Read Northwest Gbaya GALATII 6 Bible Online

GALATII 6 - Northwest Gbaya bible

GALATII 6

¹O nya'm, k’ɛ̀nɛ̀ nɛ́ kpaa ŋma bíí tɛ̀ dee ɗaŋmɔ, ɓɛɛ k’ɛ́nɛ́ nɛ̀ Sa̧a̧ Ɔmi a̧a̧ tɛ‘nɛ́'ɛ, ɛ̀nɛ̀ mgbɔ́ a̧ pii ɗoŋ nɛ̀ mɔka-see; mɛ̀ bá zu-mɛ ká mɔ tɛɛ we mɛ́ mbɛt.

²Ɛ̀nɛ̀ tui tui ko ŋmaa in o ŋmaa ha̧ heembea ko Krist mɛ́ hɔ gba̧a̧.

³Kà ŋma bíí tá‘e wi nɛ́ kpasa bíí, ɓɛɛ kà a̧ dé ŋma kpasamɔ na, a̧ ɔr nɛ́ tɛ-a.

⁴Kóó o ndé a̧ zɔ́k nɛ́ yuwar duka-a kɔ‘i, ɓɛɛ kà a̧ nɛ́ zɔka'e a̧ nyɛma mɛ́ ŋmaŋ tɛ̀ zu tom'i wó, ɓɛɛ a̧ a̧ ŋmáŋ tɛ-a nɛ̀ tɛ-a, ɓɛɛ ká a̧ we zu-a nɛ̀ ŋma bíí na.

⁵Wen nɛ́ bíí kpɔk kpɔk a̧ tɛ́ tui tui kɔ‘i nɛ̀ tɛ-wi.

⁶Wi nɛ̀ wa usi wen ko Sɔ̧ ha̧ a̧, a̧ há̧ ŋma war mbɔi kɔ‘i ha̧ wi-usa-a.

⁷K’ɛ́nɛ́ ɔr tɛ‘nɛ́ na, wen ŋma bíí nɛ̀ tɛ́ ɔr Sɔ̧ bó na; wen nɛ́ mɔ nɛ‘i gun a'i mɔi̧.

⁸Wi nɛ̀ gun mɔ wen mur-tɛ tɛ́ mɔi̧ nɛ́ mɔ ko mur-tɛ nɛ̀ duk nɛ́ fio; wi nɛ̀ gun mɔ wen Sa̧a̧ Ɔmi tɛ́ mɔi̧ nɛ́ mɔ ko Sa̧a̧ Ɔmi; nɛ́ mɔ nɛ̀ tɔ̧, a̧ tɛ kpa duka-kpasa ɓɔnsɛnɛ kpoo nɛ kpoo.

⁹Ká tɛ-ɛɛ mbɔ́í tɛ dee demɔ na; wen k’ɛ̀ɛ̀ nɛ́ ee dea-a duk na, ɛ́ɛ́ tɛ́ mɔi̧ nyɔnɔ-a tɛ́ ŋgimbi-a.

¹⁰Ɓɔnsɛnɛ k’ɛ̀ɛ̀ nɛ́ bòó nɛ̀ yuwar, n’ɛ̀ɛ̀ dé demɔ ha̧ o bíí lɛŋ, gana gan, ha̧ o nya yɛ tɛ kɔ̧ɔ̧ɗɔɔwen.

¹¹Ɛ̀nɛ̀ zɔ́k gba gasa yɔramɔ'ɛ: nɛ́ mi'i yɔra nɛ̀ er-am h’ɛ́nɛ́.

¹²Nɛ́ o wi nɛ̀ kɔ̧ɔ̧ ha̧ o bíí mɛ́ zɔn wa nɛ̀ war ko mur-tɛ a̧ de ŋmaa in'nɛ̀ɛ́ mɛ́ gɔn bɔr, wen ká wa tɛ́ɛ̀ zɔk bɔnɛ wen zu te-diŋa ko Krist.

¹³Ɓɛɛ o wi nɔ‘i nɛ̀ gɔn bɔr'i kasi heembea na mbɛt; wa kɔ̧ɔ̧ h’ɛ́nɛ́ mɛ́ gɔn bɔr, gbak na, wa zɔna tɛ-wa zu'nɛ́.

¹⁴War kɔ‘m, ŋma mɔ n'am tɛ́ zɔn tɛ‘m wen zu-a yak zu te-diŋa ko Gasa Wan k’ɛ́ɛ́ Jesu Krist bo na, wen nɛ́ te-diŋa'i a̧ dee ha̧ mɔɔ-zaŋnu mɛ́ fe yí‘m in ha̧‘m mɛ́ duk nɛ́ fio tɛ́ mɔɔ-zaŋnu mbɛt.

¹⁵Kóó wi gɔna bɔr, koo wi gɔn na mbɛt, mɔ‘i bó kɔ‘i nɛ́ ŋma gasamɔ na; gasamɔ nɛ́ duka mbe bíí ɛ̧́.

¹⁶Ɓɛɛ o bíí lɛŋ nɛ̀ ba yuwar’ɛ tɛ duka-a kɔ-wa, kóó nɛ́ Israɛl dukbíí ko Sɔ̧ mbɛt, a̧ kpá ga̧a̧mɔ in deako.

¹⁷Jesu gɔna dap kɔ‘i tɛ‘m kaɗi, ɓɛɛ ká ŋma bíí sákálá‘m woyo ɓɔna.

¹⁸O nya'm, deemɔ nɛ̀ ta-tɛ ko Gasa Wan k’ɛ́ɛ́ Jesu Krist a̧ dúk in'nɛ̀ɛ́! Aamɛn.