Read Northwest Gbaya TOM 21 Bible Online

TOM 21 - Northwest Gbaya bible

TOM 21

¹Ɗoŋ n’ɛ́ɛ́ kɛ̧ɛ̧ tɛ-ɛɛ nɛ̀ ŋmaa in wa kaɗi, ɛ́ɛ́ yee kombon yak zééŋ si Kos. Kà mɔ tɛ sa̧, ɛ́ɛ́ hɔɔ Rod, ɓɛɛ ɛ́ɛ́ kur hi̧i̧ si Patara.

²Ɛ́ɛ́ kpaa ŋma kombon nɛ̀ de mɛ yak si Fenisii; ɛ́ɛ́ yee, ɓɛɛ ɛ́ɛ́ yak.

³Ɛ́ɛ́ zɔka nú hòró Siprɛ, ɓɛɛ ɛ́ɛ́ e nɛ̀ war gale, ɓir zééŋ si Sirii, ɓɛɛ ɛ́ɛ́ zir sɛn Tir, wen nɛ́ hi̧i̧ a̧ wa tɛ́ kai o tui a nù sɛnɛ.

⁴Ɛ́ɛ́ kpaa o ŋma ŋgaiwi ko Jesu sɛn hi̧i̧; nɛ́ mɔ'ɔ n’ɛɛ ɔɔ in wa zɛ mɔɔrɔ-ɗoŋ-yiitoo, ɓɛɛ Sa̧a̧ Ɔmi tɔ̧ ha̧ wa mɛ dor Paul tɛ daŋa-a si Jerusalɛm.

⁵Nɛ́ zɛ ɔa-a k’ɛ́ɛ́ hi̧i̧ dama, ɛ́ɛ́ kura mɛ yak, ɓɛɛ o bíí lɛŋ, o okoo gú nɛ̀ o obem mbɛt mgbɔ yɛ e ɗoŋ ye. N’ɛ̀ɛ̀ bé hɔ nú hòró, ɓɛɛ ɛ́ɛ́ gbɛ zugur yɛ nù, kɔfi Sɔ̧.

⁶Ɛ́ɛ́ wara ŋmaa in wa kaɗi, nɛ́ mɔ'ɔ n’ɛɛ yee k’ɛ́ɛ́ kombon yak, ɓɛɛ wa si ɗoŋ tɛ̀ kɔ-wa.

⁷Ɗoŋ n’ɛɛ kuu yì nɛ̀ Tir hɔ Ptolemais kaɗi, ɛ́ɛ́ fana o nya-ɛɛ, ɓɛɛ ɛ́ɛ́ ɔ hi̧i̧ zɛ kpɔk in wa.

⁸Mɔ sa̧a̧, ɓɛɛ ɛ́ɛ́ kur hi̧i̧ woyo si Sezaree, nɛ́ mɔ'ɔ n’ɛɛ zira nɛ́ɛ̀ ɔ tɛ̀ ko Filip, ŋma wi-tɔ̧ De Mbe Wen mgbara o kuti-wi mɔɔrɔ-ɗoŋ-yiitoo nɛ̀ wa hoka so'i.

⁹Filip a̧a̧ so nɛ̀ o boko-bem kɔ‘i naar nɛ̀ tɛ ba wíì na; wa tɔ̧ so nɛ́ o wen oi nú Sɔ̧.

¹⁰Ɛ́ɛ́ duka hi̧i̧ zɛ dɔk tikiɗi, ɓɛɛ ŋma wi-tɔ̧-wen oi nú Sɔ̧ zir nɛ̀ nú Judee mɛ tɛnɛ, nin-a nɛ́ Agabus.

¹¹A̧ tɛ̀ɛ̀ kpa yɛ, ɓɛɛ a̧ ba kanda ko Paul hɛr nɛ̀ er-a in naŋ-a mbɛt nɛ̀ ta-tɛ-a ɓɛɛ tɔ̧: «Wen nɛ̀ Sa̧a̧ Ɔmi tɔ̧ɔ̧ nɛ́ mɔ'ɔ. O Juif tɛ hɛr wan-kanda’ɛ hegɔ sɛn Jerusalɛm, ɓɛɛ wa tɛ e a̧ er o gɔni-dùk.»

¹²Ŋgimbi n’ɛɛ zia wen'i in o nya-ɛɛ mɛ́ saaye'i, ɛ́ɛ́ aia nú ha̧ Paul mɛ e nɛa-a si Jerusalɛm duk.

¹³Ɓɛɛ Paul kifi nú h’ɛ́ɛ́: «Ɛ́nɛ́ hi̧i̧ kɔ̧a̧ ɗaŋ nɛ̀ see-am hegɔ wen ge? Wen mi duk dɔ̧́ɔ̧́ ha̧ wa mɛ hɛra'm; ɓɛɛ bó nɛ́ hɛra'm ɓɛɛ na, ɓɛɛ nɛ́ fea-a sɛn Jerusalɛm wen zu nin Gasa Wan Jesu.»

¹⁴Hee mɔ'ɔ n’ɛɛ gaia a̧ takaɗi ga, ɛ́ɛ́ ee ha̧ a̧ mɛ yak, ɓɛɛ ɛ́ɛ́ tɔ̧: «Mɔ nɛ̀ Gasa Wan kɔ̧a̧ a̧ dé.»

¹⁵Ɗoŋ n’ɛɛ duka hi̧i̧ zɛ dɔk benaŋ tikiɗi, ɛ́ɛ́ ɗafa mɔ k’ɛ́ɛ́, ɓɛɛ ɛ́ɛ́ daŋ si Jerusalɛm.

¹⁶O ŋma ŋgaiwi ko Jesu mɛ Sezaree nɛ̀ɛ̀ so in yɛ̀ɛ́, ɓɛɛ wa mgbɔ yɛ nɛ́ɛ̀ zir tɛ̀ ko Nasɔŋ, ŋma be Siprɛ; wi’ɛi nɛ́ ŋma ŋgaiwi ko Jesu tɛ kuti ŋgimbi ɓeemɛ.

¹⁷Ɓɛɛ ŋgimbi n’ɛɛ hɔɔ Jerusalɛm, o nya-ɛɛ kpɛka yɛ nɛ̀ desee.

¹⁸Mɔ sa̧a̧, ɓɛɛ ɛ́ɛ́ kai ŋmaa in Paul nɛ́ si tɛ̀ ko Jak, fara nɛ o gasawi lɛŋ mɔi̧a sɛnɛ.

¹⁹Paul fana wa kaɗi, ɓɛɛ we ɗoŋ mɔ lɛŋ nɛ̀ Sɔ̧ dea mgbara o gɔni-dùk tɛ tom kɔ‘i ha̧ wa.

²⁰O wi nɛ̀ yaa zii nɛ̀ wen'i gasa Sɔ̧, ɓɛɛ wa tɔ̧ ha̧ Paul: «Nya-ɛɛ, mɛ̀ zɔ́k gba gíí Juif nɛ̀ kɔ̧ɔ̧ ɗɔaa ha̧ Jesu a̧a̧ sɛnɛ, ɓɛɛ wa e nɛ́ see tɛ kasa heembea ko Moisɛ nɛ̀ de-a mbɛt.

²¹Ɓɛɛ wa zia'e tɛ usamɔ kɔ-mɛ, mɛ́ ir nɛ́ o Juif lɛŋ nɛ̀ ya mgbara o gɔni-dùk mɛ́ e kasa heembea ko Moisɛ duk; mɛ́ tɔ̧a̧‘e ká wa gɔn bɔr o bem kɔ-wa ɓɔna, in ká wa ndak pata gba̧‘a̧ mɔ ko o zɔmdáa k’ɛ́ɛ́ ɓɔna mbɛt.

²²Kinii ɛ́ɛ́ tɛ de hee ge? Wen wa tɛ zii kànà nyɛrɛ hɔa-a kɔ-mɛ hɛ̧ɛ̧.

²³Hegɔ mɛ̀ dé mɔ n’ɛɛ tɛ tɔ̧ ha̧ mɛ. O bíí naar a̧a̧ sɛn hɛ̧ɛ̧ nɛ̀ ha̧a̧ so nú ha̧ Sɔ̧.

²⁴Mɛ̀ mgbɔ́ wa nɛnɛ in mɛɛ, mɛ̀ ɗáfí war-tɛ-mɛ in wa kpɔk, ɓɛɛ mɛ̀ há̧ sede-a. Wa tɛ kpui zu-wa mbɛt; hegɔ o bíí lɛŋ tɛ iŋ‘e mɔ nɛ̀ o bíí tɔ̧ zu mɛ́ nɛ́ ndela, ɓɛɛ wa tɛ iŋ‘e mɛ́ kasi heembea ko Moisɛ kasi.

²⁵Ɓɛɛ nɛ̀ war ko o gɔni-dùk nɛ̀ kɔ̧ɔ̧ ɗɔaa ha̧ Jesu, ɛ́ɛ́ baa yɔr so kalata ha̧ wa'e: ‹Wa a̧ bɛ̧́ nyɔŋa kpoo-ɗafi géé-sɔ̧, tɔk, in fio-saɗi, in wa a̧ é ɗaŋ duka-a duk mbɛt kaɗi.› »

²⁶Mɔ sa̧a̧, ɓɛɛ Paul mgbɔ o wi nɔ‘i nɛ́ɛ̀ ɗafi war-tɛ in wa kpɔk, ɓɛɛ a̧ nɛ́ɛ̀ ye kɔ̧́ Tua ko Sɔ̧ mɛ́ gɔn ŋgimbi n'aa tɛ ha̧ nɛ̀ mɔɔ-ɗafi-sɔ̧ dam wa kpɔk kpɔk ɗoŋ nɛ̀ ɗafa war-tɛ-wa kaɗa.

²⁷Ŋgimbi nɛ̀ zɛ mɔɔrɔ-ɗoŋ-yiitoo hɛɗa mɛ kaɗi, o Juif mɛ́ nú Azii zɔka Paul sɛn kɔ̧́ Tua ko Sɔ̧; nɛ́ mɔ'ɔ nɛ̀ wa nɛ̀ɛ̀ a wen ha̧ giiwi ɓɛɛ wa dik gɛrɛm ba a̧.

²⁸Ɓɛɛ wa hiɗi mɔ: «Ɛ́nɛ́ o be Israɛl, ɛ̀nɛ̀ tɛ́ɛ̀ gbák yɛ! Zɔ́k wi nɛ̀ usi mɔ dam fara lɛŋ ha̧ o bíí, tɔ̧ nɛ̀ ɗaŋ wen zu dukbíí k’ɛ́ɛ́ in zu heembea ká bá nɛ̀ sa̧a̧-fara’ɛ, nɛ́ mɔ'ɔ. A̧ mgbɔɔ o ŋma be Grɛk ye nɛ̀ Tua ko Sɔ̧ ɗaŋ nɛ̀ sa̧a̧-fara.»

²⁹(Wen wa zɔka so Trofim be Efɛz fara yara-a in a̧, ɓɛɛ wa ta kɔ-wa'e ŋmafara Paul mgbɔɔ a̧ ye nɛ̀ Tua ko Sɔ̧.)

³⁰O wi saaye lɛŋ dika gɛrɛm, ɓɛɛ wa ma yì nɛnɛ nɛ̀ gíí ba Paul, gbur a̧ gbonɛ kɔ̧́ Tua ko Sɔ̧, ɓɛɛ wa kpe nú tua.

³¹Wa kɔ̧ɔ̧ mɛ gbɛ Paul, ɓɛɛ wen nɛ̀ o bíí tɔ̧ yaknɛ‘e: «Jerusalɛm ɗaŋa kaɗi wo!» aa zer gasawi ko wi-biro.

³²Nɛ́ mɔ'ɔ nɛ̀ gasawi ko wi-biro kaia o wi-biro in o wi-duk-zu wi-biro gɔmŋmaa ma nɛ̀ yì sitɛ giiwi. Ŋgimbi nɛ̀ o wi nɔ‘i zɔka o wi-biro in gasawi kɔ‘i, wa kaɗa mbɛra Paul.

³³Gasawi ko wi-biro ɗɔŋa siti, ɓɛɛ ba Paul; a̧ tɔ̧ɔ̧ ha̧ wa mɛ a nyak-zɔɓɔ yiitoo tɛ-a. A̧ kia mɛ́ iŋ tugun-aa in gba̧a̧ mɔ n'aa dea,

³⁴ɓɛɛ hiɗimɔ ko giiwi nyɛm ŋmaa na; hee mɔ'ɔ nɛ̀ gasawi ko wi-biro zii gba̧a̧ mɔ nɛ̀ wa tɔ̧ na ga, a̧ tɔ̧ɔ̧ ha̧ o wi-biro mɛ ba Paul si kɔ̧̀ ŋgárá kɔ-wa mɛ.

³⁵Paul hɔɔ fara nɛ̀‘i daŋ nɛnɛ si kɔ̧̀ ŋgárá, ɓɛɛ o wi-biro tɔi a̧ nɛ̀ ŋgɔn wen ŋgamɔ nɛ̀ o bíí kɔ̧ɔ̧ mɛ de in a̧;

³⁶o bíí lɛŋ nɛ̀ɛ́ ɗoŋ-aa hiɗi nɛ̀ mɔ‘e: «Gbɛ a̧ gbɛɛ yinɛ!»

³⁷Wa hɛɗa mɛ ba Paul ye nɛ̀ ŋgárá kaɗi, ɓɛɛ Paul tɔ̧ ha̧ gasawi ko wi-biro: «Ɛ́nɛ́ tɛ e ha̧‘m mɛ tɔ̧ be wen in'nɛ̀ɛ̀ tikiɗi?» Ɓɛɛ gasawi ko wi-biro kifi nú ha̧ a̧: «Oo, mɛ iŋa tɔ̧ɔ̧ nú grɛk?»

³⁸Gasawi ko wi-biro tɔ̧ɔ̧ ha̧ a̧: «Bó nɛ́ mɛ́ nɛ́ be Egiptɛ nɛ̀ dee ha̧ o bíí booro-naar mɛ́ de ŋgazu tɛ́ ŋgimbi nɔ'ɔ, ɓɛɛ mɛ kai wa yaknɛ si ŋga-gbárà'ɛ na?»

³⁹Paul kifa nú: «Kɔ‘m mi nɛ́ be Juif, ye kɔ‘m nɛ́ Tars sɛn nú Silisii, mí nɛ́ be gasa ye nɛ̀ bíí lɛŋ iŋa. Mi gɔma er h’ɛ́nɛ́ mɛ e ha̧‘m mɛ tɔ̧ wen ha̧ dukbíí.»

⁴⁰Gasawi ko wi-biro kpɛka akamɔ‘i, ɓɛɛ Paul yor fara-daŋ-nɛnɛ si kɔ̧̀ ŋgárá, e er ha̧ giiwi; wa yaa kéɗéŋ, ɓɛɛ a̧ ku̧ naŋ tɔ̧ɔ̧ wen ha̧ wa nɛ̀ nú hébreu.