Read Northwest Gbaya 1 KƆRINTIƐN 2 Bible Online

1 KƆRINTIƐN 2 - Northwest Gbaya bible

1 KƆRINTIƐN 2

¹O nya'm, kɔ‘m ŋgimbi n'am nɛ̀ɛ́ so nɛnɛ tɛ‘nɛ́‘i, bó nɛ́ wen n'am tɔ̧ wen nɛ̀ de-a in tɛ iŋa-mgbara-mɔ a̧‘m tɔ̧ɔ̧ nɛ̀ hu̧sa̧mɔ ko Sɔ̧ h’ɛ́nɛ́ na.

²Wen mɔ n'am hoka so mɛ́ iŋ ká‘m a̧a̧ in'nɛ̀ɛ́, nɛ́ Jesu Krist kpɔk ɓɛɛ; nɛ́ Jesu Krist nɛ̀ wa mgboia zu te-diŋa.

³Mɛ̀ nɛ́ hegɔ n'am duka mgbara'nɛ́ nɛ́ ziɓa-wi, nɛ̀ kíì, in nɛ̀ naka-tɛ mbɛt.

⁴Wen kɔ‘m in tɔ̧ɔ̧-wen ko Sɔ̧ kɔ‘m bó nɛ́ yee zer bíí wen zu iŋa-mgbara-mɔ na, ɓɛɛ mɔ‘i duka nɛ́ ŋgayamɔ ko Sa̧a̧ Ɔmi a̧ usa tɛ sɛnɛ,

⁵wen ha̧ gun kɔ̧ɔ̧ɗɔɔwen k’ɛ́nɛ́ mɛ́ tɛ nɛ̀ tɛ ŋgayamɔ ko Sɔ̧, nɛ̀ bó nɛ́ tɛ iŋa-mgbara-mɔ ko bíí na.

⁶Nɛ̀ mbetɛ, ɛ́ɛ́ usi nɛ́ iŋa-mgbara-mɔ ha̧ o bíí nɛ̀ mgbita tɛ mɔ ko Krist, ɓɛɛ bó nɛ́ iŋa-mgbara-mɔ wan mɛ́ zaŋnu na, kóó war ko o be-wan nɛ̀‘i tɛ ɗaŋ yínɛ́'ɛ na mbɛt.

⁷Ɛ́ɛ́ usi nɛ́ iŋa-mgbara-mɔ ko Sɔ̧; mɔ‘i nɛ́ hu̧sa̧mɔ in ɗukamɔ nɛ̀ Sɔ̧ ɗafa nɛti nɛ̀ ku̧u̧naŋ-a mɛ, mɛ́ duk nɛ́ gasamɔ k’ɛ́ɛ́.

⁸O be-wan zaŋnu’ɛ iŋ iŋa-mgbara-mɔ‘i na, wen kà wa íŋ so, bó nɛ́ wa tɛ̀ɛ́ mgboi so Gasa Wan ko gasamɔ zu te-diŋa na.

⁹Ɓɛɛ Yɔramɔ tɔ̧a̧‘e: «Nɛ́ mɔ nɛ̀ gbaayí bíí tɛ zɔk hɔ̧ɔ̧ na, nɛ̀ zer bíí tɛ zii nɛti na, nɛ̀ bíí ta mɔ sɛnɛ na mbɛt, á̧ Sɔ̧ ɗafa wen o wi nɛ̀ kɔ̧ɔ̧ a̧.»

¹⁰Sɔ̧ usa kɔ‘i mɔ‘i h’ɛ́ɛ́ nɛ̀ ɗoŋ Sa̧a̧ Ɔmi, wen Sa̧a̧ Ɔmi iŋa mɔ lɛŋ hɔ tɛ ɗukamɔ ko Sɔ̧ mbɛt.

¹¹Nɛ́ o'o tɛ iŋ taamɔ ko ŋma bíí o? Bó nɛ́ wi’ɛi nɛ̀ see-zu ɓɛɛ na? Kale-a mbɛt, ŋma bíí nɛ̀ iŋa taamɔ ko Sɔ̧ bo na, nɛ́ Sa̧a̧ Ɔmi ko Sɔ̧ kpɔk ɓɛɛ.

¹²War k’ɛ́ɛ́, bó nɛ́ ɛ́ɛ́ kpaa nɛ́ taamɔ wan mɛ́ zaŋnu na, ɓɛɛ ɛ́ɛ́ kpaa nɛ́ Sa̧a̧ Ɔmi nɛ̀ zira nɛ̀ tɛ Sɔ̧ mɛ, wen h’ɛ́ɛ́ mɛ́ iŋ o mɔ nɛ Sɔ̧ ha̧a̧ h’ɛ́ɛ́ nɛ ta-tɛ.

¹³Bó nɛ́ ɛ́ɛ́ tɔ̧ wen nɛ̀ war ko iŋa-mgbara-mɔ ko bíí na, ɓɛɛ ɛ́ɛ́ tɔ̧ wen nɛ̀ iŋa-mgbara-mɔ nɛ̀ Sa̧a̧ Ɔmi usi h’ɛ́ɛ́, we nɛ̀ ɗoŋ kpasawen ko Sa̧a̧ Ɔmi ha̧ o bíí nɛ a̧a̧ nɛ̀ Sa̧a̧ Ɔmi‘i.

¹⁴Bíí zaŋnu nɛ̀ ta-tɛ nyɛm mɛ́ kpɛk mɔ nɛ̀ tɛ́ nɛ̀ tɛ̀ Sa̧a̧ Ɔmi ko Sɔ̧ na; mɔ‘i duk nɛ́ mgbelemɔ yí a̧; a̧ nyɛm mɛ zii mgbara-a na mbɛt, wen kànà nɛ́ nɛ̀ ɗoŋ Sa̧a̧ Ɔmi a'i kɛ̧ nɛ̀ mgbara-a.

¹⁵Bíí nɛ a̧a̧ nɛ Sa̧a̧ Ɔmi iŋa kɛ̧ɛ̧ mgbara mɔ lɛŋ, ɓɛɛ ŋma bíí nyɛm mɛ́ kɛ̧ mgbara mɔ tɛ mɔ ko wi’ɛi na.

¹⁶Wen Yɔramɔ tɔ̧a̧: «Nɛ́ o'o iŋa taamɔ ko Gasa Wan mɛ́ tɔ̧ mbɔrɔ ha̧ a̧ o?» Ɓɛɛ war k’ɛ́ɛ́, ɛ́ɛ́ a̧a̧ nɛ taamɔ ko Krist.