Read Northwest Gbaya EFƐZIƐN 2 Bible Online

EFƐZIƐN 2 - Northwest Gbaya bible

EFƐZIƐN 2

¹Ɛ́nɛ́ fee so nɛti wen zu yɔɔ-kaya in ɗaŋmɔ k’ɛ́nɛ́

²n’ɛnɛ duka so mɛ́ de nɛti ŋgimbi n’ɛnɛ ndaka so nɛ̀ ɗoŋ sɔ̧-zaŋnu’ɛ. Nɛ́ a̧ a̧ ɔ wan nɛ̀ ŋgɔn mgbara yiwese in nù, a̧ nɛ́ ɔmi nɛ̀ de tom tɛ o wi-ŋgazu kinii’ɛ.

³Ɛ́ɛ́ mbɛt, ɛ́ɛ́ lɛŋ yaa so mgbara o wi nɔ‘i de nɛ̀ mɔ nɛ̀ kiitɛ yɛ kɔ̧a̧. Ɛ́ɛ́ ha̧a̧ so tɛ-ɛɛ wen dee mɔ nɛ̀ mur-tɛ de wɔ-a, de nɛ̀ mɔ n'aa kɔ̧a̧, ndak nɛ̀ ɗoŋ mɔ n'aa ir yɛ mɛ́ de. Wen hegɔ, tɛ duka-a k’ɛ́ɛ́, ɛ́ɛ́ nyɛma so kànà ha̧ nyimsea ko Sɔ̧ mɛ́ kur zu yɛ, hee o ŋma bíí ga mbɛt.

⁴Ɓɛɛ Sɔ̧ nɛ́ gasa wan-de-ko sɛn tɛ gasa kɔ̧ɔ̧mɔ n'aa kɔ̧ɔ̧ nɛ ɛ́ɛ́;

⁵wen ŋgimbi n’ɛɛ yaa só nɛ́ fio wen yɔɔ-kaya k’ɛ́ɛ́, a̧ dee h’ɛ́ɛ́ mɛ́ duk kpasa in Krist; nɛ́ zu deemɔ nɛ̀ ta-tɛ kɔ̧-a̧ h’ɛ́nɛ́ a̧ a̧ kpasa nɛ̀ ɛ́nɛ́.

⁶Tɛ duka-a k’ɛ́ɛ́ kpɔk in Jesu Krist, Sɔ̧ dee h’ɛ́ɛ́ mɛ́ kur ŋgɔn in a̧, ɓɛɛ de h’ɛ́ɛ́ mɛ́ ɔ wan in a̧ yiwese mɛ.

⁷Tɛ dee demɔ n'aa dee h’ɛ́ɛ́ nɛ̀ ɗoŋ Jesu Krist, a̧ kɔ̧ɔ̧ so mɛ́ usi gasa deemɔ nɛ̀ ta-tɛ kɔ̧-a̧, nɛ̀‘i nyɛm mɛ́ we nɛ̀ ŋma mɔ na, tɛ o pɛ wan mɛ́ siti.

⁸Wen nɛ́ deemɔ nɛ̀ ta-tɛ ko Sɔ̧ a̧ kpasa'nɛ́ zu kɔ̧ɔ̧ɗɔɔwen. Ŋma mɔ n’ɛnɛ dee sɛnɛ bo na, nɛ́ ha̧a̧mɔ ko Sɔ̧.

⁹Bó nɛ́ zu ŋma deemɔ na, wen ká bíí tɛɛ ŋmaŋ tɛ sɛnɛ.

¹⁰Nɛ́ a̧ á̧ dee yɛ; a̧ dee yɛ tɛ duka-a k’ɛ́ɛ́ in Jesu Krist wen h’ɛ́ɛ́ mɛ́ ha̧ tɛ yɛ tɛ dee o de tom nɛ̀ Sɔ̧ ɗafa so nɛti e h’ɛ́ɛ́.

¹¹Tɛ‘nɛ́'ɛ mbáŋ ɗoŋ duka-a k’ɛ́nɛ́ so ɓeemɛ, ŋgimbi n’ɛnɛ yaa so nɛ́ o gɔni-dùk. Nɛ́ mur-tɛ‘nɛ́ a̧ usa so'e ndé, ɛ́nɛ́ nɛ́ wi-iŋ-kpasa Sɔ̧ na. Nɛ́ mɔ‘i sa o wi nɛ̀ gɔna bɔr duk so sa'nɛ́‘e, o wi-mbii wen wa gɔna so kɔ-wa nɛ́ be mɔ tɛ mur-tɛ-wa pi̧ nù.

¹²Tɛ‘nɛ́'ɛ mbáŋ ɗoŋ-aa'e, ŋgimbi'i ɛ́nɛ́ duka so nyɛi̧ nɛ̀ Krist, ɛ́nɛ́ so nɛ́ gɛnɛ nɛ̀ bo zaŋ o be Israɛl na, ɛ́nɛ́ bó só zaŋ nɔɔ-tɔk war wan mɛ́ ha̧a̧nú na mbɛt. Ɛ́nɛ́ yaa so zaŋnu’ɛ, ŋma mɔɔ-e-nɛ-ta bo na, ɛ́nɛ́ bó nɛ̀ Sɔ̧ na mbɛt.

¹³Ɓɛɛ kinii tɛ duka-a k’ɛ́nɛ́ in Jesu Krist, ɛ́nɛ́ n’ɛnɛ yaa so nɛ̀ nyɛi̧a-a nɛ̀ Sɔ̧, tɔk tɛ Krist dee h’ɛ́nɛ́ mɛ́ ɗɔŋ pii katɛ a̧.

¹⁴Nɛ́ Krist a̧ duk nɛ́ ga̧a̧mɔ k’ɛ́ɛ́. Nɛ́ a̧ a̧ dee ha̧ mɔ nɛ̀ kɛ̧ɛ̧ so yiitoo mɛ́ duk kpɔk; a̧ ha̧a̧ kiitɛ-a gbin nɛ̀ ŋgeŋ-sɛnmɔ yinɛ.

¹⁵A̧ yaia heembea in o geŋa ká bá nɛ̀ o yuwar-kasa-a lɛŋ yinɛ, wen a̧ kɔ̧ɔ̧ so mɛ́ de ha̧ o Juif in o gɔni-dùk mɛ́ duk nɛ́ mbe bíí kpɔk sɛn tɛ-a.

¹⁶Hegɔ, tɛ fea-a zu te-diŋa a̧ ee ga̧a̧mɔ mgbara wa, ha̧ dùk nɔ‘i yiitoo'i mɛ́ ya nɛ́ kpɔk kiitɛ, ɓɛɛ mɔ‘i ɗafi mgbara wa in Sɔ̧ mbɛt. Tɛ mɔ‘i a̧ gbɛɛ sɛnmɔ yinɛ.

¹⁷A̧ tɛ̀ɛ́ mɛ́ tɔ̧ nɛ́ wen ga̧a̧mɔ h’ɛ́nɛ́, o bíí nɛ̀ yaa so nɛ̀ nyɛi̧a-a in o wan nɛ̀ yaa so nyɛi̧ na mbɛt.

¹⁸Mɛ̀ nɛ́ wen zu a̧, a̧ ɛ́ɛ́ in'nɛ̀ɛ́ lɛŋ kpaa war nɛ̀ ɗoŋ Sa̧a̧ Ɔmi kpɔk mɛ́ nɛ̀ tɛ Dáà.

¹⁹Hegɔ, ɛ́nɛ́ bó nɛ́ o gɛnɛ in o wi nɛ̀ tɛɛ tɛɛ na mbɛt. Ɛ́nɛ́ in o sa̧a̧-bíí lɛŋ nɛ́ o be-nù. Ɛ́nɛ́ nɛ́ o pɛ́r-nam nutua ko Sɔ̧.

²⁰Ɛ́nɛ́ yee tɛ tua, wan nɛ̀ naŋ-a nɛ́ o betom ko Jesu in o wi-tɔ̧-wen oi nú Sɔ̧, ɓɛɛ ta-e-mgbii-aa nɛ́ Jesu Krist nɛ̀ tɛ-wi.

²¹Hegɔ mɔ nɛ̀ a̧a̧ tɛ tua'i lɛŋ yee ŋmaa ŋgai wen zu a̧, ɓɛɛ tua'i tɛ gasi duk nɛ́ sa̧a̧ tua ko Sɔ̧ nɛ̀ ɗoŋ Gasa Wan.

²²Ɓɛɛ ɛ́nɛ́ mbɛt tɛ̀ duka-a k’ɛ́nɛ́ in Jesu, ɛ́nɛ́ yee tɛ tua'i h’ɛ́nɛ́ mɛ́ kifi duk nɛ́ tua ko Sɔ̧ nɛ̀ ɗoŋ Sa̧a̧ Ɔmi.