Read Northwest Gbaya 1 KƆRINTIƐN 11 Bible Online

1 KƆRINTIƐN 11 - Northwest Gbaya bible

1 KƆRINTIƐN 11

¹Ɛ̀nɛ̀ zɔ́k ɗoŋ deemɔ kɔ‘m hee mɔ'ɔ nɛ̀ mi nɛ̀ tɛ‘m zɔk nɛ̀ ɗoŋ deemɔ ko Krist ga.

²Mi zɔn'nɛ́ wen tɛ‘nɛ́ nɛ̀ mbaŋ ɗoŋ am tɛ ŋgimbi lɛŋ, in yuwar deemɔ n’ɛ̀nɛ̀ de hee mɔ'ɔ n'am tɔ̧ɔ̧ so h’ɛ́nɛ́ ga.

³Ɓɛɛ mi kɔ̧ɔ̧ h’ɛ́nɛ́ mɛ́ iŋ‘e ndé, wi nɛ̀ duk zu o wiwii lɛŋ nɛ́ Krist; ɓɛɛ wi nɛ̀ duk zu okoo nɛ́ wiwii; ɓɛɛ wi nɛ̀ duk zu Krist nɛ́ Sɔ̧.

⁴O wiwii lɛŋ nɛ̀ e laasɔ̧i̧ zu kɔfi nɛ̀ Sɔ̧, kóó tɔ̧ nɛ̀ wen oi nú Sɔ̧, e nɛ́ búù tɛ wan kɔ‘i.

⁵Ɓɛɛ okoo lɛŋ nɛ̀ gu laa zu na kɔfi nɛ̀ Sɔ̧, kóó tɔ̧ nɛ̀ wen oi nú Sɔ̧ e nɛ́ búù tɛ wan kɔ‘i mbɛt; wen i̧i̧ duk hee a̧ kpuia nɛ́ zu-a ga.

⁶Gana so ha̧ okoo nɛ̀ gu laa zu na mɛ́ gɔn zu! Ɓɛɛ kà gɔna-zu, kóó kpuia-zu nɛ́ duka nɛ́ mɔɔ-foe, n'aa gu laa zu-a.

⁷Wiwii beka gu laa zu na, wen Sɔ̧ dee a̧ hɔ ŋmaa in wi, in a̧ nɛ́ gasamɔ ko Sɔ̧; ɓɛɛ okoo nɛ́ gasamɔ ko wiwii.

⁸Wen bó nɛ́ Sɔ̧ baa nɛ́ gba̧a̧-tɛ okoo de nɛ̀ wiwii na, ɓɛɛ a̧ baa nɛ́ gba̧a̧-tɛ wiwii de nɛ̀ okoo.

⁹Bó nɛ́ Sɔ̧ dee wiwii wen okoo na mbɛt, ɓɛɛ a̧ dee okoo wen wiwii.

¹⁰Mɛ̀ nɛ̀ hegɔ a̧ okoo tɛ gu kànà laa zu, mɛ́ usi'e ŋma bíí a̧a̧ nɛ̀ ŋgai zu a̧ wen zu o betom mɛ́ yiwese.

¹¹Ɓɛɛ sɛn ti Gasa Wan wiwii beka duk nɛtɛ, ndaɗi in okoo na, na; ɓɛɛ okoo beka duk nɛtɛ, ndaɗi in wiwii na, na mbɛt.

¹²Wen kà Sɔ̧ nɛ́ dee okoo nɛ̀ gba̧a̧-tɛ wiwii, ɓɛɛ wiwii gbo nɛ́ tɛ okoo, mɔ‘i lɛŋ tɛ́ nɛ̀ tɛ́ Sɔ̧.

¹³Ɛ̀nɛ̀ kɛ̧́ mgbara wen’ɛ nɛ̀ tɛ‘nɛ́: nɛ́ demɔ ha̧ okoo mɛ́ kɔfi Sɔ̧ ɓɛɛ laa bó zu-a na?

¹⁴Tɛ yuwar-duka-a, kà wiwii e mu̧i̧-zu-wi da̧, bó nɛ́ mɔ‘i duk nɛ́ mɔɔ-foe na?

¹⁵Ɓɛɛ mɔ‘i nɛ́ mɔɔ-duk-tɛ ko okoo, wen Sɔ̧ ha̧a̧ dura mu̧i̧-zu ha̧ wa hee mɔɔ-kpe-zu ga.

¹⁶Ɓɛɛ kà ŋma bíí nɛ́ kɔ̧ɔ̧ mɛ́ si kafɛ zu wen'i, ɛ́ɛ́ in o zuduk bíí ko Sɔ̧, yuwar deemɔ k’ɛ́ɛ́ yak zu mɔ‘i na.

¹⁷I̧i̧ kaɗa kɔ‘i; ɓɛɛ mi beka zɔn'nɛ́ tɛ mɔ n’ɛnɛ de'i na. O mɔi̧a ŋmaa n’ɛnɛ mɔi̧ mɛ́ kpa ŋgai siti wó, ɗáŋ nɛ́ mɔ h’ɛ́nɛ́.

¹⁸Kuti mɔ nɛ́ mɔ'ɔ: mi zia'e ɛ́nɛ́ kɛ̧ nɛ́ mgbara ŋmaa tɛ mɔi̧a-a k’ɛ́nɛ́, ɓɛɛ mi taa ŋma kpasawen a̧a̧ zaŋ wen'i.

¹⁹Ɔ dee ha̧ kɛ̧ɛ̧-mgbara-ŋmaa mɛ́ duk mgbara'nɛ́ ha'i mɛ́ iŋ o mgbák wi-nɔ-ŋgiɗi tɛ weamɔ‘i.

²⁰Ɓɛɛ ŋgimbi n’ɛnɛ mɔi̧ duk in o ŋmaa, bó nɛ́ ɛ́nɛ́ nyɔŋ nɛ́ mɔ ko Gasa Wan na.

²¹Wen kóó o ndé kur nɛ́ kɔ‘i mɛ́ ba nyɔŋmɔ; tɛ mɔ‘i, o ŋma ɔ kɔ‘i nɛ́ wɔ, o ŋma gbɛ kɔ‘i nɛ́ dɔ̧ɔ̧.

²²Tua k’ɛ́nɛ́ bó h’ɛ́nɛ́ mɛ́ nyɔŋ mɔ kɔ̧ a̧ nɔ nɛ̀ mɔ na nde? Kóó ɛ́nɛ́ kɔ̧ɔ̧ mɛ́ zɔk zuduk bíí ko Sɔ̧ hee geemɔ ga, pi̧ nɛ̀ foe zu o wisan nde? A̧‘m tɔ̧́ nɛ́ ge mɔ ge h’ɛ́nɛ́ ge? A̧‘m zɔ́n'nɛ́ nde? Weyaa, mi beka zɔn'nɛ́ zu mɔ‘i na.

²³War kɔ‘m, mɔ nɛ̀ Gasa Wan usa ha̧‘m n'am tɔ̧ɔ̧ so h’ɛ́nɛ́ nɛ́ mɔ'ɔ. Ŋgimbi nɛ̀ wa ee nɛ̀ ɗɔra tɛ Gasa Wan Jesu mɛ́ zaŋzɛ, a̧ baa brɛt.

²⁴Ɗoŋ n'aa dee osoko ha̧ Sɔ̧ kaɗi, a̧ gbina, ɓɛɛ tɔ̧: «Mɔ'ɔ nɛ́ kiitɛ‘m a̧‘m ha̧a̧ wen'nɛ́, ɛ̀nɛ̀ dé hegɔ ha̧ tɛ‘nɛ́ mɛ́ mbaŋ ɗoŋ am.»

²⁵Ɗoŋ nɛ̀ wa nyɔŋa mɔ kaɗi, a̧ baa be-ɗele ɓɛɛ tɔ̧: «Be-ɗele’ɛ nɛ́ mbe Nɔɔ-tɔk nɛ̀ ɗoŋ tɔk-tɛ‘m, ɛ̀nɛ̀ dé hegɔ ŋgimbi lɛŋ n’ɛnɛ tɛ nɔ, ha̧ tɛ‘nɛ́ mɛ́ mbaŋ ɗoŋ am.»

²⁶Wen ŋgimbi n’ɛnɛ tɛ nyɔŋ brɛt’ɛ, in n’ɛnɛ tɛ nɔ dɔ̧ɔ̧'ɛ, ɛ́nɛ́ tɔ̧ nɛ́ wen fio ko Gasa Wan hɔ wese n'aa tɛ pii ɗoŋ.

²⁷Mɛ̀ nɛ́ hegɔ, wi nɛ̀ nyɔŋ brɛt in nɔ tasi-dɔ̧ɔ̧ ko Gasa Wan nɛ̀ yuwar-a na, kita ko kiitɛ Gasa Wan in tɔk tɛ-a a̧a̧ zu wi’ɛi.

²⁸O ndé a̧ tá mɔ zu mɔ kɔ‘i nɛ̀ de-a nɛti sɛka a̧ nyɔŋa brɛt nɔ nɛ̀ dɔ̧ɔ̧'ɛ mbɛt.

²⁹Wen bíí nɛ̀ nyɔŋ mɔ in nɛ̀ nɔ mɔ, ɓɛɛ iŋ‘e nɛ́ kiitɛ Gasa Wan na, mɔ n'aa nyɔŋ in mɔ n'aa nɔ‘i, nɛ́ kita a̧ a̧ mɔi̧ pii zu a̧.

³⁰Mɛ̀ nɛ́ wen mɔ‘i a̧ o dɔka bíí mgbara'nɛ́ nɛ́ o wi-zɛɛ in o wi-kum, ɓɛɛ o ŋma mbɛt fea.

³¹K’ɛ̀ɛ̀ tá mɔ zu mɔ k’ɛ́ɛ́ nɛ̀ de-a, kita beka ba so yɛ na,

³²ɓɛɛ gɔna-kita ko Gasa Wan zu yɛ duk hee gusa yɛ ga, wen ká kita tɛɛ tik yɛ kpɔk in o bíí zaŋnu.

³³Hegɔ, o nya'm, k’ɛ̀nɛ̀ mɔ́í̧ ŋmaa mɛ nyɔŋ mɔ, ɛ̀nɛ̀ pɛ́m o ŋmaa sɛ;

³⁴wi nɛ̀ wɔ gbɛ a̧, a̧ a̧ nyɔ́ŋ mɔ ɓɔn tɛ kɔ̧-a̧, wen ká mɔi̧a-a k’ɛ́nɛ́ tɛɛ de ha̧ kita mɛ́ tik'nɛ́. Ko oi mɔ, mi tɛ ɗafi ŋgimbi n'am tɛ nɛ̀ tɛ‘nɛ́.