Read Northwest Gbaya JEAN 9 Bible Online

JEAN 9 - Northwest Gbaya bible

JEAN 9

¹Jesu ɓir kɔ‘i ɓir yak, ɓɛɛ a̧ zɔk ŋma bíí nɛ̀ wa kòó nɛ̀ boma-yí.

²Nɛ́ mɔ'ɔ nɛ̀ o ŋgaiwi ko Jesu aka a̧: «Wan-usi-mɔ, nɛ́ o'o dee ɗaŋmɔ sa wa ko nɛ̀ wi’ɛ nɛ̀ boma-yí'ɛ o; nɛ́ wi’ɛ náà, kóó nɛ́ o wi nɛ̀ kòó a̧ nde?»

³Jesu kifa nú ha̧ wa: «Bó nɛ́ wi’ɛ na, bó nɛ́ o wi nɛ̀ kòó a̧ na mbɛt, ɓɛɛ wa kòó a̧ nɛ̀ boma-yí ha̧ o bíí mɛ́ zɔk tom nɛ̀ Sɔ̧ tɛ de tɛ-a.

⁴Hee mɔ'ɔ nɛ̀ wese biti kaŋ ga, ɛɛ tɛ de o tom ko wi nɛ̀ toma'm tɛnɛ; zɛ a̧ de tɛnɛ‘i, ɓɛɛ wi beka nyɛm mɛ de tom sɛnɛ na.

⁵Ŋgimbi n'am biti zaŋnu’ɛ, mi nɛ́ sa̧a̧mɔ zaŋnu.»

⁶Ɗoŋ wen'i, Jesu aa sap nù, de ɓɔtɛ nɛ̀ sap'i, ɓɛɛ sɔ̧ yí wi-boma-yí‘i.

⁷A̧ tɔ̧ɔ̧ ha̧ a̧: «Mɛ̀ nɛ́ɛ̀ táí yí-mɛ́ sɛn ɗɔɔ gɔna-yí Siloe.» (Siloe nɛ́ wen nɛ̀ tɔ̧: «Betom».) Wi-boma-yí‘i yaka nɛ́ɛ̀ táí yí, ɓɛɛ tɛ pia-ɗoŋ yí-a zɔk nɛ́ mɔ.

⁸Wi’ɛi duka so nɛ́ wi-kɔfi-mɔ, ɓɛɛ o bíí nɛ̀ ɔ katɛ a̧ in o wan nɛ̀ zɔka so a̧ fara kɔfa mɔ, tɔ̧: «Wi nɛ̀ duk so nù kɔfi nɛ̀ mɔ'ɛ bo a̧a̧ na?»

⁹O ŋma bíí tɔ̧a̧: «Nɛ́ a̧.» O ŋma tɔ̧ɔ̧ kɔ‘i: «Weyaa, nɛ́ ŋma bíí a̧ hɔɔ ŋmaa in a̧ ɛ̧.» Ɓɛɛ wi-boma-yí‘i tɔ̧: «Mɛ̀ nɛ́ mí nɛ̀ mbetɛ.»

¹⁰Ɓɛɛ wa ak a̧: «Nɛ́ ge'e dee ha̧ yí-mɛ́ mɛ hu̧i̧ ge?»

¹¹A̧ kifa nú: «Wi nɛ̀ wa sa nin-a'e Jesu dee ɓɔtɛ sɔ̧ yí‘m, ɓɛɛ tɔ̧ ha̧‘m: ‹Mɛ̀ nɛ́ɛ̀ táí yí-mɛ́ ɗɔɔ Siloe.› Mi nɛ̀ɛ̀ tai yí‘m, ɓɛɛ yí‘m hu̧i̧.»

¹²Wa aka a̧: «Wi’ɛi a̧a̧ dee?» A̧ kifa nú ha̧ wa: «Mi iŋ na.»

¹³Ɓɛɛ wa mgbɔ wi nɛ̀ duka so nɛ̀ boma-yí‘i sitɛ o Fariziɛn mɛ.

¹⁴Duka so nɛ́ wese-ɔm-tɛ a̧ Jesu dee so nɛ̀ ɓɔtɛ ha̧ yí wi’ɛi mɛ hu̧i̧ nɛnɛ‘i.

¹⁵O Fariziɛn aka a̧ mbɛt wen mɔ nɛ̀ dee ha̧ a̧ mɛ zɔk nɛ̀ mɔ‘i. A̧ tɔ̧ɔ̧ ha̧ wa: «A̧ sɔ̧ɔ̧ nɛ́ ɓɔtɛ yí‘m, mi tai yí‘m, nɛ́ mɔ'ɔ n'am zɔk nɛ mɔ.»

¹⁶O ŋma bíí mgbara o Fariziɛn tɔ̧a̧: «Wi’ɛ tɛ́ nɛ̀ tɛ́ Sɔ̧ na, wen a̧ kasi heembea wese-ɔm-tɛ na.» O ŋma tɛ̀ɛ̀ tɔ̧ kɔ‘i: «Ɗaŋwi tɛ kpa ŋgai mɛ de nɛ̀ pɛrti mɔɔ-usi-mɔ hegɔ'ɛ hee ge?» Ɓɛɛ taamɔ ko o Fariziɛn ye ŋmaa tɛ wen'i na.

¹⁷Ɓɛɛ wa ak wi-boma-yí‘i woyo: «Kɔ-mɛ, taamɔ kɔ-mɛ zu wi nɛ̀ hu̧i̧a̧ yí-mɛ'ɛ nɛ́ ge?» A̧ kifa nú: «Wi’ɛi nɛ́ ŋma wi-tɔ̧-wen oi nú Sɔ̧.»

¹⁸Ɓɛɛ hee mɔ'ɔ nɛ̀ wa tɛ sa o dáà in nàà ko wi-boma-yí‘i tɛnɛ hɔ̧ɔ̧ na ga, o Juif kɔ̧ mɛ kɔ̧ ɗɔaa'e, wi’ɛi duka so nɛ̀ boma-yí nɛti sɛka a̧ zɔk mɔ na.

¹⁹Ɓɛɛ wa ak o dáà in nàà kɔ̧-a̧: «Nɛ̀ mbetɛ, wi’ɛ nɛ́ bem k’ɛ́nɛ́ n’ɛnɛ tɔ̧‘e ɛ́nɛ́ kòó a̧ nɛ̀ boma-yí'ɛ nde? Nɛ́ ge'e dee n'aa zɔk mɔ kinii’ɛ ge?»

²⁰O dáà in nàà kɔ̧-a̧ kifa nú ha̧ wa: «Ɛ́ɛ́ iŋa a̧ nɛ́ bem k’ɛɛ, n’ɛɛ kòó nɛ̀ boma-yí.

²¹Mɔ nɛ̀ dee n'aa zɔk nɛ̀ mɔ kinii'i, ɛ́ɛ́ iŋ k’ɛɛ na; nɛ́ o'o hu̧i̧a̧ yí-a o ndé, ɛ́ɛ́ iŋ k’ɛɛ na mbɛt. A̧ gasa kaɗi; a̧ nyɛma mɛ kifi nú h’ɛ́nɛ́ nɛ̀ tɛ-a, ɛ̀nɛ̀ ák nɛ́ a̧ ɛ̧.»

²²O dáà in nàà kɔ̧-a̧ tɔ̧ɔ̧ hegɔ wen wa yu nɛ́ o Juif; wen o Juif ee so nú in o ŋmaa'e wi nɛ̀ tɛ kpɛk'e Jesu nɛ́ Mɛsii, beka ye kɔ̧́ tua-mɔi̧a-a ɓɔna.

²³Mɛ̀ nɛ́ hegɔ sa o dáà in nàà kɔ̧-a̧ tɔ̧‘e: «A̧ gasa kaɗi, ɛ̀nɛ̀ ák nɛ́ a̧ nɛ̀ tɛ-a.»

²⁴Nɛ́ mɔ'ɔ nɛ̀ o Fariziɛn saa wi nɛ̀ duka so nɛ̀ boma-yí‘i woyo, ɓɛɛ tɔ̧ ha̧ a̧: «Mɛ̀ gásí Sɔ̧! K’ɛ́ɛ́, ɛ́ɛ́ iŋa'e wi’ɛi nɛ́ ɗaŋwi.»

²⁵A̧ kifa nú ha̧ wa: «Kóó wi’ɛi nɛ́ ɗaŋwi ndé, mi iŋ na; ɓɛɛ mɔ kpɔk n'am iŋa nɛ́ mɔ'ɔ: Nɛti mi duka so nɛ̀ boma-yí, ɓɛɛ kinii mi zɔk nɛ́ mɔ.»

²⁶Ɓɛɛ wa ak a̧: «A̧ dee nɛ́ ge ha̧ mɛ ge? A̧ hu̧i̧a̧ yí-mɛ́ hee ge?»

²⁷A̧ kifa nú ha̧ wa: «Mi tɔ̧ɔ̧ h’ɛ́nɛ́ kaɗi, ɓɛɛ ɛ́nɛ́ kɔ̧ mɛ zii na. Wen ge ɛ́nɛ́ ak am tɛ kpɔk wen'i woyo ge? Ɛ́nɛ́ kɔ̧ɔ̧ mɛ duk ŋgaiwi kɔ̧-a̧ mbɛt nde?»

²⁸O Fariziɛn da̧a̧ a̧, ɓɛɛ wa tɔ̧: «Mɛ́ nɛ́ ŋgaiwi kɔ̧-a̧ ɛ̧; k’ɛ́ɛ́, ɛ́ɛ́ nɛ́ ŋgaiwi ko Moisɛ.

²⁹Ɛ́ɛ́ iŋa'e Sɔ̧ tɔ̧ɔ̧ wen ha̧ Moisɛ; ɓɛɛ ko wi’ɛ, ɛ́ɛ́ iŋ fara n'aa tɛ́ nɛnɛ na.»

³⁰Wi-boma-yí‘i kifa nú ha̧ wa: «Mɔ nɛ̀ gɔn ɗɛɗ‘am'i nɛ́ mɔ'ɔ: Ɛ́nɛ́‘e ɛ́nɛ́ iŋ fara n'aa tɛ nɛnɛ na; zu-a'i nɛ́ a̧ a̧ hu̧i̧a̧ yí‘m!

³¹Ɛ́ɛ́ iŋa'e Sɔ̧ zii kɔfamɔ ko o ɗaŋwi na, ɓɛɛ a̧ zii nɛ́ kɔfamɔ ko wi nɛ̀ yu a̧, de nɛ̀ mɔ n'aa kɔ̧a̧.

³²Ɛ́ɛ́ tɛ́ zii nɛti'e ŋma bíí hu̧i̧a̧ yí wi nɛ̀ wa kòó nɛ̀ boma-yí hɔ̧ɔ̧ na.

³³Kà wi’ɛ tɛ́ so nɛ̀ tɛ́ Sɔ̧ na, ŋma mɔ n'aa nyɛma mɛ de bo na.»

³⁴Wa kifa nú ha̧ a̧: «Ɗaŋ mɛ́ nɛ̀ wa kòó nɛ̀ oi ɗaŋmɔ, mɛ iŋa nɛ́ ŋma ge mɛ usi h’ɛ́ɛ́ ge?» Ɓɛɛ wa ndak a̧ gbonɛ.

³⁵Jesu zia'e wa ndaka wi-boma-yí‘i gbonɛ; nɛ́ mɔ'ɔ n'aa nɛ̀ɛ̀ kpa a̧ ɓɛɛ tɔ̧: «Mɛ́ kɔ̧ɔ̧ ɗɔaa ha̧ Bem ko bíí nde?»

³⁶A̧ aka Jesu: «Gasa Wan, wi’ɛi nɛ́ o ha̧‘m kɔ̧ ɗɔaa ha̧ a̧ o?»

³⁷Jesu tɔ̧ɔ̧ ha̧ a̧: «Mɛ́ zɔka a̧ kaɗi. Wi’ɛi nɛ́ mɔ'ɔ nɛ̀ tɔ̧ wen in mɛ'ɛ.»

³⁸Ɓɛɛ a̧ tɔ̧: «Gasa Wan, mi kɔ̧ɔ̧ ɗɔaa,» ɓɛɛ a̧ gbɛ zugur nù ti a̧.

³⁹Jesu tɔ̧a̧: «Mi tɛ̀ɛ́ zaŋnu’ɛ mɛ gɔn kita wen ha̧ o wi-boma-yí mɛ zɔk mɔ, in ha̧ o wi nɛ̀ zɔk mɔ mɛ kifi o wi-boma-yí.»

⁴⁰O Fariziɛn nɛ̀ yaa so hi̧i̧ in a̧ zia wen'i, ɓɛɛ ak a̧: «Mɔ'ɔ ɛ́ɛ́ mbɛt, ɛ́ɛ́ nɛ́ o wi-boma-yí nde?»

⁴¹Jesu kifa nú ha̧ wa: «Ɛ́nɛ́ bó so nɛ́ o wi-boma-yí gáà, ɛ́nɛ́ beka bo so nɛ̀ ɗaŋmɔ na; ɓɛɛ hee mɔ'ɔ n’ɛnɛ tɔ̧‘e wí zɔk nɛ́ mɔ ga, ɗaŋmɔ k’ɛ́nɛ́ biti zu'nɛ́.»