Read Northwest Gbaya KOLOSIƐN 1 Bible Online

KOLOSIƐN 1 - Northwest Gbaya bible

KOLOSIƐN 1

¹Nɛ́ mi Paul, nɛ̀ duk nɛ́ betom ko Jesu Krist nyɛm nɛ̀ ɗoŋ mɔ nɛ̀ Sɔ̧ kɔ̧ɔ̧, in nya'm Timotee,

²a̧ tom kalata’ɛ ha̧ o sa̧a̧-bíí sɛn Kolos nɛ̀ ya nɛ́ o nya-ɛɛ nɛ̀ mbo zu ha̧ Krist. Deemɔ nɛ̀ ta-tɛ in ga̧a̧mɔ ko Sɔ̧ Dáà k’ɛ́ɛ́ a̧ dúk in'nɛ̀ɛ́.

³Tɛ̀ kɔfa-sɔ̧ k’ɛ́ɛ́ ɓɔnsɛnɛ, ɛ́ɛ́ de nɛ́ osoko ha̧ Sɔ̧, Dáà ko Gasa Wan k’ɛ́ɛ́ Jesu Krist, wen zu'nɛ́,

⁴wen ɛ́ɛ́ zia nyɛrɛ kɔ̧ɔ̧ɗɔɔwen k’ɛ́nɛ́ tɛ Jesu Krist in kɔ̧ɔ̧mɔ n’ɛnɛ usi ha̧ o sa̧a̧-bíí lɛŋ.

⁵Ɛ́nɛ́ de mɔ‘i wen zu mɔ n’ɛnɛ e nɛ̀ ta, nɛ̀ pɛm'nɛ́ yiwese mɛ, wen wa tɔ̧ɔ̧ so nyɛrɛ-a h’ɛ́nɛ́ zaŋ De Mbe Wen nɛ̀ duk nɛ́ kpasawen.

⁶De Mbe Wen'i hɔɔ tɛ‘nɛ́; hee mɔ'ɔ n'aa wai wai gasi nɛnɛ dam zaŋnu lɛŋ ga, nɛ́ kpɔk mɔ‘i a̧ dee mgbara'nɛ́ ku̧u̧naŋ-a n’ɛnɛ kpaa nɛ̀ deemɔ nɛ̀ ta-tɛ ko Sɔ̧ ɓɛɛ ɛ́nɛ́ iŋ mɔ nɛ a̧a̧ sɛnɛ nɛ̀ de-a,

⁷nyɛm nɛ̀ ɗoŋ usamɔ nɛ̀ Epafras usa h’ɛ́nɛ́. A̧ nɛ́ sɛm in gbama wi-de-tom k’ɛ́ɛ́ nɛ̀ gbak nɛ́ ɛ́ɛ́ nɛ̀ de-a in nɛ̀ duk nɛ́ wi-de-tom ko Krist.

⁸Nɛ́ à̧ á̧ tɔ̧ɔ̧ nyɛrɛ tom kɔ̧ɔ̧mɔ nɛ̀ Sa̧a̧ Ɔmi de tɛ‘nɛ́‘i h’ɛ́ɛ́.

⁹Wen hegɔ war k’ɛ́ɛ́, ɛ́ɛ́ kaɗi kɔfa-sɔ̧ wen ɛ́nɛ́ ŋgimbi n’ɛ̀ɛ̀ zia nɛ̀ wen k’ɛ́nɛ́ na. Ɛ́ɛ́ ak ha̧ Sɔ̧ mɛ́ ha̧ iŋamɔ zu mɔ n'aa kɔ̧a̧ in iŋa-mgbara-mɔ lɛŋ ká bá nɛ̀ kia-mɔ nɛ̀ Sa̧a̧ Ɔmi tɛ́ ha̧ h’ɛ́nɛ́.

¹⁰Hegɔ, duka-a k’ɛ́nɛ́ tɛ́ tu̧ tɛ Gasa Wan, ɓɛɛ ɛ́nɛ́ tɛ́ de mɔ nɛ̀ tɛ́ de tɛ́ a̧ ɓɔnsɛnɛ, wen ha̧ tom k’ɛ́nɛ́ mɛ́ duk nɛ́ demo tɛ yuwar deemɔ lɛŋ, wen h’ɛ́nɛ́ mɛ́ gasi siti tɛ iŋa Sɔ̧.

¹¹Ɛ́nɛ́ tɛ́ kpa ŋgai tɛ́ mɔ lɛŋ nɛ̀ ŋgayamɔ kɔ̧-a̧ nɛ̀ ɔ gasa tɛ́ ha̧ h’ɛ́nɛ́; hegɔ, ɛ́nɛ́ nyɛma mɛ́ yor nɛ̀ nɔa-a, nɔ nɛ̀ ŋgiɗi tɛ weamɔ lɛŋ.

¹²Ɛ̀nɛ̀ dé osoko nɛ̀ desee ha̧ Dáà, Wan nɛ̀ dee h’ɛ́nɛ́ mɛ́ kpa mɔɔ-oi in o sa̧a̧-bíí nɛ̀ ya tɛ sa̧a̧mɔ;

¹³wen a̧ ɓara ɛ́ɛ́ ɗɔɔ ŋgai ko tum yinɛ, ɓɛɛ ba ɛ́ɛ́ e zaŋ wan ko Bem n'aa kɔ̧ɔ̧ nyɛmna;

¹⁴hegɔ ɛ́ɛ́ kpaa gboa-a: mɛ̀ nɛ́ ea-ɗaŋmɔ nɛ̀ sɛn tɛ a̧.

¹⁵A̧ nɛ́ gi̧ɔ̧ tɛ Sɔ̧ nɛ̀‘i zɔk na. Mgbara mɔ nɛ̀ Sɔ̧ dee lɛŋ, kaya-wi nɛ́ a̧.

¹⁶Wen mɔ lɛŋ dee nɛ̀ tɛ a̧, o mɔ mɛ́ yiwese mɛ in o wan mɛ́ zaŋnu’ɛ, o mɔ nɛ̀‘i zɔk in o wan nɛ̀‘i zɔk na mbɛt. O ɔmi nɛ̀ a̧a̧ nɛ̀ ŋgai, nɛ̀ ɔ wan, nɛ̀ ɔ dita in nɛ̀ mɔ zíí nɛ̀ wa, Sɔ̧ dee mɔɔ nɔ‘i lɛŋ nɛ̀ ɗoŋ Krist wen Krist.

¹⁷A̧ duka so kɔ̧-a̧ nɛti ha̧ o mɔɔ nɔ‘i lɛŋ, ɓɛɛ o mɔɔ nɔ‘i lɛŋ duk tɛ́ ŋgai kɔ̧-a̧.

¹⁸Krist nɛ́ zu nɛ̀ dúk zu kiitɛ, ɓɛɛ kiitɛ‘i nɛ́ zuduk bíí. A̧ nɛ́ ku̧u̧naŋ-a, kaya-wi nɛ̀ kpasa tɛ́ fio wen ha̧ a̧ mɛ́ duk tɛ kuti fara tɛ mɔ lɛŋ;

¹⁹wen nɛ́ Sɔ̧'ɔ̧ kɔ̧ɔ̧ mɛ́ e ha̧ mɔ nɛ̀ a̧a̧ tɛ́ a̧ lɛŋ mɛ́ duk tɛ Krist.

²⁰Hegɔ, a̧ ɗafa mgbara a̧ in mɔ lɛŋ sɛn zaŋnu in yiwese mɛ̀ mbɛt nɛ̀ ɗoŋ Krist in wen Krist, tɛ dea-a n'aa dea ha̧ ga̧a̧mɔ mɛ́ hɔ wen zu tɔk-tɛ Krist zu te-diŋa.

²¹Ɛ́nɛ́ mbɛt, nɛti ɛ́nɛ́ yaa so nɛ́ o gɛnɛ; o ɗaŋ deemɔ k’ɛ́nɛ́ usi so nɛ́ zɔm ɗaŋ k’ɛ́nɛ́ sitɛ a̧.

²²Ɓɛɛ kinii, Sɔ̧ ɗafa mɔ mgbara'nɛ́ in a̧ tɛ kiitɛ Bem kɔ̧-a̧ nɛ̀ fea wen h’ɛ́nɛ́ mɛ́ hɔ ti a̧ nɛ̀ sa̧a̧-a̧, nɛ̀ ŋma ɗaŋmɔ kóó ŋma wen tikiɗi bó zu'nɛ́ na.

²³Mɔ kpɔk, ɛ̀nɛ̀ dúk tɛ yuwar kɔ̧ɔ̧ɗɔɔwen k’ɛ́nɛ́, h’ɛ́nɛ́ mɛ́ yor nɛ̀ ŋgaya-a in nɛ̀ nɔa-a, wen k’ɛ́nɛ́ tɛɛ a̧r tɛ mɔ n’ɛnɛ e nɛ̀ ta zaŋ De Mbe Wen n’ɛnɛ zia'i. Wa tɔ̧ɔ̧ De Mbe Wen'i ha̧ bíí lɛŋ ɗɔɔ yiwese’ɛ, ɓɛɛ mi Paul ye tɛ dee tom-aa.

²⁴Kinii mi kpa nɛ́ desee zu bɔnɛ n'am zɔk wen'nɛ́. Nɛ́ oi bɔnɛ ko Krist nɛ̀ ɓɔna a̧‘m zɔk tɛ́ murtɛ‘m wen zu kiitɛ-a nɛ̀ dúk nɛ́ zuduk bíí kɔ̧-a̧.

²⁵Mi yee tɛ dee tom-aa; nɛ́ Sɔ̧'ɔ̧ ha̧a̧ tom'i ha̧‘m mɛ́ de wen zu'nɛ́. Tom'i nɛ́ tɔ̧ɔ̧ wen ko Sɔ̧ h’ɛ́nɛ́ hegɔ hɔ sɔŋkur-aa.

²⁶Ɓɛɛ wen'i nɛ́ ɗukamɔ ko Sɔ̧ nɛ̀ duka so nɛ̀ hu̧sa̧-a̧ tɛnɛ ɓeemɛ, á̧ à̧ usa ha̧ o sa̧a̧-bíí kɔ̧-a̧ kinii.

²⁷A̧ kɔ̧ɔ̧ so ha̧ o sa̧a̧-bíí mɛ́ iŋ demɔ in gasamɔ nɛ̀ duk tɛ ɗukamɔ‘i sɛn mgbara o gɔni-dùk: mɔ‘i nɛ́ Krist nɛ̀ duk mgbara'nɛ́, n’ɛnɛ e nɛ̀ ta wen kpaa gasamɔ.

²⁸Nɛ́ wen kɔ̧-a̧ ɛ̀ɛ̀ tɔ̧ mbaŋ nɛ̀ tɛ́ o ndé lɛŋ, usi nɛ̀ mɔ ha̧ o ndé nɛ̀ iŋa-mgbara-mɔ wen ha̧ o ndé mɛ́ duk nɛ́ bíí nɛ̀ bó nɛ̀ ɗaŋmɔ na nɛ̀ ɗoŋ Krist.

²⁹Gba̧a̧ tom kɔ‘m'i nɛ́ mɔ‘i, ɓɛɛ nɛ́ ŋgai kɔ̧-a̧ nɛ̀ de tom tɛ‘m'i a̧ de ha̧‘m mɛ́ bi biro nɛ̀ ŋgaya-a.