛ.»

⁵⁷O Juif tɔ̧ɔ̧ ha̧ a̧: «Pɛ mɛ tɛ de ɓu-mɔɔrɔ hɔ̧ɔ̧ na, ɓɛɛ mɛ‘e ndé mɛ́ zɔka Abraham?»

⁵⁸Jesu kifa nú ha̧ wa: «Nɛ́ kpasawen a̧‘m tɔ̧ h’ɛ́nɛ́; nɛti ha̧ wa mɛ ko Abraham, mi a̧a̧ sɛnɛ.»

⁵⁹Ɓɛɛ nɛ́ mɔ'ɔ nɛ̀ wa kaia ta mɛ yo nɛ̀ Jesu, ɓɛɛ a̧ yɔ er-wa ɓɛlɛm kɔ̧́ Tua ko Sɔ̧ gbo yak.