Read Northwest Gbaya 1 TESALONIK 2 Bible Online

1 TESALONIK 2 - Northwest Gbaya bible

1 TESALONIK 2

¹O nya'm, ɛ́nɛ́ nɛ̀ tɛ‘nɛ́ iŋa nɛ̀ de-a'e, bó nɛ́ ɛ́nɛ́ kpɛka yɛ sɔɔ géè na.

²Nɛ̀ bɔnɛ n’ɛ̀ɛ̀ zɔka so saaye Filipii ɓɛɛ o bíí da̧ nɛ̀ ɛ́ɛ́ mbɛt'i, ɛ́nɛ́ iŋa'e Sɔ̧ k’ɛ́ɛ́ ha̧a̧ nɔɔ-ŋgiɗi h’ɛ́ɛ́ mɛ́ tɔ̧ De Mbe Wen kɔ̧-a̧ h’ɛ́nɛ́ zaŋ dora yɛ ko bíí nɛ̀ ŋgaya-a'i mbɛt.

³Bó nɛ́ ɛ́ɛ́ tɔ̧ wen ko Sɔ̧ tɛ̀ yɔɔ-kaya, ndak nɛ̀ ɗoŋ ndiŋmɔ, in dee mɔɔ-gɔn-ta na.

⁴Sɔ̧ wee yɛ sɛka e tom De Mbe Wen er yɛ, nɛ́ hegɔ s’ɛ́ɛ́ tɔ̧ wen'i; bó nɛ́ ɛ́ɛ́ kíí mɛ́ de tɛ bíí na, ɓɛɛ ɛ́ɛ́ kíí mɛ́ de tɛ́ Sɔ̧ nɛ̀ we see yɛ.

⁵Tɛ́ mɔ‘i ɛ́ɛ́ tɔ̧ yɔka-wen-ɔr-bíí na ndó-ndó-ndó; ɛ́nɛ́ iŋa hegɔ mbɛt. Taamɔ k’ɛ́ɛ́ bó nɛ́ wen kpaa mɔ na; Sɔ̧ nɛ́ wi-sedaako.

⁶Ɛ́ɛ́ kii ha̧ o bíí mɛ́ zɔn yɛ na ndó-ndó-ndó, kóó sɛn tɛ k’ɛ́nɛ́, kóó tɛ ko o ŋma bíí na mbɛt.

⁷Ɛ́ɛ́ nyɛma so mɛ́ duk zu'nɛ́ wen ɛ́ɛ́ nɛ́ o betom ko Krist, ɓɛɛ ɛ́ɛ́ de hegɔ na; ɛ́ɛ́ duka so mgbara'nɛ́ nɛ̀ ga̧a̧-see, hee nàá-wan-bem nɛ̀ ba bem e yí-see pi̧ nɛ̀ bere nú-a’ɛ ga.

⁸Ɛ́ɛ́ kɔ̧ɔ̧ so'nɛ́ nyɛmna, ɓɛɛ ɛ́ɛ́ yaa so dɔ̧́ɔ̧́ mɛ́ tɔ̧ De Mbe Wen ko Sɔ̧ h’ɛ́nɛ́, kóó fea-a wen zu'nɛ́ mbɛt, wen ɛ́nɛ́ baa so see yɛ nyɛmna.

⁹O nya'm, ɛ́nɛ́ iŋa bɔnɛ in mbɔia-a k’ɛ́ɛ́; ɛ́ɛ́ tɔ̧ɔ̧ De Mbe Wen ko Sɔ̧ h’ɛ́nɛ́, de nɛ̀ tom zɛ nɛ̀ wese wen k’ɛ́ɛ́ tɛɛ duk hee tui ga zu ŋma bíí mgbara'nɛ́.

¹⁰Ɛ́nɛ́ o wi nɛ̀ kɔ̧ɔ̧ ɗɔaa nɛ́ o wi-sedaako, Sɔ̧ mbɛt; tɛ duka-a n’ɛ̀ɛ̀ duka in'nɛ̀ɛ́ nɛ̀ sa̧a̧-a̧, de nɛ̀ mɔ nɛ̀ yuwar-a, ŋma wen bó zu yɛ na.

¹¹Ɛ́nɛ́ iŋa mbɛt'e, ɛ́ɛ́ dee mɔ in'nɛ̀ɛ́ kpɔk kpɔk hee mɔ'ɔ nɛ̀ dáà de in o bem kɔ‘i ga.

¹²Ɛ́ɛ́ tɔ̧ɔ̧ mbɔrɔ ha̧ nɛ̀ nɔɔ-ŋgiɗi h’ɛ́nɛ́, yor nɛnɛ ɗoŋ‘nɛ́ nɛ̀ ŋgaya-a ha̧ yuwar deemɔ k’ɛ́nɛ́ mɛ́ nyɛm yí Sɔ̧ nɛ̀ sa'nɛ́ mɛ́ ye zaŋ Wan in gasamɔ kɔ̧-a̧.

¹³Mɛ̀ nɛ́ hegɔ, war k’ɛ́ɛ́, ɛ́ɛ́ de nɛ́ osoko ha̧ Sɔ̧ ɓɔnsɛnɛ. Ŋgimbi n’ɛnɛ zia nɛ̀ wen ko Sɔ̧ n’ɛ̀ɛ̀ duka so tɔ̧ h’ɛ́nɛ́, ɛ́nɛ́ kpɛka wen'i, bó nɛ́ hee wen ko bíí ga na, ɓɛɛ hee wen ko Sɔ̧ ga; ɓɛɛ nɛ́ wen ko Sɔ̧ nɛ̀ mbetɛ nɛ̀ de nɛ́ tom tɛ‘nɛ́, o wi nɛ̀ kɔ̧ɔ̧ ɗɔaa.

¹⁴Hegɔ mbɛt, o nya'm, kpɔk mɔ nɛ̀ hɔɔ zu o zuduk bíí ko Sɔ̧ nɛ̀ a̧a̧ Judee nɛ̀ duk tɛ Jesu Krist hɔɔ zu'nɛ́ mbɛt, wen ɛ́nɛ́ zɔka bɔnɛ er be-ye k’ɛ́nɛ́ hee mɔ'ɔ nɛ̀ o Juif dee so in wa ga.

¹⁵Nɛ́ o Juif a̧ gbɛɛ Gasa Wan Jesu in o wi-tɔ̧-wen oi nú Sɔ̧, nɛ́ mɔ'ɔ nɛ̀ wa usa bɔnɛ h’ɛ́ɛ́ mbɛt; wa de tɛ́ Sɔ̧ na, wa nɛ́ o wi-sɛn-bíí lɛŋ.

¹⁶Wa dor nɛ́ ɛ́ɛ́ mɛ tɔ̧ wen ko Sɔ̧ ha̧ o gɔni-dùk k’ɛ́ɛ́ kpasi wa; ɗaŋmɔ nɛ̀ wa dee tɛnɛ ŋgimbi lɛŋ‘i nyɛma hegɔ kaɗi, ɓɛɛ nyimsea ko Sɔ̧ tik zu wa nɛ̀ sɔŋkur-aa.

¹⁷O nya-ɛɛ, ŋgimbi yaka benaŋ n’ɛ̀ɛ̀ zɔk ŋmaa na, ɓɛɛ ɛ́ɛ́ ta nɛ́ mɔ wen ŋmaa. Ɛ́ɛ́ kia so yuwar batɛ mɛ́ nɛ̀ɛ́ zɔk'nɛ́, wen wɔ zɔka'nɛ́ gbɛ nɛ́ ɛ́ɛ́ nyɛmna.

¹⁸Ɛ́ɛ́ kɔ̧ɔ̧ so mɛ́ si ɗoŋ tɛ‘nɛ́. Mi Paul nɛ̀ tɛ‘m kɔ̧ɔ̧ so hegɔ war nɛ̀ dɔka-a, ɓɛɛ nɛ́ Satan a̧ kpee yuwar-a.

¹⁹Ɛ́ɛ́ tɛ́ e tɛ-ɛɛ nɛ̀ o? Desee k’ɛ́ɛ́ nɛ́ o? Laasɔ̧i̧-wan n’ɛ̀ɛ̀ tɛ́ duk nɛ̀ tɛ yɛ sɛn ti Gasa Wan k’ɛ́ɛ́ Jesu, ŋgimbi n'aa tɛ́ pii nɛ̀ ɗoŋ, kà nɛ́ bòò nɛ́ ɛ́nɛ́ na, nɛ́ o?

²⁰Nɛ̀ mbetɛ, nɛ́ ɛ́nɛ́ a̧ dúk nɛ́ ga̧samɔ in desee k’ɛ́ɛ́.