Read Northwest Gbaya RƆMƐN 16 Bible Online

RƆMƐN 16 - Northwest Gbaya bible

RƆMƐN 16

¹Mi tɔ̧ wen’ɛ wen zu Foebe, boko-nya-ɛɛ nɛ̀ duk nɛ́ ko-gbak-bíí mgbara zuduk bíí ko Krist sɛn Senkree.

²Ɛ̀nɛ̀ kpɛ́k a̧ nɛ̀ nin Gasa Wan nyɛm nɛ̀ ɗoŋ deemɔ ko o sa̧a̧-bíí; ɛ̀nɛ̀ gbák a̧ tɛ mɔ n'aa kɔ̧a̧ lɛŋ, wen n'aa gbaka so o dɔka bíí in mi nɛ̀ zu'm'i mbɛt.

³Ɛ̀nɛ̀ fán Priska in Akilas o gbama-yari n’ɛ̀ɛ̀ de tom ko Jesu Krist in wa.

⁴Tɛ kpasa'm nɛ̀ wa kpasa'i, oi-aa tikiɗi wa tɛ̀ɛ́ fe. Bó nɛ́ mi ɛ̀n'am a̧ de osoko wen zu mɔ nɛ̀ wa dea ɓɛɛ na, ɓɛɛ nɛ́ o zuduk bíí ko Krist nɛ̀ ya tɛ nù ko o gɔni-dùk lɛŋ a̧ de osoko mbɛt.

⁵Ɛ̀nɛ̀ fán zuduk bíí ko Krist nɛ̀ mɔi̧ tɛ kɔ-wa mbɛt. Ɛ̀nɛ̀ fán de sɛm kɔ‘m Epinɛt, kuti-wi nɛ̀ kɔ̧ɔ̧ ɗɔaa ha̧ Krist sɛn nú Azii, ha̧‘m.

⁶Ɛ̀nɛ̀ fán Marii nɛ̀ dee kom batɛ wen zu'nɛ́.

⁷Ɛ̀nɛ̀ fán Andronikus in Junias, o nam kɔ‘m in o sɛm n’ɛ̀ɛ̀ dee so zɔɓɔ in wa. Wa nɛ́ o bíí nɛ̀ o betom kpɛka deemɔ kɔ-wa nyɛmna, in wa duka so nɛ́ o bíí ko Krist nɛti ha̧‘m mbɛt.

⁸Ɛ̀nɛ̀ fán Ampliatus nɛ̀ duk nɛ́ de sɛm kɔ‘m nɛ̀ ɗoŋ Gasa Wan.

⁹Ɛ̀nɛ̀ fán Urbɛŋ gbama wi-de-tom k’ɛ́ɛ́ nɛ̀ ɗoŋ Krist in de sɛm kɔ‘m Stakis.

¹⁰Ɛ̀nɛ̀ fán Apɛlɛs nɛ̀ usa nɔɔ-ŋgiɗi kɔ‘i tɛ Krist, ɛ̀nɛ̀ fán o bíí kɔ̧ kira ko Aristobul mbɛt.

¹¹Ɛ̀nɛ̀ fán Herodiɔŋ, nam kɔ‘m, ɛ̀nɛ̀ fán o bíí kɔ̧ kira ko Narsis nɛ̀ kɔ̧ɔ̧ ɗɔaa ha̧ Gasa Wan.

¹²Ɛ̀nɛ̀ fán Trifɛn in Trifos nɛ̀ dee tom batɛ wen Gasa Wan, ɛ̀nɛ̀ fán boko-nya'm Pɛrsis nɛ̀ dee tom batɛ wen Gasa Wan mbɛt.

¹³Ɛ̀nɛ̀ fán Rufus ŋma mgbák bíí nɛ̀ Gasa Wan hoka, in nàà kɔ̧-a̧, nɛ̀ duk nɛ́ nàà kɔ‘m mbɛt.

¹⁴Ɛ̀nɛ̀ fán Asinkrit, Flɛgɔŋ, Hɛrmas, Patrobas, Hɛrmɛs in o nya-ɛɛ nɛ̀ ya in wa.

¹⁵Ɛ̀nɛ̀ fán Filolog in Julii, Neree in boko-nya-a̧, bá nɛ̀ Olimpas in o sa̧a̧-bíí lɛŋ nɛ̀ ya in wa.

¹⁶Ɛ̀nɛ̀ fán ŋmaa in o ŋmaa nɛ̀ fanamɔ ko bíí ko Sɔ̧. O zuduk bíí ko Krist lɛŋ fana'nɛ.

¹⁷O nya'm, mi tɔ̧ mbɔrɔ h’ɛ́nɛ́ mɛ́ mbo ta'nɛ́ nɛ̀ o wi nɛ̀ de ha̧ bíí mɛ́ kɛ̧ mgbara ŋmaa, ɗaŋ nɛ̀ taamɔ ko bíí, yu nɛnɛ tɛ usamɔ nɛ̀‘i usa h’ɛ́nɛ́. Ɛ̀nɛ̀ dúk nyɛi̧ nɛ̀ wa.

¹⁸Wen bó nɛ́ o wi nɔ‘i de nɛ́ tom ha̧ Krist Gasa Wan k’ɛ́ɛ́ na, ɓɛɛ tom kɔ-wa nɛ́ wen zaŋ-wa ɓɛɛ; wa tɔ̧ nɛ́ ɔ̧ɔ̧ nyɔ̧ɔ̧ wen, in de be wen-yɔk-bíí, ɔr nɛ̀ o bíí nɛ̀ see kpe na.

¹⁹O bíí lɛŋ iŋa mboozu k’ɛ́nɛ́. Mi de nɛ́ nyɛŋɛ wen zu'nɛ́, ɓɛɛ mi kɔ̧ɔ̧ ha̧ kɔ̧ zaŋ‘nɛ́ mɛ gɔn wen dee demɔ, ɓɛɛ k’ɛ́nɛ́ ye tɛ ɗaŋmɔ na.

²⁰Sɔ̧ Wan-ha̧-ga̧a̧mɔ tɛ mbɔli Satan kinii ɗɔɔ naŋ‘nɛ́. Deemɔ nɛ̀ ta-tɛ ko Gasa Wan k’ɛ́ɛ́ Jesu a̧ dúk in'nɛ̀ɛ́!

²¹Timotee, gbama wi-de-tom kɔ‘m fana'nɛ́, in Lusius, Jasɔŋ, ká bá nɛ̀ Sosipatros, o nam kɔ‘m.

²²Mi Tɛrtius, wan-yɔr-kalata-a fana'nɛ́ nɛ̀ nin Gasa Wan.

²³Gaius, n'am zira tɛ kɔ̧-a̧, nɛ̀ o zuduk bíí ko Jesu lɛŋ mɔi̧ tɛ kɔ̧-a̧, fana'nɛ́. Erast, wi-kasi-sede saaye’ɛ fana'nɛ́ in Kartus nya k’ɛɛ. [

²⁴Deemɔ nɛ̀ ta-tɛ ko Gasa Wan k’ɛ́ɛ́ Jesu Krist a̧ dúk in'nɛ̀ɛ́ lɛŋ! Aamɛn.]

²⁵Ɛ̀ɛ̀ gásí wi nɛ̀ nyɛma mɛ ha̧ nɔɔ-ŋgiɗi h’ɛ́nɛ́, wen zu De Mbe Wen ko Jesu Krist n'am tɔ̧‘i, nyɛm nɛ̀ ɗoŋ hu̧sa̧mɔ nɛ̀ duka so nɛ̀ hu̧sa̧-a̧ nɛti ɓeemɛ, ɓɛɛ Sɔ̧ usi.

²⁶Kinii Sɔ̧ usa mɔ‘i ɓɛɛ e ti o gɔni-dùk lɛŋ ha̧ wa mɛ iŋ hu̧sa̧mɔ‘i zaŋ kalata ko o wi-tɔ̧-wen oi nú Sɔ̧. Sɔ̧ nɛ̀ duk kpoo nɛ kpoo dee mɔ‘i nyɛm nɛ̀ ɗoŋ tɔ̧ɔ̧-wen kɔ‘i, wen ha̧ wa mɛ kɔ̧ ɗɔaa, mbo nɛ̀ zu ha̧ a̧.

²⁷Wi-iŋ-mgbara-mɔ kpɔk nɛ́ Sɔ̧; gasamɔ a̧ dúk nɛ́ kɔ̧-a̧ nɛ̀ ɗoŋ Jesu Krist hegɔ kpoo nɛ kpoo! Aamɛn.