Read Northwest Gbaya 2 KƆRINTIƐN 12 Bible Online

2 KƆRINTIƐN 12 - Northwest Gbaya bible

2 KƆRINTIƐN 12

¹Mi tɛ́ ŋmaŋ kànà tɛ‘m, kóó bó nɛ́ mɔ nɛ̀ tɛ́ gbak wi na mbɛt; hegɔ, mi tɛ́ we ɗoŋ hɔɔ-zu in mɔ nɛ̀ Gasa Wan usa ha̧‘m h’ɛ́nɛ́.

²Mi iŋa ŋma bíí ko Krist, nɛ̀ Sɔ̧ baa so si taar yiwese ŋgɔn mɛ́, dee pɛ ɓu-zua-naar kaɗi; ɓɛɛ kóó Sɔ̧ baa a̧ nɛ̀ oi kiitɛ náà, kóó nɛ́ hɔɔ-tɛ-a nde, mi iŋ na; nɛ́ Sɔ̧ kpɔk a̧ iŋa.

³Kóó wi’ɛi daŋa si yiwese nɛ̀ oi kiitɛ, kóó nɛ́ hɔɔ-tɛ-a, mi iŋ na, kànà nɛ́ Sɔ̧ a̧ iŋa. Kɔ‘m mi iŋa'e,

⁴Sɔ̧ baa wi’ɛi si yiwese mɛ, ɓɛɛ sɛn hi̧i̧ a̧ zia ŋma wen nɛ̀ nú bíí nyɛm mɛ́ tɔ̧ na, nɛ̀ bíí nyɛm mɛ́ we ɗoŋ-aa na mbɛt.

⁵Mi tɛ ŋmaŋ tɛ‘m nɛ̀ ɗoŋ wi’ɛi, ɓɛɛ war kɔ‘m, mi tɛ́ ŋmaŋ tɛ‘m zu ɓɔsi kɔ‘m.

⁶Kà bó so'e ha̧‘m mɛ́ ŋmaŋ tɛ‘m wó, bó nɛ́ mi tɛ̀ɛ́ duk nɛ́ mgbelewi na, ɓɛɛ mi tɛ̀ɛ́ tɔ̧ nɛ́ kpasawen. Ɓɛɛ mi kɔ̧ mɛ́ de hegɔ na, wen ká ŋma bíí tɛ́ɛ̀ zɔn am gan zu mɔ n'am de, kóó gan zu mɔ n'am tɔ̧.

⁷O mɔ nɛ̀ Sɔ̧ usa ha̧‘m nɛ́ gasamɔ nyɛmna; mɛ̀ nɛ́ hegɔ n'aa pi̧i̧ ŋma mɔ tɛ‘m nɛ̀ duk hee betom ko Satan ga mɛ́ usi bɔnɛ ha̧‘m, wen ká‘m tɛɛ ŋmaŋ tɛ‘m.

⁸Mi kɔfa Gasa Wan wen zu mɔ‘i war taar ha̧ a̧ mɛ́ ba mɔ‘i yinɛ tɛ‘m.

⁹Ɓɛɛ a̧ tɔ̧ ha̧‘m'e: «Deemɔ nɛ̀ ta-tɛ kɔ‘m nyɛma wen mɛ́ kaɗi; nɛ́ tɛ̀ ɓɔsi, a̧ mgbák ŋgai kɔ‘m usi nɛ̀ tɛ.» Hegɔ mi tɛ́ ŋmaŋ tɛ‘m zu ɓɔsi kɔ‘m ha̧ ŋgai ko Krist mɛ́ duk zu'm.

¹⁰Tɛ́ mɔ‘i, mi dúk nɛ̀ desee zu ɓɔsi kɔ‘m, in o dara, in o bɔnɛ, in o dee ŋgamɔ gu nɛ̀ o dita-see nɛ̀ kpa'm wen zu Krist! Wen ŋgimbi n'am ɓɔsi, ɓɛɛ nɛ́ ŋgimbi'i a̧‘m kpa nɛ̀ ŋgai.

¹¹Nɛ́ ɛ́nɛ́'ɛ dee ha̧‘m mɛ́ kifi duk mgbelewi. Ɛ́nɛ́ tɛ̀ɛ́ de so nɛ́ sedaako wen am, kóó mi bó só nɛ́ ŋma mɔ na mbɛt'i; wen o zɔm betom nɔ‘i gan am na.

¹²O mɔɔ-usi-mɔ nɔ'ɔ nɛ̀ duk nɛ́ ko mgbák betom ko Krist dee so mgbara'nɛ́: munyal tɛ o weamɔ lɛŋ, o mɔɔ-kifi, o mɔɔ-gɔn-ɗɛɗɛ-wi in ŋgayamɔ.

¹³Nɛ́ ge mɔ ge a̧ o ŋma zuduk bíí ko Sɔ̧ kpaa gan'nɛ́ ge? Kànà nɛ́ kiitɛ‘m nɛ̀ duk so nɛ́ tui zu'nɛ́ na'i ɓɛɛ; ɓɛɛ ɛ̀nɛ̀ é yɔɔ-kaya'i ha̧‘m.

¹⁴Kinii war taar nɛa-a tɛ‘nɛ́ nɛ́ mɔ'ɔ n'am tɛ́ nɛ'ɛ, ɓɛɛ mi beka ba ŋma mɔ er'nɛ́ na, wen bó nɛ́ mi kii nɛ́ kpaamɔ k’ɛ́nɛ́ na, ɓɛɛ nɛ́ ɛ́nɛ́ nɛ̀ zu'nɛ́ a̧‘m kii. Bó nɛ́ o bem a̧ e mɔ ŋgɔn wen daia o dáà na, ɓɛɛ nɛ́ o dáà a̧ e mɔ ŋgɔn wen o bem ɛ̧.

¹⁵War kɔ‘m nɛ̀ tɛ‘m, mi tɛ kpa desee wen ha̧a̧ mɔ h’ɛ́nɛ́, kóó kiitɛ‘m nɛ̀ zu'm'i mbɛt, wen gbaka'nɛ́. Kà‘m nɛ́ kɔ̧ɔ̧‘nɛ́ hegɔ batɛ, ɓɛɛ ɛ́nɛ́ tɛ́ kɔ̧‘m benaŋ tikiɗi mbɛt nde?

¹⁶Ɛ́nɛ́ iŋa mbɛt'e mi dúk so nɛ́ tui zu'nɛ́ na; ɓɛɛ o ŋma bíí‘e mi de nɛ̀ gɔn-ta ɔr nɛ̀ wi mɛ́ nyɔŋ mɔ kɔ‘i.

¹⁷Mgbara o bíí n'am toma so sitɛ‘nɛ́‘i, nɛ́ o a̧ kaia ŋma mɔ k’ɛ́nɛ́ piinɛ ha̧‘m o?

¹⁸Mi tɔ̧ɔ̧ so ha̧ Titɛ mɛ́ nɛ̀ tɛ‘nɛ́, ɓɛɛ mi tom ŋma nya-wi n’ɛnɛ iŋa mɛ́ nɛ̀ in a̧; ɓɛɛ tɛ́ mɔ‘i, Titɛ kaia ŋma mɔ er'nɛ́ nde? Bó nɛ́ yuwar taamɔ in deemɔ k’ɛ́ɛ́ kpɔk in ŋmaa na?

¹⁹Ɓeemɛ nɛ̀ ku̧u̧naŋ-a mɛ tɛnɛ ɛ́nɛ́ ta k’ɛ́nɛ́‘e, ɛ́ɛ́ yor nɛ́ ɗoŋ wen k’ɛ́ɛ́ nɛ̀ tɛ yɛ ti'nɛ́! Weyaa, bó hegɔ na; ɛ́ɛ́ tɔ̧ wen h’ɛ́nɛ́ ti Sɔ̧ nɛ̀ ɗoŋ Krist, ɓɛɛ tɛ́ mɔ‘i lɛŋ, o wi n'am kɔ̧ɔ̧ nyɛmna, mɛ̀ nɛ́ wen gbaka'nɛ́.

²⁰Kíì de'm dee wen ká‘m tɛɛ hɔ mgbara'nɛ́, k’ɛ́nɛ́ dúk hee mi taa so ga na, in ká‘m tɛɛ dúk hee ɛ́nɛ́ taa so ga na mbɛt. Mi de nɛ́ kíì wen ká‘m tɛɛ kpa kpɛri, aa-see-mɔ, nyimsea, wee-zu-nɛ-ŋmaa, dara, o wen-ɗoŋ, gasa-zu, in sakala-mɔ.

²¹Kíì de'm dee ká‘m tɛ́ɛ̀ hɔ mgbara'nɛ́ woyo ɓɛɛ ká Sɔ̧ e foe yí‘m ti'nɛ́; ká‘m tɛ̀ɛ́ hi̧i̧ kɔ̧a̧ wen o dɔka bíí mgbara'nɛ́ nɛ̀ dee so ɗaŋmɔ nɛti, ɓɛɛ wa kpai duka-a mɛ́ e ndiŋmɔ, dàlà, in o ɗaŋ deemɔ kɔ-wa so'i dúk na!