Read Northwest Gbaya 1 KƆRINTIƐN 12 Bible Online

1 KƆRINTIƐN 12 - Northwest Gbaya bible

1 KƆRINTIƐN 12

¹O nya'm, mi kɔ̧ h’ɛ́nɛ́ mɛ́ duk ndiyiŋ tɛ ha̧a̧mɔ ko Sa̧a̧ Ɔmi na.

²Ɛ́nɛ́ iŋa'e ŋgimbi n’ɛnɛ tɛ iŋ so kpasa Sɔ̧ hɔ̧ɔ̧ na, ɛ́nɛ́ nɛ̀ɛ́ so nɔ̀ nɛ̀ nú-tum hee ŋma mɔ a̧ ir'nɛ́ ga sitɛ o géé-sɔ̧́-mu̧kɛ̧.

³Mɛ̀ nɛ́ hegɔ s'am tɔ̧ h’ɛ́nɛ́ nɛ̀ sa̧a̧-a̧‘e: bíí nɛ̀ tɔ̧ wen nɛ̀ ŋgai ko Sa̧a̧ Ɔmi ko Sɔ̧ nyɛm mɛ tɔ̧‘e: «Fom a̧ bá Jesu» na. Ɓɛɛ kà bíí tɔ̧ wen nɛ̀ ŋgai ko Sa̧a̧ Ɔmi na, a̧ beka nyɛm mɛ́ tɔ̧‘e: «Jesu nɛ́ Gasa Wan» na mbɛt.

⁴O ha̧a̧mɔ nɛtɛ nɛtɛ a̧a̧ sɛnɛ, ɓɛɛ nɛ́ kale kpɔk Sa̧a̧ Ɔmi a̧ ha̧ wa;

⁵o tom a̧a̧ sɛnɛ nɛtɛ nɛtɛ, ɓɛɛ nɛ́ kpɔk Gasa Wan a'i de tom ha̧ a̧;

⁶o yuwar deemɔ mbɛt nɛtɛ nɛtɛ, ɓɛɛ nɛ́ kpɔk Sɔ̧ a̧ de mɔ lɛŋ tɛ o bíí lɛŋ.

⁷Bíí kpɔk kpɔk a̧a̧ nɛ̀ ha̧a̧mɔ wen usa tom ko Sa̧a̧ Ɔmi gbak nɛ̀ o bíí lɛŋ.

⁸Nɛ́ Sa̧a̧ Ɔmi a̧ de ha̧ ŋma bíí mɛ́ tɔ̧ wen nɛ̀ iŋa-mgbara-mɔ, ɓɛɛ a̧ dee ha̧ ŋma bíí mɛ́ tɔ̧ wen tɛ iŋamɔ;

⁹nɛ́ kpɔk Sa̧a̧ Ɔmi‘i a̧ de ha̧ ŋma bíí mɛ́ kɔ̧ ɗɔaa, ɓɛɛ kpɔk kale Sa̧a̧ Ɔmi‘i dee ha̧ ŋma bíí mɛ́ kpasi o wi-zɛɛ;

¹⁰nɛ́ a̧ a̧ ha̧ ŋgai ha̧ ŋma bíí mɛ́ de mɔɔ-kifi; ko ŋma bíí nɛ́ tɔ̧ɔ̧ wen oi nú Sɔ̧; ko o ŋma bíí nɛ́ kɛ̧ɛ̧ mgbara o taamɔ nɛtɛ nɛtɛ, ko o ŋma bíí nɛ́ tɔ̧ɔ̧ gɔni nú, ɓɛɛ ko o ŋma bíí nɛ́ wee ɗoŋ nú‘i.

¹¹Ɓɛɛ mɔ‘i lɛŋ nɛ́ kale kpɔk Sa̧a̧ Ɔmi a̧ kɛ̧ o ha̧a̧mɔ kɔ‘i ha̧ bíí kpɔk kpɔk hee a̧ kɔ̧ɔ̧ ga.

¹²Hegɔ, kiitɛ-wi nɛ́ kpɔk; zu-a'i dokoɗo-tɛ-wi ɔ dɔka; kóó nɛ̀ oi dɔka wa'i, wa lɛŋ nɛ́ kiitɛ kpɔk ɓɛɛ; Krist mbɛt duk hegɔ.

¹³Wen ɛ́ɛ́ lɛŋ, kóó nɛ́ be Juif, kóó nɛ́ Grɛk, kóó nɛ́ bara, kóó nɛ́ bíí nɛ̀ bó nɛ́ bara na, wa zuia ɛ́ɛ́ nɛ̀ kale kpɔk Sa̧a̧ Ɔmi h’ɛ́ɛ́ mɛ́ duk kiitɛ kpɔk, ɓɛɛ ɛ́ɛ́ lɛŋ nɔ nɛ́ kpɔk Sa̧a̧ Ɔmi‘i.

¹⁴Bó nɛ́ dokoɗo-tɛ-wi kpɔk a̧ de kiitɛ-wi na, ɓɛɛ wa a̧a̧ sɛnɛ ɔ dɔka.

¹⁵Kà naŋ tɔ̧ so'e: «Hee mɔ'ɔ nɛ̀ mi bó nɛ́ er na ga, mi bó tɛ́ kiitɛ na,» ɓɛɛ a̧ beka duk tɛ kiitɛ ɓɔna wen n'aa tɔ̧ɔ̧ hegɔ‘i nde?

¹⁶Ɓɛɛ kà zer tɔ̧ so'e: «Mi duk tɛ kiitɛ na wen mi bó nɛ́ gbaayí na,» ɓɛɛ a̧ beka duk tɛ kiitɛ ɓɔna tɛ tɔ̧a̧-a̧ hegɔ‘i nde?

¹⁷Ɓɛɛ kà tɛ bíí lɛŋ a̧ duk so nɛ́ gbaayí, ɓɛɛ wi tɛ̀ɛ́ zii mɔ nɛ̀ ge? Ɓɛɛ kà tɛ-wi lɛŋ a̧ duk so nɛ́ zer-wi, ɓɛɛ wi tɛ̀ɛ́ nun pɛr mɔ nɛ̀ ge?

¹⁸Nɛ́ Sɔ̧'ɔ̧ ee dokoɗo-tɛ-wi nɛtɛ nɛtɛ tɛ kiitɛ-wi hee a̧ kɔ̧ɔ̧ ga.

¹⁹Ɓɛɛ kà bó so'e mɔ nɛ̀ a̧a̧ tɛ-wi lɛŋ duk so nɛ́ dokoɗo-tɛ-wi kpɔk, ɓɛɛ kiitɛ-wi a̧a̧ dee?

²⁰Dokoɗo-tɛ-wi a̧a̧ sɛnɛ ɔ dɔka, ɓɛɛ kiitɛ nɛ́ kpɔk.

²¹Gbaayí nyɛm mɛ́ tɔ̧ ha̧ er'e: «Mi kɔ̧́ mɛ́ na wó» na, kóó zu-wi beka tɔ̧ hegɔ ha̧ naŋ na mbɛt.

²²Zu-a'i, o be dokoɗo-tɛ yɛ nɛ̀‘i zɔk hee bó nɛ́ kpasamɔ na ga, a̧a̧ nɛ̀ tom kɔ‘i;

²³ɓɛɛ wan n’ɛ̀ɛ̀ zɔk hee wan mɛ́ tu̧ tɛ-wa na ga, nɛ́ wa'i ɛ̀ɛ̀ zɔn gan. Nɛ́ o dokoɗo-tɛ yɛ, wan nɛ̀ hɔ mɔ na'i ɛ̀ɛ̀ zɔk nɛ̀ de-a,

²⁴ɓɛɛ o wan nɛ̀ hɔɔ mɔ, ɛ́ɛ́ zɔk hegɔ na. Sɔ̧ dee o dokoɗo-tɛ-wi ɓɛɛ ha̧ gasamɔ ha̧ o wan nɛ̀ duk nɛ́ geɗek-a,

²⁵wen ká kɛ̧ɛ̧-mgbara-mɔ tɛɛ duk tɛ-wi, ɓɛɛ ha̧ o dokoɗo-tɛ-wi lɛŋ mɛ́ ta mɔ wen ŋmaa in o ŋmaa.

²⁶Kà ŋma dokoɗo-tɛ-wi nyim, ɓɛɛ nɛ́ tɛ-wi lɛŋ a̧ zɔk bɔnɛ; kà ŋma dokoɗo-tɛ-wi kpa zɔnamɔ, ɓɛɛ o dokoɗo-tɛ-wi lɛŋ duk nɛ̀ desee in a̧.

²⁷Hegɔ mbɛt, ɛ́nɛ́ nɛ́ kiitɛ Krist, ɓɛɛ o ndé kpɔk kpɔk nɛ́ dokoɗo-tɛ-a.

²⁸Sɔ̧ ee o ŋma bíí zu zuduk bíí kɔ‘i wen tom nɛtɛ nɛtɛ: kuti-a nɛ́ o betom ko Jesu; yiitoo-aa nɛ́ o wi-tɔ̧-wen oi nú Sɔ̧, taar-a nɛ́ o wan-usi-mɔ; hɔ-ɗoŋ-aa nɛ́ o ha̧a̧mɔ nɛtɛ nɛtɛ wen dee mɔɔ-kifi, wen kpasa o wi-zɛɛ, wen gbaka bíí, wen duka zu bíí, in wen tɔ̧ɔ̧ o nú nɛtɛ nɛtɛ.

²⁹Wa lɛŋ só nɛ́ o betom? Wa lɛŋ só nɛ́ o wi-tɔ̧-wen oi nú Sɔ̧? Wa lɛŋ nɛ́ o wan-usi-mɔ? Só nɛ́ wa lɛŋ a̧ de mɔɔ-kifi?

³⁰Só nɛ́ wa lɛŋ a̧ kpasi o wi-zɛɛ? Só nɛ́ wa lɛŋ a̧ tɔ̧ o nú nɛtɛ nɛtɛ? Kóó só nɛ́ wa lɛŋ a̧ we ɗoŋ o nú nɔ‘i nde?

³¹Ɛ̀nɛ̀ kíí nɛ́ o de ha̧a̧mɔ. Ɓɛɛ kinii mi tɛ usi ŋma mɔ nɛ̀ dee batɛ h’ɛ́nɛ́.