Read Northwest Gbaya 1 KƆRINTIƐN 15 Bible Online

1 KƆRINTIƐN 15 - Northwest Gbaya bible

1 KƆRINTIƐN 15

¹O nya'm, mi kɔ̧ɔ̧ mɛ́ mbaŋ tɛ‘nɛ́ zu De Mbe Wen n'am tɔ̧ɔ̧ so h’ɛ́nɛ́, k’ɛ́nɛ́ kpɛk, ɓɛɛ ɛ́nɛ́ duk ndaɗi sɛnɛ.

²Nɛ́ De Mbe Wen'i a̧ tɛ kpasi'nɛ́, k’ɛ̀nɛ̀ nɛ́ kasa hee mɔ'ɔ n'am tɔ̧ɔ̧ so h’ɛ́nɛ́ ga; kà nɛ́ bòò hegɔ na, ɓɛɛ kɔ̧ɔ̧ɗɔɔwen k’ɛ́nɛ́ nɛ́ tom takaɗi.

³Nɛ́ mɔ n'am kpaa nɛ̀ tɛ‘m a̧‘m ha̧a̧ h’ɛ́nɛ́ nɛti. Krist fee wen zu ɗaŋmɔ k’ɛ́ɛ́ hee Yɔramɔ tɔ̧ ga.

⁴Yɔramɔ tɔ̧ɔ̧ mbɛt'e, wa guna a̧, ɓɛɛ a̧ kur tɛ fio tɛ taar zɛ.

⁵A̧ usa tɛ-a ha̧ Sefas in o betom ɓu-zua-yiitoo mbɛt.

⁶Mɛ́ ɗoŋ, a̧ usa tɛ-a ha̧ o nya-ɛɛ gan gɔmŋmaa-mɔɔrɔ war kpɔk; o ŋma mgbara wi nɔ‘i nɛ̀ dɔka-a biti nɛ̀ yí, ɓɛɛ o ŋma fee kaɗi.

⁷Mɛ́ ɗoŋ, a̧ usa tɛ-a ha̧ Jak, ɓɛɛ ɗoŋ-aa'i a̧ usi tɛ-a ha̧ o betom lɛŋ.

⁸A̧ usa tɛ-a nɛ̀ sɔŋkur-aa ha̧‘m nɛ̀ duk nɛ́ hɔɔ-bem’ɛ.

⁹Mi nɛ́ geɗek-wi mgbara o betom lɛŋ, ɓɛɛ bó nɛ́ mi nyɛma so ha̧ wa mɛ́ sa'm'e betom na, wen mi usa so bɔnɛ ha̧ zuduk bíí ko Sɔ̧.

¹⁰Ɓɛɛ duka-a n'am duk kinii’ɛ, mɛ̀ nɛ́ wen zu deemɔ nɛ̀ ta-tɛ ko Sɔ̧, ɓɛɛ deemɔ nɛ̀ ta-tɛ nɛ̀ Sɔ̧ dee ha̧‘m'i, tik nù géè na. Mi dee tom nɛ̀ dɔka-a gan o betom lɛŋ; bó nɛ́ mi'i de dea-a na, ɓɛɛ nɛ́ deemɔ ko Sɔ̧ nɛ̀ ta-tɛ nɛ duk tɛ‘m'i a̧ dee tom.

¹¹Kóó nɛ́ mi'i usa mɔ h’ɛ́nɛ́, koo nɛ́ wa mbɛt, nɛ́ kpɔk mɔ ɛ̀ɛ̀ usi h’ɛ́nɛ́, ɓɛɛ nɛ́ kpɔk mɔ‘i ɛ́nɛ́ kɔ̧ɔ̧ ɗɔaa mbɛt.

¹²Ɛ́ɛ́ usi mɔ‘e Krist kura ŋgɔn tɛ fio, ɓɛɛ o ŋma mgbara'nɛ́ si kafɛ‘e bíí beka kur ŋgɔn tɛ fio na wó'ɛ, wen ge?

¹³Kà o bíí kur ŋgɔn tɛ fio na, ɓɛɛ Krist kur ŋgɔn tɛ fio na mbɛt.

¹⁴Ɓɛɛ kà Krist nɛ́ kura ŋgɔn tɛ fio na, tɔ̧ɔ̧ De Mbe Wen k’ɛ́ɛ́ in kɔ̧ɔ̧ɗɔɔwen k’ɛ́nɛ́ nɛ́ geemɔ.

¹⁵Kà o bíí kur ŋgɔn tɛ fio na nɛ̀ mbetɛ, Sɔ̧ de ha̧ Krist mɛ́ kur ŋgɔn tɛ fio na mbɛt, ɓɛɛ ɛ́ɛ́ nɛ́ o wi-sedaako ko Sɔ̧ nɛ̀ de nɛ́ ndela nɛnɛ, wen n’ɛ̀ɛ̀ tɔ̧‘e Sɔ̧ dee ha̧ Krist mɛ́ kur ŋgɔn tɛ fio.

¹⁶Kà o bíí kur ŋgɔn tɛ fio na, ɓɛɛ Krist kur ŋgɔn tɛ fio na mbɛt.

¹⁷Ɓɛɛ kà Krist kur ŋgɔn tɛ fio na, kɔ̧ɔ̧ɗɔɔwen k’ɛ́nɛ́ bó nɛ́ kpasamɔ na, ɓɛɛ ɛ́nɛ́ ɓɔna zaŋ ɗaŋmɔ k’ɛ́nɛ́.

¹⁸Kà nɛ́ bòò hegɔ, ɓɛɛ o wi nɛ̀ fee so tɛ Krist, yɔɔ kaɗi.

¹⁹K’ɛ̀ɛ̀ e ta nɛ̀ Krist wen duka-a zaŋnu’ɛ ɓɛɛ wó, ɓɛɛ ɛ́ɛ́ nɛ́ o wi-kɔsa gan o dɔka bíí lɛŋ.

²⁰Weyaa, Krist kura gɔn tɛ fio; kuti wi nɛ̀ kura ŋgɔn tɛ fio nɛ́ a̧.

²¹Hee mɛ̀ nɛ́ bíí kpɔk a̧ daka fio pi̧ zu bíí ga, kale-a mbɛt, mɛ̀ nɛ́ wen zu bíí kpɔk a'i tɛ kur nɛ̀ ŋgɔn tɛ fio.

²²Hee mɔ'ɔ nɛ̀ bíí lɛŋ fe wen zu Adam ga, hegɔ bíí lɛŋ tɛ duk kpasa nɛ̀ ɗoŋ Krist;

²³ɓɛɛ kóó o ndé tɛ ŋgimbi kɔ‘i: kuti-a nɛ́ Krist, ɓɛɛ hɔ-ɗoŋ-aa nɛ́ o bíí ko Krist ŋgimbi n'aa tɛ pii nɛ̀ ɗoŋ.

²⁴Sɛka sɔŋkur mɔ dea wese nɛ̀ Jesu tɛ e nɛ̀ mɔɔ-wan er Sɔ̧ Dáà, ɗoŋ n'aa tɛ ɗaŋ o wan, in ŋgai ká bá nɛ̀ o ŋgayamɔ lɛŋ yinɛ.

²⁵Wen Krist tɛ ɔ kànà wan hɔ ŋgimbi nɛ̀ Sɔ̧ tɛ de ha̧ a̧ mɛ́ kpa nɛ̀ ŋgai zu o wi nɛ̀ sɛn a̧.

²⁶Ɓɛɛ sɔŋkur wisɛn nɛ̀ Sɔ̧ tɛ ɗaŋ nɛ́ fio,

²⁷wen a̧ dee ha̧ Krist mɛ́ ɔ wan zu mɔ lɛŋ kaɗi. Ɓɛɛ kà a̧ tɔ̧́‘e, wi dee ha̧ Krist mɛ́ ɔ wan zu mɔ lɛŋ wó, ɓɛɛ nɛ́ Sɔ̧ nɛ̀ ee a̧ tɛ wan'i a̧ bo zaŋ-aa na ɓɛɛ.

²⁸Ɓɛɛ ŋgimbi nɛ̀ Krist tɛ kpa ŋgai zu mɔ lɛŋ, Bem nɛ̀ tɛ-wi tɛ mbo zu ha̧ wi nɛ̀ ee a̧ zu mɔ lɛŋ, wen há̧ Sɔ̧ mɛ́ ɔ̀ wan nɛ̀ oi-aa tɛ́ mɔ lɛ́ŋ.[5]

²⁹Kà bó hegɔ na, o ŋma bíí de ha'i mɛ́ zui wa oi nú bíí nɛ̀ fee kaɗi, wen ge? Kà tɔ̧́ so'e bíí nɛ̀ fee kaɗi, kur ŋgɔn tɛ fio ɓɔna wo, ɓɛɛ wi zui bɔɔ o wi nɔ‘i de nɛ̀ ge?

³⁰Ɓɛɛ ɛ́ɛ́ nɛ̀ tɛ yɛ mbɛt, wen ge sa ɓan na ŋgamɔ kpaa yɛ'ɛ ge?

³¹Wese lɛŋ mi duk dɔ̧́ɔ̧́ in fio; ɓɛɛ kɔ‘m mi duk tɛ‘m wen zu'nɛ́ nɛ̀ ɗoŋ Krist Jesu, Gasa Wan k’ɛ́ɛ́. Mɔ‘i nɛ́ kpasawen a̧‘m tɔ̧.

³²Kà‘m yór so nɛ́ zu taamɔ ko bíí, ɓɛɛ mi tɛ̀ɛ́ de so biro in o saɗi sɛn Efɛz kii nɛ̀ ge? Kà bó‘e bíí fe kaɗi kur ŋgɔn tɛ fio ɓɔna wó, ɓɛɛ ɛ̀ɛ̀ nyɔ́ŋ mɔ, ɛ̀ɛ̀ nɔ́ mɔ, wen mɔɔsa̧ ɛ́ɛ́ fea.

³³K’ɛ́nɛ́ ɔr tɛ‘nɛ́ na: ɗaŋ gbama-yari ɗaŋ nɛ́ de naŋanɔ ko ŋma-wi.

³⁴Ɛ̀nɛ̀ tá mɔ nɛ̀ de-a, ɓɛɛ k’ɛ́nɛ́ de ɗaŋmɔ ɓɔna, wen o ŋma bíí mgbara'nɛ́ tɛ iŋ kɔ‘i Sɔ̧ hɔ̧ɔ̧ na; mi tɔ̧ wen'i ha̧ foe mɛ́ de'nɛ́.

³⁵O ŋma bíí tɛ ak mɔ‘e, o bíí nɛ̀ fee kaɗi tɛ kur ŋgɔn tɛ fio hee ge? Kiitɛ-wa tɛ́ duk hee ge?

³⁶Mɛ́ wi nɛ̀ bó nɛ̀ kpasa taamɔ na’ɛ, mɔ nɛ̀ mɛ gun’ɛ, kà mbɔ́r na, ɓɛɛ hɔɔ nde?

³⁷Bó nɛ́ kiitɛ nyɔnɔ a'i gun na, ɓɛɛ nɛ́ gba̧a̧-mɔ, hee alkamaari, kóó ŋma mɔ ga, a'i gun sɛka hɔa.

³⁸Ɓɛɛ nɛ́ Sɔ̧ a̧ de ha̧ o bɔr-mɔ mɛ́ gbo tɛ o kpar-a nɛtɛ nɛtɛ hee a̧ kɔ̧ɔ̧ ga.

³⁹O mur-mɔ lɛŋ hɔ ŋmaa na; mur-tɛ bíí duk nɛtɛ, o mur saɗi, mur nɔ̧́í̧ in mur zoro mbɛt duk nɛtɛ.

⁴⁰Mɔ mɛ́ yiwese in mɔ mɛ́ mbɔɗɔnu a̧a̧ sɛnɛ, ɓɛɛ wa tok hee ŋmaa ga na.

⁴¹Wese ba hee nyaŋa-zɛ ga na, o sɔra mbɛt tok nɛtɛ, kóó ŋma sɔra kpɔk tok hee ɓii-aa ga na.

⁴²Kura-ŋgɔn tɛ fio mbɛt hee mɔ‘i ga. Kiitɛ nɛ̀‘i gun'i mbɔr mbɔr, ɓɛɛ kiitɛ nɛ̀ kura ŋgɔn kaɗi mbɔr ɓɔna.

⁴³Mɔ nɛ̀‘i e tɛ geemɔ nɛ̀‘i gun kur ŋgɔn tɛ fio nɛ̀ oi gasamɔ; ɓɔsamɔ nɛ̀‘i gun kur ŋgɔn tɛ fio nɛ̀ oi ŋgai nyɛmna.

⁴⁴Kà‘i gún kiitɛ mɔ nɛ̀ mbɔr mbɔr’ɛ, tɛ kura-ŋgɔn kɔ̧-a̧, kiitɛ-a'i beka mbɔr ɓɔna. Kà kiitɛ-wi mɛ́ zaŋnu á̧ bòó sɛnɛ, ɓɛɛ wan mɛ́ yiwese a̧a̧ sɛnɛ mbɛt.

⁴⁵Mɛ̀ nɛ́ hegɔ nɛ̀ Yɔramɔ tɔ̧a̧‘e: «Kuti Adam duka nɛ́ bíí-nù nɛ̀ duka kpasa, ɓɛɛ sɔŋkur Adam nɛ́ bíí-yiwese nɛ̀ há̧ duka-kpasa.»

⁴⁶Kuti-a nɛ́ kiitɛ bíí-nù, bó nɛ́ bíí-yiwese na; wi’ɛi tɛ̀ɛ́ kɔ‘i nɛ̀ ɗoŋ.

⁴⁷Kuti-wi nɛ́ bíí-nù wen a̧ gboo nɛ̀ tɛ nù, ɓɛɛ yiitoo bíí tɛ̀ɛ́ kɔ‘i nɛ̀ yiwese.

⁴⁸O bíí-nù hɔɔ ŋmaa in wi’ɛi nɛ̀ gboo nɛ̀ tɛ nù‘i, ɓɛɛ o bíí-yiwese hɔɔ ŋmaa in wan nɛ̀ tɛ̀ɛ́ nɛ̀ yiwese.

⁴⁹Ɓɛɛ hee mɔ'ɔ n’ɛ̀ɛ̀ hɔɔ so ŋmaa in bíí-nù ga, kale-a mbɛt, ɛ́ɛ́ tɛ hɔ ŋmaa in wan mɛ́ yiwese.

⁵⁰O nya'm, mi tɔ̧ɔ̧ h’ɛ́nɛ́‘e, mur-tɛ-wi in tɔk tɛ-wi beka ye tɛ Wan ko Sɔ̧ na; mɔ nɛ̀ mbɔr beka duk in mɔ nɛ̀ beka mbɔr na, na.

⁵¹Mi tɛ tɔ̧ ŋma ɗukamɔ h’ɛ́nɛ́: bó nɛ́ ɛ́ɛ́ tɛ fe lɛŋ na, ɓɛɛ tɛ yɛ lɛŋ tɛ kpai

⁵²hee gɔma-yí ga tɛ́ sɔŋkur dɔma mbia. Wen ŋgimbi nɛ̀ wa tɛ dɔm mbia, o wi nɛ̀ fee so tɛ́ kur ŋgɔn nɛ̀ oi kiitɛ nɛ̀ beka mbɔr ɓɔna, ɓɛɛ tɛ yɛ tɛ́ kpai kpai.

⁵³Kiitɛ yɛ wan nɛ̀ mbɔr’ɛ, tɛ́ kifi duk wan nɛ̀ beka mbɔr na; ɓɛɛ kiitɛ yɛ wan nɛ̀ tɛ́ fe’ɛ tɛ́ kifi duk nɛ́ wan nɛ̀ beka fe ɓɔna mbɛt.

⁵⁴Ŋgimbi nɛ̀ kiitɛ yɛ mɛ́ ɛ̧ɛ̧ tɛ́ kifi wan nɛ̀ beka fe ɓɔna'i, ɓɛɛ mɔ nɛ̀ Yɔramɔ tɔ̧ɔ̧ so'e: «Gana-zu-mɔ gura fio kaɗi wo'i,» hɔɔ gba̧a̧.

⁵⁵«Fio, gana-zu-mɔ kɔ-mɛ a̧a̧ de, fio, sɛ́ɛ̀-dɔ-wi kɔ-mɛ a̧a̧ déè?»

⁵⁶Sɛ́ɛ̀-dɔ-wi ko fio nɛ́ ɗaŋmɔ, ɓɛɛ ŋgai ko ɗaŋmɔ nɛ́ heembea.

⁵⁷Ɛ̀ɛ̀ dé osoko ha̧ Sɔ̧, wen nɛ́ a̧ a̧ ha̧ ŋgai h’ɛ́ɛ́ mɛ́ gan fio nɛ̀ ɗoŋ Gasa Wan k’ɛ́ɛ́ Jesu Krist.

⁵⁸Hegɔ, o nya'm n'am kɔ̧ɔ̧ nyɛmna, ɛ̀nɛ̀ yór a̧ nɔ mitak, ɛ̀nɛ̀ dé tom ko Gasa Wan siti ɓɔnsɛnɛ, ɓɛɛ ɛ̀nɛ̀ íŋ‘e bɔnɛ-tom n’ɛnɛ zɔk wen Gasa Wan bó nɛ́ tom takaɗi na.