Read Northwest Gbaya 1 KƆRINTIƐN 6 Bible Online

1 KƆRINTIƐN 6 - Northwest Gbaya bible

1 KƆRINTIƐN 6

¹Kà ŋma wen nɛ́ bóò mgbara'nɛ́, hee ge ɛnɛ tɛ tɔ̧ ha̧ o wi-iŋ-kpasa Sɔ̧ na mɛ gɔn kita zu'nɛ́ ge? Ɛ̀nɛ̀ é ha̧ o sa̧a̧-bíí mɛ́ gɔn gɔna kita'i.

²Ɛ́nɛ́ iŋ‘e nɛ́ o sa̧a̧-bíí a̧ tɛ gɔn kita zu nù na nde? Ɓɛɛ kà bo'e nɛ́ ɛ́nɛ́'ɛ tɛ gɔn kita zu nù, ɓɛɛ ɛ́nɛ́ nyɛm mɛ́ ɗafi o geɗek wen mgbara'nɛ́ na wen ge?

³O betom mɛ yiwese n’ɛ̀ɛ̀ tɛ gɔn kita zu wa’ɛ, kà bó nɛ̀ o be kúsú-kúsú wen zaŋnu’ɛ?

⁴Kà pɛrti wen hegɔ bó mgbara'nɛ́, ɓɛɛ ɛ́nɛ́ sa o bíí nɛ̀ zuduk bíí ko Krist e tɛ geemɔ mɛ́ gɔn kita'i, wen ge?

⁵Mi tɔ̧ wen’ɛ ha̧ foe mɛ́ de'nɛ́. Ŋma wi-iŋ-mgbara-mɔ bo mgbara'nɛ́ kpɔk mɛ́ gɔn kita zu o nya-a̧ na,

⁶ɓɛɛ sá o nya-wi nɛ́ɛ̀ wuli ŋmaa ti o wi nɛ̀ kɔ̧ ɗɔaa na’ɛ nde?

⁷Kóó hegɔ mbɛt, kà wen nɛ́ bòó mgbara'nɛ́, ɓɛɛ mɔ‘i duk nɛ́ yɔɔ-kaya. Kóó kà ŋma bíí de mɔ nɛ̀ yuwar-a in'nɛ̀ɛ́ na, ɛ́nɛ́ nyɛm mɛ́ nyɔŋ nin'nɛ́ na nde? Kóó wa kɔ̧ɔ̧ mɛ́ kai mɔ k’ɛ́nɛ́ lɛŋ yinɛ, ɛ̀nɛ̀ é ha̧ wa kai.

⁸Ɓɛɛ ɛ̧ɛ̧, nɛ́ ɛ́nɛ́'ɛ de mɔ nɛ̀ yuwar-a na, kai nɛ̀ mɔ ko o bíí; ɓɛɛ o wi nɔ‘i nɛ́ o nya'nɛ́!

⁹Ɛ̀nɛ̀ íŋ‘e o wi-de-mɔ nɛ̀ yuwar-a na beka kpa Wan ko Sɔ̧ nɛ̀ mɔɔ-oi na! K’ɛ́nɛ́ ɔr tɛ‘nɛ́ na! Kóó nɛ́ o wi-de-wɔ ɗaŋmɔ, o wi-gasi-gee-sɔ̧, o wi-de-dàlà, o wi ɔ in ŋmaa tɛ mɔɔ-búù,

¹⁰o wi-zuzu, o wi-a-see-mɔ, o wi-duk-bara-dɔ̧ɔ̧, o wi-kai-ndaa-bíí in o wi-ɓɔŋ-mɔ beka kpa Wan ko Sɔ̧ nɛ̀ mɔɔ-oi na.

¹¹O ŋma bíí mgbara'nɛ́ duka so nɛti hegɔ, ɓɛɛ kinii Sɔ̧ fɔra ɗaŋmɔ k’ɛ́nɛ́ yinɛ, war-tɛ‘nɛ́ sa̧a̧, ɓɛɛ Sɔ̧ zɔk'nɛ́ hee o wi-de-mɔ nɛ̀ yuwar-a ga nɛ nin Gasa Wan Jesu Krist in nɛ̀ ɗoŋ Sa̧a̧ Ɔmi ko Sɔ̧ k’ɛ́ɛ́.

¹²Mi nyɛma dee mɔ lɛŋ, ɓɛɛ bó nɛ́ o mɔ lɛŋ a̧ gbak am na. Mi nyɛma dee mɔ lɛŋ, ɓɛɛ mi beka e ha̧ ŋma mɔ mɛ́ de'm nɛ̀ bara na.

¹³Wi nyɔŋ mɔ si kɔ̧ zaŋ, ɓɛɛ zaŋ-wi duk wen nyɔŋmɔ, ɓɛɛ Sɔ̧ tɛ ɗaŋ wa yiitoo'i lɛŋ. Bó nɛ́ kiitɛ-wi duk wen dee dàlà na; kiitɛ-wi nɛ́ ko Gasa Wan, ɓɛɛ Gasa Wan mbɛt duk wen kiitɛ-wi.

¹⁴Sɔ̧ nɛ̀ dee ha̧ Gasa Wan mɛ́ kur ŋgɔn tɛ fio tɛ de h’ɛ́ɛ́ mɛ́ kur mbɛt nɛ̀ ŋgai kɔ̧-a̧.

¹⁵Ɛ́nɛ́ iŋ‘e, ɛ́nɛ́ nɛ̀ tɛ‘nɛ́ nɛ́ dokoɗo-tɛ Krist na? Mi tɛ ba dokoɗo-tɛ Krist e nɛ̀ mɔɔ-de-dàlà? Weyaa, bó hegɔ na!

¹⁶Ɛ́nɛ́ iŋ‘e wi nɛ̀ ɔ in ko-de-dàlà duk nɛ́ kpɔk kiitɛ in a̧ na? Wen Yɔramɔ tɔ̧a̧‘e: «Wa yiitoo tɛ duk nɛ́ kpɔk kiitɛ.»

¹⁷Ɓɛɛ bíí nɛ̀ kiitɛ ndaɗa in Gasa Wan duk kpɔk in a̧ nɛ̀ ɗoŋ Sa̧a̧ Ɔmi.

¹⁸Ɛ̀nɛ̀ yú dee dàlà. O dɔka ɗaŋmɔ nɛ̀‘i de, wi de in tɛ-wi na; ɓɛɛ war ko dàlà, wi de in kiitɛ-wi.

¹⁹Ɛ́nɛ́ iŋ‘e kiitɛ‘nɛ́ nɛ́ tua ko Sa̧a̧ Ɔmi nɛ̀ zira nɛ̀ yiwese tɛ Sɔ̧ mɛ tɛnɛ nɛ̀ duk tɛ‘nɛ́'ɛ na? Hegɔ kiitɛ‘nɛ́ bó nɛ́ k’ɛ́nɛ́ ɓɔna.

²⁰Nɛ́ ŋma bíí a̧ gɔna zu'nɛ́; mɛ̀ nɛ́ wen hegɔ, kiitɛ‘nɛ́ a̧ zɔ́n Sɔ̧.