Read Northwest Gbaya GALATII 3 Bible Online

GALATII 3 - Northwest Gbaya bible

GALATII 3

¹Ɛ́nɛ́ o be Galatii nɛ̀ bó nɛ̀ kpasa taamɔ na’ɛ, nɛ́ o'o ɔra'nɛ́ o? Bó nɛ́ wi tɔ̧ɔ̧ wen-fio ko Jesu Krist zu te-diŋa h’ɛ́nɛ́ nɛ̀ sa̧a̧-a̧ na?

²Ɛ̀nɛ̀ tɔ̧́ nɛ̀ sa̧a̧-a̧ ha̧‘m zii: nɛ́ deemɔ nyɛm nɛ̀ ɗoŋ heembea a̧ dee h’ɛ́nɛ́ mɛ́ kpa Sa̧a̧ Ɔmi náà, kóó mɛ̀ nɛ́ wen n’ɛnɛ zia De Mbe Wen kɔ̧ nɛ̀ ɗɔaa nde?

³Mɔ‘i nɛ́ kpasa taamɔ ɛ̀nɛ̀ bó nɛnɛ na hegɔ‘i? Ɛ́nɛ́ ku̧u̧naŋ-a nɛ̀ Sa̧a̧ Ɔmi, ɓɛɛ nɛ́ mur-tɛ a̧ tɛ́ de h’ɛ́nɛ́ mɛ́ nyɛm sɛnɛ kinii?

⁴Mɔ n’ɛnɛ kpaa tɛ́ mɔ‘i nɛ́ geemɔ nde? Ŋma mɔ n’ɛnɛ kpaa sɛnɛ bó na?

⁵Wen wi nɛ̀ ha̧a̧ Sa̧a̧ Ɔmi h’ɛ́nɛ́‘i, nɛ́ kpɔk wi’ɛi a̧ de mɔɔ-kifi mgbara'nɛ́ mbɛt; ɓɛɛ o mɔɔ nɔ‘i n'aa de'i, a̧ de wen zu kasa heembea k’ɛ́nɛ́ náà, kóó mɛ̀ nɛ́ wen n’ɛnɛ zia De Mbe Wen kɔ̧ nɛ̀ ɗɔaa mbɛt nde?

⁶«Abraham kɔ̧ɔ̧ ɗɔaa ha̧ Sɔ̧, ɓɛɛ Sɔ̧ zɔk a̧ hee wi-de-mɔ nɛ̀ yuwar-a ga wen zu mɔ‘i.»

⁷Ɛ̀nɛ̀ zíí nɛ̀ sa̧a̧-a̧, o mgbák bezaŋ Abraham nɛ́ o wi nɛ̀ kɔ̧ɔ̧ ɗɔaa.

⁸Wen wen ko Sɔ̧ tɔ̧ɔ̧ so de mbe wen ha̧ Abraham'e: «Sɔ̧ tɛ́ tok de yoŋgo zu o tugun bíí lɛŋ wen zu mɛ́.» Mɔ‘i usa'e Sɔ̧ tɛ́ de ha̧ o gɔni-dùk mɛ́ ya o wi-de-mɔ nɛ̀ yuwar-a wen zu kɔ̧ɔ̧ɗɔɔwen kɔ-wa.

⁹Mɛ̀ nɛ́ hegɔ, o wi nɛ̀ kɔ̧ ɗɔaa kpa nɛ́ toka-de-yoŋgo in Abraham wi-kɔ̧-ɗɔaa.

¹⁰O wi nɛ̀ kasi heembea lɛŋ ya ɗɔɔ fom, wen Yɔramɔ tɔ̧ɔ̧ so'e: «Fom a̧ bá kóó o ndé nɛ̀ kasi mɔ lɛŋ nɛ̀ yɔra zaŋ kalata heembea nɛ̀ dama-a na.»

¹¹O ndé iŋa nɛ̀ de-a'e, bíí beka duk wi-de-mɔ nɛ̀ yuwar-a ti Sɔ̧ wen zu heembea na, wen «wi-de-mɔ nɛ̀ yuwar-a tɛ́ duk kpasa wen zu kɔ̧ɔ̧ɗɔɔwen.»

¹²Heembea bó nɛ́ kpɔk mɔ in kɔ̧ɔ̧ɗɔɔwen na; nɛ̀ war ko heembea, nɛ́ «wi nɛ̀ tɛ́ kasi o mɔ nɛ̀ a̧a̧ sɛnɛ nɛ̀ dama-a lɛŋ a̧ tɛ́ duk kpasa.»

¹³Krist gɔna zu yɛ mɛ́ gbo yɛ ɗɔɔ fom ko heembea; wen a̧ nɛ̀ tɛ-a kifa duk nɛ́ mɔɔ-fom wen zu yɛ, wen Yɔramɔ tɔ̧a̧‘e: «Fom a̧ bá kóó o ndé nɛ̀ wa ga̧i̧a̧ tɛ te.»

¹⁴Mɔ‘i dee hegɔ wen ha̧ o gɔni-dùk mɛ́ kpa toka-de-yoŋgo ko Abraham nɛ̀ ɗoŋ Jesu Krist; hegɔ, ɛ́ɛ́ tɛ́ kpa Sa̧a̧ Ɔmi nɛ̀ Sɔ̧ baa ha̧ so nú wen-aa h’ɛ́ɛ́ wen zu kɔ̧ɔ̧ɗɔɔwen.

¹⁵O nya'm, ɛ̀ɛ̀ zɔ́k yuwar deemɔ ko bíí: kà ha̧a̧nú ko wan-fio nɛ́ duka nɛ̀ yuwar-a, ŋma bíí beka e ha̧a̧nú‘i duk na, kóó ee mbe mɔ zu-a na mbɛt.

¹⁶Ɓɛɛ Sɔ̧ ha̧a̧ nú ha̧ Abraham in ha̧ bezaŋ-aa; bó nɛ́ Yɔramɔ tɔ̧a̧‘e «in ha̧ o bezaŋ-aa» hee wa ɔ dɔka ga na, ɓɛɛ nɛ́ ha̧ bezaŋ-aa kpɔk ɓɛɛ. Yɔramɔ tɔ̧a̧: «in ha̧ bezaŋ-mɛ»; mɔ‘i usi nɛ́ Krist.

¹⁷Taamɔ kɔ‘m nɛ́ mɔ'ɔ: ŋma nɔɔ-tɔk nɛ̀ duk nɛ̀ yuwar-a, a̧a̧ sɛnɛ nɛ̀ Sɔ̧ nɔɔ nɛti; dee pɛ gɔmŋmaa-naar-nɛ-ɓu-taar kaɗi sɛka heembea biti hɔ nɛ̀ ɗoŋ, ɓɛɛ heembea beka ɗaŋ nɔɔ-tɔk'i, e nɛ̀ ha̧a̧nú tɛ geemɔ na.

¹⁸Wen kà bó nɛ́ heembea a̧ de ha̧ bíí mɛ́ kpa mɔɔ-oi, ɓɛɛ bó nɛ́ wi tɛ́ kpa mɔɔ-oi wen zu ha̧a̧nú ɓɔna. Ɓɛɛ mɛ̀ nɛ́ wen zu ha̧a̧nú a̧ Sɔ̧ dee nɛ mɔ nɛ ta-tɛ ha̧ Abraham.

¹⁹Ɓɛɛ heembea tɛ̀ɛ́ kɔ‘i wen ge? Heembea tɛ̀ɛ́ kɔ‘i nɛ̀ ɗoŋ mɛ́ usi ɗaŋmɔ, pɛm nɛ̀ tɛa-a ko bezaŋ nɛ̀ Sɔ̧ ha̧a̧ so nú wen-aa'i; mɛ̀ nɛ́ o betom mɛ yiwese a̧ ha̧a̧ heembea ha̧ ŋma wi-ɗafi-mgbara-bíí, ɓɛɛ a̧ nɛɛ tɔ̧.

²⁰Ɓɛɛ wi-ɗafi-mgbara-bíí ɗafi mgbara mɔ wen bíí kpɔk ɓɛɛ na; Sɔ̧ nɛ́ kpɔk ɓɛɛ.

²¹Mɛ̀ nɛ́ wen nɛ̀ tɔ̧, heembea kɔ̧ɔ̧ mɛ́ fo ha̧a̧nú ko Sɔ̧ yinɛ nde? Bó hegɔ na! Wen kà Sɔ̧ há̧ so ŋma heembea nɛ̀ a̧a̧ nɛ̀ ŋgai mɛ́ de ha̧ bíí mɛ́ duk kpasa wó, ɓɛɛ wi tɛ̀ɛ́ duk wi-de-mɔ nɛ̀ yuwar-a wen zu heembea.

²²Ɓɛɛ Yɔramɔ ee mɔ lɛŋ ha̧ mɛ́ duk nɛ́ bara ko ɗaŋmɔ, wen ha̧ ha̧a̧nú mɛ́ hɔ gba̧a̧ ha̧ o bíí nɛ̀ kɔ̧ɔ̧ ɗɔaa ha̧ Jesu Krist nɛ̀ ɗoŋ kɔ̧ɔ̧ɗɔɔwen kɔ-wa.

²³Nɛti ha̧ kɔ̧ɔ̧ɗɔɔwen mɛ́ hɔ, ɛ́ɛ́ duka so ɗɔɔ heembea hee o bara ga, pɛm nɛ̀ ŋgimbi hɔa-a'i.

²⁴Hegɔ, heembea duka nɛ́ wi-duk-zu yɛ, pɛm nɛ̀ Krist wen h’ɛ́ɛ́ mɛ́ duk nɛ́ wi-de-mɔ nɛ̀ yuwar-a nɛ̀ ɗoŋ kɔ̧ɔ̧ɗɔɔwen.

²⁵Ɓɛɛ hee mɔ'ɔ nɛ̀ kɔ̧ɔ̧ɗɔɔwen hɔɔ kaɗi ga, ɛ́ɛ́ bo ɗɔɔ ŋgai ko wi-duk-zu yɛ‘i ɓɔna.

²⁶Mɛ̀ nɛ́ wen zu kɔ̧ɔ̧ɗɔɔwen a̧ ɛ́nɛ́ lɛŋ nɛ́ o bem ko Sɔ̧ nɛ̀ ɗoŋ Jesu Krist.

²⁷Ɛ́nɛ́ lɛŋ nɛ̀ wa zuia nɛ̀ nin Krist, ɛ́nɛ́ pi̧i̧ Krist tɛ‘nɛ́ hee laa ga.

²⁸Kɛ̧ɛ̧ mgbara be Juif in be Grɛk bó ɓɔna; kɛ̧ɛ̧ mgbara géé bíí in bara bó na, kɛ̧ɛ̧ mgbara okoo in wiwii bó na; wen ɛ́nɛ́ lɛŋ dúk nɛ́ kpɔk nɛ̀ ɗoŋ Jesu Krist.

²⁹Ɓɛɛ k’ɛ̀nɛ̀ nɛ́ bòó nɛ́ o bíí ko Krist, mɛ̀ nɛ́ wen nɛ̀ tɔ̧‘e, ɛ́nɛ́ nɛ́ o bezaŋ Abraham, ɓɛɛ ɛ́nɛ́ nɛ́ o be-kpa-mɔɔ-oi nyɛm nɛ̀ ɗoŋ ha̧a̧nú.