Read Northwest Gbaya TOM 22 Bible Online

TOM 22 - Northwest Gbaya bible

TOM 22

¹Ɓɛɛ Paul tɔ̧: «O nya'm in o dáà kɔ‘m, ɛ̀nɛ̀ zíí wen kɔ‘m n'am tɛ́ ɓa h’ɛ́nɛ́ kinii.»

²Ŋgimbi nɛ̀ wa zia Paul tɛ tɔ̧ɔ̧ wen nɛ̀ nú hébreu ha̧ wa, wa yaa kéɗéŋ gan kuti-a.

³Paul tɔ̧ɔ̧ ha̧ wa: «Mí nɛ́ be Juif, wa koa'm Tars sɛn nú Silisii, ɓɛɛ nɛ́ saaye’ɛ a̧‘m gasa sɛnɛ. Mi yamba heembea ko o zɔmdáa k’ɛ́ɛ́ er Gamaliɛl nɛ̀ de-a, mi dee so wɔ-mɔ ko Sɔ̧ batɛ, kànà hee mɔ'ɔ n’ɛnɛ de sɔsɔɔ lɛŋ ga mbɛt.

⁴Mi dee ŋgamɔ hɔ tɛ fio in o wi nɛ̀ ba yuwar ko Gasa Wan; mi aa nyak-zɔɓɔ tɛ o okoo in o wiwii kai wa a zɔɓɔ.

⁵Gasa wan-ɗafi-sɔ̧ in o gasawi lɛŋ tɛ nyɛm mɛ de sedaako mɔ‘i oi nú‘m, wen nɛ́ wa á̧ ha̧a̧ so o kalata ha̧‘m mɛ́ nɛ̀ Damas mɛ́ a nyak-zɔɓɔ tɛ o nya-ɛɛ nɛ̀ yaa hi̧i̧ wen kaia wa pii Jerusalɛm mɛ́ usi bɔnɛ ha̧ wa.»

⁶«Mi a̧a̧ yuwar ɓɛɛ mi hɛɗa nɛ̀ Damas, ká wese hɔɔ see zu kaɗi. Nɛ́ mɔ'ɔ nɛ̀ ŋma gasa sa̧a̧mɔ zira nɛ̀ yiwese gɔn zik am e see-a.

⁷Mi hɔ̧fa̧ tik nù, ɓɛɛ mi zii ŋma tiger nɛ̀ tɔ̧ ha̧‘m'e: ‹Saul, Saul, mɛ́ usi bɔnɛ ha̧‘m wen ge?›

⁸Ɓɛɛ mi kifi nú: ‹Ɛ́nɛ́ nɛ́ o, Gasa Wan?› Ɓɛɛ tiger'i tɔ̧ ha̧‘m woyo: ‹Nɛ́ mi Jesu be Nazarɛt, wi nɛ̀ mɛ usi bɔnɛ ha̧ a̧'ɛ.›

⁹O gbama-yari-nɔ̀ kɔ‘m zɔka sa̧a̧mɔ‘i nɛ̀ de-a, ɓɛɛ wa zii tiger wi nɛ̀ tɔ̧ wen in am'i na.

¹⁰Ɓɛɛ mi ak mɔ woyo: ‹Gasa Wan, nɛ́ ge mɔ ge a̧‘m tɛ de ge nde?› Ɓɛɛ Gasa Wan kifi nú ha̧‘m: ‹Mɛ̀ kúr, mɛ̀ yák si Damas, ɓɛɛ mɛ̀ nɛ́ sɛn hi̧i̧ a̧ wa tɛ tɔ̧ mɔ nɛ̀ mɛ tɛ de ha̧ mɛ.›

¹¹Sa̧a̧mɔ‘i boma so yí‘m, ɓɛɛ o gbama-yari-nɔ̀ kɔ‘m mgbɔ‘m nɛ̀ er hɔ nɛnɛ Damas mɛ.

¹²«Ŋma bíí a̧a̧ so saaye'i, nin-a nɛ́ Ananias, a̧ nɛ́ wi-yu-sɔ̧ nɛ́ kasi heembea nɛ̀ de-a mbɛt. O Juif mɛ́ Damas lɛŋ dee de sedaako duka-a kɔ̧-a̧.

¹³A̧ tɛ̀ɛ̀ kpa'm, ɓɛɛ tɔ̧: ‹Saul, nya'm, yí-mɛ́ a̧ hú̧í̧.› Ɓɛɛ nɛ́ tɛ́ kale ŋgimbi'i a̧ yí‘m hu̧i̧a̧, ɓɛɛ mi zɔk a̧.

¹⁴Ɓɛɛ a̧ tɔ̧ ha̧‘m: ‹Sɔ̧ ko o zɔmdáa k’ɛ́ɛ́ hoka mɛ́, wen ha̧ mɛ́ mɛ́ iŋ mɔ n'aa kɔ̧a̧ in ha̧ mɛ́ mɛ́ zɔk Wan-de-mɔ nɛ̀ yuwar-a, zíí nɛ̀ mgbák tiger-a mbɛt.

¹⁵Mɛ́ tɛ́ duk wi-sedaako kɔ̧-a̧, tɔ̧ nɛ̀ wen mɔ nɛ̀ mɛ zɔka in mɔ nɛ̀ mɛ zia ti o bíí lɛŋ.

¹⁶Wen ge sa mɛ́ pɛm mɔ ge? Mɛ̀ é ha̧‘m zui mɛ́ wen fɔra ɗaŋmɔ kɔ-mɛ yinɛ nɛ̀ ɗoŋ nin a̧.›

¹⁷«Ŋgimbi n'am pia ɗoŋ Jerusalɛm, mi duka kɔfi nɛ̀ Sɔ̧ kɔ̧́ Tua ko Sɔ̧. Nɛ́ mɔ'ɔ nɛ̀ Gasa Wan hɔɔ zu ha̧‘m ŋma wese,

¹⁸ɓɛɛ tɔ̧ ha̧‘m: ‹Mɛ̀ yú saaye Jerusalɛm’ɛ bee, ká mɛ́ nik naŋ na, wen wa beka kpɛk sedaako nɛ̀ mɛ tɛ de wen am sɛn hɛ̧ɛ̧ na.›

¹⁹Ɓɛɛ mi kifi nú: ‹Gasa Wan, o wi nɔ'ɔ iŋa nɛ̀ de-a'e nɛ́ mí a̧ kai so o bíí nɛ̀ kɔ̧ɔ̧ ɗɔaa h’ɛ́nɛ́ nɛ̀ kɔ̧́ tua-mɔi̧a-a a zɔɓɔ, gusi nɛ̀ wa mbɛt.

²⁰Ŋgimbi nɛ̀ wa gbɛɛ nɛ̀ wi-sedaako k’ɛ́nɛ́ Etienne, mi duka so oi-aa mbɛt, mi kpɛka mɔ nɛ̀ wa dee in a̧, ɓɛɛ nɛ́ mí a̧ pɛma laa ko o wi-gbɛ-a mbɛt.›

²¹Ɓɛɛ Gasa Wan tɔ̧ ha̧‘m: ‹Mɛ̀ yák; mi tɛ́ tom mɛ́ nɛ̀ nyɛi̧a-a sitɛ o gɔni-dùk.› »

²²O Juif nɛ̀ zia so wen ko Paul hɔ tɛ wen'i aa nú tɛ́ hiɗimɔ: «Ɛ̀nɛ̀ gbɛ́ o pɛrti bíí hegɔ'ɔ yinɛ zaŋnu, ká‘i e ha̧ a̧ mɛ duk kpasa ɓɔna!»

²³Hee mɔ'ɔ nɛ̀ wa hiɗi mɔ, kpɔ̧i̧ nɛ̀ laa tɛ-wa a nù, a nɛ̀ fuunu si ŋgɔn ga,

²⁴gasawi ko wi-biro tɔ̧ɔ̧ ha̧ wa mɛ ba Paul si kɔ̧̀ ŋgárá; wa a̧ gús'a, wen ha̧ wa mɛ iŋ gba̧a̧ mɔ nɛ̀ o bíí hiɗi mɔ a zu-a wen-aa'i.

²⁵Wa hɛra Paul mɛ́ gusi, ɓɛɛ a̧ tɔ̧ ha̧ wi-duk-zu o wi-biro gɔmŋmaa: «Heembea e h’ɛ́nɛ́ mɛ gusi be Rɔm nɛ̀‘i tɛ gɔn kita zu a̧ hɔ̧ɔ̧ na, na»

²⁶Ɗoŋ nɛ̀ wan ko o wi-biro gɔmŋmaa zia wen'i, a̧ nɛ̀ɛ̀ tɔ̧ ha̧ gasawi ko o wi-biro: «Mɔ n’ɛnɛ tɛ̀ɛ́ de’ɛ hee ge? Wi’ɛ nɛ́ be Rɔm!»

²⁷Ɓɛɛ gasawi ko o wi-biro nɛ́ɛ̀ ak Paul: «Mɛ́ nɛ́ be Rɔm nɛ̀ mbetɛ?» Ɓɛɛ Paul kɔ̧ ɗɔaa'e: «Íì.»

²⁸Gasawi ko o wi-biro tɔ̧ɔ̧ ha̧ Paul: «Kɔ‘m, mi yoɓa nɛ́ dɔka sede mɛ duk be Rɔm.» Ɓɛɛ Paul kifi nú: «Kɔ‘m, mí nɛ́ be Rɔm tɛ koa'm.»

²⁹O wi nɛ̀ nɛ̀è so mɛ gusi Paul ha̧ a̧ mɛ tɔ̧ kpasawen dee kíì, ɓɛɛ wa pɛsi kpɔk kpɔk. Gasawi ko o wi-biro nɛ̀ tɛ-wi mbɛt duka nɛ̀ kíì ŋgimbi n'aa zia'e wi n'aa hɛra'i nɛ́ mgbák be Rɔm.

³⁰Mɔ sa̧a̧, ɓɛɛ gasawi ko o wi-biro bur nyak tɛ Paul yinɛ mɛ ak ndaa mɔ nɛ̀ o Juif wula a̧ wen-aa. Nɛ́ mɔ'ɔ n'aa mɔi̧a o gasa wan-ɗafi-sɔ̧ in gasa gɔna-kita nɛ̀ oi-aa lɛŋ ha̧ Paul mɛ́ ɓa wen kɔ‘i ti wa.