Read Northwest Gbaya GALATII 2 Bible Online

GALATII 2 - Northwest Gbaya bible

GALATII 2

¹Dee pɛ ɓu-zua-naar ɓɛɛ ɛ́ɛ́ si ɗoŋ Jerusalɛm in Barnabas; mi mgbɔɔ so Titɛ nɛnɛ in am mbɛt.

²Sɔ̧ usa mɔ ha̧‘m, ɓɛɛ mi si ɗoŋ mɛ́ we ɗoŋ De Mbe Wen n'am tɔ̧ mgbara o gɔni-dùk ha̧ wa. Mi mɔi̧a in o mgbák gasawi, we nɛ̀ ɗoŋ mɔ‘i ha̧ wa mbɛt, wen ká tom n'am dee so in wan n'am tɛ́ de'i tɛɛ dúk nɛ́ tom takaɗi.

³Gbama-yari kɔ‘m Titɛ nɛ́ be Grɛk, ɓɛɛ wa de doole in a̧ mɛ́ gɔn bɔr sɛ na.

⁴Nɛ́ o ŋma bíí nɛ̀ bó nɛ́ kpasa nya-wi na a̧ kɔ̧ɔ̧ so ha̧ a̧ mɛ́ gɔn bɔr-aa. O wi nɔ‘i yee mgbara yɛ hee o wi-kpe-naŋ mɔ ga; wa zɔka yuwar-duka-a k’ɛɛ nɛ̀ ɗoŋ Jesu Krist bó nɛ́ ko o bara na; mɛ̀ nɛ́ hegɔ, nɛ̀ wa kɔ̧ɔ̧ so mɛ́ de yɛ nɛ̀ bara.

⁵Ɓɛɛ ɛ́ɛ́ kpɛk k’ɛ́ɛ́ wen ko o wi nɔ‘i na kóó tikiɗi, wen ha̧ kpasawen nɛ̀ a̧a̧ tɛ De Mbe Wen mɛ́ duk wen'nɛ́.

⁶Ɓɛɛ war ko o gasawi nɔ‘i, gásì kɔ-wa de ŋma mɔ tɛ‘m na; Gasa Wan zɔk kɔ‘i mɔ ko bíí wen yí bíí na. O gasawi nɔ‘i tɔ̧ ŋma mɔ ha̧‘m mɛ́ de na mbɛt.

⁷Wa zɔka'e Sɔ̧ ee tom usa De Mbe Wen ha̧ o wi nɛ̀ gɔn bɔr na er-am, hee mɔ'ɔ n'aa ee nɛnɛ er Pierre mɛ́ usi kɔ‘i ha̧ o wi nɛ̀ gɔna bɔr’ɛ ga.

⁸Wen kpɔk wi nɛ̀ dee tom tɛ́ Pierre mɛ́ duk betom ko o wi nɛ̀ gɔna bɔr'i, a̧ dee kànà tom tɛ‘m mɛ́ duk betom ko o gɔni-dùk mbɛt.

⁹Ɓɛɛ hee mɔ'ɔ nɛ̀ o gasawi nɔ'ɔ, Jak, Pierre in Jean, nɛ̀‘i sa'e o mbiŋ-tua, iŋa'e Sɔ̧ dee mɔ nɛ̀ ta-tɛ ha̧‘m ga, wa nyɛi̧a er-wa fan am in Barnabas mɛ́ usi'e ɛ́ɛ́ lɛŋ duk kpɔk. Ɛ́ɛ́ tɛ́ nɛ̀ k’ɛ́ɛ́ sitɛ o gɔni-dùk, ɓɛɛ wa nɛ̀ɛ́ kɔ-wa sitɛ o wi nɛ̀ gɔna bɔr.

¹⁰Mɔ nɛ̀ wa tɔ̧a̧ mɛ̀ nɛ́‘e, ɛ̀ɛ̀ tá mɔ wen o wisan; ɓɛɛ nɛ́ mɔ‘i a̧‘m dea.

¹¹Ŋgimbi nɛ̀ Pierre hɔɔ nɛnɛ Antiok, mi tɔ̧ɔ̧ wen e yí-a wen n'aa yɔɔ kaya nɛ̀ mbetɛ.

¹²Wen nɛti ha̧ o bíí ko Jak mɛ́ hɔ, Pierre duka so nyɔŋ mɔ in o gɔni-dùk, ɓɛɛ ŋgimbi nɛ̀ o wí nɔ‘i hɔɔ kaɗi, a̧ dee kíì o wi nɛ̀ gɔna bɔr, ɓɛɛ a̧ e o wí nɛ̀ gɔn bɔr na dúk, dúk nɛnɛ ɛ̀nɛ́-a.

¹³O ŋma Juif nɛ̀ yaa so hi̧i̧ zɔka ɗoŋ deemɔ ko Pierre, ɓɛɛ Barnabas nɛ̀ see zu ye tɛ dee pɛrti yí-tom'i mbɛt.

¹⁴Ɓɛɛ ŋgimbi n'am zɔka deemɔ kɔ-wa nyɛm ɗoŋ kpasawen nɛ̀ a̧a̧ tɛ De Mbe Wen na, mi tɔ̧ɔ̧ ha̧ Pierre ɓɔn gbaayí o bíí lɛŋ‘e ndé: «Mɛ́ nɛ́ Juif, ɓɛɛ yuwar-duka-a nɛ̀ mɛ́ duk hɛ̧ɛ̧ nɛ́ ko o gɔni-dùk, nɛ̀ bó nɛ́ ko o Juif na; ɓɛɛ mɛ́ de bɔɔ doole in o gɔni-dùk ha̧ wa mɛ́ duk hee o Juif ga, wen ge?»

¹⁵K’ɛ́ɛ́, tugun yɛ nɛ́ Juif, ɛ́ɛ́ bó k’ɛ́ɛ́ nɛ́ o gɔni-dùk hee o ɗaŋwi nɔ'ɔ ga na.

¹⁶Zu-a'i ɛ́ɛ́ iŋa'e bó nɛ́ deemɔ nyɛm nɛ̀ ɗoŋ heembea a̧ dé ha'i mɛ́ duk wi-de-mɔ nɛ yuwar-a na, ɓɛɛ mɛ̀ nɛ́ wen zu kɔ̧ɔ̧ ɗɔaa ha̧ Jesu Krist ɓɛɛ. Ɛ́ɛ́ mbɛt, ɛ́ɛ́ kɔ̧ɔ̧ ɗɔaa ha̧ Jesu Krist wen h’ɛ́ɛ́ mɛ́ ya o wi-de-mɔ nɛ̀ yuwar-a wen zu kɔ̧ɔ̧ ɗɔaa ha̧ Krist. Bó nɛ́ wen zu deemɔ nyɛm nɛ̀ ɗoŋ heembea na, wen wí beka dúk wi-de-mɔ nɛ̀ yuwar-a wen zu deemɔ nyɛm nɛ̀ ɗoŋ heembea na.

¹⁷Ɓɛɛ k’ɛ̀ɛ̀ nɛ́ kia mɛ́ duk o wi-de-mɔ nɛ̀ yuwar-a nɛ̀ ɗoŋ Krist, ɓɛɛ kà o bíí zɔ́k'e ɛ́ɛ́ nɛ́ o ɗaŋwi, mɛ̀ nɛ́ wen nɛ̀ tɔ̧‘e Krist yor nɛ́ ɗoŋ ɗaŋmɔ nde? Bo hegɔ na.

¹⁸Wen kà‘m mbó mɔ n'am gbina so kaɗi e ŋgɔn, ɓɛɛ mi nɛ̀ tɛ‘m nɛ́ wi-gbin-heembea.

¹⁹Nɛ́ heembea a̧ dee ha̧‘m mɛ fe tɛ heembea wen ha̧‘m mɛ́ duk kpasa wen Sɔ̧, wen wa mgboia'm zu te-diŋa in Krist.

²⁰Kinii mi duk kpasa, ɓɛɛ bó nɛ́ mi ɓɔna; nɛ́ Krist a̧ dúk kpasa sɛn tɛ‘m. Wen duka-a n'am duk nɛ̀ mur-tɛ kinii’ɛ, mi duk wen kɔ̧ɔ̧ ɗɔaa ha̧ Bem ko Sɔ̧ nɛ̀ kɔ̧a̧‘m, ɓɛɛ ha̧ tɛ wen am.

²¹Mi e deemɔ nɛ̀ ta-tɛ ko Sɔ̧ tɛ geemɔ na, wen kà bó nɛ́ heembea a̧ de ha'i mɛ́ duk wi-de-mɔ nɛ̀ yuwar-a, ɓɛɛ fio nɛ̀ Krist fea'i nɛ́ geemɔ.