Read Northwest Gbaya TOM 8 Bible Online

TOM 8 - Northwest Gbaya bible

TOM 8

¹Saul kpɛka fio ko Etienne mbɛt. Nɛ́ wese'i a̧ wa ku̧u̧ nɛ̀ naŋ dee ŋgamɔ in zuduk bíí ko Krist sɛn Jerusalɛm. O dɔka bíí pɛsa yu mɔ yak si zaŋbɛɛ nú Judee in nú Samarii; kànà nɛ́ o betom ko Jesu a̧ ɓɔna sɛn Jerusalɛm ɓɛɛ.

²O ŋma wi-yu Sɔ̧ guna Etienne, ɓɛɛ wa hi̧i̧ a̧ nyɛmna.

³Ɓɛɛ Saul kii so nɛ́ yuwar mɛ yai zuduk bíí ko Krist a taŋ; a̧ ndɛna nɛ̀ nú tua nɛnɛ kai nɛ̀ o wiwii in o okoo a zɔɓɔ.

⁴O wi nɛ̀ pɛsi yaknɛ duka tɛ tɔ̧ɔ̧ De Mbe Wen tɛ ye kpɔk kpɔk nɛnɛ.

⁵Filip yaka so kɔ‘i si ŋma ye nú Samarii, ɓɛɛ duk tɔ̧ nɛ̀ nyɛrɛmɔ ko Mɛsii tɛ ye'i.

⁶Gba giiwi kpɛka usamɔ kɔ̧-a̧, wen wa zia nyɛrɛ mɔɔ-kifi n'aa de, ɓɛɛ wa zɔk nɛ̀ yí-wa mbɛt.

⁷O ɗaŋ-sɔ̧ nɛ̀ dɔka-a gboo tɛ wi nɛ̀ ɗaŋ-sɔ̧ a̧a̧ tɛ-wa, hiɗi nɛ̀ mɔ yaknɛ. O wi-kum in o kara-wi kpasa mbɛt.

⁸Ɓɛɛ o bíí tɛ ye'i ya nɛ̀ gasa desee.

⁹Ŋma bíí duka so saaye Samarii; nin wi’ɛi nɛ́ Simɔŋ nɛ̀ de kɔ‘i nɛ́ mɔɔ-gbánà, gɔn nɛ̀ ɗɛɗɛ o wi Samarii. A̧ ta kɔ̧-a̧‘e wi nɛ́ kpasa bíí.

¹⁰O bíí lɛŋ mboɗa ɗoŋ-aa, o geɗek-wi in o gasawi mbɛt. Ɓɛɛ wa tɔ̧: «Wi’ɛ nɛ́ ŋgai ko Sɔ̧; wan nɛ̀‘i sa'e kpasa ŋgai'i a̧‘i!»

¹¹Simɔŋ gɔna ɗɛɗɛ o bíí nɛ̀ mɔɔ-gbánà kɔ‘i tɛ dɔka ŋgimbi, ɓɛɛ sa wa ndaɗi ɗoŋ-aa.

¹²Ŋgimbi nɛ̀ o wi nɔ‘i kɔ̧ɔ̧ ɗɔɔ De Mbe Wen nɛ̀ Filip tɔ̧ zu Wan ko Sɔ̧ in zu nin Jesu Krist, wa zuia wa, o wiwii gú nɛ̀ o okoo mbɛt.

¹³Nɛ́ mɔ'ɔ nɛ̀ Simɔŋ nɛ̀ tɛ-wi kɔ̧ɔ̧ ɗɔaa mbɛt, ɓɛɛ wa zui a̧. Ɗoŋ-aa'i, Simɔŋ kɔ̧ kɛ̧ɛ̧ tɛ-wi nɛ̀ Filip na. Ɓɛɛ ɗɛɗɛ-a gɔn tɛ zɔka o gasa mɔɔ-kifi in mɔɔ-usi-mɔ nɛ̀ de.

¹⁴O betom ko Jesu nɛ̀ ɓɔna Jerusalɛm zia'e o bíí Samarii kpɛka wen ko Sɔ̧ wó, ɓɛɛ wa tom o Pierre in Jean nɛnɛ tɛ wa.

¹⁵Nɛ́ mɔ'ɔ nɛ̀ o wi nɔ‘i nɛa, ɓɛɛ kɔfi Sɔ̧ zu o wi Samarii wen ha̧ Sɔ̧ mɛ ha̧ Sa̧a̧ Ɔmi ha̧ wa;

¹⁶wen wa zuia so wa nɛ̀ nin Gasa Wan Jesu ɓɛɛ, ɓɛɛ Sa̧a̧ Ɔmi tɛ zir so pii zu ŋma bíí kpɔk mgbara wa hɔ̧ɔ̧ na.

¹⁷Nɛ́ mɔ'ɔ nɛ̀ o Pierre in Jean ee er zu-wa, ɓɛɛ wa kpa Sa̧a̧ Ɔmi.

¹⁸Nɛ̀ Simɔŋ zɔka'e o betom ko Jesu ee er zu o bíí ɓɛɛ wa kpa Sa̧a̧ Ɔmi, a̧ ha̧a̧ sede ha̧ o betom,

¹⁹ɓɛɛ tɔ̧: «Ɛ̀nɛ̀ há̧ ŋgai’ɛ ha̧‘m, wen ha̧ wi n'am tɛ e er zu a̧ mɛ kpa Sa̧a̧ Ɔmi mbɛt.»

²⁰Ɓɛɛ Pierre kifi nú ha̧ a̧: «Sede kɔ-mɛ'ɛ ɗáŋ gú nɛ̀ mɛ mbɛt. Wen mɛ taa'e mɔ nɛ̀ Sɔ̧ ha̧ géè, wi hi̧fi hi̧fi nɛ̀ sede.

²¹Ŋma mɔ kɔ-mɛ in mɔ nɛ mɛ tɛ kpa tɛ mɔ'ɔ bo na, wen see-mɛ sa̧ yí Sɔ̧ na.

²²Mɛ̀ kpáí duka-a kɔ-mɛ, mɛ̀ é ɗaŋ taamɔ duk, ɓɛɛ mɛ̀ kɔ́fí Gasa Wan: ŋmafara a̧ tɛ e ɗaŋmɔ nɛ̀ mɛ́ taa kɔ̧́ see-mɛ‘i ha̧ mɛ.

²³Wen mi zɔka kpírírí paŋmɔ a̧a̧ kɔ̧́ see-mɛ in nyak zɔɓɔ ɗaŋmɔ hɛra mɛ.»

²⁴Simɔŋ kifa nú ha̧ wa: «Ɛ́nɛ́ nɛ̀ tɛ‘nɛ́ mbɛt, ɛ̀nɛ̀ kɔ́fí Gasa Wan wen am, wen ká mɔ n’ɛnɛ tɔ̧a̧‘i tɛɛ hɔ zu'm.»

²⁵Ɗoŋ nɛ̀ o Pierre in Jean dee sedaako tɔ̧ nɛ̀ wen ko Gasa Wan hi̧i̧ kaɗi, wa sii ɗoŋ si Jerusalɛm usi nɛ̀ De Mbe Wen nɛ̀ tɛ o be ye ko o wi Samarii nɛnɛ.

²⁶Nɛ́ mɔ'ɔ nɛ̀ betom ko Gasa Wan tɔ̧ɔ̧ ha̧ Filip: «Mɛ tɛ yak si war ká̧-zan-mɛ́-ɗɔɔ, yuwar nɛ̀ zir nɛ̀ Jerusalɛm si Gaza, nɛ̀ bíí ba ɓɔna.»

²⁷Filip kura yak nɛ̀ haya-a, ɓɛɛ nɛ́ɛ̀ kpa ŋma kpàná Etiopii nɛ̀ nɛ̀ɛ̀ so Jerusalɛm mɛ gasi Sɔ̧. Wi’ɛi nɛ́ ŋma gasa wi nɛ̀ duk zu mbɔi ko Kandas, ko-wan Etiopii.

²⁸A̧ si nɛ́ ɗoŋ si Etiopii; nɛ́ mɔ'ɔ n'aa duka zu keekee-nyaŋa tɔr nɛ̀ kalata ko Esaii wi-tɔ̧-wen oi nú Sɔ̧.

²⁹Sa̧a̧ Ɔmi tɔ̧ɔ̧ ha̧ Filip: «Mɛ̀ nɛ́ si ká̧ keekee-nyaŋa mɛ‘i!»

³⁰Filip maa yì nɛnɛ, ɓɛɛ kpa wi’ɛi fara tɔr kalata ko wi-tɔ̧-wen oi nú Sɔ̧ Esaii, ɓɛɛ ak a̧: «Mɛ́ zii gba̧a̧ wen nɛ̀ mɛ́ tɔr’ɛ zii?»

³¹Kpàná kifa nú ha̧ a̧: «Kà ŋma bíí kɛ̧ mgbara wen’ɛ ha̧‘m na, mi tɛ́ zii bɔɔ hee ge?» Ɓɛɛ a̧ sa Filip mɛ daŋ keekee-nyaŋa mɛ duk nù in a̧.

³²Wen ko Sɔ̧ n'aa tɔra'i nɛ́ mɔ'ɔ: «Wa mgbɔɔ a̧ nɛnɛ si fara-gɔn-saɗi mɛ hee sami ga, hee be-sami nɛ̀ duk keɗeŋ ti wi-gɔn-buma tɛ-a ga, ɓɛɛ a̧ hú̧í̧ nú tɔ̧ wen na.

³³Wa pi̧i̧ búù zu a̧ ɓɛɛ wà de mɔ nɛ̀ yuwar-a in a̧ na.[4] Nɛ́ o'o tɛ tɔ̧ wen ko o bezaŋ-aa ɓɔ o? Wen wa gbɛɛ a̧ yinɛ zaŋnu’ɛ kaɗi.»

³⁴Kpàná tɔ̧ɔ̧ ha̧ Filip: «Mi aia nú ha̧ mɛ, nɛ́ ge bíí ge a̧ wi-tɔ̧-wen oi nú Sɔ̧ tɔ̧ bɔɔ nɛnɛ'ɛ ge? A̧ tɔ̧ wen’ɛ wen a̧ nɛ̀ tɛ-a náà, kóó a̧ tɔ̧ nɛ́ ŋma bíí nde?»

³⁵Filip ku̧u̧ naŋ wee ɗoŋ mɔ tɛ yɔramɔ‘i tɔ̧ nɛ̀ De Mbe Wen ko Jesu ha̧ a̧.

³⁶Tɛ̀ nɛa-a kɔ-wa in ŋmaa siti, wa hɔɔ kpa yì, ɓɛɛ kpàná tɔ̧ ha̧ Filip: «Zɔ́k, yì nɛ mɔ'ɔ, mɔ nɛ̀ tɛ dor zuia'm kinii nɛ́ ge?» [

³⁷Filip kifa nú ha̧ a̧: «Kà mɛ kɔ̧ ɗɔaa nɛ̀ see-mɛ lɛŋ, wi nyɛma mɛ zui mɛ.» Ɓɛɛ kpàná tɔ̧: «Mi kɔ̧ɔ̧ ɗɔaa'e Jesu Krist nɛ́ Bem ko Sɔ̧.»]

³⁸A̧ baa keekee-nyaŋa yor, wa yiitoo mbɛt zira si ɗɔɔ yì, ɓɛɛ Filip zui a̧.

³⁹Ŋgimbi nɛ̀ wa daŋa ɗɔɔ yì kaɗi, Sa̧a̧ Ɔmi ko Gasa Wan baa Filip yaknɛ e Azot mɛ; kpàná zɔk a̧ ɓɔna ɓɛɛ ba war kɔ‘i yak nɛ̀ desee. Filip duka Azot tɔ̧ nɛ̀ De Mbe Wen nɛ̀ tɛ̀ o ye nɛnɛ hɔ Sezaree mɛ.