Read Northwest Gbaya TOM 9 Bible Online

TOM 9 - Northwest Gbaya bible

TOM 9

¹Ŋgimbi'i taamɔ ko Saul duka so nɛ́ wen nasa in gbɛɛ o ŋgaiwi ko Gasa Wan.

²Nɛ́ mɔ'ɔ n'aa nɛ̀ɛ̀ ak kalata er gasa wan-ɗafi-sɔ̧ ha̧ a̧ mɛ nɛ̀ɛ́ usi kɔ̧́ tua-mɔi̧a-a sɛn Damas, wen kpaa o bíí, kóó nɛ́ wiwii, kóó nɛ́ okoo, nɛ̀ bá nɛ́ yuwar ko Jesu, ɓɛɛ a̧ aa nyak zɔɓɔ tɛ-wa, kai wa piinɛ Jerusalɛm.

³Ŋgimbi nɛ̀ Saul a̧a̧ yuwar in n'aa hɛɗa nɛ̀ Damas kaɗi, sa̧a̧mɔ gɔma nɛ̀ yiwese zik a̧.

⁴A̧ hɔ̧fa̧ tik nù, ɓɛɛ a̧ zii ŋma tiger nɛ̀ tɔ̧ɔ̧ ha̧ a̧‘e: «Saul, Saul, mɛ́ usi bɔnɛ ha̧‘m wen ge?»

⁵Ɓɛɛ Saul ak mɔ: «Ɛ́nɛ́ nɛ́ o Gasa Wan?» Ɓɛɛ tiger kifi nú ha̧ a̧ woyo: «Nɛ́ mi Jesu, wi nɛ̀ mɛ usi bɔnɛ ha̧ a̧'ɛ.

⁶Mɛ̀ kúr, mɛ̀ yák si saaye, ɓɛɛ wa tɛ tɔ̧ mɔ nɛ̀ mɛ tɛ de ha̧ mɛ.»

⁷O gbama-yari-nɔ̀ kɔ̧-a̧ yora, ɗɛɗɛ-wa gɔna, ɓɛɛ wa sakali; wen wa zia tiger bíí nɛ̀ de-a, ɓɛɛ wa zɔk kiitɛ bíí na.

⁸Saul kura mbɔɗɔnu, gbaayí-a duka ŋgúlúlú, ɓɛɛ a̧ zɔk mɔ na. Ɓɛɛ o gbama-yari-nɔ̀ kɔ̧-a̧ mgbɔ a̧ mgbɔɔ nɛ̀ er ye nɛ̀ saaye Damas.

⁹Sɛn zaŋ zɛ taar, a̧ zɔk mɔ na, a̧ nyɔŋ mɔ kà a̧ nɔ nɛ̀ mɔ na mbɛt.

¹⁰Tɛ́ ŋgimbi'i, ŋma ŋgaiwi ko Jesu duka so Damas, nin-a nɛ́ Ananias. Nɛ́ mɔ'ɔ nɛ̀ Gasa Wan hɔɔ zu ha̧ a̧, ɓɛɛ sa a̧: «Ananias!» Ɓɛɛ a̧ kɔ̧ sara'e: «Gasa Wan, mí nɛ́ mɔ'ɔ!»

¹¹Ɓɛɛ Gasa Wan tɔ̧ ha̧ a̧: «Mɛ̀ kúr, mɛ̀ bá yuwar nɛ̀ wa sa'e Tana War, ɓɛɛ mɛ ák mɔ wen ŋma be Tars, nin-a'e Saul, nɛ̀ ɔ tɛ ko Judas; a̧ a̧a̧ tɛ kɔfa-sɔ̧ kinii.

¹²A̧ zɔka ŋma bíí tɛ hɔɔ-zu, nin wi’ɛi nɛ́ Ananias nɛ̀ tɛɛ ye tua, e er zu-a ha̧ a̧ mɛ zɔk mɔ woyo.»

¹³Ɓɛɛ Ananias kifi nú: «Gasa Wan, mi zia o bíí nɛ̀ dɔka-a tɔ̧ɔ̧ wen ɗaŋmɔ n'aa dee in o sá̧á̧-bíí[5] k’ɛ́nɛ́ sɛn Jerusalɛm.

¹⁴A̧ tɛɛ hɛ̧ɛ̧ tɛ ŋgai ko o gasa wan-ɗafi-sɔ̧ mɛ a nyak-zɔɓɔ tɛ o bíí lɛŋ nɛ̀ sa nin'nɛ́.»

¹⁵Ɓɛɛ Gasa Wan tɔ̧ ha̧ a̧: «Mɛ̀ kúr, mɛ̀ nɛ́ tɛ a̧, wen wi’ɛi nɛ́ ŋma boi-tom n'am hoka mɛ ba nin-am e ŋgɔn mgbara o gɔni-dùk, in o wannu, ká bá nɛ̀ o be Israɛl mbɛt.

¹⁶Ɓɛɛ mɛ̀ nɛ́ mi nɛ̀ tɛ‘m a̧ tɛ usi yuwar n'aa tɛ iŋ nɛ̀ bɔnɛ lɛŋ n'aa tɛ zɔk wen zu'm.»

¹⁷Nɛ́ mɔ'ɔ nɛ̀ Ananias yaka, nɛ́ɛ̀ ye tua, e er zu Saul, ɓɛɛ tɔ̧: «Saul, nya'm, Gasa Wan Jesu nɛ̀ usa tɛ ha̧ mɛ sɛn yuwar nɛ̀ mɛ baa tɛ nɛnɛ‘i a̧ tom am tɛnɛ tɛ mɛ, ha̧ mɛ mɛ zɔk mɔ woyo, ɓɛɛ ha̧ mɛ mɛ dun nɛ̀ Sa̧a̧ Ɔmi mbɛt.»

¹⁸Tɛ́ wen'i n'aa tɔ̧ɔ̧ hegɔ‘i, ɓɛɛ ŋma mɔ hee saɗa-zoro ga hɔ̧fi̧ tik nù nɛ̀ gbaayí Saul, ɓɛɛ a̧ zɔk mɔ woyo. A̧ kura, ɓɛɛ wa zui a̧.

¹⁹A̧ nyɔŋa mɔ, ɓɛɛ a̧ kpa ŋgai; a̧ duka ɗoŋ-aa nyɛi̧ tikiɗi in o ŋgaiwi ko Jesu sɛn Damas.

²⁰Ɓan na sɛn ɗoŋ mɔ‘i, a̧ ku̧u̧ naŋ tɔ̧ɔ̧ wen kɔ̧̀ o tua-mɔi̧a-a‘e ndé; Jesu nɛ́ bem ko Sɔ̧.

²¹Ɗɛɗɛ o bíí lɛŋ nɛ̀ zia wen kɔ̧-a̧ gɔna, ɓɛɛ wa tɔ̧: «Yàá-usi-bɔnɛ ha̧ o wi nɛ̀ sa nin Jesu sɛn Jerusalɛm’ɛ bo a̧a̧ na? Ɓɛɛ ɛ̧ɛ̧ n'aa tɛ̀ɛ́ hɛ̧ɛ̧, bó nɛ́ a̧ tɛ̀ɛ̀ mɛ́ a nyak-zɔɓɔ tɛ-wa kai nɛ̀ wa sinɛ ha̧ o gasa wan-ɗafi-sɔ̧ na?»

²²Tɛ̀ Saul ŋgaia kànà siti tɛ usa wen ko Sɔ̧, tɔ̧ nɛnɛ ha̧ o Juif mɛ Damas'e, Jesu nɛ́ Mɛsii nɛ̀ mbetɛ, ɓɛɛ wa kpa mbe wen mɛ tɔ̧ ɓɔna.

²³Ɗoŋ-aa nyɛi̧a tikiɗi, ɓɛɛ o Juif mɔi̧ ŋmaa ba keta mɛ gbɛ a̧ yinɛ.

²⁴Saul zia wen keta nɛ̀ o Juif baa'i. Wa pɛma nú garo ye'i zɛ nɛ wese mɛ gbɛ a̧,

²⁵ɓɛɛ o ŋgaiwi ko Saul ba a̧ e kɔ̧́ gɛsɛ mɛ zɛ, zir a̧ nɛ̀ zu garo si zan.

²⁶Ŋgimbi n'aa sii ɗoŋ Jerusalɛm, a̧ kɔ̧ɔ̧ mɛ ye mgbara o ŋgaiwi ko Jesu, ɓɛɛ kíì de wa lɛŋ, wen wa kɔ̧ ɗɔaa'e a̧ nɛ́ kpasa ŋgaiwi ko Jesu nɛ̀ mbetɛ na.

²⁷Barnabas mgbɔɔ Saul nɛ́ɛ̀ usi ha̧ o betom ko Jesu, ɓɛɛ we ɗoŋ mɔ ha̧ wa'e, wi’ɛ zɔka Gasa Wan sɛn yuwar, Gasa Wan tɔ̧ wen ha̧ a̧, ɓɛɛ a̧ tɔ̧ wen ko Sɔ̧ nɛ̀ nɔɔ-ŋgiɗi nɛ̀ nin Jesu sɛn Damas.

²⁸Nɛ́ ŋgimbi'i a̧ Saul ku̧u̧ nɛ̀ naŋ gbama-a in o betom ko Jesu sɛn Jerusalɛm, tɔ̧ nɛ̀ wen ko Sɔ̧ nɛ̀ nɔɔ-ŋgiɗi nɛ̀ nin Gasa Wan nɛnɛ.

²⁹A̧ tɔ̧ɔ̧ wen in o Juif-tɔ̧-nú-grɛk, si nɛ̀ kafɛ in wa, ɓɛɛ o wi nɔ‘i kii war mɛ gbɛ a̧.

³⁰O nya-wi zia wen'i, ɓɛɛ wa mgbɔ a̧ pii ɗoŋ Sezaree mɛ tom a̧ yaknɛ si Tars mɛ.

³¹Ŋgimbi'i, zuduk bíí ko Krist duka tɛ̀ ga̧a̧mɔ sɛn nú Judee in Galilee ká bá nɛ̀ Samarii mbɛt. Wa kpaa ŋgai siti, duk nɛnɛ tɛ yuu kíí Gasa Wan, ɓɛɛ Sa̧a̧ Ɔmi de ha̧ wa mɛ dɔk dɔk siti.

³²Pierre duka so yar dam fara lɛŋ, ɓɛɛ zir sitɛ o sa̧a̧-bíí nɛ̀ a̧a̧ sɛn Lida mbɛt.

³³Nɛ́ mɔ'ɔ n'aa kpaa ŋma kara-wi nin-a'e Enee, nɛ̀ ɔ nù mgbaɓala gɔn gado dee pɛ mɔɔrɔ-ɗoŋ-taar kaɗi.

³⁴Ɓɛɛ Pierre tɔ̧ ha̧ a̧: «Enee, Jesu kpasa mɛ́ tɛ zɛɛ kɔ-mɛ; mɛ̀ kúr, mɛ̀ ɗáfí gado kɔ-mɛ nɛ̀ tɛ-mɛ.» Ɓɛɛ a̧ kur tɛ wen'i nú wi'i.

³⁵O wi Lida in o wi nɛ̀ a̧a̧ bɔkɔ-nú Sarɔŋ zɔka mɔ nɛ̀ dea'i, ɓɛɛ wa lɛŋ zik tɛ wa sitɛ Gasa Wan.

³⁶Ŋma okoo duka so mgbara o ŋgaiwi ko Jesu sɛn Jope, nin-a nɛ́ Tabita (nɛ̀ nú grɛk nɛ́ Dɔrkas, nɛ́ wen nɛ̀ tɔ̧‘e «kɔɗɛ»). Kóò‘i so nɛ́ gasa ko-de-demɔ in wi-ha̧-mɔ ha̧ o wisan.

³⁷Ŋma wese, nɛ́ mɔ'ɔ n'aa ɔɔ zɛɛ, ɓɛɛ a̧ fe. Ɗoŋ nɛ̀ wa zuia a̧ kaɗi, wa baa a̧ e kɔ̧́ bɛr-tua-mɛ-ŋgɔn.

³⁸Hee mɔ'ɔ nɛ̀ Lida nyɛi̧ so nɛ̀ Jope na ga, o ŋgaiwi ko Jesu sɛn Jope zia'e Pierre a̧a̧ Lida, ɓɛɛ wa tom o bíí yiitoo nɛnɛ mɛ tɔ̧ ha̧ a̧‘e: «Ɛ́ɛ́ kɔ̧ɔ̧ h’ɛ́nɛ́ mɛ́ tɛ nɛ̀ haya-a.»

³⁹Soɓee, Pierre kura yak in wa. Tɛ̀ hɔa-a kɔ̧-a̧ hegɔ, ɓɛɛ wa mgbɔ a̧ si kɔ̧́ bɛr-tua-mɛ-ŋgɔn; o ko-gera lɛŋ mɔi̧a pii tɛ a̧ nɛ̀ kɔ̧a̧ ŋgúr-ŋgúr, usi nɛ̀ o be laa in o gasa laa nɛ̀ Dɔrkas duka so fur ŋgimbi n'aa duka nɛnɛ in wa ha̧ a̧.

⁴⁰Pierre foo o bíí lɛŋ gbonɛ, ɓɛɛ gbɛ zugur nù kɔfi Sɔ̧. Mɛ ɗoŋ, a̧ zika tɛ sitɛ fio, ɓɛɛ tɔ̧: «Tabita, mɛ̀ kúr.» Nɛ́ mɔ'ɔ n'aa hu̧i̧a̧ yí zɔk Pierre, ɓɛɛ kur duk nù.

⁴¹Pierre kasa er-a, ɓɛɛ ba a̧ e ŋgɔn. Nɛ́ mɔ'ɔ n'aa saa o sa̧a̧-bíí in o ko-gera, ɓɛɛ a̧ usi Dɔrkas nɛ̀ kpasa ha̧ wa.

⁴²O bíí Jope lɛŋ zia nyɛrɛmɔ‘i, ɓɛɛ o dɔka bíí kɔ̧ ɗɔaa ha̧ Gasa Wan.

⁴³Pierre duka Jope tɛ̀ ko Simɔŋ wi-gbɛ̧-ndàrá ɗoŋ-aa nyɛi̧ benaŋ.