Read Northwest Gbaya RƆMƐN 15 Bible Online

RƆMƐN 15 - Northwest Gbaya bible

RƆMƐN 15

¹Mɔ‘i nɛ́ tom k’ɛ́ɛ́, o wi nɛ̀ a̧a̧ nɛ̀ ŋgai tɛ kɔ̧ɔ̧ɗɔɔwen mɛ́ gbak o ɓɔsa-wi wen tuia tui-ɓɔsi kɔ-wa, ɓɛɛ k’ɛ́ɛ́ kii nɛ́ mɔ nɛ̀ tɛ ha̧ desee h’ɛ́ɛ́ na.

²Kóó o ndé a̧ kíí nɛ́ mɔ nɛ̀ tɛ ha̧ desee ha̧ ŋmá-a, tɛ deemɔ nɛ̀ tɛ́ ha̧ ŋgai ha̧ a̧ tɛ kɔ̧ɔ̧ɗɔɔwen kɔ̧-a̧.

³Bó nɛ́ Krist kia so nɛ́ mɔ nɛ̀ dee tɛ-a na. Wen Yɔramɔ tɔ̧ɔ̧ so'e: «Dara ko wi-da̧‘nɛ́ tika nɛ́ zu'm.»

⁴Wen mɔ nɛ̀ yɔra so nɛti lɛŋ, mɛ̀ nɛ́ wen usa mɔ h’ɛ́ɛ́ wen ha̧ nɔɔ-ŋgiɗi in ga̧a̧-see n’ɛ̀ɛ̀ kpa zaŋ Yɔramɔ‘i mɛ́ de h’ɛ́ɛ́ mɛ́ e ta nɛ̀ Sɔ̧.

⁵Sɔ̧, wan ha̧ nɔɔ-ŋgiɗi in ga̧a̧-see, a̧ dé h’ɛ́nɛ́ mɛ́ zii ger ŋmaa in o ŋmaa hee mɔ'ɔ nɛ̀ Jesu Krist kɔ̧ɔ̧ ga,

⁶wen h’ɛ́nɛ́ mɛ́ zɔn Sɔ̧, Dáà ko Gasa Wan k’ɛ́ɛ́ Jesu Krist, nɛ̀ nú‘nɛ́ in nɛ̀ see kpɔk.

⁷Ɛ̀nɛ̀ kpɛ́k ŋmaa in o ŋmaa hee mɔ'ɔ nɛ̀ Krist kpɛka nɛ̀ ɛ́nɛ́ ga, ha̧ nin Sɔ̧ mɛ gasi.

⁸Mi tɔ̧a̧‘e ndé, mɛ̀ nɛ́ wen nɛ̀ Sɔ̧ yor ɗoŋ wen kɔ‘i, a̧ dee ha̧ Krist mɛ́ duk wi-de-tom ko o wi-gɔn-bɔr, wen ha̧ ha̧a̧nú ko Sɔ̧ ha̧ o zɔmdáa k’ɛ́ɛ́ mɛ́ hɔ gba̧a̧.

⁹Ɓɛɛ nɛ̀ ko o gɔni-dùk, wa gasi Sɔ̧ wen deako kɔ̧-a̧ nyɛm nɛ̀ ɗoŋ mɔ nɛ yɔra'e: «Wen zu mɔ‘i mi tɛ gasi'nɛ́ mgbara o tugun bíí nɛ iŋ‘nɛ́ na, ɓɛɛ mi tɛ bìì gima zɔn nɛ̀ nin'nɛ́ mbɛt.»

¹⁰Tɔ̧ɔ̧ mbɛt woyo'e: «O tugun bíí lɛŋ, ɛ̀nɛ̀ dé nyɛŋɛ in zuduk bíí kɔ̧-a̧!»

¹¹Yɔramɔ tɔ̧ɔ̧ woyo mbɛt'e: «O tugun bíí lɛŋ, ɛ̀nɛ̀ zɔ́n Gasa Wan, o dukbíí lɛŋ a̧ súmbúrí a̧!»

¹²Esaii tɔ̧ɔ̧ mbɛt'e: «Bezaŋ Jɛse tɛ tɛ mɛ ɔ wan zu o tugun bíí, ɓɛɛ o tugun bíí tɛ e ta nɛ̀ a̧.»

¹³Sɔ̧ nɛ̀‘i e nɛ̀ ta a̧ há̧ desee h’ɛ́nɛ́ nɛ̀ dɔka-a, in ga̧a̧mɔ tɛ kɔ̧ɔ̧ɗɔɔwen k’ɛ́nɛ́, wen h’ɛ́nɛ́ mɛ́ kɔ̧ ɗɔaa ha̧ a̧ gan kuti-a nɛ̀ ŋgai ko Sa̧a̧ Ɔmi.

¹⁴O nya'm, war k’ɛ́nɛ́, mi iŋa kɔ‘m nɛ̀ tɛ‘m'e, ɛ́nɛ́ a̧a̧ nɛ̀ de taamɔ nyɛmna, ɛ́nɛ́ a̧a̧ nɛ̀ kpasa iŋamɔ in ɛ́nɛ́ nyɛma mɛ́ tɔ̧ mbɔrɔ ha̧ ŋmaa in o ŋmaa.

¹⁵Mi nɔɔ ŋgiɗi, ɓɛɛ mi yɔr o ŋma mɔ h’ɛ́nɛ́ zaŋ o ŋma kalata mbaŋ nɛ̀ tɛ‘nɛ́ zu deemɔ nɛ̀ ta-tɛ ko Sɔ̧ in am,

¹⁶ha̧‘m mɛ́ duk wi-de-tom ko Jesu Krist mgbara o gɔni-dùk; tom kɔ‘m nɛ́ tɔ̧ɔ̧ De Mbe Wen ko Sɔ̧ wen ha̧ o gɔni-dùk mɛ́ kifi duk nɛ́ ha̧a̧mɔ nɛ̀ Sa̧a̧ Ɔmi ɗafa war-tɛ-a nɛ ɔ dee tɛ Sɔ̧.

¹⁷Mi nyɛma mɛ́ zɔn tɛ‘m nɛ̀ ɗoŋ Jesu Krist wen zu tom ko Sɔ̧.

¹⁸Wen mɔ n'am tɛ tɔ̧ kpɔk nɛ́ mɔ'ɔ, kànà nɛ́ mɔ ko báá‘m nɛ̀ Krist baa de nɛnɛ ha̧ o gɔni-dùk mɛ́ mbo zu; a̧ dee mɔ‘i tɛ wen in tɛ tom,

¹⁹tɛ ŋgai nɛ̀ duk tɛ o mɔɔ-usi-mɔ in o mɔɔ-gɔn-ɗɛɗɛ, ká bá nɛ̀ ŋgai ko Sa̧a̧ Ɔmi. Mɛ̀ nɛ́ hegɔ, ku̧u̧naŋ-a nɛ̀ Jerusalɛm hɔ nɛnɛ Ilirii mɛ, mi tɔ̧ɔ̧ De Mbe Wen ko Krist tɛ o fara nɔ‘i nɛ̀ kpasa-a.

²⁰Ɓɛɛ mɔ n'am zɔn tɛ‘m wen-aa, mɛ̀ nɛ́ wen mi tɔ̧ɔ̧ De Mbe Wen'i fara nɛ̀ ŋma bíí tɛ sa nin Krist sɛnɛ nɛti hɔ̧ɔ̧ na, wen ká‘m tɛ̀ɛ́ mbo tua zu gɔni naŋ-tua ko ŋma bíí.

²¹Hegɔ, mi dee mɔ nyɛm nɛ̀ ɗoŋ mɔ nɛ̀ yɔra'e: «O wi nɛ̀‘i tɔ̧ so wen kɔ̧-a̧ ha̧ wa nɛti na, tɛ zɔk a̧, ɓɛɛ o wi nɛ̀ zii so wen-aa na, tɛ zii.»

²²Mɔ nɛ̀ dora'm war ɔ dɔka mɛ́ nɛ́ tɛ‘nɛ́ nɛ́ mɔ‘i.

²³Ɓɛɛ kinii, ŋma tom ha̧‘m mɛ́ de sɛn fara nɔ'ɔ bo ɓɔna; wen pɛ ɔ dɔka nɛ̀ wɔ nɛa-a tɛ‘nɛ́ gbɛ‘m lɛk-lɛk.

²⁴Ŋgimbi n'am bé tɛ̀ɛ́ yak si nú Ɛspa̧i, mi kɔ̧ɔ̧ mɛ́ ɓir nɛ̀ war tɛ‘nɛ́, wen ha̧‘m mɛ kpa desee tɛ duka-a benaŋ in'nɛ̀ɛ́, in ha̧‘m mɛ kpa gbakamɔ er'nɛ́ sɛka'm yaka.

²⁵Ɓɛɛ kinii, mi ba nɛ́ gbakamɔ nɛnɛ ha̧ o sa̧a̧-bíí sɛn Jerusalɛm.

²⁶Wen o wi Masedoan in o wi Akai ee zu-a mɛ tom gbakamɔ ha̧ o sa̧a̧-bíí nɛ̀ duk nɛ̀ san sɛn Jerusalɛm.

²⁷Nɛ̀ mbetɛ, nɛ́ wa nɛ̀ tɛ-wa a̧ ee zu-a mɛ́ de hegɔ, ɓɛɛ wa dee mɔ‘i nɛ̀ yuwar-a, wen hee mɔ'ɔ nɛ̀ o Juif baa kɛ̧ so demɔ nɛ̀ Sɔ̧ ha̧a̧ ha̧ wa in o gɔni-dùk ga, ɔ kànà dee mbɛt ha̧ o gɔni-dùk mɛ́ ba san yinɛ zu wa mbɛt.

²⁸Ŋgimbi n'am bé tɛ̀ɛ́ de mɔ‘i, ha̧ nɛ̀ gbakamɔ‘i ha̧ wa kaɗi, ɓɛɛ mi ɓira nɛ̀ tɛ‘nɛ́ yak nɛnɛ si Ɛspa̧i mɛ;

²⁹wen mi iŋa'e tɛ nɛa-a kɔ‘m sitɛ‘nɛ́, toka-de-yoŋgo ko Krist tɛ duk tɛ hɔa-a kɔ‘m hi̧i̧ nyɛmna.

³⁰Mi ai nú h’ɛ́nɛ́, o nya'm, nɛ̀ ɗoŋ Gasa Wan k’ɛ́ɛ́ Jesu Krist, in tɛ kɔ̧ɔ̧mɔ ko Sa̧a̧ Ɔmi, ɛ̀nɛ̀ bí biro in am tɛ kɔfa-sɔ̧ n’ɛnɛ kɔfi wen am'i,

³¹wen ha̧ ŋga-see ko o wi Judee mɛ hɔ yɔɔ zu'm in wen ha̧ o sa̧a̧-bíí sɛn Jerusalɛm mɛ kpɛk gbakamɔ n'am ba nɛnɛ ha̧ wa'i.

³²Hegɔ, kà Sɔ̧ á̧ kɔ̧a̧, mi tɛ hɔ tɛ‘nɛ́ nɛ̀ desee, ɓɛɛ mi ɔma be tɛ‘m in'nɛ̀ɛ́ mbɛt.

³³Sɔ̧, Wan-ha̧-ga̧a̧mɔ a̧ duk in'nɛ̀ɛ́ lɛŋ. Aamɛn!