Read Northwest Gbaya EFƐZIƐN 3 Bible Online

EFƐZIƐN 3 - Northwest Gbaya bible

EFƐZIƐN 3

¹Nɛ́ hegɔ, mi Paul nɛ̀ duk nɛ́ wi-zɔɓɔ ko Jesu Krist wen zu'nɛ́, o gɔni-dùk, kɔfi Sɔ̧ wen'nɛ́.

²Mi taa ɛ́nɛ́ zia nyɛrɛ deemɔ nɛ̀ ta-tɛ ko Sɔ̧ ha̧‘m wen'nɛ́, wen ha̧ mɔ n'aa ɗafa mɛ́ hɔ gba̧a̧.

³A̧ usa ɗukamɔ‘i ha̧‘m mɛ iŋ, ɓɛɛ nɛ́ mɔ‘i a̧‘m wee so be ɗoŋ-aa h’ɛ́nɛ́ nɛ̀ haya-a.

⁴K’ɛ̀nɛ̀ nɛ́ tɔra mɔ n'am yɔra, ɓɛɛ ɛ́nɛ́ tɛ́ zɔk mɔ n'am iŋa tɛ̀ ɗukamɔ ko Krist.

⁵Bó nɛ́ Sɔ̧ dee so ha̧ o bíí ɓeemɛ nɛti mɛ́ iŋ mgbara ɗukamɔ‘i na; nɛ́ kinii a̧ a̧ usa nɛ̀ mgbara-a ha̧ o sa̧a̧ betom ko Jesu in o wi-tɔ̧-wen oi nú Sɔ̧ nɛ̀ ɗoŋ Sa̧a̧ Ɔmi.

⁶Ɗukamɔ‘i nɛ́ mɔ'ɔ: Sɔ̧ kpɛka ha̧ o gɔni-dùk mɛ́ kpa kale kpɔk mɔɔ-oi in yɛɛ in ha̧ wa mɛ́ ya o dokoɗo-tɛ-wi tɛ kpɔk kiitɛ; wa a̧a̧ zaŋ kale kpɔk ha̧a̧nú‘i tɛ duka-a k’ɛ́ɛ́ in Jesu Krist nɛ̀ ɗoŋ De Mbe Wen mbɛt.

⁷Sɛn tɛ ŋgayamɔ in deemɔ nɛ̀ ta-tɛ ko Sɔ̧, a̧ dee ha̧‘m mɛ́ duk nɛ́ wi-usi De Mbe Wen kɔ̧-a̧.

⁸Mi nɛ́ mgbák sɔŋkur geɗek-wi mgbara o sa̧a̧-bíí lɛŋ; mɔ kpɔk, Sɔ̧ hu̧i̧a̧ war ha̧‘m mɛ́ we ɗoŋ zɔm demɔ ko Krist, nɛ̀ ɔ ɗuka nyɛmna ha̧ o gɔni-dùk,

⁹in ha̧‘m mɛ́ ba yuwar nɛ̀ Sɔ̧ de nɛnɛ ha̧ ɗukamɔ kɔ̧-a̧ mɛ́ hɔ gba̧a̧ e zan tɛ sa̧a̧mɔ. Nɛ́ Sɔ̧ nɛ̀ dee mɔ lɛŋ a̧ ee so mɔ‘i nɛ̀ hu̧sa̧-a̧ sɛn tɛ-a ɓeemɛ kpoo nɛ kpoo.

¹⁰Hegɔ‘i kinii yaknɛ, o wan in o ŋgai mɛ́ yiwese tɛ iŋ iŋa-mgbara-mɔ ko Sɔ̧ tɛ o yuwar-a nɛ̀ tɛ́ nɛ̀ ɗoŋ zuduk bíí ko Krist.

¹¹Mɔ nɛ̀ Sɔ̧ ee so zu-a mɛ́ de nɛ̀ ku̧u̧naŋ-a mɛ tɛnɛ, nɛ́ mɔ‘i a̧ a̧ dea tɛ Krist Jesu Gasa Wan k’ɛ́ɛ́.

¹²Tɛ duka-a k’ɛ́ɛ́ in a̧ in nɛ̀ ɗoŋ kɔ̧ɔ̧ ɗɔaa ha̧ a̧, ɛ́ɛ́ a̧a̧ nɛ̀ yuwar mɛ́ ɗɔŋ si katɛ Sɔ̧ nɛ̀ zɔm gasa ee-ta.

¹³Ɓɛɛ kinii, mi ai nú h’ɛ́nɛ́, ká tɛ‘nɛ́ gbin wen bɔnɛ n'am zɔk wen'nɛ́ na. O bɔnɛ nɔ‘i nɛ́ wen h’ɛ́nɛ́ mɛ́ kpa gasamɔ.

¹⁴Mɛ̀ nɛ́ wen mɔ‘i s'am gbɛ zugur-am nù ti Dáà,

¹⁵wan nɛ̀ o nutua mɛ́ zaŋnu in o wan mɛ́ yiwese lɛŋ baa nin-a.

¹⁶Nɛ̀ ɗoŋ zɔm gasamɔ kɔ̧-a̧ à̧ à̧ ha̧ ŋgayamɔ h’ɛ́nɛ́ tɛ Sa̧a̧ Ɔmi kɔ̧-a̧, wen ha̧ bíí wan mɛ́ tɛ‘nɛ́ nɛ̀ kɔ̧ a̧ mɛ́ kpa ŋgai,

¹⁷ɓɛɛ a̧ a̧ dé ha̧ Krist mɛ́ duk kɔ̧ see'nɛ́ nɛ̀ ɗoŋ kɔ̧ɔ̧ɗɔɔwen. Mi ak wen h’ɛ́nɛ́ mɛ́ duk zaŋ kɔ̧ɔ̧mɔ kɔ̧-a̧ nɛ̀ nɔa-a, in h’ɛ́nɛ́ mɛ́ yor mitak zaŋ kɔ̧ɔ̧mɔ‘i mbɛt.

¹⁸Hegɔ, ɛ́nɛ́ tɛ kpa ŋgai kpɔk in o sa̧a̧-bíí lɛŋ h’ɛ́nɛ́ mɛ́ iŋ‘e, gasa kɔ̧ɔ̧mɔ ko Krist, dura-a, kusa-a in ɗuka-a duk hee ge!

¹⁹Ɛ́nɛ́ tɛ́ iŋ kɔ̧ɔ̧mɔ ko Krist nɛ̀ gana iŋamɔ lɛŋ, wen h’ɛ́nɛ́ mɛ́ kpa mɔ nɛ̀ dɔka-a hɔ nɛnɛ tɛ́ mɔ nɛ̀ a̧a̧ tɛ́ Sɔ̧ nɛ̀ oi-aa lɛŋ.

²⁰Sɔ̧ nɛ̀ a̧a̧ nɛ̀ ŋgayamɔ lɛŋ nɛ̀ de tom tɛ yɛ nyɛma mɛ́ de mɔ gan mɔ n’ɛ́ɛ́ ak, kóó mɔ n’ɛ́ɛ́ ta mbɛt.

²¹Gasamɔ a̧ dúk nɛ́ kɔ̧-a̧ mgbara zuduk bíí ko Krist, in tɛ Jesu Krist hegɔ ɓɔnsɛnɛ kpoo nɛ kpoo! Aamɛn!