Read Northwest Gbaya 1 KƆRINTIƐN 5 Bible Online

1 KƆRINTIƐN 5 - Northwest Gbaya bible

1 KƆRINTIƐN 5

¹O bíí tɔ̧ dam fara lɛŋ‘e ŋma bíí dee ŋma mɔɔ-zap mgbara'nɛ́; kóó o wi-iŋ-kpasa Sɔ̧ na de pɛrti mɔ‘i na. Mi zia'e ŋma bíí mgbara'nɛ́ baa ŋma kóò ko dáà kɔ‘i ɓɛɛ duk in a̧.

²Tɛ mɔ‘i, h’ɛ́nɛ́ mɛ́ zim nɛ́ mɔ, fo nɛ́ wi’ɛi yinɛ mgbara'nɛ́ wó, nɛ́ mɔ'ɔ n’ɛ̀nɛ̀ ŋmaŋ k’ɛ́nɛ́ nɛ́ tɛ‘nɛ́ zu mɔ‘i.

³War kɔ‘m, kiitɛ‘m bo hi̧i̧ na, ɓɛɛ taamɔ kɔ‘m a̧a̧ hi̧i̧; mɛ̀ nɛ́ hegɔ n'am gɔna kɔ‘m kita zu wi nɛ̀ dee mɔ‘i, hee mi a̧a̧ so hi̧i̧ mbɛt ga.

⁴Nɛ̀ nin Gasa Wan Jesu in sɛn tɛ ŋgai kɔ̧-a̧, mi tɛ duk mgbara'nɛ́ nɛ̀ taamɔ kɔ‘m tɛ ŋma mɔi̧a-a k’ɛ́nɛ́;

⁵ŋgimbi'i, ɛ̀nɛ̀ é pɛrti bíí hegɔ er Satan ha̧ mur-tɛ-a mɛ ɗaŋ, ɓɛɛ sɔ̧-tɛ-a kpasa wese ko Gasa Wan Jesu.

⁶Mɔ n’ɛnɛ tɛ̀ɛ́ ŋmaŋ so tɛ zu-a bó a̧‘i na! Ɛ́nɛ́ iŋ‘e nɛ́ hao tikiɗi a̧ de ha̧ mbɔɗa-fuu mɛ́ kur na?

⁷Ɛ̀nɛ̀ fɔ́r gba̧‘a̧ hao yinɛ tɛ‘nɛ́ h’ɛ́nɛ́ mɛ́ duk nɛ́ mbe mbɔɗa-fuu, wen hao bó tɛ‘nɛ́ kinii na. Wen Krist nɛ̀ wa gbɛa'i nɛ́ gbaŋa Paska k’ɛ́ɛ́.

⁸K’ɛ́ɛ́ dé gbaŋa Paska nɛ̀ gba̧‘a̧ hao na, k’ɛ́ɛ́ dé nɛ̀ hao-ɗaŋmɔ in nɛ̀ ɗaŋ deemɔ na mbɛt; ɓɛɛ ɛ̀ɛ̀ dé gbaŋa Paska nɛ̀ brɛt nɛ̀ hao bo sɛnɛ na, tɛ yuwar deemɔ nɛ̀ sa̧a̧-a̧ in kpasawen mbɛt.

⁹Mi yɔra so kalata h’ɛ́nɛ́‘e, k’ɛ́nɛ́ gbam in o wi-de-dàlà na.

¹⁰Bó nɛ́ mi tɔ̧a̧‘e k’ɛ́nɛ́ gbam in o wi-de-dàlà zaŋnu’ɛ, in o wi de zɔm wɔ-mɔ, o wi-zuzu in o wi-gasi-gee-sɔ̧ lɛŋ na, na, wen kà bó só hegɔ, ɓɛɛ ɛ́nɛ́ tɛ̀ɛ́ yu so e zaŋnu’ɛ duk.

¹¹Ɓɛɛ mi kɔ̧ɔ̧ so mɛ́ mbaŋ tɛ‘nɛ́‘e, kà ŋma nya-wi nɛ́ bòó mgbara'nɛ́ nɛ̀ duk nɛ́ wi-de-dàlà, wi de zɔm wɔ-mɔ, wi-gasi-gee-sɔ̧, wi-ba-nin bíí, wi-duk-bara-dɔ̧ɔ̧, kóó wi-zuzu mbɛt, k’ɛ́nɛ́ gbam in wi’ɛi na, k’ɛ́nɛ́ nyɔŋ géé nyɔŋa mɔ in pɛrti bíí hegɔ na mbɛt.

¹²Mi so nɛ́ wi-gɔn-kita zu o bíí nɛ̀ duk nɛ̀ zan? Bó nɛ́ ɛ́nɛ́ tɛ̀ɛ́ gɔn so kita zu mɔ k’ɛ́nɛ́, ɛ́nɛ́ in o ŋmaa na nde?

¹³O bíí nɛ̀ duk nɛ̀ zan, nɛ́ Sɔ̧ a̧ tɛ gɔn kita zu wa, wen Yɔramɔ tɔ̧ɔ̧ so'e: «Ɛ̀nɛ̀ fó wi-ɗaŋ yinɛ mgbara'nɛ́.»