Read Northwest Gbaya 1 KƆRINTIƐN 13 Bible Online

1 KƆRINTIƐN 13 - Northwest Gbaya bible

1 KƆRINTIƐN 13

¹Kóó mi tɔ̧ɔ̧ só nú nɛtɛ nɛtɛ, nú ko o bíí in ko o betom mɛ yiwese mbɛt, kà‘m bó nɛ̀ kɔ̧ɔ̧mɔ na, ɓɛɛ mi nɛ́ mana, koo kuŋge nɛ̀ de gitimɔ sɔɔ géè.

²Kóó mi a̧a̧ nɛ̀ ha̧a̧mɔ mɛ́ tɔ̧ wen oi nú Sɔ̧, kóó mi iŋa o ɗukamɔ lɛŋ, kóó mi a̧a̧ so nɛ̀ iŋamɔ batɛ, kóó mi a̧a̧ so nɛ̀ zɔm kɔ̧ɔ̧ɗɔɔwen ha̧‘m mɛ́ fo o gasa kaya yinɛ, kà‘m bó nɛ̀ kɔ̧ɔ̧mɔ na, mi nɛ́ geemɔ ɓɛɛ.

³Kà‘m kɛ̧ o mɔ kɔ‘m lɛŋ ha̧ o wisan, kóó mi ee tɛ‘m ha̧ wa mɛ́ dɔ bíí wèè,[4] ɓɛɛ kà‘m bó nɛ̀ kɔ̧ɔ̧mɔ na, mi beka kpa ŋma mɔ oi-aa na.

⁴Kɔ̧ɔ̧mɔ de ko dee, a̧ gbak bíí gbak, a̧ a see mɔ na, a̧ ŋmaŋ tɛ na, a̧ gasi zu-a na mbɛt.

⁵Kɔ̧ɔ̧mɔ de mɔɔ-foe na, a̧ kii mɔ wen tɛ-a ɓɛɛ na, a̧ de nyimsea na, a̧ e kiri na,

⁶a̧ kpa desee zu ɗaŋmɔ na, ɓɛɛ a̧ duk nɛ̀ desee tɛ kpasawen.

⁷Kɔ̧-a̧ nɛ́ ee mɔ lɛŋ ha̧ bíí, kɔ̧́ nɛ̀ ɗɔɔ mɔ lɛŋ, e nɛ̀ ta nɛ̀ mɔ lɛŋ, nɔ nɛ̀ ŋgiɗi zu mɔ lɛŋ.

⁸Kɔ̧ɔ̧mɔ kaɗi na ndó-ndó-ndó, ɓɛɛ wen ko o wi-tɔ̧-wen oi nú Sɔ̧ tɛ kaɗi, o nú nɛtɛ nɛtɛ mbɛt tɛ kaɗi, in iŋamɔ tɛ kaɗi mbɛt.

⁹Wen iŋamɔ k’ɛ́ɛ́ tikiɗi, ɓɛɛ tɔ̧ɔ̧-wen oi nú Sɔ̧ k’ɛ́ɛ́ dɔk na mbɛt.

¹⁰Ŋgimbi nɛ̀ mɔ nɛ̀ tɛ nyɛm sɛnɛ tɛ hɔ, ɓɛɛ mɔ nɛ̀ nyɛm sɛnɛ na tɛ kaɗi kɔ‘i.

¹¹Ŋgimbi n'am duka só nɛ̀ bem, mi tɔ̧ wen hee obem ga, mi ta mɔ hee obem ga, kia-mgbara-wen kɔ‘m duka hee ko obem ga mbɛt. Ɓɛɛ ŋgimbi n'am dee bíí kaɗi, mi ee mɔɔ-obem duk.

¹²Kinii duk hee ɛ́ɛ́ zɔk mɔ tɛ mɔɔ-zɔk-yí ga hegɔ fata-futu, ɓɛɛ ŋma wese ɛ́ɛ́ tɛ zɔk ŋmaa nɛ̀ gbaayí. Kinii mi iŋ mɔ lɛŋ na, ɓɛɛ ŋma wese mi tɛ iŋ mɔ nɛ̀ sa̧a̧-a̧ hee mɔ'ɔ nɛ̀ Sɔ̧ iŋa nɛ̀‘m ga.

¹³Hegɔ mɔ taar a̧a̧ sɛnɛ: nɛ́ kɔ̧ɔ̧ɗɔɔwen, ee-ta nɛ̀ Sɔ̧ in kɔ̧ɔ̧mɔ, ɓɛɛ wan nɛ̀ gasa gan mgbara wa'i lɛŋ nɛ́ kɔ̧ɔ̧mɔ.