Read Northwest Gbaya 2 KƆRINTIƐN 8 Bible Online

2 KƆRINTIƐN 8 - Northwest Gbaya bible

2 KƆRINTIƐN 8

¹O nya-ɛɛ, ɛ́ɛ́ kɔ̧ɔ̧ h’ɛ́nɛ́ mɛ́ iŋ mgbara deemɔ nɛ̀ ta-tɛ nɛ̀ Sɔ̧ dee ha̧ o zuduk bíí kɔ‘i sɛn nú Masedoan.

²Wa yaa so tɛ o dɔka bɔnɛ nɛ̀ wee so wa; zu-a'i, wa duka nɛ̀ desee nyɛmna, mɛ̀ nɛ́ hegɔ nɛ̀ wa ha̧a̧ mɔ nɛ̀ dɔka-a zaŋ gasa san kɔ-wa'i mbɛt.

³Mi nyɛma mɛ́ de sedaako oi nú-wa'e, wa ha̧a̧ mɔ nyɛm ɗoŋ ŋgai kɔ-wa, nɛ́ mɔ'ɔ nɛ̀ wa ee mbe-a zu-a nɛ̀ tɛ-wa mbɛt;

⁴wa aka mɔ in yɛɛ batɛ‘e, ɛ̀ɛ̀ é ha'i mɛ́ ha̧ gbakamɔ ha̧ o sa̧a̧-bíí sɛn Judee.

⁵Wa ha̧a̧ tɛ-wa ha̧ Gasa Wan nɛti, sɛka wa ha̧ tɛ-wa h’ɛ́ɛ́ hee Sɔ̧ kɔ̧a̧ ga, ɓɛɛ bó nɛ́ ɛ́ɛ́ taa so'e, wa tɛ́ de pɛrti mɔ hegɔ na.

⁶Mɛ̀ nɛ́ hegɔ n’ɛ̀ɛ̀ aia nú ha̧ Titɛ mɛ́ gbak'nɛ́ ha̧ ha̧a̧mɔ k’ɛ́nɛ́‘i mɛ́ hɔ gba̧a̧, hee mɔ'ɔ n'aa ku̧u̧ so naŋ-a kaɗi ga.

⁷Wen ɛ́nɛ́ kpaa mɔ lɛŋ nɛ̀ dɔka-a: kɔ̧ɔ̧ɗɔɔwen, iŋa-tɔ̧ɔ̧-wen, iŋamɔ, ee-see tɛ mɔ lɛŋ, kɔ̧ɔ̧mɔ, in kɔ̧ɔ̧mɔ wan n’ɛnɛ zɔka ɗoŋ-aa tɛ yɛ. Hegɔ, ɛ̀nɛ̀ úsí ŋgai ha̧a̧mɔ k’ɛ́nɛ́ tɛ ŋgimbi’ɛ.

⁸Wen n'am tɔ̧‘i bó nɛ́ ŋma heembea na; ɓɛɛ nɛ́ sedaako ko o ŋma bíí nɛ̀ e see-wa tɛ tom kɔ-wa, a̧‘m tɔ̧ h’ɛ́nɛ́, wen h’ɛ́nɛ́ mɛ́ usi kpasa kɔ̧ɔ̧mɔ k’ɛ́nɛ́ mbɛt.

⁹Wen ɛ́nɛ́ iŋa gasa ha̧a̧mɔ ko Gasa Wan k’ɛ́ɛ́ Jesu Krist, nɛ̀ duka so nɛ́ wanmbɔi, ɓɛɛ nɛ́ mɔ'ɔ n'aa kifa dúk nɛ́ wisan wen zu'nɛ́, h’ɛ́nɛ́ mɛ́ kifi dúk nɛ́ o wanmbɔi wen zu san kɔ̧-a̧.

¹⁰Taamɔ kɔ‘m tɛ́ mɔ‘i nɛ́ mɔ'ɔ: ɔ dee h’ɛ́nɛ́ mɛ́ de tom'i hɔ sɔŋkur-aa, wen nɛ́ ɛ́nɛ́ a̧ ku̧u̧ so naŋ ha̧a̧ gbakamɔ‘i mɛ́ mgba-pɛ'ɛ; bó nɛ́ ha̧a̧-a̧ ɓɛɛ na, ɓɛɛ nɛ́ ɛ́nɛ́'ɛ baa so keta ha̧a̧mɔ‘i nɛti mbɛt.

¹¹Hegɔ ɛ̀nɛ̀ dé tom'i siti kinii ha̧ kaɗi. Ɛ̀nɛ̀ é see'nɛ́ tɛ́ tom-aa nyɛm nɛ̀ ɗoŋ ŋgai k’ɛ́nɛ́, hee mɔ'ɔ n’ɛ̀nɛ̀ ee nɛ̀ see'nɛ́ tɛ́ baa-keta-a ga.

¹²Kà taamɔ-a nɛ́ duka nɛ̀ de-a, Sɔ̧ tɛ́ kpɛk mɔ nɛ‘i ha̧ nyɛm nɛ ɗoŋ kpaamɔ, ɓɛɛ kà‘i nɛ́ bòó nɛ̀ kpaamɔ na, a̧ beka kpɛk mɔ nɛ̀‘i ha̧‘i hee geɗek-mɔ ga na.

¹³K’ɛ́nɛ́ pi̧ san zu'nɛ́ wen gbaka o ŋma bíí na, ɓɛɛ ɛ̀nɛ̀ kíí ha̧ kpaamɔ k’ɛ́nɛ́ mɛ́ nyɛm ŋmaa.

¹⁴Kinii ɔ dee ha̧ o bíí nɛ̀ a̧a̧ nɛ̀ dɔka mɔ gan zu-a mɛ́ gbak o wi nɛ̀ kpa mɔ nyɛm wa na; wen ŋma wese k’ɛ̀nɛ̀ kpa mɔ nyɛm'nɛ́ na, ká wa gbaka'nɛ́ nɛ̀ mɔ nɛ̀ wa a̧a̧ nɛnɛ gan zu-a: hegɔ, mɔ tɛ́ nyɛm ŋmaa.

¹⁵Wen Yɔramɔ tɔ̧a̧‘e ndé: «Wi nɛ̀ mɔi̧a so mɔ nɛ̀ dɔka-a, kpa mɔ gan zu-a na; wi nɛ̀ mɔi̧a mɔ tikiɗi, mɔ ɓan a̧ na mbɛt.»

¹⁶Zɔnamɔ a̧ dúk nɛ́ ko Sɔ̧ nɛ̀ dee ha̧ Titɛ mɛ́ de wɔ‘nɛ́ hee ɛ́ɛ́ ga.

¹⁷A̧ kpɛka akamɔ k’ɛ́ɛ́, ɓɛɛ gan mbɛt, a̧ kura mɔ kɔ̧-a̧ nɛ̀ tɛ-a mɛ́ nɛ̀ sitɛ‘nɛ́ mɛ.

¹⁸Ɛ́ɛ́ tom nɛ́ nya yɛ nɛ̀ o zuduk bíí ko Sɔ̧ lɛŋ zɔn wen zu tɔ̧ɔ̧ De Mbe Wen ko Sɔ̧ mɛ́ nɛ in a̧.

¹⁹Zu i̧i̧ mbɛt, nɛ́ o zuduk bíí ko Sɔ̧ a̧ hoka a̧ mɛ́ duk gbama-yari-nɔ̀ k’ɛ́ɛ́ tɛ mɔ ko gbakamɔ‘i; tom'i n’ɛ̀ɛ̀ de'i, ɛ́ɛ́ de wen ha̧ gasamɔ mɛ́ duk nɛ́ ko Gasa Wan in ha̧ mɔ n’ɛ̀ɛ̀ ta nɛ̀ ɔ dee mɛ́ hɔ gba̧a̧.

²⁰Mɔ n’ɛ̀ɛ̀ yu, mɛ̀ nɛ́ wen ká bíí tɛɛ ɗaŋ nin yɛ sɛn tɛ yuwar dɔka sede n’ɛ̀ɛ̀ kasi’ɛ.

²¹Wen ɛ́ɛ́ kii mɛ́ de nɛ́ mɔ nɛ̀ duk nɛ̀ de-a sɛn yí Gasa Wan in sɛn yí o bíí mbɛt.

²²Ŋma nya yɛ n’ɛ̀ɛ̀ tom nɛnɛ in wa'i, ɛ́ɛ́ wee a̧ war géè ndé, ɓɛɛ ɛ́ɛ́ iŋa'e, a̧ nɛ́ bíí nɛ̀ e see tɛ tom; ɓɛɛ kinii mbɛt, a̧ e nɛ́ see-aa sɛnɛ siti gan kuti-a, wen a̧ e ta nɛ̀ ɛ́nɛ́ nyɛmna.

²³Ɓɛɛ nɛ̀ war ko Titɛ, a̧ nɛ́ gbama-yari-nɔ̀ kɔ‘m, gbama-wi-de-tom mgbara'nɛ́, ɓɛɛ o nya yɛ nɔ‘i, nɛ́ o zuduk bíí ko Krist a̧ tom wa, ɓɛɛ tom kɔ-wa gasi nɛ́ Krist.

²⁴Ɛ̀nɛ̀ úsí kɔ̧ɔ̧mɔ in duka-tɛ k’ɛ́ɛ́ n’ɛ̀ɛ̀ duk nɛ́ ɛ́nɛ́ yí-wa'i ha̧ wa sɛn ti o zuduk bíí ko Krist.