Read Northwest Gbaya TOM 24 Bible Online

TOM 24 - Northwest Gbaya bible

TOM 24

¹Ɗoŋ zɛ mɔɔrɔ, gasa wan-ɗafi-sɔ̧ Ananias in o ŋma gasawi ká bá nɛ̀ ŋma wi-we-ɗoŋ-wen, nin-a nɛ́ Tɛrtulus, yaka nɛ́ɛ̀ wuli Paul sɛn ti wannu mɛ.

²Wa saa Paul si ti kita, ɓɛɛ Tɛrtulus wul'a hee mɔ'ɔ ga: «Dáà, mɔ n’ɛɛ duk nɛ̀ de-a kinii’ɛ, mɛ̀ nɛ́ wen zu mbe ɗafamɔ n’ɛnɛ ɗafa nɛ̀ yuwar-a ha̧ dukbíí'ɛ.

³Wese lɛŋ in dam fara lɛŋ ɛ́ɛ́ kpɛk o tom n’ɛnɛ de'i nɛ̀ desee; ɓɛɛ ɛ́ɛ́ dee osoko h’ɛ́nɛ́ nyɛmna mbɛt, dáà Feliks.

⁴Mi kɔ̧ mɛ́ ɗaŋ ŋgimbi k’ɛ́nɛ́ na; mi aia nú h’ɛ́nɛ́, ɛ̀nɛ̀ yèŋ zer'nɛ́ tɛ be wen n’ɛɛ tɛ́ we ɗoŋ-aa tikiɗi h’ɛ́nɛ́'ɛ.

⁵Wi’ɛ n’ɛnɛ zɔk’ɛ, ɛ́ɛ́ kpaa ndaa-a; a̧ nɛ́ ŋma wi-ŋgazu nɛ̀ dee so ha̧ o Juif mɛ́ dik gɛrɛm zaŋnu lɛŋ, ɓɛɛ zu-a'i, a̧ nɛ́ ŋma wi-duk-ti zu ŋma yuwar-sɔ̧ ko o be Nazarɛt.

⁶A̧ dee mɛ ɗaŋ war-tua ko Sɔ̧, ɓɛɛ nɛ́ mɔ'ɔ n’ɛɛ baa nɛ̀ a̧; [hegɔ ɛ́ɛ́ kɔ̧ɔ̧ so mɛ́ gɔn kita zu a̧ nyɛm nɛ̀ ɗoŋ heembea k’ɛ́ɛ́.

⁷Nɛ́ mɔ'ɔ nɛ̀ Lizias gasawi ko o wi-biro tɛ̀ɛ̀ ɓar a̧ er-ɛɛ yinɛ nɛ̀ ŋgai,

⁸ɓɛɛ a̧ tɔ̧ ha̧ o wi-wul'a mɛ́ nɛ̀ nɛa-a ti'nɛ́.] Ɛ̀nɛ̀ ák a̧ nɛ̀ tɛ̀‘nɛ́, ɓɛɛ ɛ́nɛ́ tɛ iŋ‘e mɔ n’ɛɛ tɔ̧ɔ̧ zu a̧ lɛŋ nɛ́ kpasawen nɛ̀ mbetɛ.»

⁹Ɓɛɛ o Juif lɛŋ nɛ̀ mɔi̧a kɔ̧́ tua'i kɔ̧ ɗɔɔ wen'i tɔ̧ nɛnɛ‘e, mgbák yí wen'i á̧ à̧ tɔ̧a̧‘i.

¹⁰Wi-duk-zu zika-nù ee er ha̧ Paul mɛ tɔ̧ wen; nɛ́ mɔ'ɔ n'aa kura, ɓɛɛ tɔ̧: «Mi duk nɛ̀ desee nyɛmna mɛ́ ɓa wen kɔ‘m ti'nɛ́, wen mi iŋa'e ɛ́nɛ́ gɔna kita zu dukbíí'ɛ pɛ nɛ̀ dɔka-a.

¹¹Ɛ́nɛ́ nyɛma mɛ́ iŋ nɛ̀ mbetɛ‘e, ŋgimbi n'am daŋa si Jerusalɛm mɛ gasi Sɔ̧ tɛ gan zɛ ɓu-zua-yiitoo hɔ̧ɔ̧ na.

¹²Ɓɛɛ kóó sɛn kɔ̧́ Tua ko Sɔ̧, kóó sɛn kɔ̧́ tua-mɔi̧a-a, ká bá nɛ̀ saaye mbɛt, ŋma bíí tɛ kpa'm fara kpɛra-a in ŋma bíí, kà‘m dé nɛnɛ ha̧ giiwi mɛ́ dik gɛrɛm na.

¹³O wi nɔ'ɔ nyɛm mɛ́ usi'e wen nɛ̀ wa tɔ̧ zu'm kinii’ɛ nɛ́ kpasawen na.

¹⁴Kɔ‘m, mi iŋa'e mi de nɛ́ tom ko Sɔ̧ ko o zɔmdáa k’ɛ́ɛ́, bá nɛ̀ yuwar nɛ̀ o wi nɔ'ɔ tɔ̧‘e nɛ́ ŋma yuwar-ɗafa-sɔ̧ nɛtɛ wó‘i. Mi kɔ̧ɔ̧ ɗɔɔ mɔ lɛŋ nɛ̀ yɔra zaŋ kalata heembea in o mɔ nɛ̀ o wi-tɔ̧-wen oi nú Sɔ̧ tɔ̧ɔ̧ mbɛt.

¹⁵Mi e ta nɛ̀ Sɔ̧‘e, o wi-de-mɔ nɛ̀ yuwar-a in o wi nɛ̀ de mɔ nɛ̀ yuwar-a na mbɛt tɛ kur ŋgɔn tɛ fio, ɓɛɛ o wi nɔ'ɔ a̧a̧ nɛ̀ kale taamɔ‘i mbɛt.

¹⁶Mɛ̀ nɛ́ wen hegɔ, mi mbɛt, mi kii ɓɔnsɛnɛ mɛ́ duk nɛ̀ sa̧a̧-see ti Sɔ̧ in ti o bíí lɛŋ.

¹⁷«Ɓɛɛ hee mɔ'ɔ n'am hɔ Jerusalɛm na pɛ ɔ dɔka ga, mi baa gbakamɔ nɛnɛ ha̧ dukbíí kɔ‘m in ha̧a̧mɔ ha̧ Sɔ̧ mbɛt.

¹⁸Mɛ̀ nɛ́ hegɔ nɛ̀ wa kpaa nɛ̀‘m kɔ̧́ Tua ko Sɔ̧ ŋgimbi n'am nɛ̀ɛ̀ mɛ́ ɗafi war-tɛ‘m; dɔka bíí bo in am na, ŋma foomɔ bo na mbɛt.

¹⁹Ɓɛɛ nɛ́ o Juif mɛ́ Azii a̧ duka so hi̧i̧ ŋgimbi'i; kà bó so nɛ́ wen gáà, ɓɛɛ nɛ́ wa a̧ tɛ̀ɛ́ wuli so'm h’ɛ́nɛ́ ɛ̧́.

²⁰Kà nɛ́ bòò hegɔ na, ɓɛɛ o wi nɔ'ɔ a̧ tɔ̧ ɗaŋmɔ n'am dea ŋgimbi n'am ɓaa nɛ̀ wen ti gasa gɔna-kita ŋgaɓo.

²¹Ɓɛɛ wen n'am yora mgbara wa tɔ̧ nɛnɛ nɛ̀ hee-ger nɛ́ mɔ'ɔ: ‹Mɛ̀ nɛ́ wen kura-ŋgɔn ko o bíí tɛ fio nɛ́ mɔ'ɔ n’ɛnɛ ba'm e ti kita wen-aa'e nde?› »

²²Hee mɔ'ɔ nɛ̀ Feliks iŋa mgbara yuwar ko Jesu nɛ̀ de-a ga, a̧ foo wen'i siti, ɓɛɛ tɔ̧: «Lizias gasawi ko wi-biro nɛ́ hɔɔ kaɗi, sɛka'm gɔna kita k’ɛ́nɛ́.»

²³Feliks tɔ̧ɔ̧ ha̧ o wi-duk-zu o wi-biro gɔmŋmaa mɛ́ e ha̧ Paul mɛ́ duk kɔ̧́ tua zɔɓɔ nɛ̀ de-a; ɓɛɛ kà o bíí kɔ̧-a̧ nɛ́ nɛ̀ɛ̀ mɛ́ zɔk a̧, ká wa dor wa na.

²⁴Tɛ́ ŋma wese nɛ̀ ɗoŋ, Feliks in kóò kɔ‘i zɔŋa Juif, nin-a nɛ́ Drusil, pi̧i̧ tom ha̧ Paul mɛ́ nɛ̀ɛ́ usi mɔ ha̧ wa zu kɔ̧ɔ̧ ɗɔaa ha̧ Krist Jesu.

²⁵Paul usa mɔ zu deemɔ nɛ̀ yuwar-a in kasa-zu tɛ duka-a, ká bá nɛ̀ gɔna-kita ko Sɔ̧ nɛ̀ tɛ hɔ. Kíì dee Feliks, ɓɛɛ a̧ tɔ̧: «Nyɛma hegɔ, kaɗa, mɛ̀ sí ɗoŋ, ŋma wese ɓɛɛ mi saa mɛ́ mɛ́ pii ɗoŋ.»

²⁶Feliks ta so kɔ‘i'e Paul tɛ ha̧ ŋma sede ha'i; nɛ́ mɔ‘i á̧ à̧ sa nɛ̀ Paul dɔ̧ɔ̧-dɔ̧ɔ̧ mɛ́ tɔ̧ nyɛrɛ in a̧.

²⁷Ɗoŋ pɛ yiitoo, ɓɛɛ Portius Fɛstus kpai Feliks; nɛ́ mɔ'ɔ nɛ̀ Feliks ee Paul ɓɔn kɔ̧́ zɔɓɔ yak nɛ̀ kɔ‘i mɛ́ ha̧ desee ha̧ o Juif.