Read Northwest Gbaya TOM 12 Bible Online

TOM 12 - Northwest Gbaya bible

TOM 12

¹Tɛ ŋgimbi'i, wannu Herod ku̧u̧ naŋ usa bɔnɛ ha̧ o ŋma bíí mgbara zuduk bíí ko Krist.

²Nɛ́ mɔ'ɔ n'aa gbɛɛ Jak, nya Jean nɛ̀ gba-paa.

³Ɗoŋ n'aa zɔka'e mɔ n'aa dea'i dee tɛ o Juif, ɓɛɛ a̧ ba Pierre mbɛt. Mɔ‘i dee tɛ ŋgimbi gbaŋa brɛt nɛ̀ hao bo sɛnɛ na.

⁴Herod baa a̧ pi̧ zɔɓɔ kaɗi, ɓɛɛ hok o wi-biro ɓu-zua-mɔɔrɔ-ɗoŋ-kpɔk, mɛ pɛm a̧, kpai nɛ̀ ŋmaa naar naar nɛnɛ, wen a̧ kɔ̧ɔ̧ so mɛ gɔn kita zu Pierre ti dukbíí ɗoŋ gbaŋa Paska.

⁵Ŋgimbi nɛ̀ Pierre a̧a̧ kɔ̧́ zɔɓɔ, o zuduk bíí ko Krist kɔfa Sɔ̧ nɛ̀ ŋgaya-a wen a̧ ɓɔnsɛnɛ.

⁶Mɔɔ sa̧ ɓɛɛ Herod gɔna kita zu Pierre ti dukbíí wó, nɛ́ mɔ'ɔ nɛ̀ wa hɛra a̧ nɛ̀ nyak-boi yiitoo mɛ zaŋzɛ‘i, ɓɛɛ a̧ ɔ nɛ̀ oi-aa mgbara o wi-biro yiitoo. O ŋma wi-biro yiitoo pɛma kɔ‘i mɔ nú tua zɔɓɔ nɛ̀ zan mbɛt.

⁷Betom ko Gasa Wan hɔɔ yor katɛ Pierre hee gɔma-yí ga, ɓɛɛ sa̧a̧mɔ nyɛk kɔ̧́ bɛr-tua'i baraŋ; nɛ́ mɔ'ɔ nɛ̀ betom'i mbɛra ká̧ ɔm Pierre tun nɛ̀ a̧, ɓɛɛ tɔ̧ ha̧ a̧: «Mɛ̀ kúr bee.» Ɓɛɛ nyak-boi tir er-a a nù gbɔyɛɛ.

⁸Ɓɛɛ betom ko Gasa Wan tɔ̧ ha̧ a̧ woyo: «Mɛ̀ hɛ́r kanda kɔ-mɛ, ɓɛɛ mɛ̀ á ndárà naŋ-mɛ.» Pierre dee hee mɔ‘i ga. A̧ tɔ̧ɔ̧ ha̧ Pierre woyo: «Mɛ̀ pí̧ laa kɔ-mɛ, ɓɛɛ mɛ̀ tɛ́ ɗoŋ-am.»

⁹Pierre gboo nɛ́ ɗoŋ-aa, a̧ iŋ‘e mɔ nɛ̀ betom ko Sɔ̧ de'i nɛ́ kpasa mɔ na. Taamɔ kɔ̧-a̧‘e nɛ́ hɔɔ-zu.

¹⁰Wa gboo yak kuti fara-pɛm-mɔ in yiitoo-aa mbɛt, ɓɛɛ wa hɔ nú tua-boi nɛ̀ nú-a duk si saaye mɛ. Nú tua'i hu̧i̧a̧ ti wa nɛ̀ tɛ-wi, ɓɛɛ wa gbo yak; betom ko Gasa Wan mgbɔɔ Pierre e nú war, ɓɛɛ yak kɔ‘i ɓɛlɛm e a̧ duk.

¹¹Nɛ́ tɛ ŋgimbi'i a̧ taamɔ ko Pierre pia nɛ̀ ɗoŋ, ɓɛɛ a̧ tɔ̧: «Kinii mi iŋa mgbara mɔ'ɔ kaɗi: nɛ́ Gasa Wan a̧ toma betom kɔ‘i tɛnɛ mɛ de ha̧‘m mɛ yu er wannu Herod in tɛ ŋgamɔ lɛŋ nɛ̀ o be Juif taa so mɛ de in am.»

¹²Zu Pierre pia ɗoŋ kaɗi, ɓɛɛ a̧ nɛ́ si tɛ̀ ko Marii nàà ko Jean, nɛ̀ wa sa'e Mark, ɓɛɛ ká o bíí mɔi̧a so hi̧i̧ nɛ̀ dɔka-a kɔfi nɛ̀ Sɔ̧.

¹³Pierre kɔna nú tua, ɓɛɛ ŋma boko-be-de-tom, nin-a nɛ́ Roda, nɛ́ mɛ́ hú̧í̧ nú tua.

¹⁴A̧ iŋa tiger Pierre, ɓɛɛ a̧ hú̧í̧ nú tua na; a̧ maa yì si ɗoŋ nɛ̀ desee mɛ tɔ̧ ha̧ o bíí‘e nɛ́ Pierre a̧ yor ɗoŋ nú tua'i.

¹⁵Wa kifa nú ha̧ Roda: «Zu-mɛ zik zik!» Ɓɛɛ Roda tɔ̧ ha̧ wa woyo'e, nɛ́ kpasawen a'i tɔ̧. Ɓɛɛ wa tɔ̧: «Ŋmafara mɛ kpaa nɛ́ sɔ̧-tɛ-a.»

¹⁶Ŋgimbi'i Pierre ɓɔna fara kɔn nú tua; wa nɛ̀ɛ́ hu̧i̧ nú tua. Kà wa tɛ zɔk mɔ wó, Pierre nɛ́ mɔ'ɔ, ɓɛɛ ɗɛɗɛ-wa gɔn.

¹⁷Pierre ee er ha̧ o bíí mɛ ya nɛ̀ oi nú; a̧ wee ɗoŋ mɔ nɛ̀ Gasa Wan dee, gbo nɛ̀ a̧ kɔ̧́ zɔɓɔ, ɓɛɛ tɔ̧: «Ɛ̀nɛ̀ nɛ́ɛ̀ wé ɗoŋ wen’ɛ ha̧ Jak in o nya-ɛɛ.» Ɓɛɛ a̧ ba war yak si ŋma fara.

¹⁸Nɛ̀ mɔ sa̧a̧, o wi-biro sakala, ɓɛɛ wa tɔ̧: «Nɛ́ ge mɔ ge'e kpaa Pierre ge?»

¹⁹Herod tɔ̧ɔ̧ ha̧ wa mɛ kii Pierre, ɓɛɛ wa kpa a̧ na. A̧ saa o wi-biro nɛ̀ pɛma a̧‘i ak nɛ̀ wa; ɓɛɛ a̧ tɔ̧ ha̧ wa mɛ gbɛ wa; nɛ́ mɔ'ɔ n'aa kura Judee yak si Sezaree, ɓɛɛ duk hi̧i̧ tɛ be dɔka zɛ.

²⁰Kpɛri duka so mgbara Herod in o bíí Tir bá nɛ̀ Sidɔŋ. Ɓɛɛ o ye nɔ‘i e nú in ŋmaa mɛ́ nɛ̀ɛ́ ɗafi wen'i, ɓɛɛ wa nɛ́ɛ̀ zɔk Blastus gasa wi-zɔk kɔ̧̀ kira ko wannu Herod. A̧ mgbɔɔ wa nɛnɛ mɛ ɗafi mgbara wa nɛ̀ yuwar-a, wen o be-nù kɔ-wa kpa nyɔŋmɔ kɔ‘i tɛ nù ko Herod.

²¹Wese nɛ̀ wa gɔna so'i hɔa, ɓɛɛ Herod pi̧ laa-wan nɛ́ɛ̀ duk zu damti kɔ‘i tɔ̧ nɛ̀ wen.

²²Nɛ́ mɔ'ɔ nɛ̀ o bíí aa nú tɛ hiɗimɔ, ŋmaŋ nɛ̀ a̧‘e: «Ɛ̧ɛ̧ nɛ́ Sɔ̧'ɔ̧ tɔ̧ wen ɛ̧́, nɛ̀ bó nɛ́ bíí na.»

²³Nɛ́ tɛ́ kale ŋgimbi'i a̧ betom ko Gasa Wan pi̧i̧ zɛɛ tɛ Herod, wen n'aa gasi Sɔ̧ na; o dɔk aa tɛ-a nyɔŋ a̧, ɓɛɛ a̧ fe.

²⁴Wen ko Sɔ̧ gasa, ɓɛɛ pɛsi siti mbɛt.

²⁵Nɛ́ mɔ'ɔ nɛ̀ Barnabas in Saul kaɗa tom kɔ‘i sɛn Jerusalɛm kaɗi, ɓɛɛ wa si ɗoŋ Antiok, in Jean nɛ̀ wa sa'e Mark.[7]