Read Northwest Gbaya GALATII 4 Bible Online

GALATII 4 - Northwest Gbaya bible

GALATII 4

¹Taamɔ kɔ‘m nɛ́ mɔ'ɔ: ŋgimbi nɛ̀ wi nɛ̀ tɛ́ kai mɔɔ-oi biti nɛ̀ obem, a̧ yak ŋmaa in bara na; ɓɛɛ wí nɛ̀ tɛ́ ɔ wan zu mɔ lɛŋ nɛ́ a̧ nɛ̀ mbetɛ.

²Bem’ɛi duk ɗɔɔ ŋgai ko o wi-dai-a in o wi-pɛm-mɔɔ-oi hɔ ŋgimbi nɛ̀ dáà kɔ̧-a̧ gɔna so'i.

³Ɛ́ɛ́ mbɛt, ŋgimbi n’ɛ̀ɛ̀ duka so nɛ̀ bem, ɛ́ɛ́ mbó kànà nɛ̀ zu ha̧ o mɔɔ-zaŋnu’ɛ, ɓɛɛ ɛ́ɛ́ duka só nɛ́ bara.

⁴Nɛ̀ ŋgimbi nyɛma kaɗi, Sɔ̧ toma Bem kɔ‘i tɛnɛ; nɛ́ ŋma okoo a̧ koo a̧, ɓɛɛ a̧ duk ɗɔɔ heembea,

⁵wen ha̧ a̧ mɛ́ gɔn zu o wi-ya-ɗɔɔ heembea, ba nɛ̀ ɛ́ɛ́ e nɛ̀ o bem ko Sɔ̧.

⁶Ɛ́nɛ́ nɛ́ mgbák o bem ko Sɔ̧ wen a̧ toma Sa̧a̧ Ɔmi ko Bem kɔ̧-a̧ e kɔ̧ see yɛ, ɓɛɛ nɛ́ Sa̧a̧ Ɔmi'i a̧ tɔ̧: «Aba,» gba̧a̧ wen'i'e, Dáà!

⁷Hegɔ mɛ́ bó nɛ́ bara ɓɔna, ɓɛɛ mɛ́ nɛ́ bem, be-kpa-mɔɔ-oi nɛ́ mɛ́. Mɔ‘i nɛ́ tom ko Sɔ̧.

⁸Nɛti ŋgimbi n’ɛnɛ tɛ́ iŋ Sɔ̧ hɔ̧ɔ̧ na, ɛ́nɛ́ gasa so o ŋma sɔ̧ nɛ̀ bó nɛ́ kpasa sɔ̧ na;

⁹ɓɛɛ kinii, ɛ́nɛ́ iŋa Sɔ̧, kóó wi tɛ tɔ̧, a̧ iŋa'nɛ́, ɓɛɛ s’ɛ́nɛ́ kɔ̧ɔ̧ mɛ́ si ɗoŋ tɛ ŋma geemɔ nɛ̀ bó nɛ̀ ŋgai na, h’ɛ́nɛ́ mɛ́ kifi bara woyo, wen ge?

¹⁰Ɛ́nɛ́ ɓɔna k’ɛ́nɛ́ tɛ kasa heembea gbaŋa zu o wese nɛtɛ nɛtɛ, o fio-zɛ, o ŋgimbi-bɛɛ, ɓar ká bá nɛ̀ o pɛ!

¹¹Deemɔ k’ɛ́nɛ́ pi̧ nɛ́ kíì tɛ‘m, wen ká tom n'am dee so mgbara'nɛ́ kifi geemɔ.

¹²O nya'm, mi ai nú h’ɛ́nɛ́, deemɔ k’ɛ́nɛ́ a̧ duk hee kɔ‘m ga, wen mi kifa duk hee ɛ́nɛ́ ga. Ɛ́nɛ́ dé ŋma ɗaŋmɔ in am na.

¹³Ɛ́nɛ́ iŋa nɛ̀ de-a'e, kuti-a n'am tɔ̧ɔ̧ so nɛ̀ De Mbe Wen h’ɛ́nɛ́, duka nɛ́ ŋgimbi n'am ɔɔ so nɛ̀ zɛɛ.

¹⁴Ɓɛɛ nɛ̀ oi zɛɛ nɛ̀ a̧a̧ so tɛ‘m'i, nyɛr de'nɛ́, k’ɛ̀nɛ̀ yu nɛ̀‘m na mbɛt. Ɓɛɛ ɛ́nɛ́ kpɛka'm hee betom ko Sɔ̧, kóó hee Krist Jesu ga.

¹⁵Desee k’ɛ́nɛ́ so’ɛ a̧a̧ déè kinii ge? Wen sedaako kɔ‘m zu'nɛ́ nɛ́ mɔ'ɔ: kà yuwar a̧ bó só, ɛ́nɛ́ tɛ̀ɛ́ ba gbaayí‘nɛ́ e tɛ kɔ‘m.

¹⁶Mɔ'ɔ, mi kifa wisɛn k’ɛ́nɛ́ tɛ tɔ̧ɔ̧ kpasawen n'am tɔ̧ h’ɛ́nɛ́‘i nde?

¹⁷Gbama-a nɛ̀ wa gbam in'nɛ̀ɛ́‘i de na; wa kɔ̧ɔ̧ mɛ́ ɗaŋ mgbara'm in'nɛ̀ɛ́, wen ha̧ see'nɛ́ lɛŋ mɛ́ ɓɔn tɛ wa.

¹⁸Nɛ́ demɔ ha̧ see-wi mɛ́ ɓɔn tɛ́ ŋmaa tɛ́ ŋgimbi lɛŋ zu mɔ nɛ̀ ɔ dee, ɓɛɛ bó nɛ́ tɛ́ ŋgimbi n'am a̧a̧ in'nɛ̀ɛ́ ɓɛɛ na.

¹⁹O bem kɔ‘m, taamɔ kɔ‘m wen zu'nɛ́ woyo pi̧ nɛ́ nyimmɔ tɛ‘m hee ko nàá-zaŋ ŋgimbi nyima-zaŋ-ko-bem ga, hɔ ŋgimbi nɛ̀ Krist tɛ́ ye tɛ‘nɛ́ nɛ̀ mbetɛ.

²⁰Mi kɔ̧ɔ̧ so nyɛmna mɛ́ duk ká̧ tɛ‘nɛ́ tɛ́ ŋgimbi’ɛ ha̧‘m mɛ́ tɔ̧ wen nɛ̀ tɛ́ nyɛm'nɛ́, wen kíì de'm dee wen'nɛ́.

²¹O wi nɛ̀ kɔ̧ɔ̧ kɔ‘i mɛ́ duk ɗɔɔ heembea a̧ kifi nú ha̧‘m: ɛ́nɛ́ zii gba̧a̧ mɔ nɛ̀ heembea tɔ̧ na nde?

²²Wen Yɔramɔ tɔ̧a̧‘e, Abraham koo be-wiwii yiitoo; nàá ko ŋma ɓii bem nɛ́ zɔŋa bara, ɓɛɛ nàá ko ɓii-aa bó nɛ́ bara na.

²³Zɔŋa bara koo kɔ‘i bem nɛ̀ war ko mur-tɛ; ɓɛɛ zɔŋa nɛ̀ bó nɛ́ bara na'i koo kɔ‘i bem zu ha̧a̧nú ko Sɔ̧.

²⁴Wen'i nɛ́ lizaŋ: okoo nɔ‘i yiitoo nɛ́ yuwar nɔɔ-tɔk yiitoo; kuti-a nɛ́ Agar nɛ̀ usi nɛ́ nɔɔ-tɔk wan mɛ́ zu kaya Sinai, nɛ̀ ko nɛ́ be bara.

²⁵Kaya Sinai a̧a̧ sɛn nú Arabii. Ɓɛɛ Agar nyɛma ŋmaa in Jerusalɛm kinii nɛ̀ dúk nɛ́ bara in o bem kɔ‘i’ɛ.

²⁶Ɓɛɛ Jerusalɛm wan mɛ́ ŋgɔn bó nɛ́ bara na, a̧ nɛ́ nàá k’ɛ́ɛ́.

²⁷Wen Yɔramɔ tɔ̧ɔ̧ so'e ndé: «Mɛ́ ko-yar-ndɔra, nɛ̀ ko so bem na’ɛ, mɛ̀ dúk nɛ̀ gasa desee nyɛmna, mɛ́ nɛ̀ iŋ nyima-zaŋ-ko-bem na’ɛ, mɛ̀ dé nyɛŋɛ hiɗi nɛ̀ mɔ, wen o bem ko okoo nɛ̀ wíì ee duk'i dɔka gan ko wan-wíì.»

²⁸Ɓɛɛ nɛ̀ k’ɛ́nɛ́, o nya'm, ɛ́nɛ́ nɛ́ o be ha̧a̧nú hee Izak ga.

²⁹Nɛ́ bem nɛ̀ wa koo so nɛ̀ war ko mur-tɛ a̧ usa so bɔnɛ ha̧ bem nɛ̀ wa koo zu ŋgai ko Sa̧a̧ Ɔmi; ɓɛɛ nɛ́ kpɔk mɔ‘i a̧ de sɔsɔɔ'ɛ mbɛt.

³⁰Yɔramɔ tɔ̧ɔ̧ so hee ge? «Mɛ̀ ndák zɔŋa bara in bem kɔ‘i mbɛt yinɛ, ká bem kɔ̧-a̧ tɛ́ɛ̀ kpa mɔɔ-oi in bem ko okoo nɛ̀ bó nɛ́ bara na.»

³¹Hegɔ mbɛt, o nya'm, ɛ́ɛ́ bó nɛ́ o bem ko zɔŋa bara ɓɔna, ɓɛɛ ɛ́ɛ́ nɛ́ o bem ko zɔŋa nɛ̀ bó nɛ́ bara na.