Read Northwest Gbaya TOM 16 Bible Online

TOM 16 - Northwest Gbaya bible

TOM 16

¹Paul nɛ̀ɛ̀ hɔ Dɛrbɛ in Listrɛ. Ŋma ŋgaiwi ko Jesu duka so hi̧i̧, nin-a'e Timotee; nàà kɔ̧-a̧ nɛ́ zɔŋa Juif nɛ̀ kɔ̧ɔ̧ ɗɔaa ha̧ Jesu, ɓɛɛ dáà kɔ̧-a̧ nɛ́ be Grɛk.

²O nya-wi sɛn Listrɛ in Ikonium duka so zɔn Timotee nyɛmna.

³Paul kɔ̧ɔ̧ mɛ mgbɔ a̧ mɛ yar in a̧, ɓɛɛ nɛ́ mɔ'ɔ n'aa gɔna bɔr-aa wen zu o Juif nɛ a̧a̧ nu'i; wen o bíí lɛŋ iŋa'e dáà ko Timotee nɛ́ be Grɛk.

⁴Tɛ̀ o ye lɛŋ nɛ̀ o Paul in Silas hɔ sɛnɛ, wa wee ɗoŋ keta nɛ̀ o betom ko Jesu in o kuti-wi Jerusalɛm baa, ɓɛɛ wa tɔ̧ ha̧ o bíí ye nɔ‘i mɛ kasi.

⁵O zuduk bíí ko Krist kpaa ŋgai tɛ kɔ̧ɔ̧ɗɔɔwen kɔ-wa, ɓɛɛ wa dɔk dɔk siti dam ɗoŋ wese lɛŋ.

⁶O Paul in Silas yara nú Frigii in Galatii, wen Sa̧a̧ Ɔmi dora so wa tɛ tɔ̧ɔ̧ Wen ko Sɔ̧ sɛn nú Azii.

⁷Ŋgimbi nɛ̀ wa hɔɔ mgbara nú Misii, wa kɔ̧ɔ̧ mɛ ye nú Bitinii, ɓɛɛ Sa̧a̧ Ɔmi ko Jesu dor wa.

⁸Ɓɛɛ wa ɓir nɛ̀ nú Misii yak si Troas.

⁹Mɛ zɛ Sɔ̧ hɔɔ zu ha̧ Paul: mɛ̀ nɛ́ ŋma be Masedoan a̧ yor ai nɛ̀ nú ha̧ a̧‘e: «Ɛ̀nɛ̀ tɛ pii nú Masedoan, ɛ̀nɛ̀ gbák yɛ na nde?»

¹⁰Ɗoŋ hɔɔ-zu'i, ɛ́ɛ́ kia war nɛ̀ haya-a mɛ́ yak si nú Masedoan, wen ɛ́ɛ́ iŋa'e nɛ́ Sɔ̧'ɔ̧ sa ɛ́ɛ́ mɛ tɔ̧ De Mbe Wen ha̧ o bíí nù‘i.

¹¹Ɛ́ɛ́ yee kombon sɛn Troas ɓir nɛnɛ zééŋ si Samotras, ɓɛɛ mɛ́ sa̧a̧mɔ, ɛ́ɛ́ hɔ Neapolis.

¹²Nɛ́ mɔ'ɔ n’ɛɛ kura hi̧i̧ yak si Filipii, gasa ye nú Masedoan. Nɛ́ o be Rɔm a̧ tɛ̀ɛ̀ de ye'i. Ɛ́ɛ́ duka hi̧i̧ ɗoŋ-aa nyɛi̧ benaŋ.

¹³Wese-ɔm-tɛ, ɛ́ɛ́ gboo saaye bá nɛ̀ ká̧ zaŋ nana-yì yaknɛ wen ɛ́ɛ́ taa so'e ɛ́ɛ́ tɛ kpa fara-kɔfi-sɔ̧ sɛn hi̧i̧. Ɛ́ɛ́ hɔɔ ya nù, ɓɛɛ ɛ́ɛ́ ku̧ naŋ tɔ̧ɔ̧ wen ha̧ o okoo nɛ̀ mɔi̧a so hi̧i̧.

¹⁴Ŋma mgbara o okoo nɔ‘i nɛ̀ nin-a'e Lidii, duka so kɔ‘i nɛ́ wi-ɗɔr-gbɛ̧-laa. A̧ nɛ́ boko-be Tiatir nɛ̀ duka so gasi Sɔ̧. A̧ yeŋa zer-aa tɛ wen ko Paul, wen nɛ̀ Gasa Wan hu̧i̧a̧ see-aa mɛ zii wen'i.

¹⁵Ɗoŋ nɛ̀ wa zuia a̧ in o bíí kɔ̧̀ kira kɔ̧-a̧ lɛŋ, a̧ aia nú h’ɛ́ɛ́‘e: «K’ɛ̀nɛ̀ nɛ́ iŋa'e mi kɔ̧ɔ̧ ɗɔaa ha̧ Gasa Wan nɛ̀ mbetɛ, ɓɛɛ n’ɛ̀nɛ̀ tɛ́ɛ̀ ɔ́ tɛ kɔ‘m.» A̧ tɔ̧ɔ̧ wen gɔn ɗoŋ yɛ, ɓɛɛ ɛ́ɛ́ kpɛ́k.

¹⁶Ŋma wese ɛ́ɛ́ nɛ̀ɛ̀ si fara-kɔfi-sɔ̧, ɓɛɛ ɛ́ɛ́ kpa ŋma zɔŋa-bara. Zɔŋa'i nɛ́ wan-gbánà; a̧ kpa nɛ́ mbɔi nɛ̀ dɔka-a ha̧ o dáa-bara kɔ̧-a̧ tɛ yɔɔ gbánà.

¹⁷Kóò‘i tɛ̀ɛ́ ɗoŋ yɛ in Paul hiɗi nɛ̀ mɔ tɛnɛ‘e: «O wi nɔ'ɔ nɛ́ o wi-de-tom ko kpasa Sɔ̧ ŋgɔn mɛ! Wa usi nɛ́ yuwar-kpasa-a h’ɛ́ɛ́.»

¹⁸A̧ duka tɛ tɔ̧ɔ̧ kpɔk wen'i tɛ dɔka zɛ; nɛ́ mɔ'ɔ nɛ̀ see Paul ɗaŋa, ɓɛɛ zik tɛ tɔ̧ ha̧ ɗaŋ-sɔ̧ nɛ̀ duk tɛ kóò‘i: «Nɛ̀ nin Jesu Krist, mɛ̀ gbó tɛ kóò'ɛ!» Ɓɛɛ ɗaŋ-sɔ̧ gbo tɛ a̧ tɛ́ kale ŋgimbi'i.

¹⁹O dáa-bara kɔ̧-a̧ zɔka'e ndaa kpaa-mbɔi kɔ‘i kpoo wó, ɓɛɛ wa tik tɛ o Paul in Silas, gbur wa nɛnɛ ti o gasawi fara-kita mɛ.

²⁰Ɓɛɛ wa tɔ̧ ha̧ o gasa wi-gɔn-kita: «O wi nɔ'ɔ ɗaŋa ye k’ɛɛ kaɗi; wa nɛ́ o be Juif,

²¹nɛ́ mɔ'ɔ nɛ wa usi nɛ́ yuwar-duka-a kɔ-wa nɛ̀ nyɛm ŋmaa in yuwar heembea k’ɛɛ o be Rɔm, h’ɛ́ɛ́ mɛ kpɛk, k’ɛ̀ɛ̀ kásí nɛnɛ na.»

²²O giiwi dika gɛrɛm zu wa; o gasa wi-gɔn-kita kpɔ̧i̧a̧ laa tɛ̀ Paul in Silas yinɛ, ɓɛɛ tɔ̧ ha̧ o bíí mɛ gusi wa nɛ̀ ndoe.

²³Ɗoŋ nɛ̀ wa gusa wa batɛ kaɗi, wa aa wa kɔ̧́ zɔɓɔ, ɓɛɛ wa tɔ̧ ha̧ wan-pɛm-zɔɓɔ mɛ́ pɛm wa nɛ̀ de-a.

²⁴Wan-pɛm-zɔɓɔ zia wen'i, ɓɛɛ a o Paul in Silas kɔ̧ bɛr-tua mɛ see-a; a̧ aa poka naŋ-wa mbɛt.

²⁵O Paul in Silas kɔfa Sɔ̧, bíí nɛ̀ gima, gasi nɛ̀ Sɔ̧ mɛ́ ɗuka zɛ, ɓɛɛ oi o wi-zɔɓɔ zii ger wa mbɛt.

²⁶Nɛ́ be dekpaa tikiɗi, ɓɛɛ nù nak nɛ̀ ŋgaya-a nyɛmna, tua zɔɓɔ naka hɔ naŋ-tua mɛ, o nú tua zɔɓɔ lɛŋ hu̧i̧a̧ tɛ ŋgimbi'i, ɓɛɛ nyak-boi tɛ o wi-zɔɓɔ lɛŋ ŋman a nù.

²⁷Wi-pɛm-wi-zɔɓɔ tuna tɛ yá, ɓɛɛ zɔk'e nú tua zɔɓɔ lɛŋ hu̧i̧a̧. A̧ ta kɔ̧-a̧‘e o wi-zɔɓɔ yuu mɔ yak, ɓɛɛ a̧ dak gba-paa mɛ tok tɛ-a gbɛ.

²⁸Ɓɛɛ Paul hiɗi mɔ nɛ̀ ŋgaya-a ha̧ a̧ tɔ̧ nɛnɛ‘e: «Ká mɛ́ gbɛ tɛ-mɛ na, ɛ́ɛ́ a̧a̧ hɛ̧ɛ̧ lɛŋ.»

²⁹Wi-pɛm-wi-zɔɓɔ aka wee, gɔm ye tua nɛ̀ naka-tɛ, ɓɛɛ tik ká̧ naŋ o Paul in Silas.

³⁰A̧ mgbɔɔ wa gbonɛ, ɓɛɛ a̧ tɔ̧ ha̧ wa: «O nyaa, nɛ́ ge mɔ ge a̧‘m tɛ de sɛka'm kpasa ge?»

³¹Wa kifa nú ha̧ a̧: «Mɛ̀ kɔ̧́ ɗɔaa ha̧ Gasa Wan Jesu, ɓɛɛ mɛ́ tɛ́ kpasi in o bíí kɔ̧̀ kira kɔ-mɛ lɛŋ.»

³²Ɓɛɛ o Paul in Silas tɔ̧ wen ko Gasa Wan ha̧ a̧ in o bíí kɔ̧̀ kira kɔ̧-a̧ lɛŋ.

³³Tɛ́ kale ŋgimbi'i mɛ ɗuka-zɛ, wi-pɛm-wi-zɔɓɔ mgbɔɔ wa, fɔr yí-da̧i̧ tɛ-wa; a̧ kɔ̧ mɛ pɛm mɔ siti ɓɔna, ɓɛɛ wa zui a̧ in o bíí kɔ̧̀ kira kɔ̧-a̧ lɛŋ.

³⁴Hɔ-ɗoŋ-aa, a̧ mgbɔɔ o Paul in Silas si tɛ̀ kɔ̧-a̧, ɓɛɛ ɗafi nyɔŋmɔ ha̧ wa de nɛ̀ tortɛ in o bíí kɔ̧́ tua kɔ̧-a̧, wen wa kɔ̧ɔ̧ ɗɔaa ha̧ Sɔ̧.

³⁵Mɔ sa̧a̧ kaɗi, ɓɛɛ o gasa wi-gɔn-kita tom o bíí sitɛ wi-pɛm-wi-zɔɓɔ mɛ gbo wi nɔ‘i a nù.

³⁶Ɓɛɛ wi-pɛm-wi-zɔɓɔ nɛ́ɛ̀ tɔ̧ ha̧ o Paul'e: «O gasa wi-gɔn-kita toma ha̧‘m mɛ gbo'nɛ́ a nù; ɛ̀nɛ̀ gbó, ɛ̀nɛ̀ yák mɔ k’ɛ́nɛ́ zaŋ ga̧a̧mɔ.»

³⁷Ɓɛɛ Paul tɔ̧: «Ɛ́ɛ́ nɛ́ o be Rɔm, nɛ̀ mɔ'ɔ nɛ̀ wa gusa yɛ nɛ̀ yí bíí lɛŋ; wa gɔn kita zu yɛ na, a nɛ̀ yɛ zɔɓɔ. Ɓɛɛ kinii wa kɔ̧ɔ̧ mɛ gbo yɛ a nù nɛ̀ ti-fui! I̧i̧ beka de na! Ɛ̀nɛ̀ tɔ̧́ ha̧ wa tɛ́ɛ̀ gbo yɛ a nù nɛ̀ tɛ-wa.»

³⁸O betom nɔ‘i sii ɗoŋ tɔ̧ nú-tom'i, ɓɛɛ kíì de o gasa wi-gɔn-kita nyɛmna ŋgimbi nɛ̀ wa zia'e Paul in Silas nɛ́ o be Rɔm.

³⁹Nɛ́ mɔ'ɔ nɛ̀ o gasa wi-gɔn-kita nɛ̀ɛ̀ gɔm er ha̧ wa, gbo wa a nù, ɓɛɛ kɔfi wa mɛ yu saaye'i.

⁴⁰O Paul in Silas gboo kɔ̧́ zɔɓɔ, ɓɛɛ wa yak si tɛ̀ ko Lidii; wa yaa hi̧i̧ ha̧ nɛ̀ nɔɔ-ŋgiɗi ha̧ o nya-wa, ɓɛɛ wa kur mbe nɔ̀ yak.