Read Northwest Gbaya JOSUE 10 Bible Online

JOSUE 10 - Northwest Gbaya bible

JOSUE 10

¹Adonisedɛk wannu Jerusalɛm zia'e, Josue baa Ai ɓɛɛ ɗaŋ a̧ lɛŋ, gbɛ wannu e sɛnɛ hee mɔ'ɔ n'aa dee so nɛnɛ in Jeriko ká bá nɛ̀ wannu kɔ‘i ga. A̧ zia mbɛt'e o be Gabaɔŋ nɔɔ tɔk in Israɛl, ɓɛɛ wa ɔ kpɔk.

²Kíì dee a̧ batɛ wen Gabaɔŋ duka so nɛ gasa ye hee ŋma ye-wan ga, nɛ̀ gana Ai; bíí saaye lɛŋ nɛ o ŋgaŋa wi-biro.

³Adonisedɛk wannu Jerusalɛm toma tɔ̧ ha̧ Hoham wannu Hebrɔŋ, ha̧ Piream wannu Yarmut, ha̧ Jafia wannu Lakis in ha̧ Debir wannu Eglɔŋ nde,

⁴wa a̧ gár tɛnɛ pii tɛ-wi, wa a̧ gbák wi mɛ bi Gabaɔŋ wen n'aa nɔɔ tɔk in Josue ká bá nɛ̀ o be Israɛl.

⁵Nɛ mɔ'ɔ nɛ o wannu Amɔr mɔɔrɔ, wannu Jerusalɛm, wannu Hebrɔŋ, wannu Yarmut, wannu Lakis in wannu Eglɔŋ, ee nú kpɔk mɛ yak in o wi-biro kɔ-wa lɛŋ mɛ bi Gabaɔŋ. Wa kɛra ye'i mɛ bi,

⁶ɓɛɛ o be Gabaɔŋ tom ha̧ Josue kɔ̧ gbagari sɛn Gilgal'e: «K’ɛ́nɛ́ e o wi-de-tom k’ɛ́nɛ́ duk na. Ɛ̀nɛ̀ tɛ́ nɛ haya-a pii tɛ yɛ mɛ kpasi yɛ in mɛ gbak yɛ, wen o wannu Amɔr lɛŋ nɛ ɔ zu kaya mɔi̧a ŋmaa mɛ bi yɛ.»

⁷Nɛ mɔ'ɔ nɛ Josue in o gii wi-biro ká bá nɛ̀ o ŋgaŋa wi-biro kɔ̧-a̧ lɛŋ daŋa nɛ̀ Gilgal.

⁸GASA WAN tɔ̧ɔ̧ ha̧ Josue: «Ká mɛ́ yu wi nɔ‘i na, wen mi aa wa kɔ̧ er-mɛ kaɗi, ŋma kpɔk mgbara wa nɛ tɛ yor ti mɛ bo na.»

⁹Josue daŋa nɛ Gilgal nɛ zɛ nɛ zɛ, a̧ kpàŋá wa nɛ biro.

¹⁰GASA WAN dee ha̧ o wannu nɔ‘i mɛ yu mɔ ti Israɛl; a̧ usa gasa bɔnɛ ha̧ wa sɛn Gabaɔŋ; a̧ bìí wa daŋnɛ si Bɛt-Hɔrɔŋ hɔ Azɛka in Makeda.

¹¹Hee mɔ'ɔ nɛ wa yu nɛ mɔ ti Israɛl zir nɛnɛ nɛ Bɛt-Hɔrɔŋ ga, GASA WAN dee ha̧ ŋma gasa kóró-ɓɔrɔ mɛ tik zu wa hegɔɔ hɔ Azɛka. Bíí nɛ fea tɛ kóró-ɓɔrɔ‘i gana wan nɛ o be Israɛl gbɛɛ nɛ gba-paa.

¹²Mɛ̀ nɛ́ wese'i a̧ GASA WAN ee nɛ o be Amɔr kɔ̧ er o be Israɛl. Kpɔk wese'i, Josue tɔ̧ɔ̧ wen in GASA WAN ti o be Israɛl lɛŋ, a̧ tɔ̧a̧: «Wese, mɛ̀ yór zu Gabaɔŋ, ɓɛɛ kɔ-mɛ nyaŋa-zɛ, mɛ̀ yór kɔ-mɛ kɔ̧ ɗɔŋgɔ Ayalɔŋ!»

¹³Wese in nyaŋa-zɛ yora hɔ ŋgimbi nɛ dukbíí kifa er ha̧ o wisɛn kɔ‘i. Mɔ‘i yɔra zaŋ Kalata ko Wi-de-mɔ nɛ yuwar-a. Wese yora sɛn see yiwese, ɓɛɛ ye nɛ haya-a na hee zɛ kpɔk ga.

¹⁴Kóó nɛti, kóó nɛ ɗoŋ mbɛt, ŋma wese nɛ nyɛma ŋmaa in wese'i nɛ GASA WAN mboo nɛ̀ zu ha̧ bíí hegɔ bo na, wen GASA WAN dee biro zu Israɛl wese'i.

¹⁵Ɗoŋ mɔ‘i, Josue in o be Israɛl lɛŋ sii ɗoŋ kɔ̧ gbagari kɔ‘i sɛn Gilgal.

¹⁶O wannu nɔ‘i mɔɔrɔ‘i yuu so mɔ, ɓɛɛ hu̧si kɔ̧ di̧i̧ sɛn Makeda.

¹⁷Wa tɛɛ tɔ̧ ha̧ Josue ndé, wa kpaa wannu nɔ‘i mɔɔrɔ‘i fara hu̧sa̧-a̧ kɔ̧ di̧i̧ sɛn Makeda.

¹⁸Josue tɔ̧ɔ̧ ha̧ wa: «Ɛ̀nɛ̀ kín o gasa ta kpe nɛ nú di̧i̧‘i, ɓɛɛ ɛ̀nɛ̀ á o ŋma bíí nú a̧ mɛ pɛm mɔ.

¹⁹Ɓɛɛ k’ɛ́nɛ́, k’ɛ́nɛ́ yor na, ɛ̀nɛ̀ ndák ɗoŋ o wisɛn k’ɛ́nɛ́, ɛ̀nɛ̀ gɔ́n nú wa, ɓɛɛ k’ɛ́nɛ́ e ha̧ wa mɛ ye saaye kɔ-wa na, wen GASA WAN Sɔ̧ k’ɛ́nɛ́ ee wa kɔ̧ er'nɛ́.»

²⁰Ŋgimbi nɛ Josue in o be Israɛl kaɗa gbɛɛ wa, o ŋma kpɔk kpɔk yuu mɔ yak, ɓɛɛ hɔ saaye kɔ-wa nɛ wa mboo garo zik nɛnɛ.

²¹O bíí pia ɗoŋ nɛ de-a lɛŋ pii kɔ̧ gbagari katɛ Josue sɛn Makeda. Ŋma bíí tɛ nù‘i hu̧i̧ nú sitɛ o be Israɛl ɓɔna.

²²Ɓɛɛ Josue tɔ̧: «Ɛ̀nɛ̀ hú̧í̧ nú di̧i̧, ɓɛɛ ɛ̀nɛ̀ káí o wannu nɔ‘i mɔɔrɔ‘i gbonɛ ha̧‘m.»

²³Wa dee hegɔ, ɓɛɛ wa kai o wannu nɔ‘i mɔɔrɔ‘i gbonɛ nɛ kɔ̧ di̧i̧: mɛ̀ nɛ́ wannu Jerusalɛm, wannu Hebrɔŋ, wannu Yarmut, wannu Lakis in wannu Eglɔŋ.

²⁴Ɗoŋ nɛ wa kaia o wannu nɔ‘i tɛnɛ ha̧ a̧ kaɗi, a̧ saa o be Israɛl lɛŋ, ɓɛɛ a̧ tɔ̧ ha̧ o gasa wi-duk-zu o wi-biro nɛ nɛɛ in a̧: «Ɛ̀nɛ̀ tɛ́, ɛ̀nɛ̀ é naŋ‘nɛ́ ger o wannu nɔ'ɔ.» Wa ee naŋ-wa ger-wa.

²⁵Josue tɔ̧ɔ̧ ha̧ wa woyo: «K’ɛ́nɛ́ de kíì na, ká tɛ‘nɛ́ nak na, ɛ̀nɛ̀ nɔ́ ŋgiɗi, ɛ̀nɛ̀ yór nɛ nɔa-a wen nɛ́ hegɔ a̧ GASA WAN tɛ de in o wisɛn k’ɛ́nɛ́ n’ɛnɛ tɛ bi.»

²⁶Ɗoŋ mɔ‘i, Josue gusa o wannu nɔ‘i, a̧ gbɛɛ wa, ɓɛɛ a̧ ga̧i̧ wa tɛ te mɔɔrɔ. A̧ ee wa hi̧i̧ hɔ ga̧a̧mɔ.

²⁷Ŋgimbi yee-wese, Josue ha̧a̧ nú ha̧ wa mɛ zir o wɔr tɛ te in ha̧ wa mɛ a wa kɔ̧ di̧i̧, fara nɛ wa hu̧sa̧ so sɛnɛ. Wa aa gasa ta nú di̧i̧‘i. Ta nɔ‘i a̧ ya hɔ sɔsɔɔ‘i.

²⁸Kale kpɔk wese'i, Josue baa Makeda, ɓɛɛ a̧ gbɛ o bíí saaye lɛŋ in wannu nɛ gba-paa. A̧ kuma wa in o bíí lɛŋ; a̧ e ŋma bíí kóó kpɔk kpasa na. A̧ dee mɔ in wannu Makeda hee mɔ'ɔ n'aa dee so nɛnɛ in wannu Jeriko ga.

²⁹Josue in o be Israɛl lɛŋ kura Makeda yak si Libna, ɓɛɛ wa ba zu duk nɛ̀ Libna.

³⁰GASA WAN ha̧a̧ Libna in wan kɔ̧-a̧ ha̧ Israɛl mɛ gbɛ a̧ nɛ gba-paa in o bíí lɛŋ nɛ a̧a̧ hi̧i̧; a̧ e ŋma bíí kóó kpɔk kpasa na. A̧ dee mɔ in wan kɔ̧-a̧ hee mɔ'ɔ n'aa dee so nɛnɛ in wannu Jeriko ga.

³¹Josue in o be Israɛl kura Libna, ɓɛɛ yak si Lakis; a̧ kɛra Lakis e nù, ɓɛɛ a̧ bi a̧.

³²GASA WAN ee Lakis kɔ̧ er o be Israɛl, ɓɛɛ o be Israɛl ba a̧ tɛ yiitoo zɛ. Wa gbɛɛ o bíí saaye lɛŋ nɛ gba-paa, hee mɔ'ɔ nɛ wa dee so nɛnɛ in Libna ga.

³³Nɛ mɔ'ɔ nɛ Horam, wannu Gezɛr daŋa mɛ gbak Lakis, ɓɛɛ Josue gbɛ a̧ in o bíí kɔ̧-a̧; a̧ e ŋma bíí kóó kpɔk kpasa na.

³⁴Josue in o be Israɛl lɛŋ kura sɛn Lakis si Eglɔŋ. Wa nɛɛ kɛr Eglɔŋ e nù, ɓɛɛ wa bi a̧.

³⁵Mɛ nɛ kpɔk kale wese'i a̧ wa baa nɛ ye'i, ɓɛɛ wa gbɛ o bíí saaye in mɔ nɛ duk kpasa lɛŋ nɛ gba-paa. Wa kuma o bíí ye'i lɛŋ hee mɔ'ɔ nɛ wa dee so nɛnɛ sɛn Lakis ga.

³⁶Josue in o be Israɛl daŋa nɛ̀ Eglɔŋ si Hebrɔŋ, ɓɛɛ wa ba biro duk nɛ̀ Hebrɔŋ.

³⁷Wa baa ye'i ɓɛɛ wa gbɛ wanye in o bíí kɔ̧-a̧ nɛ gba-paa; wa baa o be ye nɛ yaa zik a̧, ɓɛɛ wa gbɛ o wi-saaye nɔ‘i mbɛt; wa e ŋma bíí kpɔk kpasa na, kànà hee mɔ'ɔ nɛ wa dee so nɛnɛ in Eglɔŋ ga. Wa kuma mɔ in o bíí nɛ a̧a̧ so hi̧i̧ lɛŋ.

³⁸Josue in o be Israɛl lɛŋ zika tɛ, ɓɛɛ ba zu duk nɛ̀ Debir.

³⁹A̧ baa ye in wan kɔ̧-a̧ in o be geɗek ye kɔ̧-a̧, ɓɛɛ a̧ gbɛ wa nɛ gba-paa. A̧ kuma o bíí nɛ ya saaye'i lɛŋ. Ŋma bíí kpɔk nɛ ɓɔna kpasa bo na. A̧ dee mɔ nɛ Debir in wan kɔ‘i hee mɔ n'aa dee so nɛnɛ in Hebrɔŋ in wan kɔ‘i, ká bá nɛ̀ Libna in wan kɔ‘i ga mbɛt.

⁴⁰Josue bìí nù‘i lɛŋ: o wi zu kaya, o wi ŋga-gbárà, o wi bɔkɔ-nù, o wi ká̧ naŋ kaya in o wannu kɔ-wa lɛŋ, a̧ e bíí kpɔk kpasa na. A̧ kuma mɔ nɛ ɔm ɔm lɛŋ hee mɔ'ɔ nɛ GASA WAN Sɔ̧ ko Israɛl tɔ̧ɔ̧ so ga.

⁴¹Mɛ̀ nɛ́ hegɔ a̧ Josue baa nɛ zika-nù lɛŋ, ku̧u̧naŋ-a nɛ Kadɛs-Barnɛa hɔ Gaza, in zika-nú Gɔsɛn lɛŋ hɔ Gabaɔŋ.

⁴²Josue bìì nú nɔ‘i in o wan kɔ-wa lɛŋ war kpɔk, wen GASA WAN Sɔ̧ ko Israɛl bìì so biro zu Israɛl.

⁴³Ɗoŋ mɔ‘i, Josue in o be Israɛl lɛŋ sii ɗoŋ si kɔ̧ gbagari sɛn Gilgal.