Read Northwest Gbaya TOM 25 Bible Online

TOM 25 - Northwest Gbaya bible

TOM 25

¹Fɛstus dee zɛ taar sɛn Sezaree, ɓɛɛ yak si Jerusalɛm.

²Nɛ́ mɔ'ɔ nɛ̀ o gasa wan-ɗafi-sɔ̧ in o Juif nɛ̀ ɔ dita nɛ̀ɛ̀ wuli Paul ti Fɛstus.

³Mɔ nɛ̀ wa aka in a̧ tɛ ŋgimbi'i, nɛ́ wen ha̧ a̧ mɛ de demɔ in wa tom nɛ̀ Paul si ɗoŋ Jerusalɛm; wen wa kɔ̧ɔ̧ so mɛ́ hu̧si yuwar mɛ́ gbɛ a̧.

⁴Fɛstus kifa nú ha̧ wa: «Fara-de-zɔɓɔ ko Paul nɛ́ Sezaree, ɓɛɛ mi de mɛ́ si ɗoŋ si hi̧i̧ mbɛt.

⁵K’ɛ̀nɛ̀ nɛ́ kɔ̧ɔ̧, ɓɛɛ o ŋma gasawi mgbara'nɛ́ a̧ sí ɗoŋ in am si Sezaree; kà wi’ɛi á̧ dee ŋma ɗaŋmɔ nɛ̀ mbetɛ, ɓɛɛ o wi nɔ‘i wula a̧.»

⁶Fɛstus dee zɛ mɔɔrɔ-ɗoŋ-taar, kóó zɛ ɓu sɛn Jerusalɛm, ɓɛɛ a̧ si ɗoŋ Sezaree mɛ. Ŋgimbi n'aa sii ɗoŋ hi̧i̧, a̧ ɔɔ nù mɔ sa̧, ɓɛɛ a̧ nɛ́ɛ̀ duk fara-kita, pí̧ tom nɛ́ɛ̀ sa Paul.

⁷Ŋgimbi nɛ̀ Paul hɔa, o Juif nɛ̀ tɛ̀ɛ́ nɛ̀ Jerusalɛm zika a̧ kpa nú ŋmaa, ɓir nɛ̀ o ŋga wen-ndela nɛ̀ dɔka-a nɛ̀ wa nyɛm mɛ́ tɔ̧ yoŋgo-a nɛ̀ sa̧a̧-a̧ na e nú-a.

⁸Ɓɛɛ Paul tɔ̧ war kɔ‘i: «Mi gbin kɔ‘m ŋma heembea ko o Juif na, mi de ŋma ɗaŋmɔ in Tua ko Sɔ̧ na, kà bó nɛ̀ dee ɗaŋmɔ sitɛ wannu Sezar na mbɛt.»

⁹Fɛstus kɔ̧ɔ̧ mɛ́ ha̧ desee ha̧ o Juif, ɓɛɛ ak Paul: «Mɛ́ kɔ̧ɔ̧ mɛ daŋ si Jerusalɛm ha'i mɛ́ ɓa kita kɔ-mɛ nɛ̀ yí‘m nde?»

¹⁰Paul kifa nú ha̧ a̧: «Mi a̧a̧ ti kita ko wannu Sezar hɛ̧ɛ̧; hegɔ, nɛ́ kita'i a̧ tɛ tɔ̧ mɔ zu'm ɓɛɛ. Ɛ́nɛ́ iŋa nɛ̀ de-a'e mi de ŋma ɗaŋmɔ in o Juif na.

¹¹Kà‘m nɛ́ iŋa'e mi dee ŋma ɗaŋmɔ nɛ̀ mbetɛ nɛ̀ nyɛma ha̧‘m mɛ́ fe wen-aa, ɓɛɛ bó nɛ́ mi tɛ yu fio yuu na. Ɓɛɛ kà bó nɛ́ wen ndela nɛ̀ o wi nɔ'ɔ ɓir e nú‘m’ɛ, ŋma bíí bó nɛ̀ yuwar mɛ́ e'm er wa sɔɔ géè na. Mi kɔ̧ɔ̧ mɛ́ nɛ̀ɛ́ ɓa kita kɔ‘m ti wannu Sezar.»

¹²Nɛ́ mɔ'ɔ nɛ̀ Fɛstus aka o wi-ba-keta kɔ‘i, ɓɛɛ tɔ̧ ha̧ Paul: «Hee mɔ'ɔ nɛ̀ mɛ́ aka mɛ́ ɓa kita kɔ-mɛ ti wannu Sezar ga, mɛ́ tɛ́ nɛ̀.»

¹³Dee zɛ tikiɗi ɗoŋ-aa'i, ɓɛɛ wannu Agripa in Berenis nɛ́ sɛn Sezaree mɛ́ zɔk Fɛstus.

¹⁴Ɓɛɛ ŋgimbi nɛ̀ wa biti hi̧i̧, Fɛstus wee ɗoŋ wen ko Paul ha̧ wannu Agripa'e: «Ŋma bíí a̧a̧ hɛ̧ɛ̧ nɛ̀ wi-duk-zu zika-nù Feliks ee ɓɔn kɔ̧́ zɔɓɔ yak nɛ̀ kɔ‘i.

¹⁵Ŋgimbi n'am nɛ̀ɛ́ Jerusalɛm, o gasa wan-ɗafi-sɔ̧ in o gasawi ko o Juif mbɛt wula a̧ ha̧‘m mɛ́ gɔn kita zu a̧ ha̧ kita mɛ́ tik a̧.

¹⁶Ɓɛɛ mi kifi nú ha̧ wa'e: ‹Ko o be Rɔm, kà‘i wuli ŋma bíí, wi te e war ha̧ wi’ɛi mɛ́ ɓa wen kɔ‘i yí o wi-wul'a sɛka'i ee zu kita'i.›

¹⁷Ŋgimbi nɛ̀ wa hɔɔ hɛ̧ɛ̧, mi nik naŋ-am na. Mi pia ɔ zɛ kpɔk, ɓɛɛ mi nɛ́ɛ̀ duk fara-kita, tom mɔ sá Paul tɛnɛ.

¹⁸O wi-wul'a tɛa, ɓɛɛ wa tɔ̧ ŋma kpasa gba̧a̧-mɔ nɛ́ usi'e a̧ dee ŋma ɗaŋmɔ nɛ̀ mbetɛ hee mɔ'ɔ n'am taa so ga na.

¹⁹Wen kɔ-wa'i nɛ́ ŋma wen nɛ̀ zɔk nɛ́ yuwar-gasa Sɔ̧ kɔ-wa, mɛ̀ nɛ́ wen zu ŋma bíí nin-a'e Jesu nɛ̀ fee so kɔ‘i ɓeemɛ, nɛ̀ mɔ'ɔ nɛ̀ Paul tɔ̧‘e a̧ dúk kpasa.

²⁰Mi iŋ kɔ‘m mgbara ee zu pɛrti i̧i̧ wen'i na; nɛ́ hegɔ s'am tɔ̧‘e kà Paul nɛ́ kpɛka, a̧ a̧ nɛ́ Jerusalɛm wen ha̧ wa mɛ gɔn kita'i hi̧i̧.

²¹Nɛ́ mɔ'ɔ n'aa aka'm mɛ́ e war ha̧ a̧ mɛ́ nɛ̀ɛ́ ɓa kita kɔ̧-a̧ ti wannu Sezar; ɓɛɛ sa'm tɔ̧ ha̧ wa mɛ́ pɛm a̧ kɔ̧́ zɔɓɔ hɔ ŋgimbi n'am tɛ tom a̧ yaknɛ ha̧ wannu Sezar.»

²²Ɓɛɛ wannu Agripa tɔ̧ ha̧ Fɛstus: «Mi kɔ̧ɔ̧ mɛ́ zii wen ko wi’ɛi mbɛt.» Fɛstus kifa nú ha̧ a̧: «Ɛ́nɛ́ tɛ́ zii mɛ́ sa̧a̧mɔ.»

²³Mɔ sa̧a̧, ɓɛɛ o gasawi ko o wi-biro in o dita-bíí saaye mgbɔ wannu Agripa in Berenis suɗuɗu ye nɛ̀ tua-kita. Nɛ́ mɔ'ɔ nɛ̀ Fɛstus tɔ̧ɔ̧ ha̧ wa mɛ mgbɔ Paul tɛnɛ.

²⁴Fɛstus tɔ̧ɔ̧ woyo: «Wannu Agripa, in ɛ́nɛ́ o wi nɛ̀ ya hɛ̧ɛ̧ lɛŋ, ɛ̀nɛ̀ zɔ́k wi’ɛ nɛ̀ yor’ɛ. O Juif lɛŋ wula a̧ ha̧‘m sɛn Jerusalɛm hee sɛn hɛ̧ɛ̧ ga mbɛt, gai nɛ mɔ‘e, ká‘m e ha̧ a̧ mɛ́ duk kpasa na.

²⁵War kɔ‘m, mi kpa ŋma ɗaŋmɔ tɛ-a nɛ̀ nyɛma ha̧ a̧ mɛ fe wen-aa na; ɓɛɛ hee mɔ'ɔ n'aa aka mɛ́ ɓa wen kɔ̧-a̧ ti wannu Sezar ga, mi kpɛka mɛ́ tom a̧ nɛnɛ.

²⁶Mi kpa kɔ‘m ŋma kpasa gba̧a̧-mɔ n'am tɛ yɔr ha̧ wannu Sezar na; ɓɛɛ s'am sa a̧ mɛ́ ɓa wen'i ti'nɛ́ lɛŋ, h’ɛ́nɛ́ mɛ́ zii in am, géé mɔ na, wannu Agripa nɛ̀ duk mgbara yɛ hɛ̧ɛ̧, gbak na, mi kpaa gba̧a̧-mɔ n'am tɛ yɔr tom ha̧ a̧ sɛn ɗoŋ ɓaa kita’ɛ.

²⁷Wen kà‘i tom ŋma wi-zɔɓɔ si ŋmafara, ɓɛɛ kà‘i tɔ̧ yoŋgo mɔ nɛ‘i baa a̧ wen-aa na, mɔ‘i nyɛm sɛnɛ na.»