Read Northwest Gbaya TOM 27 Bible Online

TOM 27 - Northwest Gbaya bible

TOM 27

¹Ŋgimbi nɛ̀ wa tɔ̧a̧‘e ɛ́ɛ́ tɛ kur mɛ́ yak si Italii, wa ee Paul in o ŋma wi-zɔɓɔ er Julius wi-duk-zu o wi-biro gɔmŋmaa nɛ̀‘i sa'e Dùk-sooza ko wannu Ogust.

²Ɛ́ɛ́ yee kombon nɛ̀ kura nɛ̀ Adramit, wen baa ká̧ ŋgéré Azii yak nɛnɛ, ɓɛɛ ɛ́ɛ́ yak nɛ̀ zu gba-tɔp. Aristark ŋma be Tesalonik sɛn nú Masedoan a̧a̧ so in yɛɛ mbɛt.

³Nɛ̀ mɔ sa̧a̧, ɛ́ɛ́ hɔɔ Sidɔŋ; ɓɛɛ Julius nɛ̀ duka zɔk Paul nɛ̀ de-a e a̧ mɛ́ nɛ̀ɛ́ zir tɛ o sɛm kɔ̧-a̧ ha̧ wa mɛ́ gbak a̧.

⁴Ɛ́ɛ́ kura hi̧i̧, ɓɛɛ ɛ́ɛ́ yak nɛ̀ ká̧ Siprɛ, wen búk duka yú nɛ̀ war ti-ɛɛ tɛnɛ.

⁵Ɛ́ɛ́ kuu gba-tɔp nú Silisii in Pamfilii hɔ Mira sɛn nú Lisii, ɓɛɛ ɛ́ɛ́ zir hi̧i̧.

⁶Wi-duk-zu o wi-biro gɔmŋmaa kpaa ŋma kombon nú Alɛkzandrii nɛ̀ yak si Italii, ɓɛɛ a̧ a yɛ kɔ̧́ a̧.

⁷Dee be dɔka zɛ nɛ̀ kombon k’ɛ́ɛ́ nɛ́ nɔ̀ hai na, ɓɛɛ nɛ́ bɔnɛ bɔnɛ ɛ́ɛ́ zɔka nɛ̀ zu ye Knid. Hee mɔ'ɔ nɛ̀ búk yu nɛ̀ ti yɛ tɛnɛ ga, ɛ́ɛ́ ɓira Krɛt nɛ̀ war ɗɔɔ yak nɛnɛ nɛ̀ nú hòró Salomɔnɛ.

⁸Ɛ́ɛ́ yaka mgbák ká̧ fara'i, ɓɛɛ ɛ́ɛ́ hɔ ŋma fara nɛ̀‘i sa'e De Nú Hòró nɛ̀ duk ká̧ saaye Lasaya.

⁹Zɛ yaka nɛ̀ dɔka-a ɓɛɛ nɛ́ɛ́-nɔ̀ nɛ̀ kombon siti nɛ́ mɔɔ-fio, wen ŋgimbi gɛ̧̀ɛ̧́ [12] hɛɗa kaɗi. Ɓɛɛ Paul mbaŋ tɛ-wa'e:

¹⁰«O sɛm kɔ‘m, mi zɔka'e naŋanɔ'ɔ tɛ ɗaŋ mɔ k’ɛ́ɛ́ batɛ; o kpasa mɔ k’ɛɛ tɛ yɔ mbɛt. Bó nɛ́ o tui in kombon ɓɛɛ a̧ tɛ ɗaŋ na, ɓɛɛ o bíí k’ɛ́ɛ́ mbɛt.»

¹¹Ɓɛɛ wi-duk-zu o wi-biro gɔmŋmaa kɔ̧ mɛ́ kpɛk wen nɛ̀ Paul tɔ̧a̧ na; a̧ kɔ̧ɔ̧ mɛ́ zii nɛ́ wen nú wan-kombon in gasa wi-duk-zu o bíí-de-tom kɔ̧́ kombon'i ɓɛɛ.

¹²Hee mɔ'ɔ nɛ̀ nú hòró‘i duk nɛ̀ de-a mɛ ɓar ga na, o dɔka bíí kpɛka mɛ́ yak siti ha̧ wa mɛ́ zɔk kà wa nɛ́ nyɛma mɛ́ hɔ nú hòró Finiks sɛn nú Krɛt mɛ́ duk hi̧i̧ kaŋ. Fara'i duk si mgbii-zan nɛ̀ war wii-er in gale mbɛt.

¹³Ga̧a̧ búk yuu fɛ̀ɛ̀ nɛ̀ ká̧-zan-mɛ́-ɗɔɔ, ɓɛɛ wa ta kɔ-wa'e nɔ̀ kɔ-wa tɛ de; nɛ́ mɔ'ɔ nɛ̀ wa bura nyak kombon, ɓɛɛ wa we mɛ́ ba ká̧ ŋgere Krɛt nɛnɛ.

¹⁴Ɗoŋ tikiɗi, gasa hara-búk nɛ̀ wa sa'e «Rakilɔŋ» ku̧u̧ naŋ yua-a nɛ̀ war see-kisi mɛ si zu wa.

¹⁵Ŋga búk'i ira kombon nɛ̀ oi yɛ yaknɛ, ɛ́ɛ́ nyɛm so mɛ́ we ti búk'i na, ɓɛɛ ɛ́ɛ́ e ha̧ búk'i mɛ́ ba yɛ yaknɛ.

¹⁶Ɛ́ɛ́ ɓira nɛ̀ ɗoŋ ŋma be see-kisi nɛ̀ wa sa'e Kloda, ɓɛɛ nɛ́ hi̧i̧ ɛ́ɛ́ kpaa fara mɛ́ ɗafi be geɗek kombon n’ɛɛ gbur nɛnɛ‘i.

¹⁷Wa baa be kombon'i nɛ̀ ŋgɔn e kɔ̧̀ gasa-a, ɓɛɛ wa kaɓali ɗoŋ kombon lɛŋ nɛ̀ ŋga gba̧a̧-pɛr. Kíì dee wa wen ká kombon tɛ́ɛ̀ ba nyɛmɛ ká̧ Sirtɛ nú Libii mɛ, ɓɛɛ wa bur te-ba-kombon pi̧ ɗɔɔ yì wen ha̧ búk mɛ ba yɛ yaknɛ.

¹⁸Ŋga búk'i yuu hegɔ mɔ sa̧ nɛnɛ, ɓɛɛ wa ku̧ naŋ dɔra o tui a ɗɔɔ yì.

¹⁹Ɓɛɛ tɛ taar zɛ, o wi-de-tom kɔ̧́ kombon ku̧u̧ naŋ dɔra o mɔɔ-tɛ-kombon nɛ̀ er-wa a ɗɔɔ yì.

²⁰Zɛ dɔka ɛ́ɛ́ zɔk sɔra kà bó nɛ̀ wese na; ɓɛɛ gba-búk yu nɛ̀ kin gan kuti-a. Ɛ́ɛ́ taa k’ɛ́ɛ́‘e ɛ́ɛ́ tɛ́ kum lɛŋ.

²¹Zɛ dɔka ɛ́ɛ́ nyɔŋ mɔ na, nɛ́ mɔ'ɔ nɛ Paul kura yor, ɓɛɛ tɔ̧ ha̧ wa: «O sɛm kɔ‘m, ɛ̀nɛ̀ zɔ̀k, k’ɛ̀nɛ̀ zíí so wen nú‘m h’ɛ́ɛ́ mɛ́ ɓɔn so Krɛt gáà, bó nɛ́ ŋgamɔ'ɔ tɛ̀ɛ́ kpa yɛ, kà o mɔ k’ɛ́ɛ́ yɔ nɛnɛ na mbɛt.

²²Kinii, ɛ̀nɛ̀ nɔ́ ŋgiɗi, ŋma bíí mgbara'nɛ́ nɛ̀ tɛ́ fe bo na, nɛ́ kombon a̧ tɛ bin yì ɓɛɛ.

²³Mɛ́ zaŋzɛ'ɛ, ŋma betom ko Sɔ̧ n'am duk nɛ́ kɔ̧-a̧ in n'am de tom ha̧ a̧‘i tɛ̀ɛ́ tɛ‘m,

²⁴ɓɛɛ tɔ̧ ha̧‘m'e: ‹Paul, ká mɛ́ de kíì na, wen mɛ́ tɛ́ hɔ kànà ti wannu Sezar, ɓɛɛ Sɔ̧ tɛ kpasi o gbama-yari-nɔ̀ kɔ-mɛ lɛŋ wen zu mɛ.›

²⁵O sɛm kɔ‘m, ɛ̀nɛ̀ nɔ́ ŋgiɗi! Mi e ta nɛ̀ Sɔ̧, ɓɛɛ mi iŋa'e mɔ n'aa tɔ̧ɔ̧ ha̧‘m tɛ hɔ kànà gba̧a̧.

²⁶Kombon k’ɛ́ɛ́ tɛ́ bin yì tɛ ŋma see-kisi.»

²⁷Ɗoŋ zɛ ɓu-zua-naar, búk baa yɛ nɛ̀ nú-tum nɛnɛ sɛn zu gba-tɔp Adriatik, ɓɛɛ ɗoŋ biŋgi-zɛ, o wi-de-tom kɔ̧́ kombon iŋa'e wi hɛɗa nɛ̀ ŋma nú ŋgéré kaɗi.

²⁸Wa pi̧i̧ mɔɔ-we-ɗuka-yì, ɓɛɛ wa zɔka dee nɛ́ mɛtrɛ ɓu-naar; wa nɛ̀à siti tikiɗi, nɛ́ mɔ'ɔ nɛ̀ wa tama woyo, ɓɛɛ ɗuka i̧i̧ fara'i nɛ́ mɛtrɛ ɓu-taar.

²⁹Kíì dee wa wen ká kombon tɛ́ɛ̀ to o gasa ta, ɓɛɛ wa kpo nyak tɛ o mboɗa-boi naar kun ndaa kombon zir a ɗɔɔ yì, wen ká kombon tɛ́ɛ̀ yak siti. Wa kɔ̧ɔ̧ so nyɛmna ha̧ mɔ mɛ́ sa̧ nɛ̀ haya-a mbɛt.

³⁰O wi-de-tom kɔ̧́ kombon kia war mɛ́ yu mɔ yak e kombon duk; wa pi̧i̧ geɗek kombon ɗɔɔ yì nɛ̀ gɔn-ta, hee wa nɛ́ mɛ́ ɗafi nɛ́ o mboɗa-boi mɛ́ ti mɛ ga.

³¹Nɛ́ mɔ'ɔ nɛ̀ Paul tɔ̧ɔ̧ ha̧ wi-duk-zu o wi-biro gɔmŋmaa in ha̧ o wi-biro: «Kà o wi-de-tom kɔ̧́ kombon nɔ'ɔ duk ɓɔn kɔ̧́ kombon na, ɛ́nɛ́ beka kpasi na.»

³²Zia wen'i nɛ̀ o wi-biro zia hegɔ, wa nɛ̀ɛ̀ ɓir nyak geɗek kombon'i, ɓɛɛ i̧i̧ ba yì yak kɔ‘i.

³³Ŋgimbi nɛ̀ wa biti zɛma mɔ ha̧ mɔ mɛ́ sa̧, Paul tɔ̧ɔ̧ ha̧ o bíí lɛŋ mɛ́ nyɔŋ mɔ, ɓɛɛ a̧ tɔ̧‘e: «Sɔsɔɔ‘i dee zɛ ɓu-zua-naar n’ɛnɛ ya sakali nɛnɛ, n’ɛ̀nɛ̀ nyɔŋ mɔ na, dúk nɛnɛ.

³⁴Hegɔ, mi ai nú h’ɛ́nɛ́ mɛ́ nyɔŋ mɔ k’ɛ̀nɛ̀ kpásí. Wen sɛn mgbara'nɛ́ lɛŋ, mui̧-zu ŋma bíí kpɔk beka yɔ na.»

³⁵Ɗoŋ wen'i, a̧ baa brɛt, de osoko ha̧ Sɔ̧ nɛ̀ gbaayí wa lɛŋ, gbin, ɓɛɛ ku̧ naŋ nyɔŋa-a.

³⁶Hegɔ, wa lɛŋ kpaa nɔɔ-ŋgiɗi mɛ́ nyɔŋ mɔ mbɛt.

³⁷Ɛ́ɛ́ duka so nɛ́ bíí gɔmŋmaa-yiitoo-nɛ-ɓu-mɔɔrɔ-ɗoŋ-yiitoo-zua-mɔɔrɔ-ɗoŋ-kpɔk nɛ̀ yaa kɔ̧́ kombon'i.

³⁸Ɗoŋ nɛ̀ wa nyɔŋa mɔ zaŋ-wa sur kaɗi, wa pɛɛ tui alkamaari a ɗɔɔ yì wen ká̧ kombon tɛɛ diti.

³⁹Ɗoŋ nɛ̀ mɔ sa̧a̧ kaɗi, o wi-de-tom kɔ̧́ kombon iŋ nù nɛ̀ wa hɔɔ sɛnɛ‘i na, wa zɔka ŋma ká̧ ŋgéré nɛ̀ gba-tɔp yee si sɛnɛ nɛ̀ gbutu a̧a̧ ká̧ a̧, ɓɛɛ wa ta'e kà mɔ gan wa na, wa tɛ ba kombon ha̧ mɛ ba nyɛmɛ hi̧i̧.

⁴⁰Wa bura o mbɔɗa-boi mɛ́ ndaa kombon a ɗɔɔ yì, wa bura o berewen nɛ̀ wa hɛra so nɛ̀ gba̧a̧-pɛr, ɓɛɛ wa tati laa zu kombon wen ha̧ búk mɛ́ ba wa si tɔyɛɛ-nú-ŋgéré mɛ.

⁴¹Kin-yì baa kombon to nɛ̀ duk-nyɛmɛ, ɓɛɛ ɓɔn sɛnɛ ŋgeraa, nú-a duma nyɛmɛ ŋgai sɛnɛ kéŋ-kéŋ, ɓɛɛ ndaa-a ku̧ naŋ mbaŋa-a tɛ ha̧ma-a nɛ̀ yì há̧m yo nɛnɛ.

⁴²Nɛ́ mɔ'ɔ nɛ̀ o wi-biro taa mɔ mɛ́ gbɛ o wi-zɔɓɔ, wen ká ŋma mgbara wa tɛɛ zui yì yu mɔ yak.

⁴³Ɓɛɛ hee mɔ'ɔ nɛ̀ wi-duk-zu o wi-biro gɔmŋmaa kɔ̧ɔ̧ mɛ kpasi Paul ga, a̧ bɛ̧ɛ̧ taamɔ‘i, ɓɛɛ a̧ tɔ̧ ha̧ o wi nɛ̀ iŋa zuia yì mɛ́ zui yì si nú-ŋgéré ti.

⁴⁴Hɔ-ɗoŋ-aa, a̧ tɔ̧ɔ̧ ha̧ oi o bíí mɛ́ ɔ nù zu o mbaŋa-te in o gbina mɔɔ-tɛ-kombon, ha̧ pɛŋa-yì mɛ́ ba wa si nú-ŋgéré mɛ. Hegɔ, o bíí lɛŋ hɔɔ nú-ŋgéré, ŋma mɔ de wa na.