Read Northwest Gbaya TOM 11 Bible Online

TOM 11 - Northwest Gbaya bible

TOM 11

¹O betom ko Jesu in o nya-wi nɛ̀ yaa sɛn Judee zia'e, wen ko Sɔ̧ hɔɔ tɛ o gɔni-dùk ɓɛɛ wa kɔ̧ ɗɔaa.

²Ɓɛɛ ŋgimbi nɛ̀ Pierre sii ɗoŋ Jerusalɛm, o Juif nɛ̀ kɔ̧ɔ̧ ɗɔaa ha̧ Jesu tɔ̧ɔ̧ wen a zu a̧‘e:

³«Mɛ́ nɛ̀ɛ́ tɛ̀ ko o wi-mbii, ɓɛɛ mɛ́ nyɔŋ mɔ in wa gɔ!»

⁴Nɛ́ mɔ'ɔ nɛ̀ Pierre wee ɗoŋ mɔ nɛ̀ yaka nɛ̀ ku̧u̧naŋ-a mɛ kpɔk kpɔk ha̧ wa hee mɔ'ɔ ga:

⁵«Mi duka tɛ kɔfa-sɔ̧ sɛn saaye Jope; nɛ́ mɔ'ɔ nɛ̀ Sɔ̧ hɔɔ zu ha̧‘m, ɓɛɛ mi zɔk ŋma zɔm mɔ nɛ̀ nú-wí nyɛm mɛ tɔ̧ na hee pɛsa goe, nɛ̀ mgbii-aa naar ga, nɛ̀ zir nɛ̀ yiwese pii tɛ‘m.

⁶Mi mbaɗa mɔ‘i, ɓɛɛ mi zɔk o saɗi nɛ̀ a̧a̧ nɛ̀ naŋ naar, in o wan nɛ̀ gbur zaŋ nɛ̀ nù, ká bá nɛ̀ o nɔ̧́í̧ nɛtɛ nɛtɛ nɛ̀ bu̧i̧ ɗɔɔ yiwese.

⁷Nɛ́ mɔ'ɔ n'am zia ŋma tiger nɛ̀ tɔ̧ɔ̧ ha̧‘m: ‹Pierre, mɛ̀ nɛ́ɛ̀ gbɛ mɔɔ nɔ'ɔ, mɛ̀ nyɔ̀ŋ.›

⁸Ɓɛɛ mi kifi nú: ‹Ndó-ndó-ndó, Gasa Wan, mi tɛ nyɔŋ kɔ‘m ŋma ɗaŋ mɔɔ-ndiŋ nɛti na.›

⁹Ɓɛɛ tiger'i tɔ̧ ha̧‘m nɛ̀ yiwese mɛ woyo: ‹Mɔ nɛ̀ Sɔ̧ dea nɛ̀ sa̧a̧-a̧ kaɗi, ká mɛ́ sa'e mɔɔ-ndiŋ na.›

¹⁰Mɔ‘i tɛɛ hegɔ war taar, ɓɛɛ daŋ lɛŋ si ɗoŋ yiwese mɛ.

¹¹Ɓɛɛ nɛ́ tɛ́ kale kpɔk ŋgimbi'i a̧ o bíí yiitoo nɛ̀ wa toma nɛ̀ Sezaree mɛ tɛnɛ tɛ‘m, kii nɛ́‘m kɔ̧́ tua n’ɛɛ ɔ sɛnɛ.

¹²Nɛ́ mɔ'ɔ nɛ̀ Sa̧a̧ Ɔmi tɔ̧ɔ̧ ha̧‘m mɛ si ɗoŋ in wa, ká‘m ta mɔ na. Nɛ́ o nya'm nɔ'ɔ mɔɔrɔ-ɗoŋ-kpɔk’ɛ a̧ ea'm nɛnɛ hɔ tɛ̀ ko wi’ɛi. Ɓɛɛ ɛ́ɛ́ nɛ́ɛ̀ ye kɔ̧́ tua ko wi’ɛi.

¹³A̧ wee ɗoŋ mɔ h’ɛ́ɛ́‘e, ŋma betom ko Sɔ̧ tɛɛ tɛ̀ kɔ‘i, ɓɛɛ tɔ̧ ha'i: ‹Mɛ̀ tóm ŋma bíí si Jope mɛ́ sà Simɔŋ nɛ̀ ŋma nin-a nɛ́ Pierre tɛnɛ.

¹⁴A̧ tɛ tɔ̧ wen nɛ̀ tɛ kpasi mɛ in o bíí kɔ̧̀ kira kɔ-mɛ lɛŋ.›

¹⁵Mi ku̧u̧ naŋ tɔ̧ɔ̧ wen ha̧ wa ɗoŋ-aa tɛ nyɛi̧ na, ɓɛɛ Sa̧a̧ Ɔmi zir pii zu wa hee mɔ'ɔ nɛ̀ dee so in yɛɛ tɛ ku̧u̧naŋ-a mɛ ga.

¹⁶Ɓɛɛ tɛ‘m mbaŋ ɗoŋ wen ko Gasa Wan nɛ̀ tɔ̧ɔ̧ so'e: ‹Jean zuia o bíí nɛ̀ yi, ɓɛɛ k’ɛ́nɛ́, wa tɛ zui'nɛ́ nɛ̀ Sa̧a̧ Ɔmi.›

¹⁷Kà Sɔ̧ nɛ ha̧a̧ mɔ nɛ ta-tɛ ha̧ o wi nɔ‘i hee k’ɛɛ ga wen nɛ̀ wa kɔ̧ɔ̧ ɗɔaa ha̧ Gasa Wan Jesu Krist, ɓɛɛ mi só nɛ́ o mɛ dor Sɔ̧ tɛ dee mɔ kɔ‘i o?»

¹⁸Tɔ̧ɔ̧-wen ko Pierre ga̧a̧ see o wi nɛ̀ aka a̧, ɓɛɛ wa gasi Sɔ̧ tɔ̧ nɛnɛ‘e: «Sɔ̧ dee ha̧ o gɔni-dùk mɛ kpa mbe ta wen kpaa duka-kpasa.»

¹⁹Bɔnɛ nɛ̀ tika zu o bíí ko Sɔ̧ ɗoŋ fio ko Etienne dee ha̧ wa mɛ pɛsi hɔ Fenisii, Siprɛ, ká bá nɛ̀ Antiok mbɛt, ɓɛɛ wa tɔ̧ wen ko Sɔ̧ ha̧ ŋma bíí na, kànà nɛ́ o Juif ɓɛɛ.

²⁰Ɓɛɛ ŋgimbi nɛ̀ o ŋma mgbara wa nɛ̀ duk nɛ́ wi Siprɛ in Sirɛn hɔɔ Antiok, wa tɔ̧ɔ̧ De Mbe Wen ko Gasa Wan Jesu ha̧ o Grɛk mbɛt.

²¹Gasa Wan yora ɗoŋ wa, ɓɛɛ o bíí nɛ̀ dɔka-a zik tɛ̀ sitɛ Gasa Wan kɔ̧ nɛ̀ ɗɔaa ha̧ a̧.

²²Zuduk bíí ko Krist sɛn Jerusalɛm zia nyɛrɛ mɔ‘i, ɓɛɛ wa tom Barnabas nɛnɛ Antiok.

²³A̧ hɔɔ zɔk gasa tom nɛ̀ Sɔ̧ dee mgbara o wi nɔ‘i, ɓɛɛ a̧ kpa desee nyɛmna; a̧ tɔ̧ɔ̧ mbɔrɔ ha̧ wa mɛ ndaɗi in Gasa Wan nɛ̀ see-wa lɛŋ.

²⁴Barnabas duka nɛ́ wi-de-mɔ nɛ̀ yuwar-a, nɛ̀ duna nɛ̀ Sa̧a̧ Ɔmi, in nɛ̀ kɔ̧ɔ̧ɗɔɔwen. Ɓɛɛ o bíí nɛ̀ dɔka-a nɛ́ ɗoŋ Gasa Wan.

²⁵Ɓɛɛ Barnabas kur yak si Tars mɛ kii Saul.

²⁶A̧ nɛ̀ɛ̀ kpa a̧, ɓɛɛ a̧ mgbɔ a̧ si ɗoŋ si Antiok. Wa yaa saaye'i pɛ kpɔk de nɛ̀ tom in ŋmaa mgbara o zuduk bíí ko Krist, usi nɛ̀ mɔ ha̧ o bíí nɛ̀ dɔka-a. Mɛ̀ nɛ́ sɛn Antiok a̧ wa ku̧u̧ nɛ̀ naŋ saa o ŋgaiwi ko Jesu'e bíí ko Krist.

²⁷Tɛ ŋgimbi'i, o ŋma wi-tɔ̧-wen oi nú Sɔ̧ kura Jerusalɛm mɛ nɛ̀ si Antiok.

²⁸Nin ŋma nɛ́ Agabus; a̧ tɔ̧ɔ̧ wen tɛ ŋgai ko Sa̧a̧ Ɔmi'e: «Gasa kaɓa tɛ tik zaŋnu lɛŋ.» Ɓɛɛ mɔ‘i hɔ gba̧a̧ ŋgimbi ko wannu Klod.

²⁹Ɓɛɛ o ŋgaiwi ko Jesu lɛŋ kpɛk mɛ tom mɔ gbak nɛ̀ o nya-wi nɛ̀ a̧a̧ nú Judee, nyɛm nɛ̀ ɗoŋ mɔ nɛ̀ bíí kpɔk kpɔk a̧a̧ nɛnɛ.

³⁰Wa mɔi̧a mɔɔ nɔ‘i kaɗi, ɓɛɛ wa e er Barnabas in Saul mɛ ba nɛnɛ ha̧ o kuti-wi sɛn nú Judee.