Read Northwest Gbaya JOSUE 11 Bible Online

JOSUE 11 - Northwest Gbaya bible

JOSUE 11

¹Ŋgimbi nɛ Yabin wannu Asɔr zia nyɛrɛ mɔɔ nɔ‘i, a̧ toma o betom ha̧ Yobab wannu Madɔŋ, ha̧ wannu Simrɔŋ, ha̧ wannu Aksaf,

²ha̧ o wannu nɛ ɔ mgbara kaya nɛ war ká̧-zan-mɛ́-ŋgɔn, o wan nɛ ɔ ká̧ zaŋ Jurdɛn nɛ ɗoŋ Tɔp Kinarot nɛ war ɗɔɔ, ha̧ o wan mɛ hira-nù, ká bá nɛ̀ o wan mɛ ká̧ naŋ kaya Dɔr nɛ war yee-wese.

³A̧ toma ha̧ o be Kanaŋ nɛ a̧a̧ so nɛ war daŋa-wese in yee-wese, o be Amɔr, o be Hit, o be Periz, in o be Jebus sɛn zu kaya, ká bá nɛ̀ o be Hiv ká̧ naŋ kaya Hɛrmɔŋ nù Mispa mbɛt.

⁴Nɛ mɔ'ɔ nɛ wa tɛɛ in o wi-biro kɔ-wa lɛŋ. Wa yaa so nɛ o bíí nɛ dɔka-a hee nyɛmɛ ɗɔɔ Gba-tɔp ga, wa in o dɔka nyaŋa, in o keekee-nyaŋa mbɛt.

⁵O wannu nɔ‘i lɛŋ ee zu-a mɛ kpa ŋmaa, ɓɛɛ wa tɛɛ ba gbagari ká̧ yí Mɛrɔm wen bíí biro in Israɛl.

⁶GASA WAN tɔ̧ɔ̧ ha̧ Josue: «Ká mɛ yu wa na, wen mɔɔsa̧ hee ŋgimbi kinii ga, mi tɛ e wa lɛŋ nɛ wɔr kɔ̧ er o be Israɛl. Mɛ tɛ ɓir ɗaɗi naŋ nyaŋa kɔ-wa, ɓɛɛ mɛ pi̧i̧ wee tɛ keekee-nyaŋa kɔ-wa mbɛt.»

⁷Josue in o wi-biro kɔ‘i kpàŋá wa nɛ biro sɛn ká̧ yí Mɛrɔm.

⁸GASA WAN ee wa kɔ̧ er o be Israɛl. Wa kuma wa, ndak wa hɔ sɛn gasa ye Sidɔŋ in sɛn Misrefot-Maim hɔ kɔ̧ ɗɔŋgɔ Mispɛ nɛ war daŋa-wese; o be Israɛl kuma wa lɛŋ, bíí kpɔk ɓɔn kpasa na.

⁹Josue dee mɔ in wa hee mɔ'ɔ nɛ GASA WAN tɔ̧ɔ̧ so ha̧ a̧ ga. A̧ ɓira ɗaɗi naŋ o nyaŋa kɔ-wa ɓɛɛ a̧ pi̧ wee tɛ o keekee-nyaŋa kɔ-wa mbɛt.

¹⁰Ɗoŋ pia-a ko Josue sɛn tɛ kpɔk ŋgimbi'i, a̧ baa Asɔr, ɓɛɛ a̧ gbɛ wannu kɔ̧-a̧ nɛ gba-paa wen Asɔr duka so nɛti nɛ́ gasa ye sɛn tɛ nù‘i.

¹¹Wa gbɛɛ o bíí lɛŋ sɛn saaye'i nɛ gba-paa; wa kuma wa lɛŋ, wa e ŋma mɔ kpɔk kpasa na, ɓɛɛ wa dɔ ye kɔ-wa a nù.

¹²Josue baa ye ko o wannu nɔ‘i nɛ mɔi̧a so ŋmaa'i, a̧ kaia o wanye mbɛt, a̧ gbɛɛ wa nɛ gba-paa; a̧ kuma wa lɛŋ hee mɔ'ɔ nɛ Moisɛ wi-de-tom ko GASA WAN tɔ̧ɔ̧ so ga.

¹³Ɓɛɛ o be Israɛl dɔ ŋma ye kóó kpɔk nɛ a̧a̧ mgbara kaya na; kànà nɛ́ Asɔr a̧ Josue dɔɔ kpɔk ɓɛɛ.

¹⁴O be Israɛl kaia o mbɔi in o mɔ-dai sɛn saaye'i; mɔ kpɔk, wa gbɛɛ o bíí lɛŋ nɛ gba-paa, wa e ŋma bíí kóó kpɔk kpasa na, wa kuma wa lɛŋ.

¹⁵O heembea nɛ GASA WAN ha̧a̧ so ha̧ Moisɛ wi-de-tom kɔ̧-a̧, Moisɛ ha̧a̧ so kànà ha̧ Josue lɛŋ, ɓɛɛ Josue de mɔ nyɛm nɛ ɗoŋ-aa, a̧ e ŋma mɔ nɛ GASA WAN tɔ̧ɔ̧ so ha̧ Moisɛ duk na.

¹⁶Hegɔ Josue baa nù‘i nɛ oi-aa lɛŋ. A̧ baa zu kaya, nù Nɛgɛb, nú Gɔsɛn lɛŋ, hira-nù, ká̧ zaŋ Jurdɛn, o kaya Israɛl in nù mɛ ká̧ naŋ-a.

¹⁷A̧ baa nù ku̧u̧naŋ-a nɛ zu kaya Halak nɛ yor si war Sɛir hɔ sɛn Bal-Gat, sɛn kɔ̧ ɗɔŋgɔ Libaŋ ɗɔɔ kaya Hɛrmɔŋ. A̧ kaia o wannu kɔ-wa, ɓɛɛ a̧ kum wa lɛŋ.

¹⁸Ɗoŋ biro nɛ Josue bìí nɛ o wannu nɔ‘i nyɛi̧a.

¹⁹Ŋma ye nɛ ga̧a̧mɔ duka mgbara a̧ in o be Israɛl bo na, kànà nɛ́ o be Hiv nɛ ɔ Gabaɔŋ ɓɛɛ. Wa kaia o dɔka-a lɛŋ nɛ ŋgai-biro.

²⁰Mɔ nɛ GASA WAN kɔ̧ɔ̧ so, nɛ́ ha̧ see o bíí mɛ ŋgai wen bíí biro in o be Israɛl, ha̧ o be Israɛl mɛ gbɛ wa, kum nɛ wa lɛŋ hee mɔ'ɔ nɛ GASA WAN tɔ̧ɔ̧ so ha̧ Moisɛ ga.

²¹Ŋgimbi'i, Josue daŋa, ɓɛɛ kum o be Anak nɛ ɔ zu kaya, nɛ ɔ sɛn Hebrɔŋ, sɛn Debir, sɛn Anab, sɛn mgbara kaya Juda in Israɛl lɛŋ. Josue kuma wa, ɓɛɛ ɗaŋ o ye kɔ-wa lɛŋ.

²²Ŋma be Anak ɓɔn sɛn nù ko o be Israɛl na, kànà nɛ́ sɛn Gaza, sɛn Gat in sɛn Asdod.

²³Josue baa nù‘i lɛŋ hee mɔ'ɔ nɛ GASA WAN tɔ̧ɔ̧ so ha̧ Moisɛ ga. A̧ kɛ̧ɛ̧ nɛ̀ mɔɔ-oi ha̧ o be Israɛl dam nɛ ɗoŋ zuduk-wa lɛŋ. Ɓɛɛ nù ɔm tɛ tɛ biro.