Read Northwest Gbaya TOM 19 Bible Online

TOM 19 - Northwest Gbaya bible

TOM 19

¹Paul ɓira nɛ̀ Frigii yak si Efɛz, ɓɛɛ a̧ kpa ŋmaa in o ŋma ŋgaiwi ko Jesu sɛn hi̧i̧; ŋgimbi'i ɓɛɛ ká Apolos duk Kɔrint.

²Ɓɛɛ Paul ak wa: «Ɛ́nɛ́ kpaa Sa̧a̧ Ɔmi ŋgimbi n’ɛnɛ kɔ̧ɔ̧ nɛ̀ ɗɔaa ha̧ Sɔ̧ nde?» Wa kifa nú ha̧ a̧: «Weyaa, ɛ́ɛ́ tɛ zii k’ɛ́ɛ́ nyɛrɛ Sa̧a̧ Ɔmi nɛti na.»

³A̧ aka wa woyo: «Nɛ́ ge war ge a̧ wa zuia nɛ̀ ɛ́nɛ́ ge?» Wa kifa nú: «Wa zuia ɛ́ɛ́ nɛ̀ war ko Jean.»

⁴Ɓɛɛ Paul tɔ̧ ha̧ wa: «Jean tɔ̧ɔ̧ so ha̧ o bíí mɛ kpai duka-a kɔ-wa ha'i mɛ zui wa, ɓɛɛ a̧ tɔ̧ ha̧ dukbíí mɛ kɔ̧ ɗɔaa ha̧ wi nɛ̀ tɛ tɛ ɗoŋ-aa, ɓɛɛ wi’ɛi nɛ́ Jesu.»

⁵Wa zia wen kɔ̧-a̧, ɓɛɛ a̧ zui wa nɛ̀ nin Gasa Wan Jesu.

⁶Paul ee er zu-wa, ɓɛɛ Sa̧a̧ Ɔmi zir pii zu wa; wa tɔ̧ɔ̧ o gɔni-nú nɛtɛ nɛtɛ, ɓɛɛ wa tɔ̧ wen oi nú Sɔ̧ mbɛt.

⁷Wese'i o bíí lɛŋ duka hee ɓu-zua-yiitoo ga.

⁸Tɛ́ fio-zɛ taar, Paul duka tɛ nɛa-a kɔ̧́ tua-mɔi̧a-a, tɔ̧ nɛ̀ wen Wan ko Sɔ̧ nɛ̀ nɔɔ-ŋgiɗi ha̧ o bíí, kimii nɛ̀ wa mɛ kpɛk wen ko Sɔ̧.

⁹O ŋma bíí nɛ̀ dee ŋgazu nɛ̀ kɔ̧ mɛ kpɛk wen ko Sɔ̧ na tɔ̧ɔ̧ ɗaŋ wen zu yuwar Wan ko Sɔ̧ ti giiwi tɛ gasa mɔi̧a-a. Nɛ́ mɔ'ɔ nɛ̀ Paul gboo kɔ‘i yak e wa duk, ɓɛɛ kai o ŋgaiwi ko Jesu si tɛ̀, usi nɛ̀ mɔ ha̧ wa wese kpɔk kpɔk sɛn kɔ̧̀ tua-yambi-mɔ ko Tiranus.

¹⁰Paul duka tɛ usa mɔ hegɔ tɛ pɛ yiitoo, ɓɛɛ o bíí nú Azii lɛŋ, o Juif in o Grɛk mbɛt zii wen ko Gasa Wan.

¹¹Sɔ̧ dee o ŋga mɔɔ-kifi nɛ̀ er Paul.

¹²Hegɔ, wa baa o be laa-di̧-nú in o ŋma laa-pi̧-tɛ ko Paul nɛ́ɛ̀ gu tɛ o wi-zɛɛ, ɓɛɛ wa kpasi; o ɗaŋ-sɔ̧ mbɛt gboo tɛ o bíí.

¹³Ɓɛɛ o ŋma wan-gbánà Juif-yar-ŋgɔn kii mɛ sa nin Gasa Wan Jesu ndak nɛ̀ o ɗaŋ-sɔ̧ yinɛ tɛ o bíí. Mɔ nɛ̀ wa duka so mɛ tɔ̧ nɛ́ mɔ'ɔ: «Mi ndak'nɛ́ nɛ̀ nin Jesu nɛ̀ Paul usi wen kɔ̧-a̧'ɛ.»

¹⁴(Ŋma Juif nɛ̀ nin-a'e Seva duka so nɛ́ gasa wan-ɗafi-sɔ̧, ɓɛɛ nɛ́ o bem kɔ̧-a̧ mɔɔrɔ-ɗoŋ-yiitoo a̧ duka so mɛ de yí tom'i.)

¹⁵Ɗaŋ-sɔ̧ kifa nú ha̧ wa: «Mi iŋa Jesu, ɓɛɛ n'am iŋ Paul mbɛt; ɓɛɛ nɛ̀ k’ɛ́nɛ́, ɛ́nɛ́ nɛ́ o?»

¹⁶Nɛ́ mɔ'ɔ nɛ̀ wi nɛ̀ ɗaŋ-sɔ̧ a̧a̧ tɛ-a'i tika zu wa, gusi wa yai nɛ̀ nù, a da̧i̧ tɛ-wa, ɓɛɛ wa pɛsi gbo yak nɛ̀ mgbii.

¹⁷O bíí saaye Efɛz lɛŋ, o Juif in o Grɛk mbɛt, zia nyɛrɛ mɔ‘i; kíì baa wa lɛŋ, ɓɛɛ wa de ha̧ nin Gasa Wan Jesu mɛ gasi.

¹⁸O dɔka bíí mgbara o wi nɛ̀ kɔ̧ɔ̧ ɗɔaa ha̧ Sɔ̧ gbara mɔɔ-gbánà kɔ‘i.

¹⁹O wi-yɔ-gbánà nɛ̀ dɔka-a mɔi̧a o kalata-yɔ-gbánà kɔ‘i ɓɛɛ dɔ sɛn yí o bíí lɛŋ. Wa tɔra o sede kalata nɔ‘i lɛŋ, ɓɛɛ de kɔya-sede booro-ɓu-mɔɔrɔ.

²⁰Hegɔ wen ko Gasa Wan kpaa ŋgai, ɓɛɛ pɛsi siti tɛ ŋgai kɔ̧-a̧.

²¹Ɗoŋ o mɔɔ nɔ‘i, Paul taa [9] mɛ ɓir nɛ̀ nú Masedoan in Akai yak si Jerusalɛm, ɓɛɛ a̧ tɔ̧: «Mí nɛ́ hɔɔ hi̧i̧ kaɗi, mi tɛ nɛ̀ kànà hɔ Rɔm mbɛt.»

²²Paul toma o wi-gbak-a yiitoo, Timotee in Erastɛ, yak si Masedoan ɓɛɛ a̧ ɓɔn kɔ̧-a̧ nú Azii kaŋ.

²³Nɛ́ tɛ ŋgimbi'i a̧ mɔ sakala nɛnɛ batɛ wen zu yuwar ko Gasa Wan.

²⁴Ŋma kela nɛ̀ nin-a'e Demetrius duka so dui nɛ o be tua-bu-mbɔi ko sɔ̧ Dian; ɓɛɛ o wi-de-tom kɔ̧-a̧ gaŋgali mbɔi nɛ̀ dɔka-a tɛ mɔ‘i.

²⁵Nɛ́ mɔ'ɔ n'aa mɔi̧a o wi n'aa de tom in wa ká bá nɛ̀ o ŋma wi-de-pɛrti tom nɔ‘i, ɓɛɛ tɔ̧ ha̧ wa: «O sɛm kɔ‘m, ɛ́nɛ́ iŋa'e ɛ́ɛ́ ya nɛ̀ de-a wen zu tom’ɛ.

²⁶Ɛ́nɛ́ zɔka, ɓɛɛ n’ɛnɛ zii mbɛt; bó nɛ́ sɛn saaye Efɛz hɛ̧ɛ̧ kpɔk ɓɛɛ na, ɓɛɛ dam nú Azii lɛŋ, Paul nɛ́ mɔ'ɔ nɛ̀ ɔr nɛ́ o bíí sitɛ wi, tɔ̧ nɛnɛ ha̧ wa'e: o sɔ̧ n’ɛɛ dui nɛ̀ er yɛ bó nɛ́ sɔ̧ na.

²⁷Bó nɛ́ mɔ‘i tɛ ɗaŋ nɛ́ tom k’ɛɛ ɓɛɛ na, mɔ‘i tɛ de ha̧ o bíí mɛ fɛ̧ŋ tua ko gasa sɔ̧ k’ɛɛ Dian, ɓɛɛ o bíí nú Azii in o bíí zaŋnu’ɛ lɛŋ beka gas'a ɓɔna.»

²⁸Ŋgimbi nɛ̀ wa zia wen'i, see-wa nyima nyɛmna, ɓɛɛ wa gai mɔ: «Dian ko o be Efɛz nɛ́ gasa sɔ̧!»

²⁹O wi saaye lɛŋ sakala, ɓɛɛ wa ma yì nduɗɛɛ si gasa fara-mɔi̧a-a, kai nɛ̀ o be Masedoan, Gaius in Aristark, nɛ̀ yuwar wen wa nɛ́ o gbama-yari-nɔ̀ ko Paul.

³⁰Paul kɔ̧ɔ̧ so mɛ nɛ̀ tɛ gasa mɔi̧a-a'i, ɓɛɛ o ŋgaiwi ko Jesu dor a̧.

³¹O ŋma gasawi Azii nɛ̀ dúk nɛ́ sɛm ko Paul pi̧i̧ tom, ai nɛ̀ nú ha̧ a̧‘e, ká a̧ nɛ́ si fara-mɔi̧a-a'i na mbɛt.

³²Tɛ́ ŋgimbi mɔi̧a-a'i, mɔ ɔ ɗutuku̧i géè, wa yaa zaŋ nɛ̀ wen si hɛ̧ɛ̧, si hi̧i̧, ɓɛɛ o dɔka bíí iŋ kɔ‘i gba̧a̧ mɔ nɛ̀ wa mɔi̧a wen-aa'i na.

³³O ŋma bíí mgbara giiwi nɛ̀ mɔi̧a wee ɗoŋ wen'i ha̧ Alɛkzandrɛ, nɛ̀ o Juif foo mɛ duk ti. Ɓɛɛ nɛ́ mɔ'ɔ n'aa ee er ha̧ o bíí mɛ ya nɛ̀ oi nú ha̧ a̧ mɛ we ɗoŋ gba̧a̧ wen'i.

³⁴Ɓɛɛ ŋgimbi nɛ̀ wa iŋa'e Alɛkzandrɛ nɛ́ be Juif, wa lɛŋ aa nú tɛ gayamɔ tɛ karkor yiitoo tɔ̧ nɛnɛ‘e: «Dian ko o be Efɛz nɛ́ gasa sɔ̧!»

³⁵Nɛ́ mɔ'ɔ nɛ̀ ŋma gasa wi-yɔr-kalata saaye'i kura, gai giiwi, ɓɛɛ tɔ̧: «Ɛ́nɛ́ o be Efɛz, wi nɛ̀ iŋ‘e saaye Efɛz’ɛ hɛ̧ɛ̧ nɛ́ sa̧a̧ ye ko gasa sɔ̧ Dian, ɓɛɛ mboo-mɔ kɔ̧-a̧ hɛ̧ɛ̧ zira nɛ̀ yiwese na, nɛ́ o?

³⁶Hee mɔ'ɔ nɛ̀ ŋma kafɛ bo tɛ wen'i na ga, ɛ̀nɛ̀ yá keɗeŋ, k’ɛ́nɛ́ ɗaŋ tɛ‘nɛ́ géè na.

³⁷O wi nɔ'ɔ n’ɛnɛ kaia tɛnɛ'ɛ da̧ sɔ̧ k’ɛɛ kà wa fɛ̧ŋ nɛ̀ a̧ na mbɛt.

³⁸Kà Demetrius in o wi-de-tom kɔ‘i á̧ bòó nɛ̀ wen in ŋma bíí, ɓɛɛ a̧ a̧ nɛ́ɛ̀ wuli wi’ɛi fara-kita mɛ: wen ŋgimbi-ɓa-kita a̧a̧ sɛnɛ in o wi-gɔn-kita a̧a̧ sɛnɛ mbɛt.

³⁹K’ɛ̀nɛ̀ nɛ́ bòó nɛ̀ ŋma wen woyo, ɓɛɛ nɛ́ mɔi̧a-a ko o be-ye a̧ tɛ ɗafi i̧i̧ wen'i nyɛm nɛ̀ ɗoŋ heembea k’ɛ́ɛ́.

⁴⁰Ɛ̧ɛ̧ nɛ́ ŋma gasa wen ɛ̀ɛ̀ kii in'nɛ̀ɛ́, wen ŋma gba̧a̧ wen n’ɛɛ tɛ tɔ̧ ha̧ o gasawi mɛ kafi nɛ̀ wen zu yɛ tɛ mɔi̧a-a’ɛ bo na.»

⁴¹Ɗoŋ n'aa tɔ̧ɔ̧ wen'i kaɗi, ɓɛɛ a̧ tɔ̧ ha̧ o bíí nɛ̀ mɔi̧a mɛ pɛsi.