Read Northwest Gbaya EFƐZIƐN 6 Bible Online

EFƐZIƐN 6 - Northwest Gbaya bible

EFƐZIƐN 6

¹O obem, ɛ̀nɛ̀ mbó zu ha̧ dáà in nàà k’ɛ́nɛ́ wen Gasa Wan[1]; mɔ nɛ̀ duk nɛ̀ yuwar-a nɛ́ mɔ‘i.

²Mɛ̀ tú̧ tɛ dáà in nàà kɔ-mɛ; kuti heembea nɛ̀ a̧a̧ nɛ̀ ha̧a̧nú kɔ‘i nɛ́ mɔ‘i:

³wen ha̧ mɛ́ mɛ́ duk nɛ̀ de-a in ha̧ mɛ́ mɛ́ duk ɗoŋ-aa nyɛi̧ zu nù.

⁴O dáà in nàá-wan-bem, k’ɛ́nɛ́ tu̧ see o bem k’ɛ́nɛ́ na. Ɛ̀nɛ̀ dáí wa, usi nɛ̀ mɔ ha̧ wa, tɔ̧ nɛ̀ mbɔrɔ ko Gasa Wan ha̧ wa.

⁵O bara, ɛ̀nɛ̀ mbó zu ha̧ o dáa-bara k’ɛ́nɛ́ zu nù'ɛ, nɛ̀ kíì in naka-tɛ, nɛ̀ see'nɛ́ kpɔk hee ha̧ Krist ga;

⁶bó nɛ́ h’ɛ́nɛ́ mɛ́ de tɛ-wa wen nɛ̀ wa duk zu'nɛ́ na, ɓɛɛ hee o bara ko Krist nɛ̀ ha̧a̧ tɛ lɛŋ mɛ́ de mɔ nɛ̀ Sɔ̧ kɔ̧ɔ̧ ga.

⁷Ɛ̀nɛ̀ dé tom ha̧ wa nɛ̀ desee, hee ha̧ Gasa Wan ga, ɓɛɛ bó nɛ́ hee ha̧ bíí ga na.

⁸Ɛ́nɛ́ iŋa'e Gasa Wan tɛ́ ha̧ mɔɔ-oi-tom ha̧ bara in ha̧ géé bíí mbɛt nyɛm nɛ̀ ɗoŋ dee demɔ ko o ndé.

⁹Ɛ́nɛ́ o dáa-bara, ɛ̀nɛ̀ dé nɛ́ kpɔk mɔ‘i in o bara k’ɛ́nɛ́ mbɛt. K’ɛ́nɛ́ de ŋmaa in wa na, wen ɛ́nɛ́ iŋa ndé, Wan k’ɛ́nɛ́ in kɔ-wa a̧a̧ yiwese mɛ, ɓɛɛ sɛn ti a̧, kɛ̧ɛ̧-mgbara-bíí bó na.

¹⁰Sɔŋkur wen kɔ‘m nɛ́ mɔ'ɔ: ɛ̀nɛ̀ kpá ŋgai tɛ duka-a in Gasa Wan, in tɛ gasa ŋgayamɔ kɔ̧-a̧.

¹¹Ɛ̀nɛ̀ pí̧ laa-biro ko Sɔ̧ tɛ‘nɛ́ h’ɛ́nɛ́ mɛ́ yor nɛ̀ nɔa-a ti o mɔɔ-gɔn-ta ko Wan-ɗaŋmɔ.

¹²Wen biro k’ɛ́ɛ́ bó in bíí na, ɓɛɛ nɛ́ biro in o wan, o ŋgai, in o gasa wan-duk-zu nù nɛ̀ duk ti-tum’ɛ, in o ɗaŋ ɔmi wan mɛ́ yiwese.

¹³Hegɔ, ɛ̀nɛ̀ pí̧ laa-biro ko Sɔ̧ tɛ‘nɛ́; kà ɗaŋ wese bé tɛ̀ɛ́ hɔ, k’ɛ́nɛ́ yora nɛ̀ nɔa-a; ɓɛɛ ɗoŋ n’ɛ̀nɛ́ bìí biro kaɗi, ɛ́nɛ́ a̧ yor kànà mitak'i.

¹⁴Ɛ̀nɛ̀ dúk zu naŋ‘nɛ́, ɛ̀nɛ̀ hɛ́r zaŋ‘nɛ́ nɛ̀ kpasawen, ɓɛɛ ɛ̀nɛ̀ pí̧ deemɔ nɛ̀ yuwar-a nɛ̀ laa-biro-kpe-yi-ŋguɗi'nɛ́.

¹⁵Dee wɔ-tɔ̧ɔ̧ De Mbe Wen ga̧a̧mɔ a̧ dúk naŋ‘nɛ́ hee ndárà ga.

¹⁶Kɔ̧ɔ̧ɗɔɔwen a̧ dúk nɛ́ ŋgee nɛ̀ tɛ de h’ɛ́nɛ́ mɛ́ bi wèè nɛ̀ duk nú góò ko Wi-gɔn-ta.

¹⁷Ɛ̀nɛ̀ kpɛ́k yuwar kpasa-a nɛ̀ laasɔ̧i̧-biro, in gba-paa ko Sa̧a̧ Ɔmi, nɛ̀ duk nɛ́ Wen ko Sɔ̧.

¹⁸Sa̧a̧ Ɔmi a̧ dé h’ɛ́nɛ́ mɛ́ duk tɛ kɔfa-sɔ̧, ak nɛ̀ mɔ, ai nɛ̀ nú ha̧ a̧ tɛ mɔ lɛŋ; ɛ̀nɛ̀ dúk tɛ kɔfa-sɔ̧ wen o sa̧a̧-bíí, k’ɛ́nɛ́ mbɔi na,

¹⁹ɓɛɛ ɛ̀nɛ̀ kɔ́fí Sɔ̧ wen am mbɛt, wen ha̧ a̧ mɛ́ e wen kɔ̧ nú‘m, ha̧‘m mɛ́ tɔ̧ ɗukamɔ nɛ̀ a̧a̧ zaŋ De Mbe Wen ha̧ o bíí, kíì bó na.

²⁰Mi nɛ́ wi-we-ɗoŋ De Mbe Wen'i, ɓɛɛ nyak-zɔɓɔ hɛra'm pi̧ nù. Ɛ̀nɛ̀ kɔ́fí Sɔ̧ wen am, ha̧‘m mɛ́ tɔ̧ wen'i hee mɔ'ɔ nɛ nyɛma so ha̧‘m mɛ́ de ga, nɛ̀ kíì bó na.

²¹Mi kɔ̧ɔ̧ h’ɛ́nɛ́ mbɛt mɛ́ zii nyɛrɛ duka-a kɔ‘m in mɔ n'am de. Tikik, nya-ɛɛ n’ɛɛ kɔ̧ɔ̧ nyɛmna nɛ̀ duk nɛ́ kpasa wi-de-tom ko Gasa Wan, tɛ tɔ̧ nyɛrɛ mɔ kɔ‘m lɛŋ h’ɛ́nɛ́.

²²Nɛ́ mɔ‘i s'am tom a̧ nɛnɛ h’ɛ́nɛ́, ha̧ a̧ mɛ́ tɔ̧ nyɛrɛ mɔ kɔ‘m h’ɛ́nɛ́ in ha̧ a̧ mɛ́ ha̧ nɔɔ-ŋgiɗi h’ɛ́nɛ́.

²³Sɔ̧ Dáà in Gasa Wan Jesu Krist a̧ ha̧ ga̧a̧mɔ in kɔ̧ɔ̧mɔ ká bá nɛ̀ kɔ̧ɔ̧ɗɔɔwen ha̧ o nya-ɛɛ lɛŋ.

²⁴Deemɔ nɛ ta-tɛ ko Sɔ̧ a̧ duk in o bíí lɛŋ nɛ̀ kɔ̧ɔ̧ Gasa Wan k’ɛ́ɛ́ Jesu Krist nɛ̀ kɔ̧ɔ̧mɔ nɛ̀ beka kaɗi na.