Read Northwest Gbaya TOM 1 Bible Online

TOM 1 - Northwest Gbaya bible

TOM 1

¹Nyaa Teofil, Mi wee ɗoŋ mɔ lɛŋ nɛ̀ Jesu dea in mɔ n'aa usa mbɛt zaŋ kuti kalata kɔ‘m.

²Mi wee ɗoŋ mɔ nɛ̀ Jesu dea n'aa ku̧u̧ nɛ̀ naŋ tom kɔ̧-a̧ mɛ hɔ nɛnɛ wese nɛ̀ Sɔ̧ baa nɛ̀ a̧ si yiwese. Wese'i, á̧ à̧ ee nɛ̀ tom nɛ̀ ŋgai ko Sa̧a̧ Ɔmi er o betom n'aa hoka so.

³Ɗoŋ fio kɔ̧-a̧, a̧ usa tɛ̀ nɛ̀ kpasa ha̧ wa tɛ o yuwar nɛtɛ nɛtɛ. A̧ usa tɛ̀ ha̧ wa hegɔɔ tɛ zɛ ɓu-naar, tɔ̧ nɛ̀ mgbara mɔɔ-wan ko Sɔ̧ ha̧ wa.

⁴Ɓɛɛ tɛ ŋma ŋgimbi nyɔŋmɔ, a̧ tɔ̧ɔ̧ mbɔrɔ ha̧ wa'e, ká wa e Jerusalɛm duk na, wen ha̧ wa mɛ kpa mɔ nɛ Dáà baa ha̧ nú wen-aa'i sɛ. A̧ tɔ̧a̧: «Ɛ́nɛ́ zia so wen mɔ‘i nú‘m kaɗi.

⁵Jean zuia bíí nɛ̀ yi, ɓɛɛ k’ɛ́nɛ́, ɗoŋ zɛ tikiɗi, wa tɛ zui'nɛ́ nɛ̀ Sa̧a̧ Ɔmi.»

⁶Nɛ́ mɔ'ɔ nɛ̀ o wi nɛ̀ mɔi̧a so katɛ Jesu aka a̧ hegɔ: «Gasa Wan! Nɛ́ kinii, ɛ̀nɛ̀ tɛ de nɛ̀ wan ha̧ Israɛl woyo nde?»

⁷A̧ kifa nú ha̧ wa: «Ŋma mɔ k’ɛ́nɛ́ tɛ iŋa zɛ in ŋgimbi nɛ̀ Dáà gɔna tɛ ŋgai kɔ‘i bo na.

⁸K’ɛ́nɛ́, ɛ́nɛ́ tɛ kpa ŋgai, ŋgimbi nɛ̀ Sa̧a̧ Ɔmi tɛ zir pii zu'nɛ́, ɓɛɛ ɛ́nɛ́ tɛ ya o wi-sedaako kɔ‘m sɛn Jerusalɛm in nú Judee nɛ̀ oi-aa in Samarii mbɛt hegɔɔ hɔ nɛnɛ nduti nù mɛ.»

⁹Ɗoŋ wen'i, Jesu daŋa si yiwese ɓɔn yí-wa, ɓɛɛ tura-zan kpe ɗoŋ-aa.

¹⁰Ɓɛɛ hee mɔ'ɔ nɛ̀ wa biti kɛ̧i̧ mɔ si ɗoŋ-aa fara daŋa-a si yiwese ga, o bíí yiitoo nɛ̀ pi̧i̧ bu laa hɔɔ yor,

¹¹ɓɛɛ tɔ̧: «O wi Galilee, wen ge s’ɛ́nɛ́ yor kɛ̧i̧ nɛ̀ mɔ si yiwese’ɛ ge? Jesu nɛ̀ Sɔ̧ baa si yiwese ɓɔn yí‘nɛ́'ɛ, tɛ́ pii ɗoŋ hee mɔ'ɔ n’ɛnɛ zɔka nɛ̀ a̧ fara daŋa-a si yiwese ga.»

¹²Ɓɛɛ o betom ko Jesu zir zu kaya nɛ̀‘i sa'e «Kaya Te-nɔ̧́» si ɗoŋ Jerusalɛm mɛ; fara'i nyɛi̧ nɛ̀ Jerusalɛm na, nyɛi̧a-a dee hee kilomɛtrɛ kpɔk ga.

¹³Wa sii ɗoŋ saaye kaɗi, ɓɛɛ wa daŋ si kɔ̧́ bɛr-tua-mɛ-ŋgɔn fara-yaa kɔ-wa. Nin wa nɛ́ mɔ'ɔ: Pierre, Jean, Jak in Andre, Filip in Tomas, Bartelemi in Matthieu, Jak bem ko Alfe in Simɔŋ mgbák kpasa be-nù in Judɛ bem ko Jak.

¹⁴Wa lɛŋ yaa nɛ̀ see kpɔk in o ŋmaa tɛ kɔfa-sɔ̧ ɓɔnsɛnɛ. O ŋma okoo a̧a̧ so mgbara wa, in Marii nàà ko Jesu, ká bá nɛ̀ o nya Jesu mbɛt.

¹⁵Ŋma wese, Pierre kura ŋgɔn mgbara o nya-wi nɛ̀ mɔi̧a hee gɔmŋmaa-nɛ-ɓu-yiitoo ga, ɓɛɛ tɔ̧:

¹⁶«O nya'm, mɔ nɛ̀ yɔra zu Judas wan-duk-ti ha̧ o wi nɛ̀ baa Jesu tɛ̀ɛ́ hɔ kana gba̧a̧. Nɛ́ David a̧ tɔ̧ɔ̧ so wen'i nɛ̀ ŋgai ko Sa̧a̧ Ɔmi.

¹⁷Judas nɛ́ gbama wi-de-tom in yɛɛ, nɛ̀ Jesu hoka so mɛ de tom kpɔk in yɛɛ. (

¹⁸Nɛ́ mɔ'ɔ n'aa baa sede-ɗaŋmɔ hi̧fi nɛ̀ fɔ, ɓɛɛ a̧ hɔ̧fi̧ tik nù nɛ̀ ta-tɛ-a nɛ̀ ger, zaŋ-aa mbaŋ, ɓɛɛ nyak zaŋ-aa gbo a nù lɛŋ.

¹⁹O bíí Jerusalɛm lɛŋ zia nyɛrɛ mɔ‘i, ɓɛɛ wa gɔn nin fɔ‘i nɛ nú kɔ-wa'e: ‹Hakɛldama›, mɛ̀ nɛ́ wen nɛ̀ tɔ̧‘e: ‹fɔ-tɔk›.)

²⁰Wen kalata gima ko David tɔ̧ɔ̧ so'e ndé: ‹Tua kɔ̧-a̧ a̧ kífí nɛ́ gɛ̧ɛ̧-tua; ká bíí ɔ sɛnɛ ɓɔna.› Tɔ̧ɔ̧ woyo mbɛt'e ndé: ‹Ŋma bíí a̧ bá fara oi-aa.›

²¹«Ŋma bíí a̧ yé mgbara yɛ mɛ́ duk wi-sedaako kura-ŋgɔn ko Jesu in yɛɛ. Wi’ɛi tɛ duk nɛ́ ŋma bíí mgbara o wi nɛ̀ yara so in yɛɛ ŋgimbi lɛŋ nɛ̀ Gasa Wan Jesu duka in yɛɛ, ku̧u̧naŋ-a tɛ ŋgimbi nɛ̀ Jean zuia nɛ́ bíí hɔ wese nɛ̀ Sɔ̧ baa nɛ̀ Jesu si yiwese ɓɔn yí-ɛɛ.»

²³Nɛ́ mɔ'ɔ nɛ̀ wa kaia o bíí yiitoo a nù, Jozɛf nɛ̀ wa saa'e Barsabas, ŋma nin-a nɛ́ Justus, ɓii wi nɛ́ Matias.

²⁴Ɓɛɛ wa kɔfi Sɔ̧ hee mɔ'ɔ ga: «Gasa Wan, ɛ́nɛ́ iŋa taamɔ kɔ̧́ see o bíí lɛŋ; mgbara o wi nɔ'ɔ yiitoo’ɛ, ɛ̀nɛ̀ úsí wan n’ɛnɛ hoka

²⁵mɛ ye tɛ tom ko betom ko Jesu, wen báá fara nɛ̀ Judas ee duk mɛ yak si mgbák fara kɔ‘i.»

²⁶Nɛ́ mɔ'ɔ nɛ̀ wa pi̧i̧ tani, ɓɛɛ tani ba nɛ́ Matias, ɓɛɛ a̧ ye mgbara o betom ko Jesu ɓu-zua-kpɔk.